John 8

Amp Ti Wam Mondpa Kelpa Mba Wapra Rurum

Wote, Jisas elim Olip Komnga ila purum. Mᵾkᵾlmᵾ unt kelpa, manga wingti ou ila int purum. Wamp nimbᵾ ndi, molk pok elingina, elim mana moⱡpa, puⱡ mondpa ik mbo inditim. Ni kᵾn, mi ik mbo wu na, Perisi wu nimbᵾ ndi, amp ti wam wak ropa, wapra rurum ni, mek ok, wamp nga kuimp keta ila, tᵾk oⱡa angᵾndᵾk, Jisas kundᵾk, nᵾk mel, “Ik mbo wu ye! Amp ei, wam wak ropa, wapra rom ila mep onmᵾn. Amp i iti mbᵾ, ku ndi rop kundmin nimba, Moses ndi, mi ik ila rurum. Ei nga, akup nim ndi, namba nin?” nᵾtᵾng. Wu ni kᵾⱡ ndi, Jisas ik ti nimba, ⱡawa mundangga, kᵾmp tᵾk etᵾng nᵾk, oⱡa tᵾk, kᵾning pilik nᵾtᵾng. Ni kᵾn wote, Jisas pilpa moⱡpa, mᵾi kandpa, ki ruⱡ ei ndi, mᵾi ila mon rurum.

I etᵾk waldᵾk morung ila, Jisas rᵾn nimba, oⱡa moⱡpa nimba mel, “Nim wamp nam ti ndi, uⱡ kit mat iti natᵾtᵾn ndam, kuimp tekᵾn, amp ei, ku ndi rui!” nitim. Wote, aldpa mᵾi kandpa moⱡpa, mᵾi ila mon rurum.

Wamp morung nimbᵾ, ik ni pilik, kᵾmp kᵾm ti raⱡ nᵾk, ou kel nimbᵾ, kelik purung. Jisas elim kou murum ila, amp ni, anggilpa murum ku. 10 Wote Jisas ni, oⱡa anggilpa, amp ni, waldpa nimba mel, “Amp ye! Wamp mbᵾ nant? Ti ndi moⱡpa, nim kᵾmp tᵾpa, ni nandᵾm ei?” nitim.

11 Ni kᵾn, amp ni ndi, punt ropa, nimba mel, “Wamp ti, mon ei ka!” nitim. Wote Jisas ndi, nimba mel, “I ndam, na ndi, nim kot indi nᵾndimp ku. Nim kelik pukᵾn, aldpa uⱡ kit mat iti nᵾti mon!” nitim.

Jisas Ei Ya Mᵾi Kona Ei Nga Rᵾⱡang Ei

12 Wote aldpa, Jisas ndi, wamp nimbᵾ, kundpa nimba mel, “Ya mᵾi kona ei nga rᵾⱡang ei na! Wamp ti ndi, na pep rom ndam, rumbᵾⱡ ila ᵾndi nandᵾmba, mon. Wote, kont mba mul rᵾⱡang ila andᵾmba,” nitim.

13 Ni kᵾn, Perisi wu nimbᵾ ndi, nᵾk mel, “Nim nᵾn ik ei, ik kupa ti nᵾmp pi napᵾnmᵾn. Nim nga orunga, paka rokᵾn nᵾn,” nᵾtᵾng.

14 Wote Jisas ndi, punt ropa, nimba mel, “Na nga orunga, paka rop nint ndam kep, ik ei, kupa mint. Nambuⱡ emel, na moⱡᵾp ur kona ei kep, wote mbi kona ei kep, na nanim pilip mor. Enim uⱡ ei nga pili napᵾtmᵾn. 15 Enim wamp nga numan, kandᵾk tᵾk, wamp kᵾmp tᵾtmᵾn ei mel, na i iti natᵾt. 16 Wote, na wamp kᵾmp tilmba ndam, na nga wamp kᵾmp tint uⱡ ei, kupa mint pelinga. Nambuⱡ emel, na nanim kou muⱡi nambᵾr. Wote, na tᵾpa mundrum Wuta ei, na kᵾn morum ei nga, mondᵾp pilip nimp. 17 Enim nga mi ik ila, mon rok pendᵾtᵾng ei ndi ninim. Wamp raⱡ ndi, ik tenda ti natᵾmbil ndam, ik ei kupa nᵾtmin. 18 Na ndi, nanim nga orunga nᵾnt. Wote wamp ti ndi, na nga orunga nᵾndᵾtᵾm ei, na tᵾpa mundrum Wuta ei ndi nᵾtᵾm,” nitim.

19 Wote, Perisi wu nimbᵾ ndi, Jisas waldᵾk, nᵾk mel, “Nim nga tipanᵾm ei, nant ila morum?” nᵾtᵾng. Wote Jisas ndi, punt ropa, nimba mel, “Enim ndi, na kep, Wuta kep, kandᵾk mbi ndui nandᵾnmᵾn. Na kandᵾk mbi nduⱡina ndam, Wuta kandᵾk mbi nduⱡina ku,” nitim. 20 Ik nitim mbᵾ, manga wingti ou ila angge moni mbᵾ, tᵾk tetmin kona ila moⱡpa, wamp ik mbo endpa, ik mbᵾ nitim. Ei kᵾn, wamp ti ndi, elim tᵾk imp muⱡi nᵾmbrᵾm. Nambuⱡ emel, elim nga ui ei, kokila itim.

Na Punt Kona Ila Enim Ping Mel Mon

21 Aldpa Jisas ndi, nimba mel, “Na kelip mbi, enim ndi, na kᵾni nᵾkᵾning. Wote enim, en enim nga uⱡ kit mbᵾ ndi, enim kᵾⱡing. Na punt kona ila, enim kapⱡa ui nᵾwing,” nitim.

22 Ni kᵾn, Jura wu nimbᵾ ndi, waldᵾk nᵾk mel, “Elim punt kona ila, tᵾn kapⱡa pi nᵾpᵾmᵾn” nᵾtᵾm. “Elim ndi, elim ropa kondᵾmba, pilpa nᵾnᵾm nda,” nᵾtᵾng.

23 Jisas ndi, punt ropa, nimba mel, “Enim ya mana mᵾi kona ila wamp kᵾⱡ. Na mᵾi kona ila mon, Na oⱡa mana ur. 24 Ei nga, enim nga uⱡ kit eng mbila, en enim kuⱡing nᵾmp, unt enim kundᵾp nit. Wote, Na Ei Wu Nam nᵾk, mondᵾk pili napᵾlᵾng ndam, enim nga uⱡ kit eng mbila, en enim kᵾⱡing,” nitim.

25 Wote, wamp nimbᵾ ndi, Jisas waldᵾk, nᵾk mel, “Nim nam?” nᵾtᵾng. Ni kᵾn, Jisas ndi, punt ropa, nimba mel, “Na wu nam ei, unt kuimp tep enim kundᵾp nit. 26 Na ndi, enim kᵾmp tᵾp nimp ei nga, ik ou ndupa petᵾm. Wote, na tᵾpa mundrum Wu ei, kupa morum. Elim ndi, na kundpa nᵾtᵾm ik mbᵾ mint, mᵾi kona wamp mbᵾ nᵾmp ngur,” nitim.

27 Jisas ndi, elim nga Tipam nga nitim ik ni, pilik kun iti natᵾtᵾng. 28 Wote int ndupa, nimba mel, “Wakᵾt Muⱡᵾl Wu Kupa ei, ambulk oⱡa tᵾng ei kᵾn, na wu nam ei, pilik mbi nduing. Ei kᵾn ku, na ik nᵾt mbᵾ, na nga ronduⱡ ila, ni nandᵾt, mon. Wuta ndi, na mbo endᵾtᵾm ik mbᵾ mint nᵾt. 29 Na tᵾpa mundrum wu ei, na wak rui narᵾpa, rᵾk rᵾk na kᵾn moⱡnga, elim nga numan ngorum uⱡ mbᵾ mint et,” nitim. 30 Wamp puⱡi, Jisas nga ik nitim ei pilik, elim kᵾn mondᵾk pᵾtᵾng.

Wu Aparam Nga Wamp Pundᵾn Mbᵾ

31 Ni kᵾn, Jisas ndi, Jura wamp mat, elim kᵾn mondᵾk pᵾtᵾng nimbᵾ, kundpa nimba mel, “Na nga ik ei, pilik tᵾk teng nduk, moⱡᵾng ndam, enim na nga kitip kᵾni wamp kupa kᵾⱡ muⱡing. 32 Enim ik kupa ei, pilik ting. Wote ik kupa ei ndi, enim etpa tangga kᵾn, aldpa uⱡ kit mbᵾ nga kindmant indi nᵾnding,” nitim.

33 Wote, Jura wamp nimbᵾ ndi, punt rok, waldᵾk nᵾk mel, “Tᵾn Aparam nga wamp pundᵾn mbᵾ mormᵾn. Tᵾn wamp ti nga kindmant wamp kat mon. Ei nga wote, nim ndi, tᵾn ik kupa ei ndi, etpa tᵾmba nᵾn ei, etᵾk nᵾn mel nant?” nᵾtᵾng.

34 Ni kᵾn, Jisas ndi, punt ropa nimba mel, “Ik kupa ei, enim kundᵾp nᵾnt. Wamp ti uⱡ kit etᵾm ei, uⱡ kit mbᵾ nga kindmant wamp ei morum. 35 Wote, wamp mbo tenda kat nga kindmant wamp ti, morum ni, kongun nowu etpa morum. Wote, wamp mbo kᵾⱡ nga kangᵾm ti, morum ei, wamp mbo kᵾⱡ nga wamp mendpᵾⱡ ei morum. 36 Got Kangᵾm ei ndi, enim uⱡ kit mbila etpa tᵾm ndam, enim aldpa uⱡ kit mbᵾ nga kindmant wamp muⱡi nᵾmbᵾⱡing. 37 Enim Aparam nga wamp pundᵾn kᵾⱡ, na pilip mor. Wote, na nga ik mbo endᵾnt kᵾⱡ, enim pilik ti natᵾk, na rok kunding enmin. 38 Na nga Wuta ndi, ora ndurum mel ik mbᵾ nᵾnt. Wote enim, en enim nga tipam ei ndi, ik man ngorum ei mel ku etmin,” nitim.

39 Wote, wamp nimbᵾ ndi, punt rok nᵾk mel, “Tᵾn nga tipam ei Aparam,” nᵾtᵾng. Ni kᵾn, Jisas ndi, punt ropa nimba mel, “Enim kupa Aparam kangᵾmᵾl ndam, enim Aparam nga itim uⱡ mbᵾ mel elimina. 40 Na ndi, Got nga ik kupa ei, pilip tᵾp, enim kundᵾp nit. Wote, aldpa enim ndi, na rok kunding pilik enmin. Aparam ndi, uⱡ ei iti nᵾtᵾtᵾm ei ka! 41 Enim etmin uⱡ mbᵾ, enim nga tipam ei, etᵾm ei mel etmin,” nitim. Wote, Jura wamp nimbᵾ ndi, punt rok nᵾk mel, “Tᵾn wapra rok, mi nambᵾtᵾng, mon. Tᵾn nga Tipam kupa ei, Got morum,” nᵾtᵾng.

42 Ni kᵾn, Jisas ndi, nimba mel, “Got ei, enim nga Tipam kupa ndam, enim ndi, na numan nguⱡina. Nambuⱡ emel, na Got kᵾn moⱡᵾp ur ei, akup ya omp mor. Na nanim ui nᵾwᵾr. Elim ndi, na tᵾpa munduⱡnga, na ur. 43 Enim ndi, na nga ik ei, pilik kun iti natᵾnmᵾn. Ei nambuⱡ emel, enim ndi, na nga ik ei kum tek, piling ei nga numan orunga, piral ni nandᵾtᵾm. 44 Enim nga tipam ei, Seitan morum. Ei nga, elim nga etᵾm uⱡ mbᵾ, enim pep rok etmin. Unt, kuimp tepa, wamp ropa kundi uⱡ ei nga puⱡ ei, Seitan kᵾn tepa orum. Uⱡ kupa ti iti natᵾtᵾm. Ei nambuⱡ emel, ik kupa ti, elim nga rukrᵾng orunga ti natᵾtᵾm. Ik kol ti rorum ndam, ei elim nga uⱡ mendpᵾⱡ. Ei nambuⱡ emel, elim ik kol wu, wote ik kol rui uⱡ mbᵾ nga tipam ei morum. 45 Wote, na ik kupa nᵾt ei, enim ndi mondᵾk pili napᵾtmᵾn ei ka! 46 Na nga uⱡ kit et mbᵾ, wamp ti ndi, kandᵾk ning muna mon? Wote, ik kupa ei, na nᵾt ndam, nambuⱡ emel, enim ndi, na mondᵾk pili napᵾnmᵾn? 47 Got nga wamp ei, Got nga nᵾtᵾm ik mbᵾ, kum tepa pᵾtᵾm. Enim Got nga ik ei, pilik ti natᵾng ndam, enim Got nga wamp kat mon,” nitim.

Jisas Kᵾn Aparam Raⱡ

48 Ni kᵾn, Jura wamp nimbᵾ ndi, punt rok nᵾk mel, “Tᵾn ndi, nim Sameriya wu ti, kur kit rukᵾr orunga, mondkᵾn morᵾn nᵾtmᵾn ni, ik kol rurmᵾn ei?” nᵾtᵾng.

49 Wote Jisas ndi, punt ropa nimba mel, “Na Wuta nga mbi paka rondᵾr. Wote enim ndi, na kur kit mondᵾr nᵾk, na nga mbi ei tᵾk pei mundᵾnmᵾn,” nitim. 50 Wote na nga orunga, kaip nindeing nᵾmp ni nanᵾnt. Wu ou ti morum ei ndi, na nga orunga, kᵾmp tᵾpa kun endpa, kaip nindᵾmba. 51 Ik kupa ei, enim kundᵾp nᵾnt. Wamp ti ndi, na nga ik ei, pilpa tᵾm ndam, wamp ei kuⱡi naⱡᵾmba,” nitim.

52 Ni kᵾn, Jura wamp nimbᵾ ndi, punt rok nᵾk mel, “Nim kupa kur kit mondkᵾn morᵾn! Aparam na, painui wu na morung mbᵾ, unt korung. Aldpa nim ndi, pilkᵾn kelkᵾn wamp mbᵾ, ik mbo endkᵾn, nim nga ik ei pilik tᵾng ndam, kuⱡi nᵾⱡing nᵾn ei ka! 53 Tᵾn nga tipam Aparam kᵾn, painui wu korung nimbᵾ, nim ndi, tᵾkᵾn pei mundun ku ei? Nim naka wu ei?” nᵾtᵾng.

54 Wote Jisas ndi, punt ropa nimba mel, “Na ndi, na nga mbi ei, paka rop nilmba ndam, na nga mbi ei, kapⱡa mon. Na nga mbi paka rondnum Wuta ei, enim ndi nᵾk mel, ‘Enim nga Got,’ nᵾnmᵾn. 55 Enim ndi, Got pilik kandᵾk iti natᵾtmᵾn. Na ndi, pilip kandᵾp et. Na ndi, nᵾmp mel, ‘Na pilip kandᵾp, iti natᵾt nint ndam, enim ik kol rormᵾn ei mel, na ik kol roⱡᵾmba. Wote na ndi, pilip kandᵾp mbi ndup et ei ndi, elim nga ik ei teng ndᵾr. 56 Enim nga tipam Aparam nga numan ei ndi, na nga ui ei, kᵾnimp nimba, ambuⱡpa paⱡpa murum. Ei mel kandpa kᵾn, numan wang ndurum,” nitim.

57 Wote, Jura wamp nimbᵾ ndi, Jisas kundᵾk, nᵾk mel, “Nim nga pana 50 omba, pi nᵾpi. Nim kokila ei nga, nim Aparam kᵾndrᵾn nᵾn ei?” nᵾtᵾng.

58 Ni kᵾn, Jisas ndi, nimba mel, “Ik kupa ei, enim kundᵾp nᵾnt. Aparam ni, mi nᵾmi kᵾn, na unt kuimp tep mur,” nitim. 59 Jura wamp morung nimbᵾ ndi, ku mat tᵾk, Jisas ni ruing elingina, wote manga wingti ou ni, wak ropa, mo ropa purum.

Copyright information for `MED