Luke 15

Kng Sipsip Ti Mba Tiki Purum Ei Nga Ik Ek

Wote, ku moni takis tᵾk, uⱡ kit mbᵾ etᵾk etᵾng wu nimbᵾ, Jisas ni moⱡpa, ik nitim ila kum tek, pilmin nᵾk, nondpa orung. Wote, Perisi wu na, mi ik mbo wu na nimbᵾ ndi, ik mura etᵾk, Jisas kundᵾk, nᵾk mel, “Wu ei, wamp kit mbᵾ kᵾn, ki ngumba moⱡpa, rᵾng rak ndupa moⱡpa, nomba enim ei ka!” nᵾtᵾng. Wu kᵾⱡi nᵾtᵾng ila, wote Jisas ndi, ik ek kat ropa, wu kᵾⱡ kundpa, nimba mel, “Enim wu mbᵾ nga ti ndi, kng sipsip 100, ᵾt ropa tepa muⱡangga kᵾn, wote kng sipsip tenda ti, andpa mba tiki poⱡpa, pena pem ndam, kng sipsip puⱡ wu ei ndi, kng sipsip 99 wak ropa tila, mondpa kelpa mba, kng sipsip tenda ei, kandᵾp timp mint nimba, kurpa purum. Mba kurpa kandpa tᵾpa kᵾn, tᵾpa pendᵾk ombil ila koma ropa mepa, rui mᵾi nimba, mepa manga kona omba kᵾn, elim nga wamp rᵾⱡaip tenda na, wamp puⱡ mbᵾ, wi ropa rukᵾr tᵾpa, nimba mel, ‘Na nga kng sipsip tenda ti, andᵾp mba tiki purum ni, kandᵾp tᵾp mep, ont nitim mel kᵾn, wamp mbᵾ elim kᵾn ambulk palk tᵾtᵾng,’ nitim. Jisas ndi, nimba mel, “Na ndi, enim ik kupa kat kundᵾp nᵾnt. Ya mana nᵾtmin uⱡ ei mel ku, ambulk palk wamp kit ti, numan ropᵾl rorum ei kᵾn, wi muⱡ kona ila ambulk palk, ei mel ku nᵾtmᵾn. Wamp 100 kᵾⱡ, numan ropᵾl rok, pora nduk mormin nᵾk pilik mormᵾn. Ei mon! Wamp tenda ei mint, uⱡ kit mbᵾ etpa morum ni, numan ropᵾl rorum ei kᵾn, wamp ama ambulk palk tᵾtᵾm,” nitim.

Ku Moni Mana Purum Ei Nga Ik Ek

Wote Jisas ndi, ik ek ti ropa, wamp mbᵾ, kundpa nimba mel, “Amp ti, elim ku silpa mong ruri kat, tepa muⱡangga kᵾn, ku mong ruri tenda ti, manga mukᵾr etpa, tᵾpa mana ndupa etᵾm ndam, wote namba uⱡ etmba? Ku meiya kandpa, manga brum mepa, kandᵾp timp nimba kᵾrᵾrᵾm. Amp ni, elim nga ku mong mana purum kandpa tᵾpa kᵾn, elim nga wamp mbo na, kona tenda wamp na mbᵾ, wi ropa rᵾk tᵾpa, kundpa nimba mel, ‘Na nga ku mong ruri ti, mana purum ni, akup kurᵾp kandᵾp tint, nitim ila wamp mbᵾ kᵾn, ku moni puⱡ amp ei kᵾn, ambulk palk minal,’ nᵾtᵾng. 10 Wote Jisas ndi, wamp mbᵾ, kundpa nimba mel, “Na ndi, enim ik kupa kat kundᵾp nᵾnt. Ya mᵾi kona ambulk palk nᵾtmin uⱡ, to ei mel ku, wamp kit ti, numan ropᵾl rorum ei kᵾn, Got nga wi muⱡ kona anggelo mbᵾ, uⱡ i etᵾk, ambulk palk,” nᵾtmin.

Wu Ti Nga Kangᵾm Wu Ti, Tiki Purum Nga Ik Ek

11 Wote Jisas ndi, ik kat wamp mbᵾ, kundpa nimba mel, “Wu ti nga kangᵾm wu raⱡ mitim. 12 Kang wu akil ni ndi, tipam kundpa, nimba mel, ‘Na ndi, numan ti pᵾnt ei mel, nim ndi mel mbᵾ, kᵾmp tᵾkᵾn mat, kang wu komun ei ngukᵾn, na nga nguin mat, akup ngui!’ nitim. Wote tipam ndi, mel nimbᵾ, kᵾmp tᵾpa, kangᵾm wu raⱡ ngurum. 13 Kang wu akil ei nga ngurum mel nimbᵾ, tᵾkrᵾpa mint tᵾpa, mᵾk ropa wamp mbᵾ kᵾn, ku moni tᵾpa mepa, nung nimba, kona ruⱡ ronggᵾt muⱡimp nimba purum. Kona nila moⱡpa, ik pili napilpa, ku moni mepa purum mbᵾ, etpa pora ndurum. 14 Ku moni na mel nimbᵾ, etpa pora nduⱡnga kona nila, kump kun mam ti titim ila, kun kurum. 15 Wote, kang wu ni mba, kona ila wu ti nga kongun indimp nimba purum. Wu ni ndi, kang wu ei tᵾpa, elim nga kng makrᵾp indangga nimba, tᵾpa mundrum. 16 Kang wu ni mba kᵾndrᵾm mel, kng nimbᵾ mbin kᵾng mbᵾ, norung ni kandpa, ol tᵾmᵾng nurum. Wote, wamp na ti ndi, elim rᵾng na mat, nangga ngᵾk iting mel, kapⱡa mon. 17 Kang wu ni, akup numan kun kat kandpa, tᵾpa moⱡpa nimba mel, “Na nga tipam ei nga kongun wamp mbᵾ, rᵾng puⱡi tek mormin pᵾnt ei ka! Na ya ila mᵾn ndam, kump kun ndi kuⱡimp. 18 Nanim kelip, wuta kᵾn mbo rimp mel, ‘Na ndi, Got kᵾn wuta, nim raⱡ etᵾp, kit mundᵾr ei ka nimp. 19 Akup, na wu kai ti mon. Ei nga, na nim nga kangᵾm ei nin, mel kapⱡa mon. Na tᵾkᵾn nim nga kindmant kongun wu mel mundᵾn,’” nitim. 20 Nimba kᵾn, tipam murum kona nila elim purum. Mba nombuⱡa mam ila ruⱡ etpa pelinga, tipam moⱡpa kᵾndrᵾm mel, kangᵾm urum ni kandpa kᵾn, tᵾkrᵾpa omba, kangᵾm kanggᵾⱡpa, numan minal ngurum. 21 Kangᵾm ndi, tipam kundpa, nimba mel, ‘Na ndi, Got kᵾn nim kᵾn, kit mundᵾr. Ei nga, akup na wu kai ti mon. Nim ndi, na nim nga kangᵾm nin mel mon ei ka!’ nitim. 22 Wote tipam ndi, elim nga kongun wu nimbᵾ, wi ropa nimba mel, ‘Enim ndi, wal pᵾki kai ni kᵾⱡ, mek ok puk ndᵾi! 23 Puk kᵾn, kng kau waⱡ pela kai iti ti, tᵾk mek ok, rok kui yangina, tᵾn nombun moⱡpᵾn, ambuⱡpᵾn paⱡpᵾn muⱡamᵾn!’ nitim. 24 Tipam ndi, nimba mel, ‘Na nga kangᵾm wu ei, mba kurum nᵾmp pitmin ni mon! Kont moⱡpa, yant om ei nga rᵾng mam ti nok molk, ambulk palk muⱡamᵾn,’ nitim.

25 Kang wu kumna ni, ant ei kᵾn, kongun kona ila murum. Wote, mang kona uimp nimba, manga keta ila nondpa omba, pitim mel, wamp mat gita rok, denis etᵾk nᵾk, morung ni pitim. 26 Wote, kongun wu ti, wi ropa tᵾpa, waldpa nimba mel, ‘Wamp mbᵾ, namba elinga nᵾk mormin ei?’ nitim. 27 Kongun wu ni ndi, punt ropa nimba mel, ‘Nim nga ᵾngᵾn wu akil ni, yant om ila tipanᵾm ndi, kangᵾm om ei nga numan elinga kᵾn, kng kau waⱡ pela ti, ropa koim. Ei nambuⱡ emel, kangᵾm moⱡpa, kai mondpa, yant om ei nga em ei.’ 28 Kang wu kumina ei ik ni pilpa kᵾn, popᵾⱡ kuⱡpa, manga ila mukᵾr pi napᵾpa, pena murum. Wote tipam ni, pena omba, kangᵾm ik mat kundᵾp namba, numan wang ndangga, nimba nitim. 29 Kang wu ni ndi, tipam kundpa, nimba mel, ‘Nambuⱡ emel, na ndi, nim nga kindmant kongun endᵾp puⱡ mba, pana mbᵾ ou ndupa omba purum. Na ndi, nim nga ik tᵾp, roi ndui nandᵾp et, ni ka! Nim ndi, na kng meme waⱡ na ti, ngana kᵾn, na nga wamp puⱡ mbᵾ kᵾn kep, koip nomp, numan kai pilip iti natᵾt mon, ni ka! 30 Wote, nim nga kangᵾm wu ei ndi, mel mbᵾ mepa mba, amp wapra mbᵾ kᵾn, etpa pora ndupa pendpa, wote aldpa, yant om. Ei nga, kng kau waⱡ pela ti, rok koindkᵾn itᵾn ye!’ nitim. 31 Wote, tipam wu ni ndi, kangᵾm wu kumina ni kundpa, nimba mel, ‘Nim ya na kᵾn, rᵾk rᵾk rᵾp rokᵾn morᵾn, ni ka! Na nga mel tetᵾm mbᵾ pora mel, nim nga mbᵾ mint tetᵾm. 32 Wote, kang wu ei mba, kurum nda nimbun pitmin ni, akup kont moⱡpa, yant om. Ei nga, numan kai pilpᵾn, ambuⱡpᵾn paⱡpᵾn nᵾmp tamin,’” tipam ndi nitim.

Copyright information for `MED