Luke 3

Jon Wamp Nu Tindi Wu Ei Ndi, Got Nga Ik Nitim

Wote, Sisa Taipiriyus ni wu ei, Rom wamp kᵾⱡ nga wu nuim mumuk moⱡnga, pana 15 itim. Pontiyus Pailot ni wu ei, Jura kona peng ila gapman kuimbal murum. Ui ei kᵾn, Erot ndi, Galili kona ei nokᵾndrᵾm. Ʉngᵾn Pilip ndi, Ituriya kᵾn Treikonaitis kona raⱡ nokᵾndrᵾm. Laisaniyas ni, wu ei ndi, Apilin ei, kona peng ei nokᵾndrᵾm. Wote, wu Anis kᵾn, Kaiyapas raⱡ pris kuimbal morunggil. Ui ei kᵾn, wu Sakaraiya kangᵾm Jon ni, kona kui waka tila murum ila, Got ndi, ik mat Jon kundpa nitim. Wote, Jon ik ni pilpa mba kᵾn, nu Joran ᵾldᵾ ila petᵾng wamp nimbᵾ pora, kundpa nimba mel, “Enim numan ropᵾl rok, nu tangina kᵾn, Got ndi, enim nga uⱡ kit etᵾk mormin mbᵾ, tinga ndundᵾmba,” nitim. Akup uⱡ etmba kᵾⱡ, unt painui wu Aisaiya ndi, ik pai nomba, mon ropa nitim ei mel pimba,

“Kona kui waka tila wamp ti nga keta ila wi ti onum ei ndi, nimba mel, ‘Wu Nuim ei nga nombuⱡa mam omba ei, rok kun endᵾk, etᵾk kai mundᵾk itᵾi!
Kona kut tem mbᵾ, mᵾi mbo rok. Komnga tem mbᵾ, kulda rok ruⱡa nduk, nombuⱡa mam kᵾrᵾiya em mbᵾ, etᵾk tᵾk kun mundᵾk, nombuⱡa kit moⱡum mbᵾ, etᵾk kai mondᵾk itᵾi! Ya mᵾi kona ila wamp mbᵾ ndi, Got nga wamp Etpa Ti Uⱡ ei kᵾning!’” nitim.
Wote wamp puⱡi, Jon ndi, nu tindangga nᵾk oⱡungina, Jon ndi, wamp mbᵾ kundpa nimba mel, “Enim wimbᵾ kit mbᵾ ye! Got nga popᵾⱡ ei, nondpa omba enim ila, enim nung nᵾk ping ei, nam ndi nᵾm? Enim numan ropᵾl rok, kupa rong ndam, enim nga uⱡ kai eng mbᵾ ndi, ora ndupa mel, enim numan ropᵾl rok pora ndurᵾng nimba ei ka! Enim nga keta mᵾn ei ndi, nᵾk mel, ‘Eiparam ei tᵾn nga wu tipam anda kouwᵾ nᵾtmin ik ei, ni nᵾnᵾi!’ Na ndi, enim ik kat kundᵾp nᵾnt. Ya ila ku tetᵾm kᵾⱡ, Got ndi, kapⱡa etpa, Eiparam nga kangambuⱡa pundᵾn kᵾⱡ, mondᵾmba mint. Nde puⱡ ila rui kat nokundpa tetᵾm. Nde kit kat mong ropa, kit mondum kᵾⱡ, rui rok tᵾk ndip kuⱡing,” nitim.

10 Jon nga ik nitim ni, wamp mbᵾ pilik, min ngᵾn mundᵾk, Jon waldᵾk nᵾk mel, “Akup tᵾn namba uⱡ itmin nda?” nᵾtᵾng. 11 Wote, wamp mbᵾ nga nᵾtᵾng ik ni, Jon ndi, punt ropa nimba mel, “Nim wamp nam ti, wal pᵾki raⱡ tekᵾn mun ndam, wal pᵾki ti tᵾkᵾn, wal pᵾki mon wamp ei ngui. Wote, nim rᵾng mat tekᵾn mun ndam, rᵾng mon wamp ei, mat ngui ku,” nitim. 12 Ku moni takis tᵾtmᵾn wu mat, nu timin nᵾk ok morung nimbᵾ ndi, Jon waldᵾk nᵾk mel, “Ik mbo wu ye! Tᵾn akup namba uⱡ itmin nda?” nᵾtᵾng. 13 Jon ndi, wu kᵾⱡ kundpa nimba mel, “Enim gapman ndi, ku moni takis tᵾi nᵾm, to ila mendpᵾⱡ tᵾi. Ik kol rok wamp mbᵾ nga ku moni mat pendᵾk, ti nᵾtᵾi mon!” nitim. 14 Wote, el wu mat ndi, Jon waldᵾk nᵾk mel, “Akup tᵾn namba uⱡ itmin nda?” nᵾtᵾng. Jon ndi, el wu kᵾⱡ nga ik, punt ropa nimba mel, “Enim ndi, wamp mat, nᵾk kit mondᵾk, ku moni na mel mbᵾ, kindᵾp nok ti nᵾtᵾi mon! Enim ndi, wamp mat, nga ik kep nok, kot pilik kᵾn, ku moni na mel mbᵾ, roldᵾk ti nᵾtᵾi mon! Enim nga kongun etmin ila nga ku tᵾtmᵾn kᵾⱡ, numan ngᵾk tᵾi!” nitim.

15 Ni kᵾn, wamp nimbᵾ ndi, Got nga ngurum wu ti omba nᵾtmᵾn ndi, Jon ni, wu ei aⱡᵾm ei, nda nᵾk, numan ou nduk pᵾtᵾng. 16 I nᵾk pᵾtᵾng ni, Jon ndi, ik punt ropa wamp mbᵾ, kundpa nimba mel, “Na ndi, enim wamp mbᵾ, nu ila mendpᵾⱡ nu tᵾndᵾnt. Wote wu ti, akil tepa omba ei ndi, na nga ronduⱡ ei, mana ndupa omba. Na wu kai ti ndi, kapⱡa wu ei nga kᵾmp rᵾk mondum raⱡ nga kan ei pilinga, nduimp mel kapⱡa mon. Wu ei ndi, enim wamp mbᵾ, Muⱡnga Wingti ei kᵾn, ndip ei kᵾn, pendpa nu tᵾndᵾmba. 17 Wu omba ei, wit kongun etmin ti, mepa omba wit rᵾlkawa mbᵾ, apᵾrpa tᵾpa, mundpa kelpa, wit mong pemba tᵾpa, wit manga ila mᵾk romba. Wote, wit kit mbᵾ, tᵾpa ndip rᵾk rᵾk nomba, mint morum ila mundᵾmba,” nitim.

18 Jon ndi, ik mat ou ndupa, wamp mbᵾ, pilik teing nimba, ronduⱡ mundpa, ik mbo endpa, Rᵾnang Ik Kai mbᵾ nimba ngurum.

19 Wote Jon ndi, nuim Erot ni, ik mura ngurum. Ei nambuⱡ emel, Erot ni, gapman wu kuimbal moⱡpa kᵾn, elim nga ᵾngᵾn nga amp Erotiyas ni, manggᵾpa titim. Wote, uⱡ ⱡawa elpa mat, ou ndupa itim ku. 20 Wote Erot ndi, uⱡ ⱡawa unt itim kᵾⱡ, tᵾpa pei mundpa kᵾn, wote Jon ni, aldpa kan ngurum.

Jon Ndi, Jisas Nu Tᵾndᵾtᵾm

21 Wamp mbᵾ, Jon ndi, nu tindpa pora nduⱡnga kᵾn, wote Jisas ni omba, nu titim. Nu tᵾpa pora ndupa, wote atinga ropa moⱡnga kᵾn, wi muⱡ kona kumba tilinga, Muⱡnga Wingti ni, kᵾi imil mel mana omba, Jisas kᵾn murum. Ni kᵾn, wi muⱡ ila, ik ti omba nimba mel, “Nim na nga kangᵾm waⱡᵾm ei, na ndi, nim numan minal ngunt,” nitim.

Jisas Nga Anda Kouwᵾmin Mbᵾ

23 Jisas ni, pana 30 omba puⱡnga kᵾn, puⱡ mondpa kongun itim. Wamp mbᵾ ndi, pilik mel, Jisas ni, wu Josep nga kangᵾm ei nᵾk pᵾtᵾng. Wu Josep nga tipam ei Eli. 24 Wu Eli nga tipam ei Matat. Matat tipam Lipai. Lipai tipam Melki. Melki tipam Janai. Janai tipam Josep. 25 Josep tipam Matatiyas. Matatiyas tipam Eimos. Eimos tipam Neiyum. Neiyum tipam Esli. Esli tipam Nakai. 26 Nakai tipam Mat. Mat tipam Matatiyas. Matatiyas tipam Semein. Semein tipam Josek. Josek tipam Jora. 27 Jora tipam Jowanan. Jowanan tipam Resa. Resa tipam Serapapel. Serapapel tipam Seldiyel. Seldiyel tipam Neri. 28 Neri tipam Melki. Melki tipam Ari. Ari tipam Kosam. Kosam tipam Elmatam. Elmatam tipam Er. 29 Er tipam Josuwa. Josuwa tipam Eliyeser. Eliyeser tipam Jorim. Jorim tipam Matat. Matat tipam Lipai. 30 Lipai tipam Simiyon. Simiyon tipam Jura. Jura tipam Josep. Josep tipam Joram. Joram tipam Eliyakim. 31 Eliyakim tipam Meleiya. Meleiya tipam Mena. Mena tipam Matata. Matata tipam Neitan. Neitan tipam Depit. 32 Depit tipam Jesi. Jesi tipam Opet. Opet tipam Bowas. Bowas tipam Salmon. Salmon tipam Nason. 33 Nason tipam Aminatap. Aminatap tipam Atmin. Atmin tipam Arni. Arni tipam Esron. Esron tipam Peres. Peres tipam Jura. 34 Jura tipam Jekop. Jekop tipam Aisak. Aisak tipam Aparam. Aparam tipam Tera. Tera tipam Neiyor. 35 Neiyor tipam Seruk. Seruk tipam Reyu. Reyu tipam Pelek. Pelek tipam Iper. Iper tipam Sela. 36 Sela tipam Keinan. Keinan tipam Arpakat. Arpakat tipam Sem. Sem tipam Nowa. Nowa tipam Lamek. 37 Lamek tipam Matusela. Matusela tipam Inok. Inok tipam Jeret. Jeret tipam Malalalel. Malalalel tipam Keinan. 38 Keinan tipam Enos. Enos tipam Set. Set tipam Andam. Andam ni wu ei, Got nga kangᵾm.

Copyright information for `MED