Luke 23

Pailot Nga Kuimp Keta Ila Jisas Ni Mek Purung

Wote, wu nuim nimbᵾ ndi pora, Jisas mek, Pailot murum kona ila purung. Jisas ni, puⱡ mondᵾk, kot endᵾk, nᵾk mel, “Tᵾn kᵾnmin ei, wu ei ndi, tᵾn nga wamp mbᵾ, tᵾpa wᵾlᵾ mundpa, ‘Wu nuim mumuk Sisa, ku moni takis ngui ngᵾngᵾi,’ nimba, wote wu ei, el elim kundpa, nimba mel, ‘Wu Kraist wu king ei nga,’” nitim. Wote Pailot ndi, Jisas waldpa, nimba mel, “Nim Jura wamp nga wu king ei?” nitim. Wote Jisas ndi, punt ropa, nimba mel, ”Nim nᵾn ei kupa,” nitim. Pailot ndi, wu pris kuimbal na, wamp mbᵾ kundpa, nimba mel, “Wu ei nga uⱡ ⱡawa ti, kandᵾp ti natᵾnt mon, ei ka!” nitim. Wamp mbᵾ ndi, ronduⱡ ke, nᵾk mel, “Wu ei ndi, Jura kona peng na, Galili kona peng na mbila andpa, wamp mbᵾ, ik mbo endpa, ropa gi ndupa etᵾm. Wote, akup ya ila om,” nᵾtᵾng.

Jisas Ni Erot Nga Kuimp Keta Ila Mek Purung

Pailot ndi, wamp mbᵾ nga nᵾtᵾng ik mbᵾ, pilpa moⱡpa, wamp mbᵾ waldpa, nimba mel, “Wu ei, Galili ila wu ei nda?” nitim. Pailot ndi pilpa mel, Jisas ni wu ei, Erot nga rᵾp itim kona ila moⱡpa, om nimba pitim. Ui ei kᵾn, Erot ni, Jerusalem kona ila murum ku. Pailot ei ndi, Jisas tᵾpa, Erot murum kona nila mundrum. Erot ndi, Jisas urum ni kandpa, numan mam ti ngurum. Jisas nga timan ik ei pitim, wote Jisas kᵾni nᵾkᵾndrᵾm eing, uⱡ rᵾpᵾndi mat itangga, Erot kᵾnimp nimba murum. Uⱡ mbᵾ nga, Erot ndi, ik mat ou ndupa, Jisas wuldᵾtᵾm. Wote Jisas ndi, Erot ik ti, punt ropa, yant ndui nᵾndrᵾm mon. 10 Wu pris kuimbal na, mi ik mbo wu na mbᵾ, Jisas murum nila nondpa ok, Jisas ronduⱡ mundᵾk, kot endᵾtᵾng. 11 Erot kᵾn, elim nga el wu ni kᵾⱡ kᵾn, Jisas tᵾk ik kuldᵾk, Jisas wal pᵾki eng nui kai kat, tᵾk pakᵾndᵾk, Jisas ni, Pailot murum kona nila, nduk yant mundrᵾng. 12 Erot ni, unt Pailot kᵾn, el puⱡa wamp mel morunggil. Ui ei kᵾn mint, wu raⱡ mᵾn mondrᵾnggil.

Pailot Ndi, Jisas Nde Peta Ila Nil Rᵾi Nitim

13 Wote Pailot ndi, rᵾp wu na, wu pris kuimbal na, wamp mbᵾ, wi ropa, nimba mel, “Wᵾi!” nitim. Kona ila rᵾk ok, mᵾk rorung. 14 Pailot ndi, wamp mbᵾ, kundpa nimba mel, “Enim ndi, wu ei, mek ok, na nguk, enim ndi, wu ei kundᵾk, wamp mbᵾ tᵾpa wᵾlᵾ mundrum nᵾnmᵾn. Na ndi, wu ei, enim nga kuimp keta ila kun mondᵾp, waldᵾp pᵾnt ei, wu ei nga uⱡ ⱡawa ti em ila, enim ndi, kot endᵾng uⱡ ei, kurᵾp kandᵾp, ti natᵾnt ei ka! 15 Erot ndi, wu ei nga uⱡ ⱡawa ti, kurpa kandpa, ti natᵾpa kᵾn, wu ei ngumba, ya tᵾn kᵾn yant ndum. Enim pilᵾi! Wu ei nga uⱡ ⱡawa ti mon! Ei nga, tᵾn ndi wu ei, rop kundamin mel mon! 16 Na ndi, wu ei kan puⱡa ndi rop, wak rop, mundamba kᵾn kelpa pangga!” nitim. [ 17 Mowi kor ui mbila pora, Pailot ei ndi, kan manga wu ti, wamp mbᵾ kᵾn, wak ropa ngurum.] 18 Wamp nimbᵾ pora, wi rok ke nᵾk mel, “Wu ei, rok kondkᵾn, Barapas wak rokᵾn, tᵾn kᵾn mundi!” nᵾtᵾng. 19 (Barapas ni, wu ei, kona peng ila gapman wu mat kᵾn, el ropa wu mat ropa kᵾndrᵾm ila tᵾk kan ngurung.) 20 Wote Pailot ndi, wamp mbᵾ waldpa pilpa, Jisas wak rop, mundamba pangga, nitim. 21 Wote aldpa, wamp mbᵾ ndi, wi rok, Pailot kundᵾk, nᵾk mel, “Jisas nde peta ila nil ro! Jisas nde peta ila nil ro!” nᵾtᵾng. 22 Wote Pailot ndi, raldika endpa kᵾn, nimba mel, “Wu ei, namba uⱡ ⱡawa ti em? Wu ei kuⱡangga nimp ei, wu uⱡ ⱡawa ti, na ndi, kandᵾp ti natᵾnt ei ka! Na ndi, wu ei, kan puⱡa ndi rop kᵾn, wote wak rop mundamba pangga!” nitim. 23 Wote, wamp mbᵾ ndi, ronduⱡ ke nᵾk, ronduⱡ mundᵾk, Pailot ndi, Jisas nde peta ila nil rangga nᵾtᵾng. Wamp mbᵾ nga ronduⱡ, wi rok nᵾtᵾng ik ei ndi, Pailot nga ik nitim ei, rok mana mana ndurᵾng. 24 Ni kᵾn, Pailot ndi, wamp mbᵾ nga nᵾtᵾng ik ni, pep ropa, nimba mel, “Jisas ni kuⱡangga!” nitim. 25 Wote, wamp mbᵾ ndi, Pailot wi rok kundᵾk, nᵾk mel, “Barapas ni, gapman kᵾn el ropa wamp ropa kᵾndrᵾm wu ei, wak rokᵾn mundana, kelpa wangga!” nᵾtᵾng. Nᵾtᵾng ei kᵾn, Pailot ndi, wu ei, wak ropa mundpa kᵾn, wamp kᵾⱡ nga nᵾtᵾng ik ni, pep ropa, Jisas ni tᵾpa, el wu kᵾⱡ nga ki kaimp ila ngurum.

Jisas Tᵾk Nde Peta Ila Nil Rorung

26 Wote, el wu nimbᵾ ndi, Jisas ni, imp molk mek purung ila, Sairin kona peng ila wu ti, mbi tek, Saimon nᵾtmᵾn ni, kona peng ila rukᵾr uimp nimba urum ni, tᵾk imp molk, nde peta ni kᵾⱡ ngurung ila, koma ropa mepa, Jisas ni, pep ropa, akil tepa purum. 27 Wamp rᵾⱡaip mam ti, Jisas pep rok, akil tek purung. Wote, amp mat ou ndupa, Jisas kont kolk ka etᵾk purung. 28 Jisas ni, ropᵾl ropa, amp ka etᵾk, orung ni kᵾⱡ, kundpa nimba mel, “Enim Jerusalem kona peng ila amp kᵾⱡ ye! Enim ndi, na nga nᵾndᵾk, ka iti nᵾtᵾi, mon! En enim nga orunga nᵾk kᵾn, enim nga kangambuⱡa, mbᵾ nga nᵾndᵾk, ka itᵾi! 29 Enim pilᵾi! Wote ui ti, ekit wangga kᵾn, wamp mat ndi, enim kundᵾk, i etᵾk ning. ‘Amp mbᵾ, kangambuⱡa mi naimbᵾk, kangambuⱡa aim ngui nganggᵾk eng mbᵾ, numan kai pileing,’ ning. 30 Ui ei kᵾn, wamp mat ndi, komnga mong mbᵾ kundᵾk, ‘Tᵾn tᵾkᵾn mo rokᵾn, ⱡᵾrᵾk ndui!’ ning. 31 Ni kᵾn, akup wamp mbᵾ ndi, nde nu pi kᵾⱡ uⱡ ei mel enmin, wote nde kᵾⱡ kᵾp em ei kᵾn, namba uⱡ ti iting nda?” nitim.

32 El wu mbᵾ ndi, uⱡ kit mbᵾ, etᵾnggil wu raⱡ kunda, Jisas kᵾn nde peta ila pendᵾk ruing, pilik mek purung. 33 Wote, wu ni kᵾⱡ mek puk, kona komnga ti, mbi tek, ‘Wamp Peng Ombil’ kona nᵾtmin nila, Jisas nde peta ila nil rok pendᵾtᵾng. Wu ni raⱡ nga ti, Jisas nga ki mbo orunga, nde peta tila nil rok pendᵾk, wu ti, ki rar orunga nde peta ila nil rok pendᵾk etᵾng. 34 Wote Jisas ndi, nimba mel, “Wuta Got nim ndi, wu kᵾⱡ nga uⱡ ⱡawa mbᵾ, wak rundi. Wu kᵾⱡ uⱡ enmin ei nga puⱡ ti, pili napilik enmin,” nitim. El wu kᵾⱡ ndi, Jisas nga wal pᵾki na mel nimbᵾ, potᵾk tek, satu etᵾk, wu ti tangga, nᵾk etᵾng. 35 Wote wamp nimbᵾ, anggilik kandᵾk moⱡina, Jura nga rᵾp wu nimbᵾ ndi, Jisas nga ik kuldᵾk nᵾk mel, “Wu ei ndi, wamp mbᵾ, tᵾpa rapundpa etᵾm uⱡ ei mel, elim Muⱡᵾl Wu Kupa ti, Got ndi, tᵾpa mundrum ila, wamp mbᵾ, etpa rukᵾr tangga nimba itim ndam, elim ndi, elim kapⱡa uⱡ mat, etpa tᵾpa mundangga!” nᵾtᵾng. 36 El wu mbᵾ kunda ku, ik raka rondᵾk, wote Jisas rok pendᵾtᵾng nila, nondpa ok, ki runt rok, nᵾk mel, “Nim kupa Jura wamp mbᵾ nga Wu Nuim Mumuk ei ndam, ninim ndi, uⱡ mat etkᵾn olkᵾn pi!” nᵾtᵾng. 38 Wu kᵾⱡ ndi, mon kat rok, Jisas nga peng oⱡa orunga, nde peta nila mondᵾk, nᵾk mel, “WU EI, JURA WAMP NGA WU NUIM MUMUK EI!” nᵾtᵾng.

39 Wu ralt, nde peta ila rorung ni nga ti ndi, Jisas ni tᵾpa, ik kuldpa nimba mel, “Nim kupa Got nga tᵾpa mundrum wu ti ndam, ninim ndi, uⱡ mat etkᵾn, ninim etᵾk tᵾk mundkᵾn, wote tᵾl tᵾkᵾn rapundkᵾn iti ku!” nitim. 40 Wote, wu ti ndi, nitim ik ni pilpa kᵾn, wu ni, ik mura ngumba, nimba mel, “Wu ei, tᵾn mindil kapⱡa mint nonmun. Ei nga, nim Got kᵾn mundmong iti natᵾkᵾn nᵾn ei?” 41 Tᵾl uⱡ kit mbᵾ, etmbᵾⱡ wu raⱡ, kapⱡa rok kunding enmin. Wu ei nga ⱡawa ti mon. Ei nambuⱡ emel, rok kunding enmin nda?” nitim. 42 Wu ni ndi, Jisas kundpa, nimba mel, “Wote, Jisas ni, nim pukᵾn, nim nga mumuk rui kona ei mᵾn ndam, nim ndi, na piliya!” nitim. 43 Wote Jisas ndi, wu ni kundpa, nimba mel, “Na ndi, nim ik kupa ti, kundᵾp nᵾnt. Nim wote, na kᵾn rᵾp ropᵾⱡ, muⱡ kona muⱡin,” nitim.

Jisas Ni Kurum

44 Wote ant ni, ou rᵾnggilmᵾ elinga, kona rumbᵾⱡ ropa pelinga mba, epindama ant mong raldika itim. 45 Ant ei kᵾn, kona ant rui narᵾⱡnga kᵾn, manga wingti ou ila muⱡ mbal mam ti, kuipa rok mondᵾrmin ei, rᵾk ila paⱡpa, mba raⱡ itim. 46 Wote Jisas ni, ke ronduⱡ, nimba mel, “Wuta ye! Na nga muⱡnga ei, nim nga ki kaimp ila ngᵾnt,” nitim. Nimba kᵾn, Jisas ni kurum. 47 El wu kᵾⱡ nga wu kuimbal ni ndi, uⱡ itim ni kᵾⱡ, kandpa kᵾn, Got nga mbi paka rondpa, nimba mel, “Wu kun kai ei nga, uⱡ ⱡawa ti mon ei, rok kondᵾnmin ei ka!” nitim. 48 Wamp mat ndi, uⱡ itim ni, kᵾnmin nᵾk, orung nimbᵾ ndi, uⱡ itim ni kandᵾk, min ngᵾn mundᵾk, pepiⱡ ⱡuwa rok, kelik mang kona purung. 49 Jisas nga wamp pundᵾn mbᵾ kᵾn, Galili kona peng ila amp kat, Jisas pep rok orung ni kᵾⱡ kᵾn, wamp kᵾⱡ ruⱡ etᵾk mel molk, uⱡ itim ni kandrᵾng.

Jisas Kurum Ni Nga Kᵾng Kᵾⱡ On Ku Manga Ila Tetᵾng

50 Wu ti, kona ila murum ei nga mbi, Josep. Jura wamp kᵾⱡ nga Arimatiya kona peng ila wu ei. Wu ei, kaunsil tᵾpa etᵾm wu kun kai ei. 51 Wu ei ndi, wu kaunsil mat nga numan pilik, uⱡ etmin mbᵾ mel iti natᵾtᵾm. Got nga wamp tᵾpa mumuk rui uⱡ ei mint, nokundpa morum. 52 Josep mba, Pailot ni, waldᵾp pilamba kᵾn, Jisas nga on ei ngangga, nimba mba, pitim mel, Pailot ei ndi, kapⱡa nitim. 53 Wote Josep ndi, Jisas nga on ni, mana tᵾpa, muⱡ mbal kurᵾmᵾⱡa tila kum ropa, mepa mba, ku manga kont ti, wamp on kona mim etᵾk tetᵾng nila, rᵾk ndupa titim. 54 Mowi kor mormin ui ei, ekit oⱡnga kᵾn, rᵾng molk nuing mbᵾ, tᵾk kun etᵾng. 55 Galili kona ila amp kat, Jisas pep rok orung ni kᵾⱡ, Josep ndi, Jisas nga on ni, mepa mba, wamp on ku manga nila etpa, tenᵾm mel nant nda nᵾk, kᵾnmin nᵾk, akil tek purung. 56 Amp ni kᵾⱡ, kandᵾk pendᵾk, wote kelik, manga kona yant ok kᵾn, kopung mura rui kai na, ronduⱡ mat, tᵾk kun etᵾk morung. Mi ik ei ndi, nᵾtᵾm ei mel, mowi kor ei kᵾn, muⱡ tᵾk kor morung.

Copyright information for `MED