Luke 17

Uⱡ Kit Mbᵾ Ndi, Wamp Nga Mondpa Pili Etpa Kit Mondrum

Jisas ndi, kitip kᵾni wu kᵾⱡ, kundpa nimba mel, “Uⱡ elpa elpa mat omba, wamp mbᵾ tangga kᵾn, uⱡ kit mbila mana ping. Wamp nam ti ndi, uⱡ kᵾⱡ em wamp ei, mong tᵾmba ei ka! Wote, wamp nam ti ndi, na nga kangambuⱡa kel ti, etpa uⱡ kit mur ila mana ndum ndam, wamp ei, ku mam ti, kan kuⱡpa nuim kan ila rumᵾndpa tᵾpa, num kuta ila ropa mana ndumba an. I etmba uⱡ ei nga, wamp mbᵾ, en enim rᵾp etᵾk, kai mondᵾk muⱡᵾi! Ʉngᵾn uⱡ kit mat, etpa moⱡum ndam, nim ndi, kundkᵾn nana kᵾn, tᵾpa kun etpa numan ropᵾl ropa tangga kᵾn, nim ndi, uⱡ kit mbᵾ wak rundi! Wote, ᵾngᵾn wamp ei, nim kᵾn uⱡ kit 7 ant tenda ila em ndam, ᵾngᵾn nim kᵾn yant omba 7 ila tangga kᵾn, elim nga uⱡ kit em mbᵾ, kont kuⱡpa tangga! Nim ndi, uⱡ kit em nit mbᵾ, wak rundi!” nitim.

Jisas Ndi, Wamp Nga Mondpa Pili Ik Ei Nga Nitim

Nombuⱡa rung wu nimbᵾ, Jisas kundᵾk nᵾk mel, “Nim ndi, tᵾn nga mondpa pili uⱡ ei, etkᵾn ou indᵾn ka!” nᵾtᵾng. Wote Jisas ndi, nombuⱡa rung wu ni kᵾⱡ, kundpa nimba mel, “Enim nga mondpa pili ei, nde mastat mong kel mel, kapⱡa em ndam, nde kᵾⱡ kundᵾk, puⱡ pᵾkᵾ rᵾnggᵾⱡa, rokᵾn pukᵾn, num kuta ila ᵾnggᵾli! Nangina, wote enim nga nᵾng ik ei mel, ‘Nde kᵾⱡ kapⱡa, pep romba!’” nitim.

Jisas Ndi, Kongun Wamp Uⱡ Iting Mbᵾ Nga Nitim

Wote Jisas ndi, nimba mel, “Wu ti ndi, elim nga kongun wu ti, tᵾpa mundangga mba, kongun kona ila mᵾi apᵾp romba, muna mba, kng sipsip rᵾp etpa andpa, mang kona om ei kᵾn, elim nga wu nuim ei ndi, nimba mel, ‘Nim tᵾkᵾrkᵾn okᵾn, ila molkᵾn, rᵾng nui!’ nimba ei? Ei mon! Wu nuim ei ndi, kongun wu ei, kundpa nimba mel, ‘Na nga rᵾng mbᵾ tᵾkᵾn kun endkᵾn, nim nga kan mum ei, tᵾk gi tᵾkᵾn ralkᵾn, na nga rᵾng mbᵾ, ro rokᵾn, mek okᵾn ngana, na unt rᵾng na, nu na mbᵾ neimp. Wote, nim nu na, rᵾng na mbᵾ nᵾn.’ Wu nuim ei ndi, elim nga kongun wu elim nitim uⱡ kᵾⱡ, pep ropa itim ei nga, wu nuim ei, angge ni nᵾndᵾtᵾm, mon. 10 Uⱡ to ei mel ku, Got ndi, enim uⱡ mat iteing nimba ngum ndam, kongun mbᵾ etᵾk, pora ndukᵾn, nᵾk mel, ‘Tᵾn kongun wamp kit kᵾⱡ nᵾi! Tᵾn uⱡ enmin mbᵾ, kindmant kongun mint etᵾp mormin, nᵾi!’” nitim.

Kint Pombuⱡma Rurum Wu 10 Kat Jisas Ndi, Etpa Titim

11 Wote Jisas ni, Jerusalem nombuⱡa mam nila mba, pilpa purum. Mba Galili kᵾn, Sameriya kona raⱡ nga rᵾk ting ila purum. 12 Jisas ni omba, kona tila oⱡnga kᵾn, kint pombuⱡma wu 10 kat ndi, Jisas urum nombuⱡa mam nila ok, kandᵾk tᵾtᵾng. Wu ni kᵾⱡ ok, ruⱡ etᵾk anggilik, Jisas ni, ronduⱡ wi rok nᵾk mel, “Wu Nuim ye! Nim ndi, tᵾn kont kun ka!” nᵾtᵾng. 14 Wote Jisas ndi, wu ni kᵾⱡ, kandpa kᵾn, kundpa nimba mel, “Enim nga kᵾng mbᵾ, mek puk, wu pris kᵾⱡ, ora ndui!” nitim. Ni kᵾn, mbin nᵾk, nombuⱡa ruk ting ila puⱡnga, wu ni kᵾⱡ nga kᵾng mbᵾ kai elinga, kelik purung. 15 Wote, wu 10 kᵾⱡ nga tenda ti ndi, elim nga kᵾng kᵾⱡ kᵾndrᵾm mel, kᵾng kᵾⱡ kai murum ila, kelpa yant omba, wi ronduⱡ mundpa ropa, Got nga mbi paka rᵾndrᵾm. 16 Wote, wu ni mba, Jisas ᵾnggᵾtᵾm kona nila, mura ropa mondpa rumᵾⱡi pepa, Jisas nga kᵾmp puⱡ ila mba pitim. Wu ei, Sameriya kona ila urum. 17 Wote Jisas ndi, wu ni, kundpa nimba mel, “Wu 10 kᵾⱡ nga kui ei, kapⱡa em nᵾmp pint ni ka! Wote, akup wu 9 kᵾⱡ, nᵾl mormᵾn? 18 Wu mat yant ok, Got nga mbi paka runding ui nawᵾng ei ka! Kona elpa ila wu tenda ei mint, yant om kant ei ka!” nitim. 19 Jisas ndi, wu ni, kundpa nimba mel, “Nim nga mondpa pili uⱡ ei ndi, ninim etpa, kapⱡa endnim. Nim oⱡa anggilkᵾn pi!” nitim.

Got Nga Wamp Tᵾp Mumuk Rui Kona Ei Omba

20 Wote, Perisi wu nimbᵾ ndi, Jisas waldᵾk, nᵾk mel, “Got nga wamp tᵾpa mumuk rui uⱡ ei, nant kᵾn omba nda?” nᵾtᵾng. Jisas ndi, ik nᵾtᵾng ni, punt ropa nimba mel, “Got nga wamp tᵾpa mumuk rui uⱡ ei, wamp na ni mel ti wangga, enim mong raⱡ ndi, kᵾni nᵾkᵾning mon. 21 Wamp ti ndi, nimba mel, ‘Got nga wamp tᵾpa mumuk rui uⱡ ei, noi ila tetᵾm, muna ya ila morum,’ ni nᵾning mon. Nambuⱡ emel, Got nga wamp tᵾpa mumuk rui uⱡ ei, enim kᵾn ya rᵾk ila omba, tepa pora ndurum,” nitim.

22 Wote Jisas ndi, elim nga kitip kᵾni wu ni kᵾⱡ, kundpa nimba mel, “Wote, ui ti ekit om ei kᵾn, Muⱡᵾl Wu Kupa ei nga ui ei, kᵾnmin nᵾk, numan minal ngᵾk muⱡing. Wote enim ndi, ui ei kᵾni nᵾkᵾning. 23 Wote, wamp mat ndi, enim kundᵾk, nᵾk mel, ‘Wu ei noi ila morum, muna ya ila morum.’ I nᵾng ndam, wote wamp mbᵾ nga nᵾng ik ei, enim pep rok, pi nᵾpᵾi mon! 24 Enim kandᵾk pᵾtmᵾn ni ka! Kona kiraipa etᵾm ei kᵾn, oⱡa muⱡ ei pora rᵾⱡang purum ni ka! Uⱡ ni mel ku, Muⱡᵾl Wu Kupa ei, om ei kᵾn, wamp mbᵾ pora, kandᵾk pilik iting. 25 Wote Muⱡᵾl Wu Kupa ei, unt mindil nomba, mbun koma ropa etmba. Akup ui nga wamp mbᵾ ndi, wu ei tᵾk mbuⱡ nguing. 26 Unt wamp mbᵾ molk, wu Nowa murum ei kᵾn, etᵾng uⱡ ei mel ku, akup Muⱡᵾl Wu Kupa omba, ei nga, wamp mbᵾ ndi, uⱡ ei mel ku iting. 27 Unt wamp mbᵾ, rᵾng nok, nu nok, kang amp tᵾndᵾk etᵾk moⱡina, Nowa omba, okak manga ila mukᵾr purum. Mᵾi ila nu oⱡa omba, wamp mbᵾ, ropa nu wᵾnggᵾrᵾm. 28 Wote akil tepa, Lot murum ei kᵾn, wamp mbᵾ molk, uⱡ mbo tenda ei mel ku etᵾng. Rᵾng nok, nu nok, mel mbᵾ rarᵾp rok, int yant tᵾk, pana kongun etᵾk, manga rakᵾk etᵾk moⱡina, Lot ni, Sorum kona ila wak ropa puⱡnga, ant tenda ila, ku kundi na, ndip na mbᵾ ndi, wi muⱡ ila kona ndamᵾng mel mana omba, wamp mbᵾ ndip ndi, nomba pora ndurum. 30 Muⱡᵾl Wu Kupa ei ndi, yant omba ei kᵾn, unt uⱡ itim ei mel ku, wote uⱡ i iting.

31 Ant tenda ei kᵾn, wu ti mba, manga im oⱡa orunga moⱡpa kᵾn, elim nga mel mbᵾ, manga mukᵾr tem ndam, wote murᵾk mba, kapⱡa ti natᵾmba. Uⱡ ei mel ku, wamp ti pana kongun kona ila mba, moⱡum ndam, wote mang kona yant ui nawᵾmba. 32 Lot ambᵾm ndi, elim nga mel mbᵾ nga tᵾpa pendpa yant ndupa kᵾndrᵾm uⱡ ei, akup enim numan tᵾk mundᵾk pilᵾi! 33 Wote, wamp nam ti ndi, elim nga kᵾng orunga mint, nimba pilim ndam, kont mba mul uⱡ ei wak romba. Wote, wamp nam ti ndi, na nga nimbᵾ pilpa, elim nga kᵾng orunga, pili napilim ndam, wamp ei, kont mba mul uⱡ ei, kapⱡa tᵾmba. 34 Na ndi, enim kundᵾp nᵾnt an! Rumbuldi wamp raⱡ manga rat pol tenda ila ur piyanggila kᵾn, wamp ti, tᵾpa mepa mba kᵾn, wamp ti, wak romba. 35 Wote amp raⱡ, oka pek rokᵾⱡ muⱡanggila kᵾn, amp ti, tᵾpa mepa mba kᵾn, amp ti, wak romba. [Wote wu raⱡ, kongun kona ila etkᵾⱡ muⱡanggila kᵾn, wu ti tᵾpa mepa mba kᵾn, wu ti wak romba,” nitim.] 37 Wote, kitip kᵾni wu ni kᵾⱡ ndi, Jisas ni, waldᵾk nᵾk mel, “Wu Nuim ye! Nim nᵾn uⱡ kᵾⱡ, kona nant ila omba?” nᵾtᵾng. Jisas ndi, yant ndupa, punt ropa nimba mel, “Kui ti koⱡpa purpa, tetᵾm kona ila, kᵾi tap mbᵾ ok, num petmᵾn,” nitim.

Copyright information for `MED