John 7

Jisas Kᵾn Elim Nga Ʉngᵾn Wu Kᵾⱡ Kᵾn

Wote Jisas ni, Galili kona orunga andpa kᵾn, Juriya kona ila pi naprᵾm. Ei nambuⱡ emel, Jura wu mat ndi, elim rok kunding pilik etᵾng. Jura wamp mbᵾ nga manga kouwᵾ rok, kor mormᵾn ui ou ei, nondpa elinga, Jisas nga ᵾngᵾnᵾl mbᵾ ndi, elim kundᵾk, nᵾk mel, “Nim ya kona ei, wak rokᵾn, Juriya kona ila pi! Wote, nim pep rormin wamp mbᵾ ndi, nim uⱡ rᵾpndi mbᵾ itana kᵾneing. Wamp ti ndi, elim kandᵾk, neing nimba pᵾtᵾm. Wote elim ndi, uⱡ mbᵾ tᵾpa pena ila, pendpa etᵾm. Nim ndi, i etkᵾn uⱡ mbᵾ in ndam, muⱡ uⱡ mbila, nim nga mbi ei piling,” nᵾtᵾng. Wote, elim nga ᵾngᵾnᵾl nimbᵾ ndi, i ku etᵾk, elim kᵾn mondᵾk pili napᵾtᵾng. Jisas ndi, nimba mel, “Na mbi ei nga ui mendpᵾⱡ ei, ekit ui nawᵾm. Wote ui nant mbila, enim kapⱡa ping mint. Mᵾi kona wamp mbᵾ ndi, enim numan nguing, wote na numan ngui ngᵾnging. Nambuⱡ emel, na ndi, wamp mbᵾ nga uⱡ etmin mbᵾ, nᵾmp kit mondᵾr. Enim wᵾl rᵾng nok mormᵾn kona ila, muⱡeing pᵾi! Wote na pi nᵾpimp. Ei nambuⱡ emel, na nga ui ei kokila,” nitim. Ik ei mel nimba pendpa, kelpa wᵾl Galili kona ila, int murum.

Jura Wamp Nga Kor Morung Ui Ou Ei, Jisas Kanmba Purum

10 Wote, elim nga ᵾngᵾnᵾl mbᵾ, kor morung ila puⱡᵾngina, Jisas ila purum ku. Mot nga pi nᵾprᵾm, wote mo ropa purum. 11 Kor morung ui ou ni kᵾn, Jura wu nimbᵾ ndi, wamp mbᵾ waldᵾk nᵾk mel, “Jisas ni, nil morum?” nᵾk, andᵾk kurᵾrᵾng. 12 Ni kᵾn, wamp minal ndi, ol wal tek nᵾk mel, “Wu ei, wu kai ei,” nᵾtᵾng. Mat ndi, nᵾk mel, “Wu ei ndi, wamp mbᵾ tᵾpa wᵾlᵾ mundrum,” nᵾtᵾng. 13 Wamp morung nimbᵾ ndi, Jura wu nuim mbᵾ nga mundmong etᵾk, ik ei, mot nga ni nandᵾtᵾng.

14 Kor morung ui ni omba, rᵾk ting ila pelinga, Jisas ni manga wingti ou nila, murᵾk mba wamp mbᵾ kᵾn, puⱡ mondpa ik mbo inditim. 15 Jura rᵾp wu nimbᵾ ndi, min ngᵾn mundᵾk nᵾk mel, “Wu ei ndi, ik wengᵾndᵾpa, ronduⱡ mat ninim mbᵾ, nam ndi, mbo rondum nda?” nᵾtᵾng. 16 Wote Jisas ndi, punt ropa, nimba mel, “Na ndi, enim ik mbo endint mbᵾ, nanim nga numan ila pilip ni nanᵾnt, mon. Wote na tᵾpa mundrum Wuta ei ndi, ik mbo endilinga nᵾnt. 17 Wamp ti ndi, Got nga numan pᵾtᵾm ei mel, pep rop itimp nimba, pilim ndam, na ndi, ik mbo endᵾnt mbᵾ, Got kᵾn pepa onum, muna na nga numan ila pilip nᵾnt nda? Ei pilpa, mbi ndumba. 18 Wote wamp ti, elim nga numan ila pilpa ik nᵾtᵾm ni, elim nga mbi paka rundeing nimba etᵾm. Wote, wamp ti ndi, elim tᵾpa mundrum wamp ei nga mbi, paka rundeing nimba, pᵾtᵾm wamp ei, kun kai morum. Uⱡ ⱡawa ti mon. 19 Unt, Moses ndi, enim mi ik nimba ngurum pᵾtmᵾn. Ni kᵾn wote, enim wamp ti ndi, pep rui narᵾrmin. Ei nga, nambuⱡ emel, enim ndi, na rok kunding enmin?” nitim. 20 Wote, wamp nimbᵾ ndi, punt rok nᵾk mel, “Nim kur kit ti, mondkᵾn morᵾn! Nam ndi, nim ropa kondᵾmba enim?” nᵾtᵾng. 21 Ni kᵾn, Jisas ndi, nimba mel, “Na ndi unt, uⱡ rᵾpndi ou ti elimba, enim kandᵾk rut nᵾtᵾng. 22 Moses ndi, wamp kᵾng kupti uⱡ ei nga iteing nitim. Ei Moses ndi, iti nᵾtᵾtᵾm. Uⱡ ei, unt anda kouwᵾmᵾn mbᵾ nga etᵾng. Ei nga, enim ndi, mowi kor kᵾn, kang mbᵾ kᵾn, kᵾng kupti uⱡ ei etmin. 23 Enim ndi, Moses nga mi ik ei, ropᵾn puⱡa rui nᵾrmᵾn. Nᵾk kᵾn, wamp kᵾn kᵾng kupti uⱡ ei, mowi kor kᵾn etmin. Wote na ndi, wu ti nga kᵾng ei, mowi kor kᵾn, etᵾp kai mundunt. Ei nga, nambuⱡ emel, popᵾⱡ kᵾnmin? 24 Enim ndi, mong raⱡ ndi mendpᵾⱡ, kandᵾk kᵾmp ti nᵾtᵾi! Uⱡ kupa mendpᵾⱡ ila, kandᵾk kᵾmp tᵾi!” nitim.

Got Nga Ngurum Wu Ei Kraist Nda?

25 Ni kᵾn, Jerusalem wamp mat ndi, molk waldᵾk nᵾk mel, “Wu ei, ruing nᵾtmin wu ndi nda? 26 Kᵾnᵾiya! Wamp nga num ila ik ninim mat ndi, ik punt rui narᵾnmin ei ka! Got Nga Ngurum Wu ei, Kraist pilik kun enmin nda? 27 Wote, Got Nga Ngurum Wu ei, om ndam, kona nant ila moⱡpa omba uⱡ ei, wamp ti ndi, pili napilmba. Wu ei moⱡpa, onum kona ei, tᵾn pora pᵾtmᵾn,” nᵾtᵾng.

28 Jisas ndi, manga wingti ou ila wamp mbᵾ, ik mbo endpa, ik ronduⱡ mundpa, nimba mel, “Enim ndi, na kandᵾrmin. Wote, na nga mang kona enim pᵾtmᵾn. Wote, na omp mor uⱡ ei, na nga ronduⱡ ila mon. Wuta, muⱡ ila wu kupa morum ei ndi, na tᵾpa mundrum. Wu ei, enim ndi, pili napᵾtmᵾn. Wote na pilip mor. Ei nambuⱡ emel, na wu ei kᵾn moⱡᵾp ur. Wote wu ei ndi, na tᵾpa munduⱡnga ur,” nitim. 30 Wote, tᵾp imp muⱡmin nᵾk etᵾng. Ei nga wote, elim nga ui ei, kokila itim ila, wamp ti ndi, imp muⱡi nᵾmbrᵾng. 31 Wamp num pitim nila mat ndi, ik nitim ni, pilik tᵾk nᵾk mel, “Wote Got nga ngurum wu ei, om ndam, ya wu ei, enim ei mel, uⱡ rᵾpndi mat minal etmba nda?” nᵾtᵾng.

Jisas Imp Muⱡeing Nᵾk El Wu Mat Tᵾk Mundrᵾng

32 Wamp minal nimbᵾ, Jisas nga nitim ik nimbᵾ wamp ndi, ol wal tek nᵾtᵾng. Perisi na, wu Pris kuimbal nimbᵾ ndi pilik, Jisas tᵾk imp muⱡeing nᵾk, el wu nimbᵾ, tᵾk mundrᵾng. 33 Jisas ndi, nimba mel, “Na ui orunga kot, enim kᵾn moⱡᵾp, wote na tᵾpa mundrum wu ei kᵾn, kelip mbi. 34 Enim ndi, na andᵾk kurung. Wote, na kandᵾk ti nᵾtᵾng. Na mbi ent kona ila, enim pi nᵾping,” nitim. 35 Jura wu nimbᵾ ndi, en enim nᵾk mel, “Wu ei, nant tila pangga, tᵾn ndi, kurmin ei nga ninim nda? Tᵾn nga Jura wamp mat, wᵾl Grik kona ila petmin wamp mbᵾ kᵾn, mba Grik wamp ik mbo endᵾmba, ninim nda? 36 Elim ndi nimba mel, ‘Tᵾn ndi, elim andᵾp kurmin, wote kandᵾp ti nᵾtmin,’ nitim. Wote, ‘Elim mbo munt kona ila, kapⱡa ui nᵾwing,’ nitim. Ik ei, etpa ninim mel nant nda?” nᵾtᵾng.

Jisas Ni, Kont Mba Mul Nu Ei

37 Kor molk munding etᵾng ui ou ila, Jisas oⱡa anggilpa, ik oⱡa mundpa, nimba mel, “Wamp ti, nu waka em ndam, na kᵾn omba nu nangga! 38 Buk Wingti ei ndi, nimba mel, ‘Na mondᵾk pᵾtmᵾn wamp mbᵾ nga numan ila, kont mba mul nu ei, rᵾk rᵾk pukpa omba, mint morum,’” nitim. 39 Jisas ndi, ik nitim ei, elim mondᵾk pᵾtᵾng wamp mbᵾ, Muⱡnga Wingti nguimp nimba nitim. Ui ni kᵾn, Muⱡnga Wingti ei, ti natᵾtᵾng. Nambuⱡ emel, Jisas koⱡpa wote, mul kona pi nᵾpᵾrᵾm. 40 Jisas nitim ik ei, wamp mbᵾ ila mat ndi, pilik nᵾk mel, “Wu ei kupa, Painui Wu ei,” nᵾtᵾng. 41 Wamp mat ndi, wu ei, Got Nga Ngurum Wu ei Kraist, nᵾtᵾng. Wote wamp mat ndi nᵾk mel, “Got nga ngurum wu ei, Galili kona orunga ui nawᵾmba ei ka!” nᵾtᵾng. 42 Buk Wingti ei ndi, nimba mel, “Got nga ngurum wu ei, King Depit nga pundᵾn ei, Betelem kona ila, Depit nga mᵾi mang kona ila ming,” nitim. 43 Ni kᵾn, wamp mindil nila, Jisas nga nᵾk oi nduk mu raⱡ rorung. 44 Wamp mat ndi, tᵾp kan nguimin nᵾtᵾng. Wote ambulk ti natᵾtᵾng.

Jura Rᵾp Wu Nuim Mbᵾ Mondᵾk Pili Nᵾpᵾtᵾng

45 El wu ni kᵾⱡ, int purung kᵾn, Perisi wu na, Pris kuimbal nimbᵾ ndi, waldᵾk nᵾk mel, ”Nambuⱡ emel, wu ei, tᵾk mek ui nawᵾnmᵾn?” nᵾtᵾng. 46 Wote, el wu ni kᵾⱡ ndi, punt rok, nᵾk mel, “Wamp ti ndi, wu ei, ik nim ei mel ni nanim, ei ka!” nᵾtᵾng. 47 Perisi wu nimbᵾ ndi, nᵾk mel, “Enim i ku etpa, tᵾpa kum ngi randum ei? 48 Tᵾn nga Pris Kuimbal na, Perisi wu mbᵾ nga mat ndi, wu ei nga ik ei, pilik tᵾtmᵾn ei? 49 Wamp nimbᵾ ndi, Moses nga mi ik ei, pep rui narᵾrmin. Ei kᵾn, wamp mbᵾ, Got nga kuimp keta ila, kit molk pora ndurung,” nᵾtᵾng. 50 Perisi wu kᵾⱡ nga wu ti ni, Nikondimas wu ei, unt Jisas mba kᵾndrᵾm. Ei ndi kat, kundpa nimba mel, ”Wu ti nga puⱡ ei, kᵾni nakᵾndpᵾn. Ik ndo ngonmin ei, tᵾn nga mi ik ila petᵾm nda?” nitim. 52 Wote, Perisi wu kat ndi, punt rok, nᵾk mel, “Nim Galili wu ei ku? Buk Wingti ila, kᵾmp rokᵾn pilkᵾn, kun iti Galili kona ila, painui wu ti, ui nawᵾmba,” nᵾtᵾng. 53 Wote wamp nimbᵾ, elpa elpa mang kona purung

Copyright information for `MED