John 5

Jisas Ndi, Kui Pitim Wu Ti Etpa Titim

Got ndi, Jura wamp etpa titim ei nga, kor muⱡing ui nila, Jisas Jerusalem kona ila purum. Jerusalem ku paⱡa petᵾm ei nga, sipsip keta puⱡ puⱡ nᵾtmin ᵾldᵾ orunga, nu num ti morum. Ei, Ipru ik ila mbi tek, ‘Betseita,’ nᵾtmin. Kona ila, kᵾpkᵾ tᵾk mormᵾn manga 5 kat ᵾnggᵾtᵾm. Ni kᵾn, kui wamp minal kui ropa, mong tᵾpa, on por moⱡpa itim wamp nimbᵾ, nu num ei, pᵾnin nimba omba nᵾk, kᵾpkᵾ manga nimbila, nokundᵾk pek morung. [Nu num nila, ui mat kᵾn, Got nga anggelo ti ndi, mana omba, nu ni ropa orung orung elinga. Kui wamp ti ndi kandpa, kuimp tepa mana puⱡnga, namba kui ti pitim ndam, kui ei pora nitim.] Wote kona nila, kui rurum wu ti, pepa pana 38 tᵾpa mundrum. Jisas ndi, wu ni, pana ui mbᵾ nga ou ndupa, tepa mundrum ila kandpa, nimba mel, “Nim nga kui ei, wang nangga nᵾkᵾn pᵾn ei?” nitim.

Wote, kui wu ni ndi, punt ropa nimba mel, “Wu Nuim ye! Na tᵾk mek puk, num ila munding wamp ti mon. Nu pᵾnin nimba oⱡnga, mana mbi nimp et ei kᵾn, wamp ti ndi ku, kuimp tepa omba, mana purum,” nitim.

Wote Jisas ndi, wu ni kundpa nimba mel, “Nim oⱡa anggilkᵾn, nim nga rupⱡaima kᵾⱡ, tᵾkᵾn mekᵾn, nombuⱡa mam pi!” nitim. Ei mel nilinga, tᵾngᵾnda mint, wu ni nga kui ni pora nilinga, rupⱡaima ni kᵾⱡ, tᵾpa mepa purum. Mowi kor kᵾn uⱡ ei itim. 10 Ei nga, Jura wamp nimbᵾ ndi, kui wang nitim wu ni, kundᵾk nᵾk mel, “Mowi kor ei kᵾn, nim nga rupⱡaima kᵾⱡ, men uⱡ ei ndi, tᵾn nga Mi Ik petᵾm uⱡ ei, nim ndi, rokᵾn puⱡa ron ei ka!” nᵾtᵾng.

11 Wote, wu ni ndi, punt ropa, nimba mel, “Na etpa tᵾm wu ei ndi, ‘Na nga rupⱡaima kᵾⱡ tᵾkᵾn, mekᵾn pi nim wu ei mel’, tᵾp mep mbi ont!” nitim.

12 Wote, wu ni, waldᵾk nᵾk mel, “Nim rupⱡaima ei, tᵾkᵾn mekᵾn pi nim wu ei, ei nam?” nᵾtᵾng. 13 Kui wang nitim wu ni ndi, Jisas pilpa mbi ndui nᵾndrᵾm. Ei nambuⱡ emel, Jisas ni, wamp minal pitim nila, mo ropa omba, ekit mba purum. 14 Wote, manga wingti ou nila, Jisas murᵾk mba, wu ni kandpa, wote nimba mel, “Nim nga kui pora nim ei, kan mon! Nim uⱡ kit mat, aldpa iti nᵾti! Muna in ndam, uⱡ kit minal mat, nim kᵾn pemba,” nitim. 15 Wote, wu ni ndi, pilpa int mba, Jura wu nimbᵾ kundpa nimba mel, “Na etpa tᵾm wu ni nga mbi Jisas,” nitim.

16 Ni kᵾn, Jisas ndi, mowi kor kᵾn itim ei nga, Jura wu nimbᵾ ndi, ik mura nguimin nᵾtᵾng. 17 Wote Jisas ndi, punt ropa nimba mel, “Na nga Wuta kongun rᵾk rᵾk etpa mint morum. Ei nga, na kongun etᵾp ku mor,” nitim. 18 Jura wu nimbᵾ ndi, ik ni pilik, kit pilik, wu ei ndi, tᵾn nga mowi kor ei nga, mi ik ei, puⱡa ropa, Got kundpa Wuta nimba, elim Got mel ranᵾm wu ei, ropᵾn kundmun, nᵾtᵾng.

Got Nga Kangᵾm Ronduⱡ Tᵾpa Etᵾm

19 Wote Jisas ndi, ik punt ropa, nimba mel, “Enim ik kupa ei kundᵾp nᵾnt. Got kangᵾm ei ndi, elim nga numan ila, uⱡ ti etmba mel kapⱡa mon. Got kangᵾm ei, Tipam nga kitip kandpa kongun etᵾm. Tipam nga nambuⱡ ti etᵾm ei, kangᵾm etᵾm ku. 20 Got ndi, kangᵾm ei, numan ngumba. Wote, elim nga etᵾm uⱡ mbᵾ, tᵾpa ora ndurum. Akup uⱡ enim kanmin ei mel, uⱡ mbi pi minal mat, kangᵾm kᵾn etpa ora ndangga. Wote enim kandᵾk, min ngᵾn munding. 21 Got ndi, wamp kui mbᵾ, ropa rut ndupa, etpa kont mundrum. Ei mel ku, elim nga kangᵾm ei ndi, i ku etpa, wamp nam ti, elim nga numan ei ndi, pilim ei mel ku, etpa kont mundᵾmba. 22 Got ndi, wamp uⱡ eng ei mel kandpa, kᵾmp ti natᵾmba. Wamp kᵾmp ti uⱡ ei, kangᵾm itangga nimba, ambuⱡpa ngurum. 23 Ei nga, wamp mbᵾ ndi, Got tᵾk ou ndurmin ei mel, elim nga kangᵾm ei, i ku etᵾk, tᵾk ou ndeing nimba itim. Elim nga kangᵾm ei, tᵾpa ou ndui nandᵾm. Wote wamp ti, kangᵾm tᵾpa mundrum Tipam ei kep, tᵾpa ou ndui nandrᵾm ku.

24 Na ndi, ik kupa ei nᵾnt! Na nga ik ei, pilpa tᵾpa, wote na tᵾpa mundrum wu ei, mondpa pilim wamp ei, uⱡ nga kᵾnt nga kont mul uⱡ ei, tepa morum. Wamp ei nga uⱡ kit etᵾm mbᵾ, kᵾmp ti natᵾmba. Wamp ei ndi, wamp kui nga uⱡ ei, wak ropa, akup uⱡ nga kᵾnt nga kont mul uⱡ ei, moⱡmba ei nga morum. 25 Na ndi, ik kupa ei nᵾnt. Ui ti omba, ei mel akup onum. Wamp kui mbᵾ ndi, Got Kangᵾm ei nga, ik ei piling. Wote kum tek piling wamp mbᵾ, kont puk muⱡing. 26 Kont mul uⱡ ei, Got elim kᵾn puⱡ petᵾm. Ei mel ku, elim nga Kangᵾm ei, i ku etpa, ronduⱡ nguⱡnga, kont mul uⱡ ei nga puⱡ petᵾm ku. 27 Elim nga Kangᵾm ei ndi, wamp mbᵾ, kᵾmp tᵾmba ei nga ronduⱡ ei ngurum. Ei nambuⱡ emel, wu ei elim ndi, Muⱡᵾl Wu Kupa ei.

28 Ik nᵾnt ei pilik, min ngᵾn mundi nᵾmundᵾi! Nambuⱡ emel, ui ti om ei kᵾn, on kona ila petmin wamp mbᵾ, elim nga ik ei pilik, wote on kona ei, wak rok ekit uing. Uⱡ kai etᵾng wamp mbᵾ, kont puk muⱡing. Wote, uⱡ kit etᵾng wamp mbᵾ, etpa kit mondᵾmba. 30 Na ndi, nanim nga ronduⱡ ila, uⱡ ti kapⱡa iti nᵾtimp. Wamp kᵾmp timp uⱡ ei, Got ndi, nᵾtᵾm ei mel itimp. Ei nga, na nga wamp kᵾmp timp uⱡ ei, kun mba tetᵾm. Ei nambuⱡ emel, na nga numan ei ndi, uⱡ ti itimp nᵾmp iti natᵾnt mon. Na tᵾpa mundrum Wu ei nga numan ila, pep rop ent.

Wamp Mat Ndi, Jisas Nga Nᵾk Mot Ndurᵾng

31 Na ndi, na nanim nga orunga mint nᵾmp mot ndunt ndam, enim ndi pilangina, ik nᵾnt ei nga ronduⱡ ti, pi napᵾmba. 32 Wamp ti morum ei ndi, na nga nimba mot ndupa, ik kun mint ni nᵾndᵾtᵾm. Wote na pᵾnt ei, na nga nimba mot ndurum ik mbᵾ, kupa mint.

33 Enim ndi, nombuⱡa rung wu kat, Jon kᵾn tᵾk munduⱡngina, ik kupa ei nga, nimba mot ndurum. 34 Mᵾi kona wamp ti ndi, na nga ik ei kandᵾk, pilik nᵾnding mel mon. Na ik nᵾnt ei ndi, enim etpa tangga, nᵾmp nᵾnt. 35 Jon ni, lam mel, nomba rᵾⱡang puⱡnga, ui onunga ni kᵾn, enim Jon nga rᵾⱡang ila, molk ambulk palk morung.

36 Wote uⱡ ti, Jon ropa mana ndupa, na nga orunga nimba, mot ndupa nᵾtᵾm. Ei uⱡ elpa ti mel, Wuta ndi, na kongun ngurum et, ei nga kongun nit ei ndi, nimba mot ndupa, Wuta ndi, na tᵾpa mundrum. 37 Na tᵾpa mundrum Wuta ei ndi, na nga orunga nimba, mot ndurum ku. Wote, elim nga ik ei, enim ndi, pili napᵾtmᵾn. Elim morum ei kep, kᵾni nakᵾndᵾrmin ku. 38 Wote, elim nga ik ei, enim nga rukᵾr orunga ti natᵾtᵾm. Ei nambuⱡ emel, elim nga tᵾpa mundrum wu ei, enim ndi, mondᵾk pili napᵾtmin. 39 Enim ndi, uⱡ nga kᵾnt nga kont mul uⱡ ei, kandᵾk timin nᵾk, Buk Wingti kᵾⱡ, rᵾk rᵾk kandᵾrmin. Ei wote, Buk Wingti nga nᵾtᵾm ik puⱡ ei, na kᵾn petᵾm. 40 Wote, enim uⱡ nga kᵾnt nga kont mul uⱡ ei, kandᵾk ting ei nga, enim na kᵾn ui nawᵾrmᵾn, ei ka! 41 Na enim wamp mbᵾ nga mbi ou ngurmᵾn uⱡ ei, ti natᵾt mon. 42 Wote, enim nga mundmong ila, Got numan ngui nganggᵾk, mormᵾn uⱡ ei, na pilip mor. 43 Na Wuta nga ronduⱡ ila, omp ik nilmba. Enim ndi, ik ei, pilik ti natᵾtmᵾn. Wote wamp ti, elim nga ronduⱡ ila, omba ik nilinga ndam, ik ei, pilik tilingina. 44 Got ndi, kaip nᵾndangga, ni nandᵾk. Enim wamp mbᵾ ndi, kaip nindeing nᵾk etmin. Namba etᵾk, enim ndi, na mondᵾk piling. 45 Na ndi, enim nga puⱡ orunga, Wuta kᵾn nimp kit mundimp, nᵾk pili nᵾpilᵾi! Enim Moses ndi, uⱡ ti endᵾmba, nᵾk pilik mormᵾn. Wu ei ndi, enim nga puⱡ orunga nimba, kit mondᵾmba. 46 Moses nga ik ei, kupa nᵾk, pilingina ndam, na nga ik ei, pilik tilingina ku. Wu ei ndi, na nga ik ei, mon ropa pinditim. 47 Wote, ik mon rurum mbᵾ, mondᵾk pili napᵾtᵾng. Ei kᵾn wote, na nga ik ei, namba etᵾk, mondᵾk piling?” nitim.

Copyright information for `MED