Luke 24

Jisas Ni, Ⱡoporpa Kont Murum

Kor ou ei nga ant puⱡ mondrung ni nga mᵾkᵾlmᵾ unt, amp ni kᵾⱡ ndi, kopung mura rui ronduⱡ na mat, tᵾk kun etᵾk tetᵾng nimbᵾ mek, wamp on kona nila purung. Amp ni kᵾⱡ puk, anggilik kandrᵾng mel, ku manga keta puⱡ puⱡ kumba rormᵾn ku kara ni, mberᵾk nduk, tᵾk ᵾldᵾ orunga, angᵾndᵾtᵾng ila ᵾnggᵾtᵾm. Ku manga nila mukᵾr puk, kandrᵾng ei, Nuim Jisas nga on ni, ti nᵾtᵾtᵾm. Jisas nga on ni, nᵾl teng nda nᵾk, amp ni kᵾⱡ, wote pilik rondᵾk, numan ou nduk, pilik molk, kandrᵾng mel, wu raⱡ muⱡ kurᵾmᵾⱡa pakᵾkᵾⱡ, morunggil ila rᵾⱡang ndi, ᵾlt nitim. Amp ni kᵾⱡ, mundmong etᵾk, mᵾi kandᵾk morung ila, wu ni raⱡ ndi, amp kᵾⱡ kundkᵾⱡ, nᵾkᵾⱡ mel, “Wu koⱡpa tikil rom ei nga, nambuⱡ emel, ok kurᵾk, mormᵾn ei?” nᵾtᵾnggil. “Wu ei, Galili kona ila kont moⱡpa kᵾn, enim kundpa nitim ni mel pilᵾi! Wu ei, ⱡoporpa omba pum. Ya kona ila pi napᵾtᵾm. Enim kundpa, nimba mel, ‘Wu mat ndi, Muⱡᵾl Wu Kupa ei tᵾk, wu kit mat ngangina kᵾn, nde peta ila nil rangina, kuⱡangga kᵾn, wote wamp on kona ila tᵾk puk andangga. Wote, rumbᵾⱡ raldika omba, pangga kᵾn, ⱡoporpa kont moⱡmba,’” nitim. Jisas kont moⱡpa nitim ik ni pᵾtᵾng. Uⱡ itim kandrᵾng nimbᵾ mel puk, kitip kᵾni wu 11 ni kᵾⱡ kᵾn, wamp mbᵾ kᵾn kundᵾk, nᵾtᵾng. 10 Amp Mariya Makndelin, Jowana na, Jeims mam amp Mariya na, amp mat kunda, rᵾp rok molk kᵾn, nombuⱡa rung wu kᵾⱡ kundᵾk nᵾtᵾng. 11 Nombuⱡa rung wu ni kᵾⱡ ndi, amp kᵾⱡ nga ik nᵾtᵾng ik ei, mondᵾk pili napᵾtᵾng. Ik nuwa mat nᵾnmᵾn nᵾk pᵾtᵾng. 12 Ni kᵾn, Pita mint, tᵾkrᵾpa mba, wamp on kona ila kᵾnimp nimba purum. Mba mana pepa, mukᵾr ndupa kᵾndrᵾm mel, muⱡ mbal kurᵾmᵾⱡa kat mint titim. Wote, mang kona yant omba kᵾn, uⱡ kᵾⱡ nga numan ou ndupa pitim.

Imeiyus Nombuⱡa Paka Ila Kitip Kᵾni Wu Raⱡ Ndi, Jisas Kandrᵾnggil

13 Ant tenda ei kᵾn, wu ralt, Imeiyus kona ila mbil ni kᵾⱡ, nombuⱡa mam ila orᵾnggil. Imeiyus ni kona ei, Jerusalem kona peng ou ei nga ruⱡ etpa mel tetᵾm. 14 Wu raⱡ, nombuⱡa mam ila okᵾⱡ kᵾn, Jisas rok etᵾng uⱡ mbᵾ mel timan rokᵾⱡ nᵾkᵾⱡ orᵾnggil. 15 Wu raⱡ ndi, uⱡ etᵾng ni mbᵾ nga ik ou ndukᵾⱡ, waldkᵾⱡ nᵾkᵾⱡ orᵾnggil. Ni kᵾn, Jisas elim ni, wu raⱡ kᵾn nondpa urum uⱡ ei, pili napᵾtᵾnggil. 16 Wu raⱡ nga mong ila mel mat ndi, ⱡᵾrᵾk ndurum ila, Jisas kandkᵾⱡ, mbi ndui nandrᵾnggil. 17 Jisas ndi, wu raⱡ, waldpa nimba mel, “Enmbil namba uⱡ em mbᵾ nga nᵾnmbil, wote enmbil nᵾl pinggil, onmbil nilinga mel, wu raⱡ nga numan orunga, mbun tᵾtᵾnggil?” nitim. 18 Wu raⱡ nga wu ti nga mbi, Kliopas ni ndi, Jisas nga nitim ik ni, punt ropa, nimba mel, “Kona elpa elpa mbila wu mbᵾ ok, Jerusalem kona peng ila mormᵾn uⱡ ei, nim wu tenda ei mint, uⱡ em ei, pili nᵾpᵾn ei?” nitim. 19 Wu ni, i nilinga mel, Jisas ndi, wu ni raⱡ, waldpa nimba mel, “Namba uⱡ mat em nda?” nitim. Wu ni ndi, nimba mel, “Nasaret kona peng ila Jisas ni, wu ei ndi, uⱡ rᵾpᵾndi mat etᵾm. Painui wu ei ndi, ik na kongun na, ronduⱡ mat, wamp kᵾn, Got nga kuimp keta mbila nimba etᵾm. 20 Wu pris kuimbal na, rᵾp wu mbᵾ ndi, Jisas tᵾk gapman nga ki kaimp ila nguⱡina kᵾn, gapman ndi, nimba kᵾn, Jisas nde peta ila nil rᵾi nilinga, nde peta ila nil rorung. 21 Unt, tᵾn pᵾtmᵾn ei, Got ndi, Jisas tᵾpa mundpa kᵾn, Isrel wamp mbᵾ etpa rukᵾr tangga, nimba itim. Wote, wamp kit mbᵾ ndi, Jisas nde peta ila nil rok eng. Uⱡ ei nga, rumbᵾⱡ raldika omba pum ei nga akup mormᵾn. 22 Ei mel pilpᵾn moⱡmina, wote akup nga mᵾkᵾlmᵾ unt, tᵾn nga amp mat wamp on kona ila puk kandᵾk, yant ok nilingina, tᵾn rut nimin. 23 Puk kanᵾng ei, Jisas nga on ni, on kona ila ti natᵾm. Amp kᵾⱡ yant ok, nᵾk mel, tun ndi anggelo kᵾⱡ kᵾnmin ila nᵾk mel, Jisas ⱡoporpa kont morum nᵾng. 24 Tᵾn nga wu mat puk kanᵾng ei mel ku, amp kᵾⱡ kandᵾk yant ok nᵾng. Wu kᵾⱡ ndi, Jisas nga on ei, kᵾⱡ tem kᵾni nakᵾnᵾng,” nitim.

25 Wote Jisas ndi, wu raⱡ, kundpa nimba mel, “Enim mbil nga numan ti mon, ei ka! Painui wu mbᵾ nga nᵾtmin ik mbᵾ, enmbil mondkᵾⱡ, pili napᵾtᵾmbil ei ka! 26 Enmbil pili napᵾtᵾmbil ye! Jisas ni mbun mam ti, unt koma ropa kᵾn, wote uⱡ eng nui ti, Got kᵾn tᵾm ei?” nitim. 27 Jisas ndi, wu raⱡ, ik mat mbo inditim. Moses nga mi ik mat, puⱡ mondpa, mbo endpa, pai nui wu mbᵾ nga ik puⱡ mat, nimba ngumba, Got nga Buk Wingti ila mat, elim nga itim uⱡ mbᵾ mel nimba, ngumba itim.

28 Wu raⱡ nga numan pinggil, pilkᵾⱡ orᵾnggil kona ila nondpa oⱡunggila. Jisas ni, kandpa, kelpa kun pi mel itim. 29 Wote, wu raⱡ ndi, Jisas ni imp molkᵾⱡ, nᵾkᵾⱡ mel, “Nim akup tᵾl kᵾn muⱡmin,” nᵾtᵾnggil. Kona ant ei, mana mba elinga, nondpa rumbᵾⱡ romba itim ila, Jisas ni, manga ila mukᵾr puⱡnga kᵾn, wu ni raⱡ kᵾn, rᵾp rok morung. 30 Wote Jisas ni, wu raⱡ kᵾn molk, rᵾng nuing etᵾng ila, Jisas ndi, bret ni, tᵾpa oⱡa ndupa, Got kᵾn angge nimba, ambuⱡpa puk ropa tᵾpa, wu raⱡ ngurum. 31 Jisas ndi, uⱡ ni eling kᵾn, wu raⱡ mong makᵾlkᵾⱡ kandrᵾnggil mel, Jisas kandkᵾⱡ, mbi ndᵾrᵾnggil. Tᵾngᵾnda mint, Jisas purum ila, wu raⱡ ndi, Jisas ni, kᵾni nakᵾndrᵾnggil. 32 Wote, wu ni raⱡ, ik nᵾkᵾⱡ int yant etkᵾⱡ, nᵾkᵾⱡ mel, “Tᵾl nombuⱡa mam ila ᵾmbᵾⱡ ei kᵾn, Jisas ndi, Got nga Buk Wingti ila ik puⱡ kai mat, tᵾl nimba nguⱡnga kᵾn, tᵾl pilpᵾⱡ min ngᵾn mundᵾmbᵾⱡ ni ka!” nᵾtᵾnggil. 33 Wu raⱡ ndi, ik nimbᵾ, nᵾkᵾⱡ pendkᵾⱡ tᵾkᵾrkᵾⱡ, Jerusalem kona peng nila yant orᵾnggil. Okᵾⱡ kandrᵾnggil mel, kitip kᵾni wu 11 kᵾⱡ kᵾn, wamp mat kunda mᵾk rok morung. 34 Wamp mbᵾ ndi, wu raⱡ, kundᵾk nᵾk mel, “Wu Nuim ni, ⱡoporpa kont morum! Saimon ndi, wu ei kanim ei ka!” nᵾtᵾng. 35 Wu raⱡ nga uⱡ mat, nombuⱡa mam ila Jisas ndi, itim kandrᵾnggil nimbᵾ mel timan rokᵾⱡ, wamp mbᵾ ngurᵾnggil. Jisas ndi, bret tᵾp roⱡnga kᵾn, wu raⱡ ndi, Jisas kandᵾk, mbi ndukᵾⱡ, etᵾnggil mbᵾ mel nᵾtᵾnggil.

Kitip Kᵾni Wu Kᵾⱡ Ndi, Jisas Ni Kandrᵾng

36 Kitip kᵾni wu ni kᵾⱡ, ik nᵾk moⱡina kᵾn nila rᵾk, Jisas ni, omba anggilpa, wu kᵾⱡ kundpa nimba mel, “Enim numan kai mbᵾ mint, pilik muⱡᵾi!” nitim. 37 Wu ni kᵾⱡ, rut nᵾk, mundmong etᵾk pilik mel, Jisas nga min ei nda nᵾk, kandrᵾng. 38 Wote Jisas ndi, wu kᵾⱡ, kundpa nimba mel, “Nambuⱡ emel, enim rut nᵾk, numan ou nduk, pilik mormin ei? 39 Na nga kᵾmp ki ᵾrᵾⱡa mbᵾ, ya ok, ambulk kᵾnᵾi! Wamp nga min ei, ya na mel ti wangga, kapⱡa kᵾni nᵾkᵾning, mon!” nitim. 40 Ni kᵾn, Jisas ndi, elim nga kᵾmp ki ᵾrᵾⱡa mbᵾ, wu ni kᵾⱡ ora ndurum. 41 Wu kᵾⱡ, ama numan minal ngurung. Wote, wu kᵾⱡ nga mondpa pili ti, kapⱡa mon ei nga, numan ou ndupa pᵾtᵾng. Uⱡ ila, Jisas ndi, wu kᵾⱡ, kundpa nimba mel, “Rᵾng mat, enim tek mormin ei?” nitim. 42 Wote, wu ni kᵾⱡ ndi, oma karᵾng mint ti ngurung ila, Jisas ndi, oma mint ti tᵾpa, nurum ila, wu kᵾⱡ kandrᵾng.

44 Jisas ndi, wu kᵾⱡ, kundpa nimba mel, “Unt, na enim kᵾn moⱡᵾp, enim kundᵾp nᵾmp pora ndᵾr ni ka! Unt, ik mong mat, na nga mon rondᵾk ngurung ei, Moses nga mi ik na, painui wu kᵾⱡ na, ik nᵾtᵾng. Wote, Buk Wingti ila ik kᵾⱡ, akup omba kupa enim,” nitim. 45 Jisas ndi, wu kᵾⱡ nga pilpa kungᵾndi orunga nimba, piral ndurum ila uⱡ puⱡ mbᵾ, pilik kai etᵾng. 46 Jisas ndi, wu kᵾⱡ, kundpa nimba mel, “Buk Wingti ei ndi, nimba mel, ‘Kraist ni, wu ei, mbun koma ropa mba koⱡpa, wote ⱡoporpa mba, kont moⱡmba,’ nᵾtᵾm. 47 Wu ei nga ronduⱡ ila mbi ei, tek angᵾndᵾk, wamp mbᵾ kundᵾk nangina, wamp mbᵾ, pilik numan ropᵾl rok tangina, Got ndi, wamp mbᵾ nga uⱡ kit mbᵾ, wak rondᵾmba. Enim ndi, kongun ei, Jerusalem kona peng ila puⱡ mondᵾk etᵾk, ya uⱡ penim kanmin mbᵾ mel, wamp kundᵾk, nᵾk itᵾi! 49 Enim pilᵾi! Unt Wuta ndi, nimba mᵾi ropa kᵾn, Muⱡnga Wingti, enim kᵾn nguimp nitim ei, akup nondpa, enim ngumba. Enim akup ya Jerusalem kona peng ou ila molk, Got nga ronduⱡ ei, tᵾk kᵾn, wote enim kongun etᵾk pᵾi!” nitim.

Got Ndi, Jisas Tᵾpa Mepa Muⱡ Kona Purum

50 Wote Jisas ndi, elim nga kitip kᵾni wu ni kᵾⱡ, tᵾpa mepa mba, Betani kona nila puk molk kᵾn, Got kᵾn atinga ropa, ki oⱡa ndupa, wu kᵾⱡ, memp pendpa itim. 51 Wu kᵾⱡ, memp pendpa moⱡnga kᵾn, Got ndi, tᵾpa mepa, muⱡ kona oⱡa purum. 52 Wote, wu ni kᵾⱡ, mura rok mondᵾk, Jisas nga mbi paka rondᵾk, ambulk palk, Jerusalem kona peng ila yant orung. 53 Ui nimbila rᵾk rᵾk, manga wingti ila mint puk, Got nga mbi paka rondᵾk etᵾng.

Copyright information for `MED