Luke 13

Numan Ropᵾl Rui Narᵾm Wamp Ei Uⱡ Kit Mbᵾ Nde Ropa Kondᵾmba

Ui ni kᵾn, Jisas ndi, wamp ik mbo endpa moⱡnga kᵾn, wu mat rᵾk ila morᵾng nimbᵾ ndi, Galili wu mbᵾ etmin uⱡ mbᵾ mel, Jisas timan rok ngok, nᵾk mel, “Pailot ndi, elim nga el wu mbᵾ, kundpa nimba mel, ‘Enim ndi, wamp rok kondᵾrmᵾn mema mbᵾ, rat pol ila mana tek, kng mema mbᵾ kalk oⱡa pol ila tek, Got kᵾn oi nduk, angge nᵾk ngᵾi!’” nitim. Wote Jisas ndi, wu mbᵾ, kundpa nimba mel, “Galili wamp uⱡ kit minal etmin mbᵾ ndi etᵾk, Galili wamp mat rok, mana ndurmin ei! Ei, uⱡ kit mbᵾ nga puⱡ ti mon ei ka! Na ndi, enim ik kupa kat kundᵾp nᵾnt. Enim numan ropᵾl rui narᵾng ndam, enim i ku etᵾk kuⱡing. Unt, Sailom nga manga ruⱡ ndi, ᵾtkil ropa mana omba, wamp 18 ropa kundrᵾm. Wamp kᵾⱡ nga uⱡ ⱡawa etᵾng kᵾⱡ ndi, Jerusalem wamp kᵾⱡ rok mana ndui nandrᵾng ei? Ei mon! Wote na ndi, enim ik kun kat kundᵾp nᵾnt. Enim numan ropᵾl rui narᵾng ndam, uⱡ ⱡawa mbᵾ mel ku, enim kᵾn uⱡ i ku etmba!” nitim.

Nde Mong Rui Narᵾm Ei Nga Mel Ik Ek

Wote Jisas ndi, wamp ik mbo endpa, ik ek kat ropa, nimba mel, “Wu ti ndi, elim nga wain pana ila rᵾk nde pik kat, raⱡpa pinditim ila kᵾnimp nimba mba kᵾn, yant omba kᵾndrᵾm mel, nde pik kᵾⱡ, mong ropa pi nᵾptᵾm. Elim nga pana ila rᵾp wu ni, kundpa nimba mel, ‘Nde pik kᵾⱡ, pana kona ila rᵾk anggilinga, pana raldika mong rui narᵾm ei ka! Koⱡmung etkᵾn, tᵾkᵾn mundi! Nambuⱡ emel, mᵾi kopᵾng etpa, pora ndupa anggᵾtᵾm?’ nitim. Kongᵾn wu ni ndi, Wu Nuim kundpa, nimba mel, ‘Pana tenda ila mint, nokᵾndᵾp moⱡᵾp kᵾnmin. Mᵾi rᵾk rᵾk etᵾp, kng kau te maldᵾp mundᵾp tamba kᵾn, wote pana mat ila, mong rui narᵾm ndam, nᵾn uⱡ ei mel koⱡmung etkᵾn mundᵾn,’” nitim.

Jisas Ndi, Mowi Kor Ui Ila Amp Ti Etpa Kai Itim

10 Jura wamp nga Mowi Kor ui ni kᵾn, Jisas ndi, wamp mbᵾ, atinga manga kel tila mukᵾr ik mbo inditim. 11 Rᵾk nila amp ti, kur kit ila rukᵾr orᵾnga murᵾm. Kur kit rukᵾr orunga moⱡpa, amp ei nga mbᵾⱡ ming ei, etpa kᵾrᵾiya endilinga, pana 18 omba purᵾm. 12 Wote Jisas ndi, amp ni kandpa, wi ropa wangga nitim ila oⱡunga, amp ni, kundpa nimba mel, “Na ndi, nim nga kui ei, etᵾp pora indamba pᵾn,” nitim. 13 Wote Jisas ndi, ki oⱡa ndupa, amp ni ambuⱡnga, tᵾngᵾnda mint, kui ei pora nilingga, amp ni oⱡa anggilpa mba, Got nga mbi paka rᵾndrᵾm. 14 Jisas ndi, Mowi Kor ui ei kᵾn, amp kur murᵾm ni, etpa titim ni nga, atinga manga kel rᵾp wu nuim ni, popᵾⱡ kuⱡpa, wamp morᵾng nimbᵾ, kundpa nimba mel, “Rumbᵾⱡ 6 kᵾⱡ ila kongᵾn etmin ni ka! Enim kui wamp mbᵾ, kongᵾn ui mbila, kui etᵾk kapⱡa inding nᵾk wᵾi! Mowi Kor ui mbila, kui ei, etᵾk kapⱡa inding nᵾk, wu mat, wᵾldi nᵾwᵾldᵾi mon!” nitim. 15 Wote, Wu Nuim ndi, ik nitim punt ropa, nimba mel, “Enim ik kol rok rormin wamp mat kant. Enim nga ik nᵾk, uⱡ etmin mbᵾ, to tenda mon ei ka! Enim wamp mbᵾ ndi, enim nga kng kau na, donggi na mbᵾ, nu nuing nᵾk mek, Mowi Kor ui ei kᵾn purmin. 16 Ya amp Eiparam nga mbuⱡam ei, Seitan ndi, kan ngurᵾm ila pana 18 omba purᵾm ei ka! Ya amp ei, kan ngurᵾm uⱡ ei, Mowi Kor kᵾn etᵾp tᵾp, mundi nᵾmᵾndamp, mon ei?” nitim. 17 Jisas ndi, ik nitim ni pilik, el puⱡa wamp mbᵾ, pipil minal kurᵾng. Wamp mat ndi, Jisas nga uⱡ min ngᵾn pi itim ni kandᵾk, ambulk palk morᵾng.

Nde Mastat Mong Ei Kᵾn Yis Ei Kᵾn

18 Wote Jisas ndi, wamp nimbᵾ, kundpa nimba mel, “Got nga wamp tᵾpa mumᵾk rui uⱡ ei namba mel ei nda? Wote, ik ek rop namba namp nda? 19 Nde mong ei, mbi tek mastat nᵾtmin. Wu ti, nde mastat mong ei, tᵾp mepa mba, elim nga pana ila rᵾrᵾm. Wote, nde mastat oⱡa omba, omung etpa, puⱡa mam mbᵾ etpa eling kᵾn, kᵾi mbᵾ ndi ok, nde puⱡa mbila mi manga rok petmin,” nitim. 20 Wote Jisas ndi, ik ti ku, wamp mbᵾ kundpa, nimba mel, “Got nga wamp tᵾpa mumᵾk rui uⱡ ei, ik ek rop namba namp nda? 21 Kona ei, yis mel kapⱡa. Amp ti ndi, yis oi ndupa, plawa kuⱡpa, ming ila oi ndupa kᵾn, ropa oⱡa mana etpa telinga, wote mepa oⱡa orᵾm ni mel kapⱡa,” nitim.

Keta Puⱡ Puⱡ Kel Ei

22 Wote Jisas ni, Jerusa-lem kona peng ou ila mba pilpa purᵾm. Kona peng kel nimbila, wamp ik mbo endpa ku purᵾm. 23 Wu ti ndi, Jisas waldpa, nimba mel, “Wu Nuim ye! Got ndi, wamp tenda tenda etpa, rukᵾr titim tᵾmba nda?” nitim. Wote Jisas ndi, wamp mbᵾ kundpa, nimba mel, “Enim wamp mbᵾ, ombil pendᵾk, keta puⱡ puⱡ kel mel wei ila mukᵾr ping. Na ndi, enim ik kupa kat kundᵾp nᵾnt ei ka! Wamp puⱡi mbin nᵾk etmin ku. Wote, kapⱡa mon! 25 Wote, manga puⱡ wu ei ndi omba, manga kumba ᵾngᵾndangga kᵾn, enim manga keta puⱡ puⱡ pena orᵾnga anggilik kumba rok, gep nduk molk, nᵾk mel, ‘Wu Nuim ye! Tᵾn onmᵾn, manga kumba tindᵾn ka!’ ning. Wote yant ndupa, enim kundpa, i etpa nimba mel, ‘Na ndi, enim pili napᵾt, wamp kᵾⱡ ka! Enim kona nant orunga ong wamp mbᵾ nda?’ nimba. 26 Wote enim ndi, i ik punt rok, nᵾk mel, ‘Tᵾn nim kᵾn rᵾp rok, nu na, rᵾng na mbᵾ moⱡpᵾn nombᵾn itmin ni ka! Nim ndi moⱡᵾn, tᵾn nga kona ila, ik mbo endkᵾn itᵾn ku ni ka!’ ning. 27 Wote, enim aldpa kundpa, nimba mel, “Enim kona nant orunga wamp kᵾⱡ? Na ndi, enim pili napᵾt wamp kat ei ka! Enim uⱡ kit mbᵾ etmin wamp kᵾⱡ, kelik pᵾi!” nimba. 28 Wote, enim rop enim ndi, kᵾning ei, Eiparam, Aisak, Jekop, na painui wu mbᵾ pora, Got nga wamp tᵾpa mumᵾk rui kona ila rukᵾr moⱡangina kᵾning. Enim wamp mbᵾ ndi, puk manga keta puⱡ puⱡ pena orunga molk, ka etᵾk, gu konggᵾlᵾk, gi nduk muⱡing. 29 Al ant oⱡa ui orᵾnga, wᵾl ant mana pi orᵾnga, met orᵾnga, wi orᵾnga, wamp mbᵾ ok, Got nga wamp tᵾpa mumᵾk rui kona ila rukᵾr rᵾng nok muⱡeing. 30 Enim pilᵾi! Akup nga ui ila wamp mat ok, kuimbal mormin mbᵾ, wote ok akil ting. Akup nga ui ila wamp mat ok, akil

tek mormin wamp mbᵾ, wote ok, kuimbal muⱡeing,” nitim.

Jisas Ni Jerusalem Kona Peng Ou Ei Kont Kurᵾm

31 Ant mong ila mendpᵾⱡ, Perisi wu mat ndi ok, Jisas murᵾm ni, kundᵾk nᵾk mel, “Nim ndi, ya kona ei, wak rokᵾn, kelkᵾn kona ronggᵾt elpa tila pi! Nuim Erot ndi, nim ropa kondᵾmba ei ka!” nᵾtᵾng. 32 Jisas ndi, wu nimbᵾ, kundpa nimba mel, “Enim ndi puk, owa rakra kit ei, kondᵾk nᵾk mel, ‘Akup kᵾn, utᵾma raⱡ ila, na ndi, wamp mbᵾ nga kur kit moⱡᵾm mbᵾ, tᵾp mundᵾp, kui rorᵾm wamp mbᵾ, etᵾp kapⱡa endᵾp muⱡimp. Ui onᵾnga kuⱡ ila moⱡᵾp, kongᵾn ei etᵾp mbo pora nduimp, nᵾm nᵾk kondᵾk nᵾi!’ 33 Wote akup ei kᵾn, utᵾma kᵾn, kona ila na nanim kelip pamp. Painui wu ei, kona elpa ila muⱡangga, rok kundi nᵾkᵾnding, mon. Jerusalem kona peng ou ila mint muⱡangga, mint rok kunding.

34 Jisas ndi, ka etpa wi ropa nimba mel, “Enim Jerusalem, Jerusalem wamp mbᵾ ye! Enim ndi, painui wu mbᵾ, rok kundᵾk ku etmin. Got ndi, wamp mat tᵾpa enim ngurᵾm mbᵾ, ku ndi rok kondrᵾng ei ka! Wote na ndi, enim wamp mbᵾ etᵾp, kᵾi kulda mam ei ndi, waⱡ mbᵾ tᵾpa, pou ila ruk ruk etᵾm ni mel itimp nᵾmp et ku. Ei wote, enim wamp mbᵾ ndi, numan ngui nganggᵾrmin. 35 Enim pilᵾi! Got ndi, enim wak romba ei kanmin mon. Na ndi, enim ik kun kat kundᵾp nᵾnt. Enim ndi, na kᵾni nakᵾndᵾk moⱡangina. Wote ui tila nᵾk mel, ‘Nuim ei nga ila om wu ei, Got ndi, memp pindangga ning ei ka!’” nitim.

Copyright information for `MED