John 6

Jisas Ndi, Wamp 5000 Rᵾng Itim

Wote, Jisas ni, num Galili noi orunga int purum. Num ei nga mbi ti kundᵾk, ‘Taipiriyus’, nᵾtᵾng. Wamp mam ti, Jisas purum mel, akil tek purung. Nambuⱡ emel, Jisas ndi, uⱡ rᵾpndi mat etpa, kui peng itim wamp mbᵾ, etpa titim kandrung. Wote, Jisas komnga ila oⱡa mba, elim nga kitip kᵾni wu ni kᵾⱡ kᵾn, rᵾp rok morung. Ui ni kᵾn, Jura wamp nga Pasopa, Rᵾng Ou Nuing ui ei, nondpa itim.

Jisas moⱡpa kᵾndrᵾm mel, wamp minal, elim pep rok, orung kandpa, wu Pilip kundpa nimba mel, “Rᵾng mat nant ila, kandᵾp tᵾpᵾn, ya wamp kᵾⱡ, rᵾng ruimin nda?” nitim. Ik ei, Pilip oⱡa tᵾpa, kanᵾmba pilpa nitim. Elim uⱡ etmba ei mel, pilpa pora ndupa murum. Wote Pilip ndi, ik punt ropa nimba mel, “Tᵾn ku moni K200 ei mel, rᵾng bret timin ndam, wamp mormᵾn mbᵾ ndi, rᵾng mint rok nuing mel, kapⱡa mon!” nitim. Kitip kᵾni wu ti, Saimon Pita nga ᵾngᵾn Andru ndi, nimba mel, “Kang ti, bret 5 kat kᵾn, oma raⱡ tepa morum ei ndi, wamp minal kᵾⱡ kᵾn, kapⱡa etmba nda?” nitim. 10 Ni kᵾn, Jisas ndi, kitip kᵾni wu kᵾⱡ, kundpa wamp mbᵾ, mana muⱡeing nᵾi, nitim. Kona kai titim nila, wamp nimbᵾ, mana morung ila, wu 5000 mel morung. 11 Wote Jisas ndi, bret ni tᵾpa ambuⱡpa, Got kᵾn angge nimba, puk ropa wamp morung nimbᵾ, neing nimba, ngurum. Wote, oma ni raⱡ i ku etpa, oⱡa tᵾpa angge nimba, gurpa wamp nimbᵾ, neing nimba, ngurum ku. Wamp nimbᵾ rᵾng noⱡᵾngina, pilᵾng elinga, mana titim. 12 Rᵾng noⱡᵾngina, mana titim nimbᵾ, Jisas ndi, kitip kᵾni wu ni kᵾⱡ, kundpa nimba mel, “Rᵾng nonmᵾn mbᵾ nga, mana tᵾnᵾm mbᵾ, tᵾk rᵾkᵾlᵾi! Rᵾng ti etᵾk, ge ndui nᵾndᵾi!” nitim. 13 Wote, bret 5 kᵾⱡ nga wamp mbᵾ ndi, noⱡᵾngina mana titim mbᵾ, tᵾk rakilingina, wal 12 peka rurum. 14 Ni kᵾn, uⱡ rᵾpndi Jisas ndi, itim ni, wamp mbᵾ ndi, kandᵾk nᵾk mel, “Painui wu ti, mᵾi kona ila mana omba nᵾtmin ni, omba morum kanmᵾn,” nᵾtᵾng. 15 Jisas ni, pitim mel, wamp mbᵾ ndi, ronduⱡ mundᵾk, elim tᵾk, wu nuim mumuk munding, elingina pilpa, komnga nila, elim kou kiyang nimba, int purum.

Jisas Nu Ndi, Pol Ila Kᵾmp Kambilpa Urum

16 Wote, epindama elinga, Jisas nga kitip kᵾni wu nimbᵾ, num ᵾldᵾ nila purung. 17 Puk, nu kanu nila rukrᵾng puk, num ei, puⱡa rok, Kaperniyum kona ila ping purung. Kona ni, rumbᵾⱡ roⱡnga, Jisas ni, ama ui nᵾwᵾrᵾm. 18 Ni kᵾn, kᵾpkᵾ ambuⱡpa pilpa roⱡnga, nu ni, ropa mbᵾ, nuwa kuⱡpa kara purum. 19 Wote, kitip kᵾni wu ni kᵾⱡ, num rᵾk ting ila puk, kandrung mel, Jisas ni, nu ndi, pol ila kᵾmp kambilpa, nondpa oⱡnga kandᵾk, mundmong etᵾng. 20 Wote Jisas ndi, kundpa nimba mel, “Mundmong iti nᵾtᵾi! Na ont ei ka!” nitim. 21 Kandᵾk kᵾn, numan wang nduk, Jisas ni, nu kanu ila, oⱡa wangga nᵾk, pilik moⱡᵾngina, wote tᵾngᵾnda mint, nu kanu ni kᵾⱡ, ping orung kona ila, mba rᵾk purum.

Wamp Mbᵾ Ndi, Jisas Andᵾk Kurᵾrᵾng.

22 Mᵾkᵾlmᵾ orunga, num noi orunga, morung wamp nimbᵾ ndi kandrung. Nu kanu tenda kat titim ni kᵾⱡ, ti nᵾtᵾtᵾm. Ni kᵾn, tᵾk mendᵾk pᵾtᵾng ei, kitip kᵾni wu ni kᵾⱡ mendpᵾⱡ, nu kanu ila purung. Wote Jisas ni, kunda pi naprᵾng. 23 Wᵾl Taipiriyus kona ila nga nu kanu mat, Jisas ndi, angge nimba, wamp rᵾng ngurum kona nila, nondpa orung. 24 Wote wamp nimbᵾ kandrung mel, Jisas kᵾn, elim nga kitip kᵾni wu ni kᵾⱡ pora, muⱡi nambᵾrᵾng. Nu kanu titim nimbila, ok rᵾk puk, Kaperniyum kona nila kurᵾk purung.

Jisas Ei Kont Mul Uⱡ Ei Nga Bret Ei

25 Wote, wamp nimbᵾ ndi, Jisas nu noi orunga, puk kandᵾk tᵾk, waldᵾk nᵾk mel, “Ik Mbo Wu ye! Nim nant kᵾn ya ila un?” nᵾtᵾng. 26 Wote, Jisas ndi, punt ropa, nimba mel, “Na ndi, ik kupa enim kundᵾp nᵾnt. Enim bret nok, pᵾlᵾng kundᵾk, eng ni nga mendpᵾⱡ, na kurᵾk onmᵾn. Wote, uⱡ rᵾpndi mat int nimbᵾ nga, enim tᵾk mindi namindᵾnmᵾn. 27 Rᵾng purpa moⱡmba mbᵾ nga, kongun iti nᵾtᵾi! Rᵾng kai uⱡ nga muⱡing ei nga, kongun indᵾi! Rᵾng ei, Muⱡᵾl Wu Kupa ei ndi, enim ngumba. Uⱡ ei, Got Tipam ndi, unt tip timal mundpa, Muⱡᵾl Wu Kupa ei kᵾn, etpa ronduⱡ mundpa pinditim,” nitim. 28 Wote, wamp mbᵾ ndi, Jisas waldᵾk, “Tᵾn namba uⱡ ti etpᵾn kᵾn nᵾk mel, Got nga kongun indᵾmin nda?” nᵾtᵾng. 29 Jisas ndi, punt ropa, nimba mel, “Enim kongun ti iting ei, Got elim ndi, tᵾpa mundrum wu ei, mondᵾk pilᵾi!” nitim. 30 Wamp mbᵾ ndi, ik punt rok, nᵾk mel, “Nim nambuⱡ ti rᵾpndi ronduⱡ ti, etana kandpᵾn, nim mondᵾp pilmin nda? Namba uⱡ ti itin pilkᵾn nᵾn nda? 31 Unt, tᵾn nga anda kouwᵾmin mbᵾ ndi, kona kui waka ila rᵾng ti, mbi tek, ‘mana,’ nᵾtmin ei norung. Buk Wingti ila nᵾtᵾm ei mel, ‘Muⱡ kona bret ei nga nguⱡnga norung,’” nᵾtᵾng. 32 Wote, Jisas ndi, punt ropa, nimba mel, “Na ndi, enim ik kupa ei kundᵾp nᵾnt. Moses ndi, enim muⱡ kona bret ei, tᵾpa ngui ngᵾnggrᵾm. Wote na nga Wuta ndi, enim muⱡ kona bret kupa ei, tᵾpa ngorum. 33 Got ndi, muⱡ kona bret ngurum ei ndi, ya mᵾi kona ila wamp mbᵾ, kont mul uⱡ ei ngorum,” nitim. 34 Wote, wamp nimbᵾ ndi, nᵾk mel, “Nuim ye! Nim ndi, bret ei nga, tᵾn rᵾk rᵾk ngui!” nᵾtᵾng. 35 Jisas ndi, wamp nimbᵾ, kundpa nimba mel, “Kont mul uⱡ ei nga bret, ei na! Wamp ti, na kᵾn om ndam, kump kun kuⱡi naⱡᵾmba. Na mondpa pilim wamp ei, nu waka kuⱡi naⱡᵾmba. 36 Wote na ndi, enim kundᵾp nit ni, na kanung, wote mondᵾk pili napᵾnmᵾn. 37 Wuta ndi, na ngurum wamp mbᵾ pora, na kᵾn uing. Wote, na kᵾn ong wamp mbᵾ, tᵾp mbuⱡ ngui ngᵾngimp. 38 Ei nambuⱡ emel, na muⱡ kona wak rop mana ur ei, nanim ndi, ui nᵾwᵾr. Wuta nga numan pᵾtᵾm uⱡ ei, pep rop itimp pilip ur. 39 Wuta ndi, numan ei mel pilpa, na tᵾpa mundrum. Na ngurum wamp mbᵾ nga ti, wak rui narup, wote ui pora nim kᵾn, wamp mbᵾ rop rut ndup, kont mul uⱡ ei nguimp. 40 Na nga Wuta ndi, uⱡ ti pᵾtᵾm ei, wamp namin mat ndi, kangᵾm ei kandᵾk, mondᵾk pᵾtᵾng wamp mbᵾ, uⱡ nga kᵾnt nga kont mul uⱡ ei ting. Wote, ui pora nim kᵾn, na ndi, wamp mbᵾ rop rut ndup, kont mul uⱡ ei nguimp,” nitim.

41 Ni kᵾn, Jura wamp nimbᵾ ndi, ik rombulk nᵾtᵾng. Ei nambuⱡ emel, Jisas ndi, kundpa nimba mel, “Na muⱡ kona nga, bret ei, mana ur,” nitim. 42 Wamp mbᵾ ndi, nᵾk mel, “Wu ei Jisas, Josep kangᵾm nimbun, kanmin ei? Wote, wu elpa nda? Tᵾn ndi, mam tipam raⱡ kandᵾrmin. Ni wote, elim muⱡ ila mana ur ninim ei, etpa ninim, mel nant nda,” nᵾtᵾng. 43 Wote Jisas ndi, punt ropa, nimba mel, “Ik tek rombulk ni nᵾnᵾi! 44 Wamp ti, na kᵾn numa ui nawᵾmba. Na tᵾpa mundum Wuta ei ndi, tᵾpa mundangga, na kᵾn omba. Wote na ndi, wamp ei, ui pora nim kᵾn, rop rut ndup, kont mundimp 45 Unt painui wu mbᵾ nga, mon ti rorung petᵾm ei ndi, nimba mel, ‘Got ndi, wamp mbᵾ, elim ndi, ik mbo endᵾmba,’ nᵾtᵾng. Wuta nga ik ei pilik, tᵾk pep rong wamp mbᵾ, na kᵾn uing. 46 Ik nᵾnt ei ndi, nᵾmp kᵾn wamp ti ndi, Got kᵾndrᵾm ni nanᵾnt mon! Got kᵾn moⱡpa, mana urum Wu ei ndi mendpᵾⱡ, Got kandrum.

47 Enim ik kupa ei kundᵾp nint. Wamp ti, mondpa pilpa moⱡum ti, uⱡ nga kᵾnt nga kont mul uⱡ ei, tᵾpa tepa morum. 48 Uⱡ nga kᵾnt nga kont mul uⱡ ei nga bret ei, na. 49 Unt, enim nga anda kouwᵾ mbᵾ ndi, kona kui waka ila, rᵾng mbi tek, ‘mana’ nᵾtmin ni, nurung. Ni kᵾn wote, kolk ketᵾng. 50 Wote, muⱡ kona bret mana urum ei, elpa ti mel, wamp ti nom ndam, kuⱡi naⱡᵾmba. 51 Na muⱡ kona kont mba mul bret ei, mana ur. Wamp ti, bret ei, tepa nom ndam, kont moⱡpa mint mba. Na ndi, bret ngᵾmp nᵾnt ei, na nga kᵾng ei. Ei, tᵾpa nom wamp ti, uⱡ nga kᵾnt nga kont moⱡpa mint mba,” nitim.

52 Wote, Jura wu nimbᵾ ndi, ik ni pilik kit pilik, tek rombulk, nᵾk mel, “Ya wu ei ndi, elim nga kᵾng ei, tᵾn ngangga! Wote tᵾpᵾn nᵾmᵾn ninim ei, etpa ninim mel nant nda?” nᵾtᵾng. 53 Wote Jisas ndi, kundpa nimba mel, “Enim ik kupa ei, kundᵾp nᵾnt. Wamp ti ndi, Muⱡᵾl Wu Kupa ei nga kᵾng ei kᵾn, mema ei kᵾn, tᵾpa nui nanᵾm ndam, kont mul uⱡ ei, wamp ei kᵾn pi napᵾmba. 54 Na nga kᵾng ei kᵾn, mema ei kᵾn, tᵾpa nom wamp ei, uⱡ nga kᵾnt nga kont mul uⱡ ei tᵾpa tepa morum. Wote, ui ei pora nim kᵾn, na ndi, wamp ei, rop rut ndup, tᵾp oⱡa mundimp. 55 Na nga kᵾng ei, rᵾng kupa ingk ei. Omba, na nga mema ei, nu kupa ingk ei. 56 Wamp ti ndi, na nga kᵾng ei kᵾn, mema ei kᵾn, tᵾpa nom wamp ei, na kᵾn moⱡangga! Wote, na wamp ei kᵾn muⱡimp. 57 Na tᵾpa mundrum Wuta ei, rᵾk rᵾk kont morum. Ei mel ku, na mor. Uⱡ ei mel ku, na tᵾpa nom wamp ei, rᵾk rᵾk kont moⱡmba. 58 Muⱡ kona mana urum bret kupa ei, na mor. Unt, enim nga anda kouwᵾ kᵾⱡ ndi, bret ti norung, wote kolk ketᵾng. Wote wamp ti ndi, muⱡ kona mana urum bret kupa ei, nom ndam, kont moⱡpa mint mba,” nitim. 59 Jisas ndi, Kaperniyum kona ila manga wingti kel ila, wamp ik mbo endpa moⱡpa, ik kᵾⱡ nitim.

Uⱡ Nga Kᵾnt Nga Kont Moⱡpa Mint Pi, Ei Nga Ik

60 Elim nga kitip kᵾni wu ou ndupa ndi, ik nitim mbᵾ, pilik molk nᵾk mel, “Ik ronduⱡ mat mbo endnim. Wamp nam ti ndi, ik mbᵾ pilpa tᵾmba nda?” nᵾtᵾng. 61 Jisas wamp numan kandrum ei ndi, ik nᵾtᵾng ni pilpa nimba mel, “Ik ei ndi, enim nga numan orunga, mbun ngunum nda? 62 I ndam, Muⱡᵾl Wu Kupa ei, elim moⱡpa mana urum kona ila kᵾnangina, kelpa int pum ndam, enim etᵾk piling mel nant? 63 Got nga Muⱡnga ei ndi, kont mul uⱡ ei ngorum. Wamp nga ronduⱡ ei ndi, uⱡ ingk ti, iti natᵾtᵾm. Na nᵾnt ik ei ndi, Got nga Muⱡnga enim ngump. Wote, uⱡ nga kᵾnt nga kont mul uⱡ ei, kunda ngᵾnt. 64 Jisas elim kᵾn, mondᵾk pili napilik iting,” nitim. Wu mbᵾ kᵾn, wote wu ti, elim reing nimba, rᵾk moⱡmba ei, unt kuimp tepa pitim. Ei nga, Jisas ndi, wu nimbᵾ, kundpa nimba mel, ‘Enim wu mat mondᵾk pili napᵾnmin,’” nitim. 65 Wote Jisas ndi nimba mel, “Uⱡ ei nga wamp ti, na kᵾn kapⱡa ui nawᵾmba. Wuta ndi, etpa kapⱡa endim ti, na kᵾn omba,” nitim.

66 Ik nitim ei nga, rup rok andrᵾng wamp nimbᵾ nga mat ndi, Jisas wak rok, mondᵾk kelik purung. Wote aldpa, Jisas murum ila, yant ui nawᵾrᵾng. 67 Wote Jisas ndi, elim nga kitip kᵾni wu 12 ni kᵾⱡ, waldpa nimba mel, “Enim i ku etᵾk, na wak rok ping ei?” nitim. 68 Saimon Pita ndi, punt ropa, nimba mel, “Wu Nuim ye! Tᵾn nam kᵾn mbin? Uⱡ nga kᵾnt nga kont mul uⱡ ei nga ik ei, nim tekᵾn morᵾn. 69 Ei nga, akup tᵾn pᵾnmᵾn ei, nim Wu Wingti ti, Got kᵾn molkᵾn, urᵾn nᵾmp mondpᵾn pᵾnmᵾn,” nitim. 70 Wote Jisas ndi, punt ropa, nimba mel, “Na ndi, enim wu 12 ni kᵾⱡ, kᵾmp rop tit. Ei nga, wu tenda ti, kur kit ei mondpa morum,” nitim. 71 Ik nitim ni, Juras, Saimon Iskariyot nga kangᵾm kundpa nitim. Juras ei, elim nga kitip kᵾni wu 12 ni kᵾⱡ nga ti, wote Jisas rᵾk murum.

Copyright information for `MED