Luke 5

Jisas Nga Kitip Kᵾni Wu Kuimp Tepa Titim Kᵾⱡ

Tᵾnggᵾt kᵾn, Jisas ni, num Genesaret nga ok, pena nila ᵾnggᵾtᵾm. Kona nila wamp mam ti ok, Got nga ik kai mat, Jisas ndi, mbo indangga pilimin nᵾk, Jisas murum kona nila nondpa ok, tᵾk paⱡa etᵾng. Wote Jisas ndi, kᵾndrᵾm mel, nu kanu raⱡ nu ok, pena ila tetᵾng. Nu kanu kᵾⱡ, oma wal pendᵾtmᵾn. Wu kᵾⱡ, nu kanu kᵾⱡ wak rok, oma wal kᵾⱡ ⱡumᵾi rok morung. Wote Jisas ni, Saimon nga nu kanu nila puka ropa, omba oⱡa purum. Oⱡa mba moⱡpa, Saimon kundpa nimba mel, “Nim nu kanu kᵾⱡ onunga, kot pungaⱡ ndukᵾn, na ila rukᵾr ndui,” nitim. Jisas nu kanu pol ila moⱡpa, wamp ik mbo inditim.

Jisas ndi, wamp mbᵾ ik mbo endpa pora ndupa, wote Saimon kundpa, nimba mel, “Nu kanu kᵾⱡ, mek num rᵾk ting ila puk, oma wal kᵾⱡ rok, num ila mana ndukᵾn, mat tin,” nitim. Wote Saimon ndi, Jisas punt ropa nimba mel, “Wu Nuim ye! Tᵾn rumbuldi oma ruimin nimbun, kongun mam ti etpᵾn, mbun andᵾp koinmin rᵾngᵾndmᵾn. Ei wote, oma tenda kot kep, rui nurmin. Akup nim nᵾn ei kᵾn, teng ndup, oma wal kᵾⱡ, rop num ila mana ndamp,” nitim. Wote, oma wal ni, kᵾⱡ rok tᵾk, num ila mana nduⱡina, oma puⱡi wal kᵾⱡ, peka ropa rung nimba itim. Wu ni kᵾⱡ ndi, wu kat nu kanu tila morung kᵾⱡ, wi rok, tᵾn tᵾk rᵾpᵾndeing, “Wᵾi!” nᵾtᵾng. Wote, nu kanu kat, mek oⱡina, oma nimbᵾ tᵾk, nu kanu raⱡ ila rᵾk rᵾk elingina, nu kanu raⱡ mbun etpa, num ila mana mba itim. Saimon Pita ndi, oma puⱡi tᵾtᵾng uⱡ ni kandpa, mundmong etpa, Jisas kᵾn nondpa omba, mura ropa mondpa nimba mel, “Wu Nuim ye! Na uⱡ kit mbᵾ nga puⱡ wu ei. Nim ndi, na wak rokᵾn kelkᵾn pi,” nitim. Ei kᵾn, Saimon Pita kᵾn, wu ᵾngᵾnᵾl kat kunda, oma puⱡi tᵾtᵾng uⱡ ni kandᵾk, min ngᵾn mundrᵾng. 10 Saimon kᵾn kongun tenda ila etᵾng wu Jeims kᵾn Jon raⱡ, wu raⱡ Sepeti nga kangᵾm raⱡ kunda, min ngᵾn mundrᵾng. Wote Jisas ndi, Saimon Pita kundpa nimba mel, “Nim mundmong iti nᵾti! Akup nim oma wal pendkᵾn, tᵾn ei mel, wote nim ndi, wamp mbᵾ i ku etkᵾn, tᵾkᵾn mekᵾn, na kᵾn uin!” nitim. 11 Wote, wu ni kᵾⱡ ndi, nu kanu kᵾⱡ, mek ekit ok tek, en enim nga mel mbᵾ pora, wak rok tek kelik, Jisas pep rok akil tek purung.

Jisas Ndi, Kint Pombuⱡma Rurum Wu Ti Etpa Titim

12 Tᵾnggᵾt kᵾn, Jisas ni, kona peng tila mba murum. Kona nila, kint pombuⱡma ndi, kᵾng mbᵾ kum rurum wu ti murum. Wu ni moⱡpa, Jisas ni kandpa omba, Jisas nga kuimp keta ila mura ropa, mondpa nimba mel, “Wu Nuim ye! Nim ndi, kapⱡa nᵾkᵾn pin ndam, na etkᵾn kai mundun ka!” nitim. 13 Wote Jisas ndi, elim nga ki ni, oⱡa ndupa, wu ni minda ndupa, nimba mel, “Na kapⱡa nᵾmp ei kᵾn punt ei, nim nga ku, ei kapⱡa tangga. Ni kᵾn, tᵾngᵾnda mint kui ni ndi, wu ni wak roⱡnga, wu ni eng nui kai ei, murum. 14 Jisas ndi, ronduⱡ mundpa wu ni, kundpa nimba mel, “Ya uⱡ nim kᵾn em kᵾⱡ, wamp ti kundkᵾn, ni nᵾni mon! Nim pukᵾn wu pris kᵾⱡ kᵾn, nim nga kᵾng kᵾⱡ ora ndukᵾn, Moses ndi, nitim uⱡ ei mel, Got kᵾn angge mel ti ngui. I in uⱡ ei ndi, wamp ndi, nim kandᵾk, nim nga kui ni, pora nim ning,” nitim. 15 Ni kᵾn, Jisas nga itim uⱡ kᵾⱡ nga timan ik ei, pi nimba kona mbila purum. Wamp ou ndupa, Jisas nga uⱡ itim ik timan nimbᵾ pilik, kui rurum wamp mbᵾ, en enim etpa kapⱡa indangga, nᵾk orung. 16 Wote, ui ou ndupa, Jisas ndi, wamp mbᵾ, wak ropa mondpa, kelpa mba, kona mo ropa mat ila atinga rorum.

Jisas Ndi, Kump Ki Rumbᵾⱡi Wu Ti Etpa Titim.

17 Ui ti kᵾn, Jisas ndi, wamp mat, ik mbo endpa murum. Perisi wu na, mi ik mbo wu mat ila rᵾk morung ku. Wu orung mbᵾ, Jerusa-lem kona peng ou ei kᵾn, Galili kona na, Juriya kona peng mbila orung. Jisas ndi, Got nga ronduⱡ ei, tepa moⱡpa, kui wamp mbᵾ, etpa kapⱡa inditim. 18 Wu mat ndi, kᵾmp ki rumbᵾⱡi wu ti, rupⱡaima kulk mek, Jisas murum manga nila mukᵾr ping pilik orung. 19 Wamp ndi, manga ni ti, nimba murum ila kui wu ni, mek mukᵾr ping nombuⱡa mam ti, ti nᵾtᵾtᵾm. Kui wu ni, rupⱡaima pᵾkᵾ mek, Jisas murum manga nila oⱡa puk, manga im ni, rokᵾtᵾk tek, kui wu pitim rupⱡaima ni kᵾⱡ, kan kulk mana nduⱡmina mba, Jisas murum kuimp keta nila kun titim. 20 Jisas ndi, wu kᵾⱡ nga mondᵾk pilik uⱡ etᵾng ei, kandpa kui wu ni, kundpa nimba mel, “Wu ang ye! Nim nga, uⱡ kit mbᵾ, na ndi, pendᵾp kent,” nitim. 21 Ni kᵾn, Perisi wu na, mi ik mbo wu na mbᵾ ndi, en enim ik nᵾk, int yant etᵾk nᵾk mel, “Wu ei nam? Got tᵾpa wᵾlᵾ mundnum ei ka! Wamp ti ndi, kapⱡa wamp nga uⱡ kit etmin mbᵾ, pendpa kili nakilmba. Uⱡ kit mbᵾ, Got tenda ei ndi mint, uⱡ kit pendpa ketᵾm,” nᵾtᵾng. 22 Wu kᵾⱡ nga numan pilik ik nᵾtᵾng ni, Jisas ndi, pilpa pora ndupa, wu kᵾⱡ kundpa nimba mel, “Nambuⱡ emel, enim nga numan ila ik kᵾⱡ pilik mormin. 23 Namba ik i wei wei etᵾp nimp? Na nim nga uⱡ kit mbᵾ, wak rondᵾnt, muna rupⱡaima kᵾⱡ mekᵾn anggilkᵾn pi? 24 Na ndi, enim pileing nᵾmp nᵾnt, ‘Muⱡᵾl Wu Kupa ei, ya mᵾi kona ila ronduⱡ ei, mepa urum ei ndi, kapⱡa uⱡ kit mbᵾ wak romba,’” nitim. Wote Jisas ndi, kᵾmp ki rumbrᵾm wu ni, kundpa nimba mel, “Nim kundᵾp nᵾnt. Nim oⱡa molkᵾn, nim nga rupⱡaima kᵾⱡ tᵾkᵾn, mekᵾn mang kona pi,” nitim. 25 Tᵾngᵾnda mint, wu ni run nimba, oⱡa anggilpa, wamp nga kuimp keta nila, elim nga rupⱡaima ni kᵾⱡ, tᵾpa mepa, Got nga mbi paka rondpa mang kona purum. 26 Wamp mbᵾ ndi, Jisas uⱡ itim ni kandᵾk, min ngᵾn mundᵾk. Got nga ronduⱡ mam ti, kongun enim, kanmᵾn nᵾk, Got nga mbi paka rondᵾk nᵾk mel, “Akup uⱡ elpa ti mel kanmᵾn ei ka!” nᵾtᵾng.

Jisas Ndi, Lipai Wu Ni Wi Rurum

27 Wote, Jisas ni mba, kᵾndrᵾm mel, ku takis tᵾtmᵾn manga nila wu ti, ku takis tᵾpa murum. Wu ei nga mbi ei Lipai. Wote Jisas ndi, wu ni, kundpa nimba mel, “Nim na pep rokᵾn ui!” nitim. 28 Wote, wu Lipai ni, mel mbᵾ pora, wak ropa tepa kelpa, Jisas pep ropa purum.

29 Lipai ndi, rᵾng mam ti, Jisas tᵾpa tᵾma endpa kᵾndrᵾm. Ku takis tᵾtmᵾn wu mbᵾ kᵾn, wote wu elpa mat kunda, wu raⱡ kᵾn, rak nduk molk, rᵾng norung. 30 Ni kᵾn, Perisi wu na, mi ik mbo wu na mbᵾ ndi, Jisas nga kitip kᵾni wu kᵾⱡ kᵾn, ik ou nduk nᵾk mel, “Nambuⱡ emel, ku takis tᵾk, uⱡ kit mbᵾ etmin wamp mbᵾ kᵾn, rak nduk, rᵾng nok mormin?” nᵾtᵾng. 31 Jisas ndi, wu ik nᵾtᵾng ni, punt ropa nimba mel, “Wamp ti, kui rui narᵾm ni, dokta kᵾn pi napᵾrᵾm ei ka! Kui rorum wamp ei mint, dokta kᵾn purum. 32 Uⱡ ei mel ku, na ur ei, wamp kun kai mbᵾ, numan ropᵾl reing nᵾmp ui nᵾwᵾr mon. Na ndi, wamp kit mbᵾ, wi ramba kᵾn, numan ropᵾl reing nᵾmp ur,” nitim.

Rᵾng Mi Rormin Uⱡ Ei Nga Jisas Ndi Nitim

33 Wu mat ndi, Jisas kundᵾk nᵾk mel, “Ui mat ou ndupa, Jon nga kitip kᵾni wu kᵾⱡ kᵾn, wote Perisi kitip kᵾni wu kᵾⱡ kᵾn, rᵾng mowi rᵾk rᵾk pek, atinga rᵾk rᵾk rok etᵾng. Wote, nim nga kitip kᵾni wu kᵾⱡ, rᵾng na, nu na mbᵾ normin ei ka!” nᵾtᵾng. 34 Wote Jisas ndi, wu kᵾⱡ kundpa nimba mel, “Wu nam ti, amp kokila tᵾmba ei kᵾn, enim ndi, wu ei nga wamp mbo mbᵾ kᵾn, rᵾp ropa muⱡangina kᵾn, wamp kᵾⱡ, rᵾng mi rok nandᵾk muⱡing nda, ei mon! 35 Wote, amp tᵾmba wu ei, wamp mat ndi, tᵾk mek pangina kᵾn, wu ei nga wamp mbo mbᵾ, en enim molk kᵾn, rᵾng mowi ping,” nitim.

36 Wote Jisas ndi, ik ek ti ropa, wu kᵾⱡ kundpa nimba mel, “Wal pᵾki ping unt nga kat, rᵾr rom ndam, wamp ti ndi, kapⱡa muⱡ kont ti ondpa tᵾpa, wal pᵾki unt nga kᵾⱡ, rumbᵾⱡi nambᵾⱡᵾmba mon. Uⱡ ei em ndam, muⱡ kont ei, etpa kit mondᵾmba. Wal pᵾki unt nga kᵾⱡ kᵾn, muⱡ kont ei kᵾn, to tenda mel kapⱡa mon. 37 Kng meme kᵾng unt nga kᵾⱡ ila kanda, nu wain kont ei kulk, tᵾk oi ndᵾng mel mon. Uⱡ ei em ndam, kng meme kᵾng kᵾⱡ, rok nimba, nu wain kont ei, mᵾi ting ila, oi nimba moⱡmba. Kng meme kᵾng kᵾⱡ, kit moⱡmba ku. 38 Nu wain kont ei kolk, tᵾk kng meme kᵾng kont ila oi ndurmᵾn. 39 Wamp nam ti, nu wain unt nga nom ndam, wote nu wain kont ei, numan ngui nganggᵾrᵾm. Wamp ei, nimba mel, ‘Nu wain unt nga ei ka!’” nᵾtᵾm.

Copyright information for `MED