Luke 10

Jisas Ndi, Wu 72 Kat Elim Ng Kongun Ila Tᵾpa Mundrum.

Wote, Nuim ei ndi, wu 72 kat morung kᵾⱡ, wi ropa tᵾpa raⱡ raⱡ nimba, kuimp tepa tᵾpa mundrum. Wu kᵾⱡ, tᵾpa kona peng na, mbo kona na mbila, tᵾpa mundpa kᵾn, elim akil tepa, kona mbila mba pilpa itim. Wote Jisas ndi, wu 72 ni kᵾⱡ, kundpa nimba mel, “Pana kona mbila rᵾng puⱡi rupa ropa petᵾm. Wote, rᵾng ting kongun wu mat, ou ndupa mon. Ei nga, enim puk pana puⱡ wu ei kᵾn, atinga rangina, kongun wu mat, ou ndupa tᵾpa mundangga, puk rᵾng mbᵾ tᵾk, mᵾk rok muⱡeing. Enim pilik pᵾi! Na ndi, enim tᵾp mundunt ei, kng sipsip waⱡ na mat, owa rakra morum kona ila rᵾk purmin ni mel, enim tᵾp mundunt pᵾi! Enim puk kᵾn, ku moni na, wal na, kᵾmp rᵾk na mel mat, mek pi nᵾpᵾi mon! Wote, nombuⱡa mam ila puk, wamp mat kandᵾk kᵾn, rawe iti nᵾtᵾi mon ku! Wote, enim puk wamp mat nga manga tila mukᵾr pung ndam, kokila puk ei kᵾn, wamp mbᵾ kundᵾk, enim ya manga ila wamp kᵾⱡ, numan wang nduk muⱡeing nᵾi. Omba wote, numan kai pili kang wu ti, manga ila moⱡum ndam, enim nga memp ik kai nᵾng kᵾⱡ pilpa tᵾmba. Wote, numan kai pili napᵾlᵾng kang wu ti, moⱡum ndam, enim nga memp ik kai nᵾng mbᵾ, en enim kᵾn rukᵾr tᵾi. Enim puk manga tenda ila mint molk, wamp mbᵾ ndi, rᵾng na, nu na, ngᵾng mbᵾ nok muⱡᵾi! Manga elpa mat ila andᵾk, pi nᵾpᵾi mon! Ei nambuⱡ emel, kongun etᵾm wamp ei, mel ti tᵾmba ei nga kongun etᵾm. Wote, enim kona peng tila pangina kᵾn, wamp mat ndi, enim rawe etᵾk tᵾk mek puk, en enim nga manga ila pung ndam, rᵾng ngᵾng mbᵾ nok muⱡᵾi! Wote, kona ila kui rom wamp mbᵾ, etᵾk kai mondᵾk, Got nga wamp tᵾpa mumuk rui uⱡ ei, int enim kᵾn nondpa, omba tetᵾm ei nga nᵾk ik mbo indᵾi! 10 Wote, kona peng tila pangina kᵾn, wamp mat ndi, enim rawe etᵾk ti natᵾng ndam, enim puk kona peng ei nga nombuⱡa mam rᵾk ila anggilik nᵾk mel, ‘Enim nga kona peng ei nga kᵾnggᵾpᵾn kᵾⱡ, tᵾn nga kᵾmp mbila rᵾmp ninim mbᵾ, akup ndanda ndᵾnmᵾn. Enim uⱡ ⱡawa mbᵾ, etᵾk mormin ei nga tᵾpᵾn ora ndᵾnmᵾn. Enim pilik kai itᵾi! Got nga wamp tᵾpa mumuk rui uⱡ ei, nondpa omba enim.’ 12 Na ndi, enim kundᵾp nᵾnt. Unt Sorum kona ila wamp mbun ngurum ei, mana ndupa, Got ndi, enim kona peng ila wamp kᵾⱡ, elim nga ui ou ila, mbun minal ngumba,” nitim.

Wamp Numan Ropᵾl Rui Narᵾrmin Kona Kᵾⱡ

13 Wote Jisas ndi, nimba mel, “Korasin kona peng ila wamp kᵾⱡ kᵾn, kont enim. Wote, Betseita wamp kᵾⱡ kᵾn, kont enim ku. Unt wu ti ndi, omba ya Taiya kᵾn, Sairon kona peng raⱡ ila, uⱡ rᵾpᵾndi mat, akup na ndi, enim kᵾn omp ent ei, mel elinga ndam, wamp nᵾnt kᵾⱡ numan ropᵾl ronmᵾn nᵾk, muⱡ ping ralk ui kik raⱡ pakᵾk elingina. 14 Wote Got ndi, wamp kᵾmp tᵾmba ui ila, enim Korasin, kᵾn Betseita kona raⱡ nga wamp kᵾⱡ, tᵾpa mana ndupa, Taiya, Sairon kona raⱡ nga wamp kᵾⱡ, kont minal kuⱡmba. 15 Wote, enim Kaperniyum wamp kᵾⱡ ye! Enim muⱡ kona mbin nᵾk pil-ing kᵾn, ei mon. Enim ndip kona ila ping.

16 Wote Jisas ndi, elim nga 72 wu ni kᵾⱡ, kundpa nimba mel, “Wamp nam ti ndi, enim nga ik nᵾng ei, pilpa tᵾm ndam, wamp ei, na nga ik ei pilpa tᵾmba. Wote, wamp ti ndi, enim tᵾpa mbᵾⱡ ngum ndam, na tᵾpa mbᵾⱡ ngumba. Wote, wamp ti ndi, na tᵾpa mbᵾⱡ ngum ndam, na tᵾpa mundrum wamp ei, tᵾpa mbᵾⱡ ngumba ku,” nitim.

Kongun Wu 72 Ni Kᵾⱡ Yant Orung

17 Wu 72 kat Jisas ndi, kongun teing nimba tᵾpa mundrum ni kᵾⱡ, wote andᵾk yant ok, ambulk palk nᵾk mel, “Wu Nuim ye! Nim nga mbi tepᵾn angᵾndpᵾn, muⱡnga kit mbᵾ ok, ekit peing nimᵾn ei kᵾn, tᵾn nga ik ei, teing nduk ok, pung ei ka!” nᵾtᵾng. 18 Wote Jisas ndi, wu kᵾⱡ, kundpa nimba mel, “Seitan wi muⱡ ila kona kiraipa mel etpa, mana om ei, na kᵾnt,” nitim. 19 Enim pilᵾi! Na nga ronduⱡ ei, enim ngur uⱡ ei ndi, wimbᵾ kit na kimbuⱡa kelwa na mbᵾ, kamblik kondᵾk, wote el puⱡa wu Seitan nga ronduⱡ ei, rok mana nduk iting. Mel mat ndi, enim kapⱡa etpa kit mundi namᵾndᵾmba, mon! 20 Wote enim ndi, ambulk palk, nᵾk mel, “Muⱡnga kit mbᵾ, tᵾn nga ik kum tek ok, pung ni nᵾnᵾi mon! Enim nga mbi kᵾⱡ, Got ndi, wi muⱡ kona ila, mon ropa mana ndupa mundrum ei nga, ambulk palk muⱡᵾi!” nitim.

Jisas Numan Kai Pilpa Got Kᵾn Angge Nitim

21 Wote ui ti kᵾn, Muⱡnga Wingti ndi, Jisas numan kai kat mbo rᵾndrᵾm ila, Tipam Got kᵾn atinga ropa nimba mel, “Wuta Nuim ei, nim muⱡ mᵾi raⱡ nga Tipam ei. Na nim kᵾn angge nᵾnt ei, nambuⱡ emel, Nim ndi, wamp pilpa kungᵾndi mbᵾ kᵾn, uⱡ mbᵾ mo rokᵾn etᵾn. Wote, wamp ti kangambuⱡa kel mel raⱡpa morum ei kᵾn, uⱡ mbᵾ ninim nga numan ei ndi, pilkᵾn ora ndurun,” nitim.

22 Wote Jisas ndi, ik kat nimba mel, “Nanim nga Tipam ei ndi, mel mbᵾ pora, na nga ki ila tepa pora ndurum. Wamp ti ndi, Got nga Kangᵾm ei, pilpa mbi ndui nandrᵾm mon. Elim nga Tipam Got ndi, mint pᵾtᵾm. Wote, wamp ti ndi, Got Tipam pilpa mbi ndui nandrᵾm mon, elim nga Kangᵾm ei ndi, mint pᵾtᵾm. Wote, Kangᵾm elim ndi, Tipam wamp mat tᵾp ora nduimp nimba, pᵾtᵾm kᵾⱡ mint, ora nduⱡnga, kandᵾk pᵾtmᵾn.

23 Wote, Jisas elim nga kitip kᵾni wu kᵾⱡ mendpᵾⱡ, elim kᵾn rᵾp rok morung ila ropᵾl ropa, wu kᵾⱡ, kundpa nimba mel, “Enim kanmin uⱡ kᵾⱡ, wamp mat kandᵾk kᵾn, enim pora ambulk palk muⱡeing. 24 Wote, unt nga painui wu mat kᵾn, wu nuim mumuk na mat, ou ndupa morung mbᵾ ndi, uⱡ akup enim kanmin uⱡ kᵾⱡ, kᵾnmin nᵾk pᵾtᵾng. Ei wote, kᵾni nakᵾndrᵾng, mon. Wote, akup enim ik pᵾnmin kᵾⱡ kep, pilamin nᵾk pᵾtᵾng. Ei wote, pili napᵾtᵾng mon ku,” nitim.

Sameriya Wu Ti Ndi, Jura Wu Ti Tᵾpa Rᵾpᵾndrᵾm Ei Nga Ik Ek

25 Wote, mi ik mbo wu ti ndi, Jisas oⱡa tᵾp kᵾnimp nimba, waldpa nimba mel, “Ik mbo wu ye! Na namba uⱡ ti etᵾp kᵾn, uⱡ nga kᵾnt nga kont mul uⱡ ei, kandᵾp timp nda?” nitim. 26 Wote Jisas ndi, wu ni nga ik punt ropa nimba mel, “Mi ik ila petᵾm ik kᵾⱡ, nim kᵾmp rokᵾn pᵾtᵾn mel nant?” nitim. 27 Wote, mi ik mbo wu ni ndi, punt ropa nimba mel, “Enim nga Wu Nuim Got numan nguing uⱡ ei, enim nga mundmong, min, ronduⱡ, numan na mbila pora, numan nguing. En enim numan ngurmin uⱡ ei mel ku, manga keta kup wamp mbᵾ, i ku etᵾk numan ngeing,” nitim. 28 Jisas ndi, wu ni, kundpa nimba mel, “Akup nim ndi, na nga ik waldᵾnt ni, punt rokᵾn nᵾn ei mel, uⱡ mbᵾ in ndam, uⱡ nga kᵾnt nga kont mba mul kona ei tin,” nitim.

29 Wote, mi ik mbo wu ni ndi, Jisas ndi, elim wu kun kai ti, nimba pilangga nimba, waldpa nimba mel, “Mi ik ei ndi, mang keta kup wamp ninim ni, namin kundpa ninim nda?” nitim. 30 Wote Jisas ndi, wu ni nga ik nitim ni, punt ropa nimba mel, “Tᵾnggᵾt kᵾn, Jura wu ti, Jerusalem kona peng ei, wak ropa, Jeriko kona peng ila mbi nimba, nombuⱡa mam ila purum. Nombuⱡa ruk ting ila kindᵾp wu mat ndi, Jura wu ei, tᵾmbᵾⱡ ndi rok, mel mepa purum mbᵾ, roldᵾk tᵾk mek purung. Wote, rorung wu ni, nombuⱡa mam ila koⱡmba etpa titim. 31 Wote ei kᵾn, wu Pris ti, nombuⱡa mam ila akil tepa omba, kᵾndrᵾm mel, wu ni, koⱡmba etpa, nombuⱡa mam ila peta ropa titim ila kandpa pendpa, nombuⱡa mam ᵾldᵾ orunga, kuk tᵾpa omba purum. 32 Wote, Lipai wu ti, i ku etpa omba, rorung wu ni, kandpa kᵾn, nombuⱡa mam ᵾldᵾ orunga, kuk tᵾpa omba purum. 33 Wote, Sameriya wu ti, akil tepa urum ni ndi, wu rok tetᵾng ni kandpa, kont kuⱡpa munt mindil tᵾpa, nondpa omba, ambuⱡpa kandpa, rorung kona nimbᵾ, kopung ni kandpa, kng donggi mbuⱡ ila mondpa, mepa mba, wamp tᵾma ok, pek puk etmin manga nila pendpa, rᵾp itim. 35 Wote utᵾma orunga, Sameriya wu ni ndi, manga puⱡ wu ni, ku K2 ngumba kᵾn, nimba mel, “Nim ndi, wu ei, rᵾp etkᵾn kai mondkᵾn molkᵾn, nim nga ku moni mat ndi, rᵾng rarᵾp rok, tᵾk ngukᵾn in mbᵾ mel, wote na yant omp kᵾn, ninim punt rop nguimp,” nitim. 36 Wote Jisas ndi, mi ik mbo wu ni, waldpa nimba mel, “Wu raldika kᵾⱡ nga wu nam ti ndi, wu rorung ei, tᵾpa manga keta kup wamp randpa, numan ngurum nda?” nitim. 37 Mi ik mbo wu ni ndi, nimba mel, “Sameriya wu ei ndi, kont kuⱡpa etpa titim,” nitim. Wote Jisas ndi, mi ik mbo wu ni, kundpa nimba mel, “Nim akup int pukᵾn, Sameriya wu ei itim uⱡ ei mel ku itᵾn pi!” nitim.

Jisas Ni Mata Kᵾn Mariya Raⱡ Nga Manga Ila Purum

38 Wote tᵾnggᵾt kᵾn, Jisas ndi, elim nga kitip kᵾni wu ni kᵾⱡ kunda, kona tila purung. Kona nila amp Mata ni, ti murum ni ndi omba, Jisas rawe etpa tᵾpa mepa, elim nga manga nila purum. 39 Amp Mata nga ᵾngᵾn amp ti, murum ei nga mbi Mariya. Amp Mariya ni, Jisas murum kona nila, nondpa wᵾng ila moⱡpa, ik nitim ni, kum tepa pilpa murum. 40 Ni kᵾn, amp Mata ni, rᵾng mbᵾ, elim kou tᵾpa kun etpa, numan kit pilpa, wote Jisas murum nila omba, kundpa nimba mel, “Wu Nuim ye! Na nga ᵾngᵾn amp ei, na wak roⱡnga, nanim mendpᵾⱡ rᵾng mbᵾ, tᵾp kun etᵾp mor ei ka! Nim ndi, amp ei, kundᵾk nana omba, na tᵾpa rᵾpᵾndangga!” nitim. 41 Wote Nuim ndi, Mata nga nitim ik ni, punt ropa nimba mel, “Amp Mata, Mata ye! Nim rᵾng na mel mbᵾ nga mint, numan ou ndukᵾn, ngukᵾn morᵾn ei mon. 42 Nim mel tenda ti mint, nim kᵾn mon ndonum. Mel ei, Mariya ndi, pilpa tᵾpa morum. Ei, wamp ti ndi, roldpa tᵾmba mel mon!” nitim.

Copyright information for `MED