Luke 14

Jisas Ndi, Kui Wu Ti Elpa Titim

Wote, Jura wamp nga mowi kor ui ni kᵾn, Perisi wu nuim ting manga ila, Jisas rᵾng nomba pilpa purum. Perisi wu mbᵾ ndi, Jisas rᵾp etᵾk kandᵾk morung. Kona ila wu ti nga kᵾmp ki orum wu ti, Jisas murum ila nondpa murum. Wote Jisas ndi, wu ni kandpa kᵾn, mi ik mbo wu na, Perisi wu na nimbᵾ, waldpa nimba mel, “Mowi kor ui ei kᵾn, tᵾn ndi kanda, kui wamp mbᵾ etᵾp, kai mundmin muna mon nda?” nitim. Wote wu nimbᵾ, ik mat ni nandᵾk morung ila, Jisas ndi, kui wu ni, tᵾpa mepa mba, kui rurum ni etpa, kapⱡa endᵾp pi nilinga, kelpa purum. Wote Jisas ndi, wu nimbᵾ, kundpa nimba mel, “Enim nga kangambuⱡa ti kep, muna kng kau ti kep, kut ila mana mba pem ei kᵾn, mowi kor ui ila kapⱡa, tᵾkrᵾk puk, oⱡa ting muna mon nda?” nitim. Wote, wu nimbᵾ ndi, Jisas nga nitim ik ni, punt rok ik mat ni nandᵾtᵾng.

Nim Nga Kᵾng Orunga, Mekᵾn Mana Pi

Perisi wu ei nga rᵾng kurum kona nila, Jisas moⱡpa, kᵾndrᵾm mel, wu mat en enim raⱡ pol mat kuimbal titim nimbila, muⱡmin mint nᵾk pilik orung. I etᵾng ila, Jisas ndi, ik ek ropa, wamp nimbᵾ, kundpa nimba mel, “Wu ti ndi, kang amp tᵾmba ila rᵾng koipa, ‘Enim wᵾi!’ nitim. Nimba kᵾn, wi rom ndam, nim pukᵾn, rat pol kuimbal muⱡi nᵾmbᵾⱡi. Wu ti, elpa mbi moⱡpa etᵾm ti nga to rok tᵾndᵾng tila, nim pili napilikᵾn puk muⱡᵾn. Nim okᵾn, kuimbal muⱡana kᵾn, wote rᵾng koim puⱡ wu ni ndi, nim mᵾn ila omba, nim kundpa, nimba mel, ‘Nim morᵾn rat pol kuimbal ei, wu ti elpa ngangga!’ Wote, nim pipil kulkᵾn, pukᵾn met tᵾp orunga, rat pol mbila muⱡᵾn. 10 Wote. uⱡ ei nga, wu ti ndi, rᵾng koipa nim ui nimba wi rom ndam, nim pukᵾn, tip orunga muⱡana. Wu ei ndi, nim mᵾn ila omba, nim kundpa, nimba mel, ‘Ana ye! Nim okᵾn, rat pol kuimbal muⱡᵾn ui nangga kᵾn, nim okᵾn, rat pol kuimbal moⱡᵾn, wamp nga kuimp keta ila mbi ou tᵾkᵾn, rᵾng nokᵾn muⱡᵾn.’ 11 Wamp nam ti, elim nga kᵾng orunga mepa oⱡa mba moⱡum ndam, Got ndi, wamp ei, ropa mana ndumba. Wamp ti elinga, kᵾng orunga mepa mana mba moⱡum wamp ei, Got ndi, wamp ei, paka rondᵾmba,” nitim.

12 Wote Jisas ndi, rᵾng kuitᵾm wu ndi, kundpa nimba mel, “Nim ndi, rᵾng koikᵾn nuin etkᵾn kᵾn, nim nga wamp rᵾⱡaip tenda na, ᵾngᵾnᵾl na, kng mel pi wamp mbᵾ, wi rokᵾn, weing ni nᵾni! Wote, wamp mbᵾ ndi, rᵾng mat koikᵾn, nim wi rangina, pun ndam, nim nga rᵾng koikᵾn ngurun mbᵾ, punt rok yant nguing. 13 Ei mon! Nim ndi, rᵾng mam ti kuin ndam, wamp kurpa na, kᵾmp ki kit wamp na, mong ti wamp mbᵾ, wi rok nana ok rᵾng neing. 14 Got ndi, nim memp pendᵾmba. Nambuⱡ emel, wamp kit mbᵾ ndi, nim nga rᵾng ngᵾn mbᵾ nok kᵾn, punt rui nᵾring. Got ndi, nim punt ropa ngumba ui ila, wamp kun kai korung wamp mbᵾ, on kona ila ⱡoprᵾk yant ong,” nitim.

Rᵾng Mam Ti, Nuing Ei Nga Ik Ek

15 Wote, rᵾng nok morung mou ila rᵾk wu ti, Jisas kᵾn murum ni ndi, ik nᵾtᵾng ni pilpa, Jisas kundpa, nimba mel, “Got nga wamp tᵾpa mumuk rui kona ila rᵾng nok moⱡᵾng mbᵾ, kai pilik muⱡing,” nitim. 16 Wote Jisas ndi, wu ni, kundpa nimba mel, “Wu ti ndi, rᵾng mam ti koipa kᵾn, wamp puⱡi rᵾng neing wᵾi nimba wi rorum. 17 Wote, rᵾng koipa ui ei kᵾn, elim nga kongun wu ti, tᵾpa mundrum ila mba, wamp rᵾng neing weing nimba, unt to rurum mbᵾ, wi ropa nimba mel, ‘Rᵾng mbᵾ, tᵾpa kun etpa pora ndum, neing wᵾi!’ nitim. 18 Wote wamp nimbᵾ, pi nᵾpᵾmᵾn nᵾtᵾng. Wu ti ndi, nimba mel, ‘Na kongun kona ti, rarᵾp nop tint ei, mbo kᵾnimp mbi ent. Na pi nᵾpimp,’ nitim. 19 Wu ti ndi, nimba mel, ‘Na pi nᵾpimp, kng kau 10 kat rarᵾp rop tint kᵾⱡ, kongun iting, muna mon nda? Na mbo kᵾnimp ent,’ nitim. 20 Wu ti ndi, nimba mel, ‘Na amp kokila ti, tᵾp tep mor ei ka, pi nᵾpimp,’ nitim. 21 Wote, kongun wu ni ndi, wamp ik nᵾtᵾng nimbᵾ, pilpa yant omba, wu nuim ei, kundpa nitim. Wu nuim ni pilpa, popᵾⱡ kuⱡpa, elim nga kongun wu ni, kundpa nimba mel, ‘Nim tᵾkrᵾk mint pukᵾn, kona peng ei nga nombuⱡa ou kel tetᵾm mbila, wamp kurpa na, kᵾmp ki kit wamp na, mong ti wamp na mbᵾ, tᵾk mekᵾn wana, na nga manga ei, mukᵾr ti nangga!’ nitim. 22 Kongun wu ni ndi, wu nuim ni nga nitim ni mel, etpa pora ndupa kᵾn, wu nuim kundpa, nimba mel, ‘Nim nin ni mel int ei nga, wote manga ni, ti ni nanᵾm,’ nitim. 23 Wote, wu nuim ni ndi, kongun wu ndi, kundpa nimba mel, ‘Nim kona peng ei, wak rokᵾn, nombuⱡa kel ila pukᵾn, kinana wamp mat moⱡᵾng ndam, ik ronduⱡ mundkᵾn wamp mbᵾ kᵾn nana, wamp mbᵾ, ya na nga rᵾng kuimp ila wangina, manga ei ti nangga! 24 Na ndi, enim kondᵾp nᵾnt. Unt wamp mat, wi rᵾr mbᵾ ndi, na nga rᵾng koint mbᵾ nga kot, ama nomba kᵾni nakᵾndᵾmba!’” nitim.

Wamp Ti Jisas Pep Romba Ndam, Mᵾi Kona Uⱡ Mbᵾ Wak Rangga

25 Ni kᵾn, akil tepa wamp rᵾⱡaip mam ti, Jisas kᵾn rᵾp rok purung. Wote Jisas ndi, ropᵾl ropa, wamp mbᵾ kundpa, nimba mel, “Wamp ti, na kᵾn pep ropa uimp nimba pilim ndam, elim nga tipam mam raⱡ kep, amp kangambuⱡa mbᵾ kep, ᵾngᵾnᵾl kimᵾnᵾl mbᵾ kep, wote elim nga mul uⱡ ei kep, wak ropa om wamp ei, na nga kitip kᵾni wamp ti moⱡmba. 27 Wamp ti, elim nga uⱡ mbun mindil mbᵾ, nde peta mel, mi namᵾmba, na pep rom ndam, wamp ei, na nga kitip kᵾni wamp muⱡi nambᵾⱡmba. 28 Wote, wu nam ti ndi, manga mam ti, rᵾkimp nimba kᵾn, ku moni namba iti ndi, manga ei, rakᵾp timp nda nimba, numan ila kuimp tepa to rorum. 29 Kuimp elim tepa, elim nga numan ila pilpa, kun iti natᵾpa kᵾn, ku ronduⱡ etpa pendᵾm ndam, wote mang ei rakpa, pora ndui nᵾndangga kᵾn, wamp mbᵾ ndi kandᵾk, ik raka rondᵾk nᵾk mel, ‘Manga ei rakpa, pora ndui nᵾndrᵾm ei ka!’ ning. 31 Wu nuim ti mba, wu nuim ti kᵾn, el itimp nimba kᵾn, kuimp tepa, elim nga numan kuimp tepa pᵾtᵾm. Elim nga el wu 10,000 tep morum. Wu nuim ti nga el wu 20,000 mepa omba, elim kᵾn el pendpa, elim rok munding, muna mon nda nimba, unt pᵾtᵾn kuimp tepa pᵾtᵾm. 32 Wu nuim ei ndi, elim kᵾn kapⱡa mon nimba, pilpa kᵾn, wu nuim ei, ruⱡ etpa moⱡnga kᵾn, wu mat tᵾpa, nomba uⱡ rung mundpa kᵾn, el ei, rop kundimp nᵾtᵾm. 33 Uⱡ ei mel ku, wamp nam ti ndi, elim nga mel mbᵾ, wak rui narᵾm ndam, na nga kitip kᵾni wamp muⱡi nambᵾⱡmba,” nitim.

Ip Kuta Nga Tᵾngᵾn Ti, Mon Ei Nga Ik Ek

34 Wote Jisas ndi, ik ti, nimba mel, “Ip kuta ei, mel kai. Wote, ip kuta nga tᵾngᵾn ei, pora nim ndam, namba uⱡ ti etpᵾn kᵾn, ip kuta nga tᵾngᵾn ei kai moⱡmba. 35 Ip kuta kit morum ei, tᵾpᵾn kongun kona na mbila, ropᵾn mundi namᵾndᵾrmᵾn. Kng kau te na mbila, tᵾp rak ndupᵾn, pana kona na mbila, mundi namᵾndᵾrmᵾn ku. Ropᵾn mundpᵾn ketmin ni ka! Wamp ti, kum nombuⱡa tem ndam, ik mong ei pilᵾi!” nitim.

Copyright information for `MED