Luke 22

Juras Ndi Mi Tepa Jisas Ni Wu Nuim Mbᵾ Tᵾp Nguimp Nitim

Bret yis mundi namᵾndᵾrmin Mowi Kor ui ei, mbi tek, Pasopa rᵾng normin. Ui ei nondpa mel pitim. Ni kᵾn, mi ik mbo wu na, Perisi wu na mbᵾ ndi, wamp mbᵾ nga pilik, mundmong etᵾk, nᵾk mel, “Namba uⱡ ti etpᵾn, Jisas imp moⱡpᵾn, rop kundmin nda?” nᵾk pᵾtᵾng. Kitip kᵾni wu 12 kᵾⱡ nga wu ti nga mbi, Juras, mbi ti tek, Iskariyot nᵾtᵾng. Wu ni, Seitan ndi, rukᵾr orunga moⱡpa, kunt kunt rurum. Juras ni mba, wu pris kuimbal na, manga wingti ou mbila wu nuim nimbᵾ kᵾn, rᵾk murum. Jisas tᵾpa, wu kᵾⱡ ngumba ei nga nombuⱡa ti kᵾrᵾrᵾm. Wu nimbᵾ, numan mam ti, Juras kᵾn nguk, Juras kandᵾk, ku moni na mat nguimin nᵾk nᵾtᵾng. Wu ni kᵾⱡ nga nᵾtᵾng ik ni, Juras ni, kapⱡa nimba, Juras ndi, Jisas tᵾpa, wu kᵾⱡ nga ki kaimp ila ngumba. Ei nga, nombuⱡa mam ti, kurpa nokundpa, moⱡpa mba, wote wamp mbᵾ, Jisas kᵾn rᵾp rok, muⱡi nambᵾⱡangina kᵾn, kiyang nᵾmp, Jisas tᵾp nguimp nimba pitim.

Kitip Kᵾni Wu Raⱡ Ndi, Pasopa Nuing Ei Nga Tᵾk Kun Etᵾnggil

Mowi kor mormᵾn ant ila bret yis mundi namᵾndᵾrmin ui ei urum. Ant ei kᵾn, kng sipsip waⱡ mat rok, Pasopa rᵾng nuing ei nga tᵾk kun etᵾng. Wote Jisas ndi, Pita kᵾn Jon raⱡ, kuimp tepa tᵾpa mundpa kᵾn, kundpa nimba mel, “Enmbil pukᵾⱡ, Mowi Kor rumbuⱡ ila rᵾng nuimin mat, tᵾkᵾⱡ kun itinggil pᵾl!” nitim. Wu raⱡ ndi, Jisas kᵾn int ndukᵾⱡ, waldkᵾⱡ nᵾkᵾⱡ mel, “Tᵾn nga rᵾng nimin mbᵾ, kona nant tila, tᵾpᵾⱡ kun itimbil, nᵾkᵾn nᵾn ei?” nᵾtᵾnggil. 10 Jisas ndi, wu raⱡ, kundpa nimba mel, “Enmbil pukᵾⱡ, Jerusa-lem kona peng ila panggila kᵾn, wu ti, nu ming mam ti, nu kuⱡpa mepa om wu ei, pep rokᵾⱡ pukᵾⱡ, wu ei mba, mukᵾr pum manga ila, mukᵾr pukᵾⱡ kᵾn, manga puⱡ wu ei, waldkᵾⱡ nᵾkᵾⱡ mel, ‘Ik mbo wu ei ndi, nim waldpa, na nga kitip kᵾni wu kᵾⱡ kᵾn, Pasopa rᵾng moⱡpᵾn nimin, manga kᵾkaⱡ ei nant nda?’ tᵾl tᵾkᵾn, ora ndana kᵾn, 12 wu ei ndi, enmbil tᵾpa ora ndumba ei, manga kᵾkaⱡ oⱡa orunga ila, rᵾng noⱡᵾp nuimin mel mbᵾ pora, tetᵾm kona ila mel mbᵾ, tᵾkᵾⱡ kun etkᵾⱡ muⱡᵾl!” nitim. 13 Wote, wu ni raⱡ, pukᵾⱡ kandrᵾnggil mel, Jisas ndi, nitim uⱡ nimbᵾ mel pitim. Wote, rᵾng nuing nimbᵾ, tᵾkᵾⱡ kun etkᵾⱡ morunggil.

Jisas Ndi, Bret Kᵾn Wain Raⱡ Elim Nga Kitip Kᵾni Wu Kᵾⱡ Ngurum.

14 Rᵾng nuing ui ei, nondpa itim ila, Jisas na, elim nga kitip kᵾni wu ni kᵾⱡ kᵾn kunda, rat pol nila morung. 15 Kona ila, Jisas ndi, kitip kᵾni wu kᵾⱡ, kundpa nimba mel, “Na akup enim kᵾn rᵾp rop moⱡᵾp, Pasopa nimin ei, numan enim. Wote, na mindil nuimp!” nitim. 16 Jisas ndi, wu ni kᵾⱡ, kundpa nimba mel, “Na ndi, enim ik kupa kat kundᵾp nᵾnt. Na enim kᵾn rup ropᵾn moⱡpᵾn, Pasopa rᵾng ti, wote nui nᵾnmᵾn. Wakᵾt, Got nga wamp tᵾpa mumuk rui uⱡ kupa ei, ekit om ei kᵾn, Pasopa rᵾng ei nga puⱡ ei, mot nᵾm kᵾn, na kᵾning,” nitim. 17 Wote Jisas ndi, nu wain ming n, tᵾpa ambuⱡpa oⱡa ndupa, Got kᵾn angge nimba, wote kitip kᵾni wu kᵾⱡ, kundpa nimba mel, “Enim ya nu ming ngᵾnt ei, kᵾmp tᵾk nᵾi! 18 Na ndi, enim kundᵾp nᵾnt. Akup nga ant ila enim kᵾn, ming ila nu wain nont ei manda. Wote, na nu wain enim kᵾn, moⱡᵾp nuimp ei, Got nga wamp tᵾpa mumuk rui uⱡ ei, ekit om ei kᵾn nuimin,” nitim. 19 Wote Jisas ndi, bret ni tᵾpa ambuⱡpa, puk ropa oⱡa ndupa, Got kᵾn angge nimba, tᵾpa elim nga kitip kᵾni wu kᵾⱡ ngumba, nimba mel, “Ya ei na nga kᵾng ei, ei ndi, enim tᵾpa rᵾpᵾndangga nᵾmp ngᵾnt. Enim tᵾk nok molk, wote na pilik mint muⱡeing nᵾmp ent,” nitim. 20 Rᵾng nok pora nduⱡmina kᵾn, wote nu wain ming ni tᵾpa, ambuⱡpa oⱡa ndupa, Got kᵾn i ku etpa, angge nimba kᵾn, kitip kᵾni wu kᵾⱡ ngumba, nimba mel, “Ya nu wain ming ei, na nga mema ei, enim kᵾn nᵾmp mᵾi ruimp mema ei, oi nimba kᵾn, enim tᵾpa rapᵾndᵾmba,” nitim.

21 Jisas ndi, wu ni kᵾⱡ, kundpa nimba mel, “Ya kᵾnᵾi! Na ki ambuⱡpa tᵾpa, el puⱡa wu mbᵾ nga ki kaimp ila ngumba wu ei, na kᵾn nondpa rat pol ila morum wu ei. 22 Wu ei nga Muⱡᵾl Wu Kupa ndi, nombuⱡa mam ti unt to ropa tinditim ila pep romba. Wu ti ndi, Muⱡᵾl Wu Kupa ei, tᵾpa el puⱡa wu kᵾⱡ nga ki kaimp ila ngum wu ei, mong mam ti tᵾmba!” nitim. 23 Wote, kitip kᵾni wu ni kᵾⱡ ndi, en enim int yant etᵾk, waldᵾk nᵾk mel, “Uⱡ ei, nam ti ndi, etmba nda?” nᵾtᵾng.

Kitip Kᵾni Wu Ni Kᵾⱡ, Ik Palk Nam Ti Kuimbal Moⱡmba Nda Nᵾtᵾng

24 Wote, kitip kᵾni wu kᵾⱡ, en enim nga rᵾk ila, puⱡ mondᵾk ik palk, wu nam ti, kuimbal moⱡmba nda waldᵾtᵾng. 25 Jisas ndi, kitip kᵾni wu ni kᵾⱡ, kundpa nimba mel, “Wu king mat, wamp rᵾⱡaip mat nga kuimbal molk, wamp mbᵾ rᵾp etᵾk etmin wu kᵾⱡ, uⱡ kai mbᵾ elingina, mbi moⱡpa etᵾm. 26 Wote, enim uⱡ ei mel iti natᵾnmᵾn, mon ei ka! Wu nam ti, kuimbal muⱡimp nimba pilim wu ei omba, akil tiyangga! Enim nga kuimbal moⱡpa, rᵾp itimp nimba pilim wu ei ndi, enim tᵾpa rapundpa kindmant kongun endpa tangga! 27 Enim pilᵾi! Nam kuimbal moⱡmba? Wu nam ti, rᵾng nomba moⱡum ei, muna kindmant wu ti, rᵾng kaⱡpa mepa om ei? Rᵾng moⱡpa nom wu ei, kuimbal moⱡmba. Wote, na ya enim nga rᵾk ting ila moⱡᵾp, enim tᵾp rapᵾndᵾp, kindmant kongun endᵾp mor.

28 Uⱡ mat ndi, na oⱡa tᵾpa kanᵾmba om ndam, enim na kᵾn kunda, rᵾp rok muⱡing ei ka! 29 Na nga Tipam ei ndi, Got nga wamp tᵾpa mumuk rui uⱡ ei, na ngurum. Na ndi, Got nga wamp tᵾpa mumuk rui uⱡ ei, akup enim nguimp. 30 Got nga wamp tᵾpa mumuk rui kona na ndi, enim nguimp kona ila enim rat pol mbila molk, rᵾng na, nu na mel mbᵾ nuing. Enim rat pol kai mbila molk, wote Isrel wamp rᵾⱡaip 12 kᵾⱡ, kᵾmp tᵾk iting,” nitim.

Jisas Ndi, Nimba Mel, “Pita Ndi, Na Tᵾpa Mbᵾ Ngumba,” Nitim.

31 Wote Jisas ndi, nimba mel, “Saimon, Saimon, nim kum tekᵾn pili! Seitan ndi, enim nga mondpa pili oⱡa tᵾpa, kanmba uⱡ ei, nimba pora ndum. Uⱡ ei, wit mong kᵾⱡ ambulk, mᵾk tᵾk, elim muna kᵾn, ⱡawa kᵾⱡ purum ni mel, enim kᵾn etmba ei ka! 32 Na ndi, enim nga tᵾp rapᵾndᵾp, atinga rondᵾp pora ndᵾnt uⱡ ei ndi, nim nga mondpa pili ei, mana pi napᵾmba. Nim wote, kelkᵾn ropᵾl rokᵾn, na kᵾn yant okᵾn, nim nga ᵾngᵾnᵾl kᵾⱡ, nᵾkᵾn ronduⱡ mundi!” nitim. 33 Pita ndi, int ndupa, Jisas kundpa nimba mel, “Wu Nuim ye! Nim kan manga ila pun ndam kep, kun ndam kep, na kunda rᵾp ropᵾⱡ mbil mint,” nitim. 34 Jisas ndi, Pita ni, kundpa nimba mel, “Pita, akup rumbᵾⱡ ila, kᵾi kulda rui nᵾri! Nim ndi, na pili napᵾt nᵾkᵾn, raldika indin,” nitim.

Jisas Ndi Koiya, Ku Moni, Na Wal Mel Mbᵾ Nga Nitim

35 Jisas ndi, elim nga kitip kᵾni wu kᵾⱡ, kundpa nimba mel, “Na ndi, enim unt tᵾp mundᵾr ni kᵾn, ku moni wal na, kᵾmp rᵾk na mel mat, mek pi naprᵾng ni kᵾn, enim mel mat nga mon ndurum, muna mon?” nitim. Wu kᵾⱡ ndi, “Mon ndi nᵾndrᵾm!” nᵾtᵾng. 36 Jisas ndi, wu kᵾⱡ, kundpa nimba mel, “Ku moni na, wal na mel mbᵾ tᵾk mek, kur koiya ti natᵾm wu ti, elim nga wal pᵾki kᵾⱡ tᵾpa, wamp mat kᵾn, kur koiya rarᵾp ropa tangga! 37 Uⱡ ei, nambuⱡ emel, Buk Wingti ila, Muⱡᵾl Wu Kupa ei nga, nᵾtᵾm ni mel, ‘Wu ei, elim wamp mbᵾ ndi, etᵾk kit munding,’ nᵾtᵾm. Ni mel, na ndi, enim kundᵾp nᵾnt. Uⱡ kᵾⱡ, na kᵾn pemba. Buk Wingti ila uⱡ kat, na kᵾn omba nᵾtᵾm kᵾⱡ, akup omba kupa etmba. 38 Kitip kᵾni wu kᵾⱡ ndi, Jisas kundᵾk, nᵾk mel, “Wu Nuim ye! Nim ya kᵾni! Tᵾn koiya raⱡ mint, tepᵾn mormᵾn,” nᵾtᵾng. Jisas ndi, wu kᵾⱡ, kundpa nimba mel, “Koiya raⱡ manda,” nitim.

Jisas Ni, Mba Komnga Olip Ila Atinga Rurum

39 Jisas ni, kona murum ni, wak ropa mba, wi Komnga Olip nila, atinga unt rurum uⱡ ei mel, romba purum. Elim nga kitip kᵾni wu kᵾⱡ, akil tek pep rok purung. 40 Komnga ila ruk puk kᵾn, Jisas ndi, wu kᵾⱡ, kundpa nimba mel, “Enim atinga rok mint muⱡᵾi! Ei nga wote, uⱡ mbun mindil mbᵾ, enim kᵾn ui nᵾwangga!” nitim. 41 Nimba pendpa, Jisas ndi, wu kᵾⱡ, wak ropa mba, ruⱡ etpa mel, mura ropa mondpa, atinga ropa, nimba mel, “Wuta! Nim nga numan ei ndi, na nga mindil nuimp uⱡ ei, timp nin ndam, timp. Nim ndi, na nga numan ei pep rui nᵾri, mon! Nim nga numan ei ndi, pin uⱡ mbᵾ mel iti!” nitim. 43 Ni kᵾn, muⱡ kona anggelo ti ndi omba, Jisas etpa ronduⱡ mundrum. 44 Jisas ni pitim ei, mbun itim ila, atinga ronduⱡ mundpa roⱡnga, elim nga kᵾng ila kur mema raⱡ nu mel, oi nitim.

45 Wote, atinga ropa pora ndupa, oⱡa anggilpa omba, elim nga kitip kᵾni wu kᵾⱡ, kᵾndrᵾm mel, numan mbun minal tᵾk, ur pek morung. 46 Jisas ndi, wu kᵾⱡ, kundpa nimba mel, “Nambuⱡ emel, enim ur mint pek mormᵾn? Oⱡa molk, atinga rok mint muⱡᵾi! Tᵾpa kawa ndangga, uⱡ mbun pi mbᵾ, enim kᵾn wangga, enim mana ping,” nitim.

Jisas Ni, Tᵾk Imp Morung

47 Jisas ni, ik nimba moⱡnga kᵾn, wu rᵾⱡaip mam ti orung. Kitip kᵾni wu 12 kᵾⱡ nga wu ti nga mbi, Juras nᵾtmin. Wu ei ndi, wu kat nombuⱡa ora ndupa, mepa urum. Juras ni, Jisas kᵾn nondpa omba, keta nu ropa nuimp nimba itim. Wote, Jisas ndi, Juras waldpa, nimba mel, “Juras, nim ndi, Muⱡᵾl Wu Kupa ei, keta nu rok nokᵾn, wote wu ei, tᵾkᵾn el puⱡa wu kᵾⱡ, nguin pilkᵾn en ei?” nitim. 49 Kitip kᵾni wu kᵾⱡ, Jisas kᵾn rᵾp rok molk, kandrᵾng mel, uⱡ ni kᵾⱡ etᵾng ila, wu ni kᵾⱡ ndi, nᵾk mel, “Wu Nuim ye! Tᵾn koiya tep mormᵾn ei ndi, wu mbᵾ ramin ei?” nᵾtᵾng. 50 Kitip kᵾni wu ti ndi, koiya pinditim ni, ekit tᵾpa, wu pris kuimbal ei nga kongun wu ni, koiya ndi, kum mbo orunga ropa, puⱡa rurum ila mana urum. Wote Jisas ndi, uⱡ ni kandpa, nimba mel, “Uⱡ ⱡawa en ei, wak rui!” nitim. Nimba kᵾn, wu ni nga kum ni, tᵾpa aldpa ropa rᵾmp ndupa, mundrum ila kapⱡa itim.

52 Wote Jisas ndi, wu pris kuimbal na, manga wingti rᵾp wu na, wu nuim na mbᵾ, kundpa nimba mel, “Enim kur koiya na, tᵾmbᵾⱡ na mat, mek onmᵾn mbᵾ, kindᵾp nomba, el ropa ik pili napilim wamp ti, imp muⱡing pilik onmᵾn ei? 53 Ui mbila rᵾk rᵾk, na manga wingti ou ila rukᵾr mor ni, wote enim ndi, na imp muⱡi nambᵾrmᵾn ni ka! Akup nga ui ei, enim nga ti pᵾnt. Rumbᵾⱡ ei ndi, rᵾⱡang ei kapⱡa, ropa mana ndumba,” nitim.

Pita Ndi, Jisas Pili Napᵾt Nitim

54 Jisas ni, ik nimba pora nduⱡnga, imp molk mek puk, wu pris kuimbal kᵾⱡ nga manga ila mukᵾr purung. Pita ni, akil tepa mba, ruⱡ etpa murum. 55 Wu mat, manga ei nga paⱡa rukᵾr ndip kalk morung kona nila, Pita kunda rᵾp rok morung. 56 Pita ni, ndip pilpa murum ila, kongun amp ti ruk omba, Pita ni, nem nᵾm kandpa, amp ni ndi, nimba mel, “Wu ei, Jisas kᵾn rᵾp rokᵾⱡ, andrᵾmbil ndi ka!” nitim. 57 Wote Pita ndi, amp ni, kundpa nimba mel, “Jisas ni wu ei, na pili napᵾt,” nitim. 58 Wote, wu ti ndi omba, Pita murum ni, kandpa mbi ndupa, nimba mel, “Wu ei, Jisas nga rᵾⱡaip ila wu ei ka!” nitim. Pita ndi, int ndupa, nimba mel, “Na Jisas nga kitip kᵾni wu ti mon!” nitim. 59 Wote moⱡnga, ant mong ti omba puⱡnga kᵾn, wu ti ndi omba, Pita nem nᵾm kandpa, ronduⱡ mundpa, nimba mel, ”Kupa mendpᵾⱡ, Jisas kᵾn Galili kona ila wu raⱡ,” nitim. 60 Wote Pita ndi, int ndupa, nimba mel, “Nim nga nᵾn, ik ei, na pili napᵾt ik mat nᵾn ei ka!” Pita ik nimba moⱡᵾng mel, tᵾngᵾnda mint, kᵾi kulda rurum. 61 Ni kᵾn, Nuim ei ndi, tᵾpa ropᵾl ropa, Pita kanduⱡnga mel, wote elim numan tᵾpa mundpa, pitim mel, Wu Nuim ei ndi, ik kat, elim unt kundpa, nitim kᵾⱡ pitim. Nimba mel, “Akup rumbᵾⱡ ila, kᵾi kulda rui nᵾri kᵾn, nim ndi, na pili napᵾt nᵾkᵾn, raldika indin,” nitim ik kᵾⱡ, Pita pitim. 62 Wote Pita ni, mindil tᵾpa, ka etpa, pena purum.

Jisas Nga Oi Endᵾk Tᵾmbᵾⱡ Ndi Rok Etᵾng

63 Jisas imp morung wu mbᵾ nga mat ndi, Jisas nga mong raⱡ muⱡ ti ndi, kum rok pendᵾk, tᵾmbᵾⱡ ndi rok, tᵾk ik kuldᵾk, waldᵾk nᵾk mel, “Nim wu nam ndi, ronum ei?” ᵾldᵾ ndukᵾn, ni nᵾtᵾng. 65 Wote, wu mbᵾ ndi, ik kit mat, Jisas kundᵾk nᵾtᵾng ku.

Jisas Mek Puk Kaunsil Ei Nga Kuimp Keta Ila Purum

66 Mᵾkᵾlmᵾ ant ei oⱡa oⱡnga, Jura nga pris kuimbal wu na, manga wingti rᵾp wu na, mi ik mbo wu mbᵾ kᵾn, mou tenda ila rorung. Mou rok morung kona nila, Jisas tᵾk mek, kaunsil ei nga kuimp keta ila puk, nᵾk mel, “Nim ndi, tᵾn kundᵾk ni! Nim Got ndi, tᵾpa mundpa kᵾn, wamp mbᵾ etkᵾn, rukᵾr ti nitim wu ei, muna wu elpa ti nda?” nᵾtᵾng. Ei mel, nilingina kᵾn, Jisas ndi, punt ropa, nimba mel, “Na ndi, enim ik ei kundᵾp, nint ndam, enim ndi, kapⱡa pilik poⱡ ndui nᵾnding. 68 Wote, enim nam ndi, ik kat waldᵾp, nint ndam, enim ndi kapⱡa punt rui nᵾring. 69 Ei nga akup, Muⱡᵾl Wu Kupa ei, kᵾmp kᵾm mba, Got Ronduⱡ Purum ei nga ki mbo orunga moⱡmba,” nitim. 70 Wu nimbᵾ ndi, Jisas waldᵾk, nᵾk mel, “Nim Got Kangᵾm ei?” nᵾtᵾng. Jisas ndi, wu mbᵾ kundpa nimba mel, “Enim pilik nᵾnmᵾn ei ka!” nitim. 71 Wu nimbᵾ ndi, nᵾk mel, “Namba ik ti, wu mbᵾ wi ramina kᵾn, ok nangina pilmin? Ya wu ei nga keta mᵾn ila, ik nᵾnᵾm kᵾⱡ, tᵾn pilpᵾn pora ndᵾnmᵾn,” nᵾtᵾng.

Copyright information for `MED