Luke 16

Kongun Rᵾp Wu Ti, Mel Punt Rurum Ei Nga Ik Ek

Jisas ndi, elim nga kitip kᵾni wu ni kᵾⱡ, kundpa nimba mel, “Ku moni ᵾmbrᵾm wu ti, elim nga wu ti ndi, kongun rᵾp inditim. Ei kᵾn, wu mat ndi ok, ku moni ᵾmbrᵾm wu kunt rok, nᵾk mel, ‘Nim nga kongun rᵾp wu ei ndi, ku moni mbᵾ etpa nᵾwᵾ pora ndunᵾm ei ka!’ nᵾtᵾng. Wote, ku moni ᵾmbrᵾm wu ni, elim nga kongun rᵾp inditim wu wi ropa, kundpa nimba mel, ‘Nambuⱡ emel, nᵾkᵾn nim uⱡ etᵾn mbᵾ, na kundᵾk nilingina pᵾnt. Na nga mel mbᵾ pora, nim nga ki ila tetᵾm mbᵾ nga punt rokᵾn, tᵾkᵾn kun indi. Nim akup kongun wu muⱡi nᵾmbᵾⱡᵾn!’ nitim. Wote, kongun rᵾp wu ni, elim nimba mel, ‘Na nga kongun rᵾp endᵾt wu nuim ei ndi, na makrᵾnᵾm pᵾnt ei nga kindmant kongun mᵾi apᵾp rop, itimp mel kapⱡa mon. Na ndi, wu mat, ku moni nguing nimp uⱡ ei, pipil enim. Akup na uⱡ ti, itimp ei mel pᵾnt. Na nga wu nuim ei ndi, na makrᵾm ei kᵾn, wu mbᵾ ndi, na mek, enim nga manga mbila ping,’ nitim. Nimba pilpa kᵾn, wu tenda tenda nimba, elim nga wu nuim ei nga punt mondrung wu mbᵾ, wi rurum ila orung. Wote wu ti, kuimp tepa urum ni, waldpa nimba mel, ‘Nim ndi, na nga wu nuim ei nga punt namba iti mundrᵾn?’ nitim. Wote, wu ni ndi, nimba mel, ‘Wel ming 100 tit ei ka!’ nitim. Wote, kongun rᵾp wu ni ndi, nimba mel, ‘Nim pepa ongum ngᵾnt ei ndi, nim nga punt morum ei nga, tᵾkᵾrkᵾn mana molkᵾn, 50 nᵾkᵾn, mon rokᵾn mundi!’ nitim. Wote, wu ti urum ila, kongun rᵾp wu ni ndi, waldpa nimba mel, ‘Nim nga punt namba iti norum?’ nitim. Wu ni ndi, nimba mel, ‘1000 ming wit morum,’ nitim. Kongun rᵾp wu ni ndi, wu ni, kundpa nimba mel, ‘Nim pepa ongum ngᵾnt ei ndi, punt 800 nᵾkᵾn, mon rokᵾn mundi,’ nitim. Wote, wu nuim ni ndi, kongun wu ni itim uⱡ ni kᵾⱡ, kandpa mbi ndupa kᵾn, kongun rᵾp itim wu ni, kai nitim. Uⱡ ei, nambuⱡ emel, kongun rᵾp wu ei ndi, wamp mbᵾ mel punt mondrung mbᵾ, mepa mana omba mon ngurum. Uⱡ itim ei ndi, elim numan ngeing nimba itim. Wu mat ndi, ya mᵾi kona ila uⱡ mbᵾ nga minal, peng goiya tᵾk, enim nga kongun elpa elpa mbᵾ, pip rok etᵾk, mek puk kᵾn, rᵾⱡang ila mormin wamp mbᵾ, rok mana ndurmin,” nitim.

Na ndi, enim ik kupa kat kundᵾp nᵾnt. Ya mᵾi kona ila ku moni mel kit ei, enim ndi, tᵾk ambulk kᵾn, wamp mbᵾ tᵾk rapᵾndᵾⱡngina, enim numan ngormᵾn. Wakᵾt ui tila, ku moni ambᵾrmin uⱡ ei, pora nim kᵾn, uⱡ nga kᵾnt nga kona ei, ik tᵾk rapᵾndrᵾng wamp mbᵾ ndi, enim rawe etᵾk ting. 10 Wote, wamp nam ti ndi, mel kel mbᵾ rᵾp etpa kai mondum ndam, wote mel ou mbᵾ, kapⱡa rᵾp kai etmba. Wamp ti ndi, mel kel mbᵾ kᵾn, uⱡ kun mat iti natᵾm ndam, wote mel ou mbᵾ kᵾn, uⱡ kun mat iti natᵾmba ku. 11 Ya mᵾi kona ila, ku moni mel kit ei, wamp ti ndi, rᵾp etpa kit mondum ndam, wote wamp nam ndi, Got nga kongun uⱡ kupa mbᵾ nangga, rᵾp etpa kai mondᵾmba? 12 Wote enim ndi, wamp mat nga mel mbᵾ, rᵾp indi nandᵾng ndam, wote enim mel mbᵾ nam ndi ngumba? 13 Wamp ti ndi, kongun wu raⱡ nga kongun kindmant rak ndi nandᵾmba. Kongun wu ti, numan ngum ndam, kongun wu ti numan ngui ngangᵾmba. Kongun tila ik kum tem ndam, tila tᵾpa mbuⱡ ngumba. Enim Got nga kongun etᵾk, wote ku moni ei kᵾn, rak nduk kongun iti nᵾtᵾi mon!” nitim.

Got Nga Wamp Tᵾpa Mumuk Rui Ik Ei Kᵾn, Mi Ik Ei Kᵾn

14 Perisi wu mbᵾ, ku moni mint numan ngurmin uⱡ ei ndi, Jisas nga nitim ik ei, tᵾk ik kuldᵾtᵾm. 15 Wote Jisas ndi, Perisi wu mbᵾ, kundpa nimba mel, “Enim numan ei ndi, pitmin uⱡ ei, wamp mbᵾ ndi, enim uⱡ kun mbᵾ, etmin nᵾk, pileing nᵾk pᵾtmᵾn ei ka! Wote Got ndi, enim nga mundmong ila, uⱡ mo ropa petᵾm uⱡ kᵾⱡ pᵾtᵾm. Wamp ndi, uⱡ kai mat nᵾk pᵾtmᵾn kᵾⱡ, Got nga kuimp keta ila, uⱡ kit kᵾⱡ etmin.

16 Mi ik na, painui wu mbᵾ nga ik na mbᵾ, Jon wamp nu tindi wu ei murum ei kᵾn titim. Got nga wamp tᵾpa mumuk rui rᵾnang kai ik ei, Jon puⱡ mondᵾp, kongun itim ei kᵾn, mᵾi kona mbila pora purum. Got nga wamp tᵾpa mumuk rui kona ila wamp mbᵾ pora, ronduⱡ mundᵾk, rukᵾr mbin nᵾtᵾng. 17 Muⱡ mᵾi raⱡ pora nimba, wote Got nga mi ik kel kot, ama pora ni nanᵾmba,” nitim.

Jisas Ndi Wu Amp Wak Rurmin Uⱡ Ei Nga Nitim

18 Jisas ndi, ik ti nimba mel, “Wu nam ti ndi, elim nga amp ei, wak ropa ndupa mundpa kelpa kᵾn, amp elpa ti tᵾm ndam, wu ei, wapra nga uⱡ etmba. Wu ti nga amp ti, unt wak ropa ndupa mundpa kitim ti, wote wu ti tᵾm ndam, wu ei, wapra nga uⱡ ku etmba,” nitim.

Wu Mel Pi Ti Kᵾn Lasarus Raⱡ Nga Timan

19 Wote Jisas ndi, ik ti, nimba mel, “Unt wu mel pi ti murum. Rᵾk rᵾk mel eng nui kai mbᵾ mint raⱡpa, wal pᵾki kunt mbᵾ mint, pakᵾpa murum. Ant mbila rᵾk rᵾk rᵾng kai mbᵾ mint, nomba murum. 20 Wu mel pi ei nga manga keta puⱡ puⱡ kumba pena orunga, wu kurpa ti murum. Wu kurpa ei nga mbi ei Lasarus. Wu mel pi ei nga rᵾng na mat nomba itim kᵾn, rat pol ila mana mba itim mbᵾ, aprᵾp tᵾp nomp elimba, nimba pitim. Kᵾng iti etpa mema ropa itim mbᵾ, owa mbᵾ ndi ok, pen tek nok etᵾng. 22 Wote Lasarus ni, kurum ila, anggelo mat ndi ok, tᵾk mek, muⱡ kona Eiparam kᵾn, rᵾp rok mondrung. Wote, wu mel pi ni kurum ila, tᵾk anggᵾtᵾng ku. 23 Wu mel pi ni, koⱡpa mba kᵾn, wamp kolk puk, mindil mam mbᵾ nok mormin kona ila mba, mindil nomba moⱡpa, tᵾpa oⱡa ndupa kᵾndrᵾm mel, Eiparam ni Lasarus raⱡ, rᵾp rokᵾⱡ, ruⱡ etkᵾⱡ morunggil. 24 Wu mel pi ndi, wi ropa nimba mel, ‘Wuta Eiparam ye! Nim ndi, na kont kulkᵾn, Lasarus kundkᵾn nana kᵾn, ki ila nu kot mondpa, mepa omba, na nga keta anmbil ila, oi ndangga kᵾn, keta anmbil ei koma tiyangga! Na ya ndip ila moⱡᵾp, mindil mam ti nont ei ka!’ nitim. 25 Wote Eiparam ndi, wu ni, kundpa nimba mel, ‘Kang wu ye! Nim kont murᵾn ni kᵾn, mel kai mbᵾ mint, ᵾmbrᵾn ni pili. Lasarus mel kit mbᵾ mint ᵾmbrᵾm. Akup ya kona ila, Lasarus numan kai pilpa morum. Wote, nim mindil kit nokᵾn morᵾn. 26 Wote uⱡ ti, Got ndi itim ei, enim mormᵾn kona ei kᵾn, ya tᵾn mormᵾn kona raⱡ nga rᵾk ila, ruⱡ mam ti petᵾm. Ya orunga mormᵾn wamp mbᵾ ndi kapⱡa, ru ei puⱡa rok, int orunga uing mel kapⱡa mon. Wote, int orunga mormᵾn wamp mbᵾ ndi, ru ei puⱡa rok, ya orunga uing mel kapⱡa mon ku.’ 27 Wote, wu mel pi ni ndi, nimba mel, ‘Wuta Eiparam ye! Nim ndi, kapⱡa Lasarus tᵾkᵾn mundana, na nga wuta nga mang kona mba, na nga wu ᵾngᵾnᵾl 5 kat mormᵾn kᵾⱡ, kundpa nangga kᵾn, pilik uⱡ ⱡawa etmin mbᵾ, tᵾk kᵾn etᵾk muⱡeing. Tᵾpa kawa ndangga, wote wu kᵾⱡ ok, ya kona ila mindil mam mbᵾ, nuing ei mon!’ nitim. 29 Wote Eiparam ndi, punt ropa nimba mel, ‘Moses nga mi ik na, painui wu mbᵾ nga mi ik na mbᵾ pora, tetᵾm ei kapⱡa, wu mbᵾ kum tek piling,’ nitim. 30 Wu mel pi ni ndi, punt ropa, Eiparam kundpa, nimba mel, ‘Nim nᵾn ik ei kapⱡa mon. Wamp korung ti, on etᵾk pendᵾtᵾng ei, ⱡoporpa mba wu kᵾⱡ mormin ila pum ndam, wu kᵾⱡ ndi kandᵾk, numan ropᵾl ruing,’ nitim. 31 Wote Eiparam ndi, wu ni, kundpa nimba mel, ‘Wamp mbᵾ ndi, Moses na, painui wu mbᵾ nga mi ik mbᵾ, pilik pep rui narᵾng ndam, wote wamp on etᵾk pendᵾtᵾng ti, on kona ila ⱡoporpa pum ei kandᵾk kᵾn, mondᵾk pili nᵾpᵾling mon, ei ka!’” nitim.

Copyright information for `MED