Luke 21

Amp Wiya Ti, Got Kᵾn Angge Nimba Ku Moni Ngurum

Ui ti kᵾn, manga wingti ou nila mba moⱡpa, kᵾndrᵾm mel, ku moni ou nduk ambᵾrmin wamp nimbᵾ, nde ket nila angge ku moni ngorung. Ui ni kᵾn, amp wiya kurpa ti, ku kuⱡi kel raⱡ mepa omba, nde ket ila mana nduⱡnga kᵾndrᵾm ku. Uⱡ ni, Jisas ndi, kandpa moⱡpa, nimba mel, “Na ndi, enim ik kupa ti kundᵾp nᵾnt. Amp wiya kurpa ei, ku moni ngunum ei ndi, moni minal mundᵾnmᵾn wamp mbᵾ, tᵾpa mana ndupa ngunum. Ku moni ou nduk ambᵾrmin wamp mbᵾ ndi, ku moni mat, mang kona tek, ku moni mat mek ok, Got kᵾn angge nᵾk ngᵾnmᵾn. Wote, amp wiya ei, elim rᵾng nomba ku ti mon, tepa moⱡum ku moni waⱡum, kuraⱡ pᵾi mepa omba ngunum,” nitim.

Jisas Ndi, Manga Wingti Ou Ei Kit Moⱡmba Nitim

Wote, wamp mat ndi, manga wingti ou ni, kandᵾk nᵾk mel, ku eng nui kai mat kᵾn, mel kai mat, Got kᵾn angge nᵾk ngᵾk, manga wingti ou ei, ou nduk etmin ei ka, nᵾtᵾng. Wote Jisas ndi, wamp nimbᵾ, kundpa nimba mel, “Akup enim ndi, mel mbᵾ, kandᵾk ninmin. Wote ui ti om ei kᵾn, ku ti natᵾmba, mon. Wote, ku mbᵾ pora, mana mba,” nitim.

Jisas Ndi, Mbun Mindil Puⱡi Omba Nitim

Wote, wamp nimbᵾ ndi, Jisas waldᵾk, nᵾk mel, “Ik mbo wu ye! Nim uⱡ nᵾn mbᵾ, nant kᵾn pemba nda? Namba uⱡ ti unt itangga, tᵾn kandᵾp muⱡamina kᵾn, wote uⱡ nᵾn mbᵾ, ekit omba nda?” nᵾtᵾng.

Wote Jisas ndi, nimba mel, “Enim pilik, tᵾk mendᵾk muⱡᵾi! Wamp mat ndi, ik kol rok, na nga mbi tek, nᵾk mel, ‘Na wu Jisas ont. Ui nimbᵾ, akup nondpa pora nimba,’ enim ning. I nᵾng ndam, enim ik ei, pilik pep rui nᵾrᵾi mon!’ Ei, enim kᵾn, pilangina kᵾn, el mam mat enmin nᵾng ndam, enim mundmong iti nᵾtᵾi mon! Uⱡ mbᵾ, kuimp tepa ekit omba, wote muⱡ mᵾi raⱡ ui ila, tᵾkrᵾpa pora ni nanᵾmba mon!” nitim. 10 Wote Jisas ndi, wamp ni kᵾⱡ, kundpa nimba mel, “Wu rᵾⱡaip kat ndi, wu rᵾⱡaip kat kᵾn el iting. Wu king ti nga rᵾⱡaip kat ndi, wu king ti nga rᵾⱡaip ei kᵾn, el iting ku. 11 Wote, kona kilimbᵾmp mam mat etpa, kump kun mat tiyangga. Wote, kona mat ila kui mam mat, kandᵾk ting ku. Wi muⱡ ila uⱡ to elpa elpa mat kandᵾk, wote uⱡ elpa elpa mat ndi, tᵾn etpa mundmong endᵾmba ku.

12 “Wote uⱡ mbᵾ, nondpa ui nᵾwangga kᵾn, enim tᵾk imp molk, etᵾk kit munding. Wote, enim manga wingti mbila, mek mukᵾr puk kot endᵾk, kan ngᵾk iting. Uⱡ ei, nambuⱡ emel, na nga mbi enim kᵾn tetᵾm ei nga kandᵾk, tᵾpᵾn mana nduimin nᵾk enim, mek wu king na, gapman na mbᵾ nga kuimp keta mbila, mek ping. 13 Uⱡ mbᵾ, ekit om ei kᵾn, enim ronduⱡ mundᵾk molk, Rᵾnang Ik Kai mbᵾ nᵾk ngᵾi! 14 Wote enim ndi, namba ik mat, punt ropᵾn nimin nda nᵾk, numan ou nduk pili nᵾpilᵾi! 15 Ui ila nanim ndi, enim nga numan ila ik kai mat ning mbᵾ, mbo rᵾndamba kᵾn ning. Wote, enim nga el rui wamp mbᵾ ndi, enim nga nᵾng ik ei, tᵾk roi nduk rok, mana nduk iti nᵾtᵾng. 16 Enim nga tipamᵾl mamᵾl na, ᵾngᵾnᵾl na, wamp puⱡ na, mema tenda wamp ni mbᵾ ndi, enim wamp mat tᵾk, el rui wamp mbᵾ ngangina, enim rok kunding. 17 Wote, wamp mat ndi, enim kᵾn popᵾⱡ mondᵾk iting uⱡ ei, nambuⱡ emel, na nga mbi ei, enim kᵾn tiyangga kandᵾk iting. 18 Wote, enim nga peng ndi tenda ti, ama mana pi napᵾmba mon. 19 Uⱡ eng ei ndi, en enim nga wamp kont mul uⱡ ei, etᵾk ting, ronduⱡ mundᵾk molk, en enim nga kont mba mul uⱡ etᵾk, peng kont ting.

Jisas Ndi, Jerusalem Kona Peng Ou Ei Kit Moⱡmba Nitim.

20 “Wote, enim molk kᵾnangina kᵾn, el wu mat ok, Jerusalem kona peng ou ei, tᵾk pok eng ndam, kona peng ei, etᵾk kit munding ui ei, nondpa tangga iting. 21 Ui ei kᵾn, Juriya kona ila wamp mbᵾ, nung nᵾk, komnga mong mbila oⱡa ping. Wote, Jerusalem kona peng ou ila wamp mbᵾ, kona peng ei, wak rok, kona mat ila ekit ping. Kona peng ei nga ekit orunga petmin wamp mbᵾ, wote ok, rukᵾr pi nᵾping. 22 Wamp nga uⱡ kit etmin mbᵾ, ui ei kᵾn, Got ndi, punt rondᵾmba. Ik ei, Got nga Buk Wingti ila petᵾm uⱡ ei, wote omba kupa etmba. 23 Akup ui ila, amp mat kangambuⱡa mondᵾk mormin. Wote, amp mat kangambuⱡa aim nguk mormin mbᵾ, mbun ting. Mbun mindil mam mat, mᵾi kona ila pem ei kᵾn, Got nga popᵾⱡ ei, wamp mbᵾ kᵾn punt romba. 24 Ui ei kᵾn, el rui wamp mbᵾ ndi, wamp mat koiya ndi rok kunding. Wote, wamp mat tᵾk mek puk, mᵾi kᵾmp mat ila kan nguk mundangina ping. Ik nᵾpᵾl wamp mbᵾ ndi, Jerusa-lem kona peng ei, rok wapra pendᵾk muⱡangina, en enim nga ui ni wei pora noimba.

Wote Got Kangᵾm Jisas Kraist Ni, Yant Omba

25 “Uⱡ i tangga kᵾn, oⱡa muⱡ ila ant, kalimp na, mipil na mbila, uⱡ elpa elpa mat itangga kᵾn, mᵾi kona ila pora, num kuta rᵾk nangga, wamp mbᵾ ndi, pilik min ngᵾn mundᵾk, mundmong etᵾk muⱡing. 26 Wamp mbᵾ ndi, uⱡ em ei kandᵾk, namba uⱡ mat enim nda nᵾk, mundmong etᵾk muⱡangina kᵾn, mil mal tᵾpa ropa mundᵾmba. Wote ni kᵾn, muⱡ ila mipil mbᵾ roka nimba. 27 Uⱡ mbᵾ kandᵾk muⱡangina, wote Got nga kangᵾm Jisas Kraist ni, kopa pol ila rᵾpᵾndi rᵾⱡang mbᵾ, tᵾpa pakᵾpa wangga kᵾning. 28 Wote uⱡ mbᵾ, puⱡ mondpa tangga kᵾn, enim wamp mbᵾ ndi, anggilik molk, oⱡa nduk kandᵾk muⱡangina kᵾn, Got ndi, enim etpa rukᵾr tᵾmba ui ei, nondpa omba, pora nimba,” nitim.

Nde Ui Mᵾn Etᵾm Ei Mel Tᵾk Mundᵾi!

29 Wote Jisas ndi, ik ek ti ropa, wamp mbᵾ, kundpa nimba mel, “Enim nde ui kᵾⱡ kandᵾk kᵾn, nde mat kᵾnᵾi! 30 Nde ui mᵾn etᵾm uⱡ ei kandᵾk kᵾn, akup kona ant mba enim nᵾtmin. 31 Uⱡ ei mel ku, enim ndi, kᵾnangina uⱡ mbᵾ mel, pem ndam, Got nga wamp tᵾpa mumuk rui uⱡ ei, nondpa omba, pora nimba ei nga etmba. 32 Na ndi, ik kupa ti, enim kundᵾp nᵾnt! Akup nga ui ila mormin wamp mbᵾ nga mat, kolk pora ni nᵾnangina kᵾn, uⱡ mbᵾ mel pemba. 33 Wote ui ei kᵾn, muⱡ mᵾi raⱡ pora nimba. Wote, na nga ik ei, pora ni nanᵾmba,” nitim.

Enim Kandᵾk Tᵾk Mendᵾk Muⱡᵾi!

34 “Uⱡ ei nga, enim wamp mbᵾ pilik, tᵾk mendᵾk muⱡᵾi! Enim rᵾng na, nu ronduⱡ na mbᵾ, ou nduk nui nandᵾk, mᵾi kona mel mbᵾ nga mint, numan ngui nganggᵾk muⱡᵾi! Wote, enim uⱡ mbᵾ ndi, mana tᵾm ndam, Got nga ui ei, tᵾngᵾnda mint ekit omba, enim kui mil mel, pira tepa romba. 35 Mᵾi kona mbila mormin wamp mbᵾ pora, Got nga ui ei ndi, kandpa tᵾmba. 36 Enim rᵾk rᵾk uⱡ mbᵾ nga kandᵾk, tᵾk mendᵾk, Got kᵾn atinga rᵾk rᵾk rok, ronduⱡ tᵾk itᵾi! I eng uⱡ ei ndi, Muⱡᵾl Wu Kupa om ei kᵾn, elim nga kuimp keta ila ronduⱡ mundᵾk, anggilik muⱡing,” nitim. 37 Ui mbila rᵾk rᵾk, Jisas ndi, manga wingti ou ila wamp mbᵾ, ik mbo endpa kᵾn, rumbᵾⱡ rurum ei kᵾn, Olip Komnga ila oⱡa mba, moⱡmba purum. 38 Wamp mbᵾ ndi, mᵾkᵾlmᵾ unt, manga wingti ou ila ok, Jisas nga ik nitim mbᵾ, pilik kun etᵾng.

Copyright information for `MED