Luke 12

Ik Kol Uⱡ Mbᵾ Nga Tᵾk Mendᵾk Muⱡᵾi

Tᵾnggᵾt kᵾn, wamp ama minal ok moⱡina, kona ti nimba moⱡnga, wamp mat ndi, mat kᵾmp pol mbila kambilik anggᵾtᵾng. Kona nila Jisas ndi, elim nga kitip kᵾni wu kᵾⱡ, kuimp tepa kundpa nimba mel, “Enim ndi, Perisi wamp mbᵾ nga yis mbᵾ, pilik tᵾk mendᵾk muⱡᵾi! Yis nᵾnt ei, ik kol uⱡ ei, kundᵾp nᵾnt nitim. Wamp mbᵾ ndi, ik nᵾk, mo rok uⱡ etᵾk, kambilik pendᵾk mormin mbᵾ, wote pena ila mot nimba. Wote enim ndi, ik mat rumbuⱡ ila molk nᵾng ik mbᵾ, wote omba ik mat nᵾng ndam, pena ila piyangga wamp mbᵾ ndi, pilik kapⱡa inding. Manga ila mukᵾr, ol tek nᵾng ik mbᵾ, tᵾk peni ila pendᵾk, ui rok ning,” nitim.

Got Kᵾn Mint Mundmong Itᵾi

Wote Jisas ndi, wamp mbᵾ kundpa nimba mel, “Enim nga kᵾng kᵾⱡ, wamp mat ndi, rok kunding ei nga mundmong iti nᵾtᵾi mon! Enim nga min ei, kunda rok kundi nᵾkᵾnding ei ka,” nitim. Jisas ndi, nimba mel, “Enim ndi, nam nga mundmong inding ei nga, na ndi, nᵾmp piral ndamp. Got nga mint mundmong indᵾi! Nambuⱡ emel, Got nga rondᵾⱡ ei ndi, wamp ropa kundpa, wote ndip kona tᵾpa mundpa etᵾm. Na ndi, enim ik kupa kundᵾp nᵾnt. Enim ndi, Got nga mint mundmong indᵾi! Enim pᵾtmᵾn ni ka, wamp mat ndi, ku toea raⱡ rok mundᵾk, kᵾi waⱡ 5 kat rarᵾp rok tᵾtmᵾn. Ni nga, Got ndi, kᵾi waⱡ ti, wak rui narᵾrᵾm mon ni ka! Got ndi, enim wamp mbᵾ nga peng ndi mbᵾ, kᵾmp ropa pilpa pora ndurᵾm. Ei nga, enim mundmong iti nᵾtᵾi! Enim wamp mbᵾ, Got nga kuimp keta ila wamp ingk mbᵾ mormᵾn,” nitim.

Jisas Nga Mbi Paka Runding Ei Mel

Omba Jisas ndi, wamp kᵾⱡ ik mat, kundpa nimba mel, “Wamp ti ndi, anggilpa wamp mbᵾ kundpa, na nga rᵾⱡaip ila mor nim ndam, wote Muⱡᵾl Wu Kupa ei ndi, Got nga anggelo mbᵾ kᵾn, uⱡ tenda ei mel ku etmba. Wote, wamp ti ndi anggilpa, wamp mbᵾ kundpa, na nga rᵾⱡaip ila rᵾk muⱡi nambᵾr nim ndam, wote Muⱡᵾl Wu Kupa ei ndi, Got nga anggelo mbᵾ kᵾn, uⱡ tenda ei mel ku etmba. 10 Wamp nam ti, Muⱡᵾl Wu Kupa ei, ik mura kit mat ngum ndam, Got ndi, wamp ei nga uⱡ kit mbᵾ wak rondᵾmba. Wote, wamp nam ti ndi, Muⱡnga Wingti ei ik mura kit mat ngum ndam, wote Got ndi, wamp ei nga uⱡ kit mbᵾ, wak rundi nandᵾmba mon!

11 Ui mat kᵾn, enim wamp mat ndi, mek puk atinga manga kel na, gapman kot kona mbila, muna mi ik mbo wu na mbᵾ nga kuimp keta mbil angᵾndᵾk, enim waldᵾk, ik mat nᵾng ndam, enim mundmong etᵾk kᵾn, na namba etᵾp ik mat, punt rop nimp nda nᵾk, pili nᵾpᵾlᵾi mon! 12 Ant mong ila kᵾn, Muⱡnga Wingti ei ndi, ik mong mbᵾ, mbo rundangga punt rokᵾn nin ei ka!” nitim.

Ku Moni Ambrᵾm Wu Ropa Wᵾlᵾ Mundrᵾm Ei Nga Ik Ek

13 Wamp ou nduk, mᵾk rok morᵾng rᵾk ting nila wu ti ndi, Jisas kundpa nimba mel, “Ik Mbo Wu ye! Na nga tipam ei, kurᵾm ei nga, na nga ᵾngᵾn wu ei, kundᵾk nana kᵾn, tᵾl nga tipam ei nga moiya mel tepa, purᵾm mbᵾ nga mat, kᵾmp tᵾpa, na ngangga ni!” nitim.

14 Wote Jisas ndi, wu ni punt ropa, waldpa nimba mel, “Nam ndi, na mak ropa kᵾn, enmbil nga mel mbᵾ, molkᵾn kᵾmp tindi,” nitim. 15 Jisas ndi, wamp nimbᵾ, kundpa nimba mel, “Enim pilik kandᵾk, kun etᵾk muⱡᵾi! Tᵾpa kawa ndangga, enim ndi, mel elpa elpa mbᵾ kandᵾk, kum pindi uⱡ ila muⱡing. Nambᵾⱡ emel, enim mel ou nduk, tek moⱡᵾng ndam, mel mbᵾ ndi, enim nga kont muⱡing uⱡ ei, kapⱡa mon,” nitim.

16 Jisas ndi, ik ek ti ropa, wamp mbᵾ, kundpa nimba mel, “Wu ti, ku moni ambrᵾm ei nga, kongᵾn kona ila rᵾng puⱡi, kakᵾna tangga kᵾn, wote wu ei, elim numan ei ndi pilpa, ‘Akup na namba uⱡ ti itimp nda nimba kᵾn, na nga rᵾng mbᵾ, tᵾp timp manga mat, mon pᵾnt ei ka!

18 Akup na pᵾnt uⱡ ei mel, itimp nimba kᵾn, rᵾng tet manga mbᵾ, rokᵾtᵾp kᵾn, manga mam mat rakᵾp mondᵾp mbila, wit na rᵾng kai mbᵾ, manga ila timp.’ 19 Wote elim ndi, nimba mel, “Na akup mel mbᵾ, kapⱡa enim. Na mel kai mbᵾ, tᵾp tep moⱡᵾp pamba mba, pana ou ndupa omba mba. Akup na rᵾk rᵾk rᵾng nomp, nu kai kandᵾp, muⱡ tᵾp ambuⱡᵾp paⱡᵾp, wei muⱡimp ei ka!’” nitim.

20 Wote Got ndi, wu ni, kundpa nimba mel, ‘Nim wu wᵾlᵾ purᵾm ti kant. Akup rumbᵾⱡ ila mint nim kun ndam. ‘Wote, nim nga mel tekᵾn morᵾn mbᵾ, wamp nam ti tᵾmba nda?’

21 Wote Jisas ndi, nimba mel, “Wu mat ndi, mel ou ndupa mbᵾ, tᵾk mᵾk rok molk, wote Got nga kuimp keta ila, wamp kurpa ralk muⱡing,” nitim.

Numan Ou Nduk Pili Nᵾpilᵾi

22 Wote Jisas ndi, elim nga kitip kᵾni wu ni kᵾⱡ, kundpa nimba mel, “Na ndi, ik kᵾⱡ nᵾnt. Enim nga kᵾng orunga, namba rᵾng mat nombᵾn, muⱡ mat raⱡpᵾn itmin nda nᵾk, kel rondᵾk numan ou ndupa, pili nᵾpᵾlᵾi mon! 23 Kont mba mul uⱡ ei uⱡ rondᵾⱡ, wote rᵾng mbᵾ kᵾn kapⱡa mon! Wote, kᵾng kᵾⱡ nga ronduⱡ ei kᵾn, muⱡ mbaⱡ mbᵾ nga rondᵾⱡ ei, kapⱡa mon! 24 Enim kᵾi mbᵾ kᵾnᵾiya! Kongᵾn etᵾk rᵾng mat rᵾⱡi nakᵾrmin ku. Wote, rᵾng manga mat rᵾki nakᵾrmin ku. Wote kᵾi mbᵾ, Got ndi, rᵾng ngurᵾm ila nok andᵾrmin. Enim wamp mbᵾ, kᵾi mbᵾ mel kapⱡa mon ei ka! 25 Wote, enim kᵾⱡ nga ti ndi, numan rondᵾⱡ kat pilpa kᵾn, na pana ralt moⱡᵾp mint, mbi nimba pᵾtᵾm uⱡ ei, kapⱡa mon! 26 Uⱡ kel ei, nim kapⱡa iti nᵾtᵾn. Ei nga wote, enim mel elpa mat nga nambuⱡ emel, numan ou nduk pᵾtmᵾn?

27 Enim ndi, plawa kuk kᵾⱡ kandᵾrmin ei, etpa oⱡa orᵾm mel nant? Wote, plawa kuk mbᵾ ndi, kongun iti natᵾk muⱡ mbal namba iti natᵾtmᵾn ni ka! Ei nga, na enim kundᵾp nᵾnt. Unt king Solomon ndi moⱡpa, elim nga kᵾng orunga, muⱡ minal tepa, moke kai mat itim. Wote, plawa kuk ei nga eng norum uⱡ ei ndi, king Solomon nga moke itim uⱡ ei, mana ndurᵾm. 28 Akup nga plawa kᵾⱡ, mᵾi ila kuk ropa, eng nomba morᵾm. Utᵾma oⱡa ila, tepa mana pangga, tᵾk ndip kᵾⱡing. Plawa mel roldᵾnga kᵾⱡ, Got ndi, ou ndurᵾm ndam, wote enim wamp mbᵾ, mundpa kel mba nda ei! Enim wamp mbᵾ nga mondpa pili mel wei etpa petᵾm. 29 Uⱡ ei nga, enim ndi, kᵾⱡ keⱡ numan pilik kᵾn, namba rᵾng na, nu na mat nuimin ndam, nᵾk pili nᵾpᵾlᵾi, mon! 30 Mbo wamp mbᵾ, mel mbᵾ nga mint pilik keⱡ rondᵾrmin. Wote, enim nga Tipam Got ei ndi, enim nga ting mel mbᵾ, pilpa pora ndurᵾm. 31 Wote enim ndi, Got nga wamp tᵾpa mumᵾk rui uⱡ ei tᵾk, kuimbal mundᵾng ndam, Got ndi, mel mbᵾ pora, enim ngumba mint,” nitim.

Muⱡ Kona Ting Ei Nga Uⱡ Kai Mbᵾ, Tᵾk Mᵾk Rᵾi

32 Jisas ndi, wamp mbᵾ kundpa nimba mel, “Enim wamp rᵾⱡaip kel kᵾⱡ, mundmong iti nᵾtᵾi! Nambuⱡ emel, enim nga Tipam ei ndi, nimba pora ndupa kᵾn, Got nga wamp tᵾpa mumᵾk rui uⱡ ei, enim nguimp nitim. 33 Enim nga mel tek moⱡᵾng mbᵾ, rarᵾp rok, ku tᵾk, wote ku moni mbᵾ tᵾk, wamp kurpa moⱡᵾng mbᵾ, tᵾk rapᵾndᵾk ngᵾi! Ku moni wal rondᵾⱡ kat kit muⱡi nambᵾrᵾm kᵾⱡ ila mel kai mbᵾ, tᵾk wal rok, wi muⱡ kona ila tiyᵾi! Kona ila wu raⱡ rui narᵾmba, kindᵾp nok ti nᵾting, tᵾtᵾp ropa uⱡ ti, iti natᵾmba. 34 Enim nga mel kai mbᵾ, teng kona ila wote, enim nga mundmong ei kunda temba,” nitim.

Kongᵾn Wamp Mbᵾ Tᵾk Kun Etᵾk Nokᵾndᵾk Muⱡeing

35 Jisas ndi, wamp mbᵾ kundpa, nimba mel, “Enim nga muⱡ mbal mbᵾ tᵾk, gi nduk ralk, lam kiya mbᵾ, anmbil nangga. Tᵾk kun etᵾk muⱡᵾi! 36 Enim nokᵾndᵾk muⱡing uⱡ ei, wu nuim na ti, kang amp tᵾk etmin ila mba, rᵾng nomba moⱡpa, wote yant omba, manga kumba roⱡnga kᵾn, kongun wu kᵾⱡ ndi molk, tᵾkrᵾk ok, manga kumba tᵾtmᵾn uⱡ ei mel. 37 Wote, wu nuim ei, omba kandrᵾm mel, kongᵾn wu kᵾⱡ ur pi napᵾk mormin kᵾⱡ, ambulk palk muⱡeing. Na ndi, enim ik kupa kat kundᵾp nᵾnt. Wu nuim ei, elim nga muⱡ mbal ei, tᵾpa gi ndupa raⱡpa, wamp mbᵾ, rat puⱡ ila, muⱡᵾi nimba. Wote elim ndi, wamp mbᵾ, rᵾng ngumba ei nga nu kundpa moⱡmba. 38 Wote, wu nuim ei, rumbᵾl rangga omba, muna ou rumbuldi omba, muna wote rang mba tangga omba, kᵾnangga kongᵾn wamp kat ur pi napᵾk, tᵾk kun etᵾk moⱡᵾng wamp kᵾⱡ, kapⱡa ambulk palk muⱡeing. 39 Wote, enim uⱡ ti pilᵾi! Manga puⱡ wamp ei ndi, kundᵾp wamp ti omba, ei nga pilim ndam, elim nokundpa moⱡpa, elim nga mel mbᵾ poⱡ tᵾmba. 40 Uⱡ ei mel ku, enim akup tᵾk kun etᵾk muⱡᵾi! Enim ndi, Muⱡᵾl Wu Kupa ei, ui nawᵾmba, rᵾk pilik moⱡᵾng ui tila omba,” nitim.

Kongᵾn Wamp Kit Kai Mbᵾ Nga Ik Ek

41 Pita ndi, Jisas ni, waldpa nimba mel, “Wu Nuim ye! Nim ik ek rokᵾn nᵾn ik kᵾⱡ, tᵾn mint kundkᵾn nᵾn, muna wamp mbᵾ, kunda kundkᵾn?” nitim.

42 Wote Jisas ndi, nimba mel, “Kongᵾn wamp nam ti, elim numan kai pilpa, elim nga kongᵾn ei etpa kai mondrᵾm. Elim nga wu nuim ei ndi, elim to ropa mondpa kᵾn, elim nga kongᵾn wamp mbᵾ rᵾp endpa, rᵾng nuing wi ei, pilpa mint, kongᵾn wamp mbᵾ rᵾng ngumba. 43 Wote, wu nuim ei, yant omba kᵾnangga kᵾn, elim nga kongᵾn rᵾp endpa, moⱡᵾm ndam, kongᵾn wu ei, ambuⱡpa paⱡpa moⱡmba. 44 Na ndi, enim ik kupa kat kundᵾp nᵾnt. Wu nuim ei ndi, elim nga mel mbᵾ pora, kongᵾn wu ei ndi, rᵾp itangga,” nimba. 45 “Wote kongᵾn wu ei, elim nga numan ila keⱡ rondpa kᵾn, elim nimba mel, ‘Wu nuim ei, tᵾkrᵾpa ui nawᵾmba ei ka!’ nimba. Wote, kongᵾn wamp mat, tᵾmbᵾⱡ ndi ropa, rᵾng tem mbᵾ nomba, nu nomba kupᵾr ropa muⱡangga kᵾn, wote wu nuim ei omba, kᵾnangga kongᵾn wu ei, tᵾpa kun iti natᵾpa moⱡᵾm ndam, wu nuim ei ndi, kongᵾn wu ei etpa kit mondpa, kongᵾn etᵾk kit mondᵾrmin wamp mbᵾ kᵾn, tᵾpa rᵾp rondᵾmba.

47 Kongun wu nam ti, elim nga wu nuim ei nga kongᵾn endᵾmba kᵾⱡ, pilpa pora ndupa, wote elim tᵾpa kon iti natᵾpa moⱡᵾm ndam, tᵾmbᵾⱡ ndi romba. 48 Wote, kongᵾn wu nam ti ndi, elim nga wu nuim ei nga endᵾmba uⱡ kᵾⱡ, pili napilpa, uⱡ kit mat em ndam, elim nga wu nuim ei om ei kᵾn, kongᵾn wu ei, tᵾmbᵾⱡ wei wei etpa romba. Mel ou ndupa tᵾm wamp ei ndi, mel ou ndupa, punt ropa ngumba. Wote, mel ou ndupa, minal tᵾm wamp ei ndi, to ei mel ku, punt ropa ngomba,” nitim.

Jisas Ni, Wamp Rᵾⱡaip Mbᵾ Tᵾpa Elpa Elpa Mundᵾmba Ei Nga Urᵾm.

49 Wote Jisas ndi, wamp mbᵾ, kundpa nimba mel, “Na omp kᵾn, ndip ti, mᵾi kona ila rop mundᵾr ei, tᵾkrᵾpa ndip nangga nᵾmp pᵾnt. 50 Na nu ti, mel ku timp ei, ti natᵾp mor ei nga numan ei mbun enim. 51 Enim ndi, pilik kᵾn, na ya mᵾi kona ila mana ur ei, wamp nga moⱡpa kundi uⱡ ei, mep ui nᵾwᵾr! Na ndi, enim kundᵾp nᵾnt. Na omp wamp rᵾⱡaip mbᵾ, tᵾp elpa elpa mundimp ei nga ur. 52 Akup ei kᵾn, wote kunda ku, wamp mbᵾ, paip kat manga tenda ila petmin ndam, raⱡ int tanggila, raldika yant tangina, el puⱡa wamp ralk muⱡing. 53 Wamp oi rok muⱡing ei mel, tipam kangᵾm raⱡ, el puⱡa wamp mel muⱡᵾnggil. Mam mbuⱡam raⱡ, el puⱡa wamp mel muⱡᵾnggil. Apᵾm apᵾm raⱡ, el puⱡa wamp mel muⱡᵾnggil,” nitim.

Jisas Omba Ei Nga Tᵾk Minding Ei Mel.

54 Wote ni kᵾn, Jisas ndi, wamp rᵾⱡaip mam ti morᵾng ila, kundpa nimba mel, “Enim ndi, wᵾl ant ei, mana purᵾm orunga, kona kopa kᵾⱡ kandᵾk kᵾn, kona ndamᵾng romba nᵾtmin ei, kopa kona rorᵾm. 55 Wote enim ndi, molk kandᵾk pilik kᵾn, kona ant ei, al orᵾnga rondᵾⱡ mundpa oⱡa onᵾm ei, ant mba nᵾtmin ei, kopa kona ant purᵾm. 56 Enim ndi, uⱡ kandᵾk nᵾtmin kᵾⱡ, enim wamp ik kol rormin ei ka! Enim ndi, muⱡ mᵾi raⱡ ila oⱡa orᵾm uⱡ kᵾⱡ, kandᵾk pilik kᵾmp tᵾtmᵾn. Enim nambuⱡ emel, akup ui ila nga uⱡ, enim kᵾⱡ pilik kandᵾk, kᵾmp ti natᵾtmᵾn,” nitim.

57 Wote Jisas ndi, wamp mbᵾ, kundpa nimba mel, “Nambuⱡ emel, en enim ndi, uⱡ kun mbᵾ kᵾmp tᵾk, pilik kai etᵾk, kᵾni nakᵾndᵾrmin. 58 Wamp nam ti ndi, nim kot indimp nim wamp ei kᵾn, rᵾp rokᵾⱡ, nombuⱡa mam ila pukᵾⱡ kᵾn, mana nᵾkᵾⱡ kun mundi! Tᵾpa kawa ndangga wamp ei ndi, nim mepa mba, kᵾmp tᵾmba pᵾtmᵾn wu kᵾⱡ ngangga! Wu kᵾⱡ ndi, nim mek puk, el wu kᵾⱡ ngangina, wote el wu kᵾⱡ ndi, nim mek puk, kan ngangina ila pekᵾn molkᵾn kᵾn, nim ku moni mak rong kᵾⱡ, ngᵾkᵾn mint, kan manga ila wak rokᵾn uin,” nitim.

Copyright information for `MED