Mark 1

Jon Wamp Nu Tindi Wu Ei Ndi, Rᵾnang Ik Ei Nitim

Puⱡ mundrum rᵾnang ik kai ei, Jisas Kraist Got nga kangᵾm ei morum. Ik kᵾⱡ unt kuimp tepa, painui wu Aiseiya ndi, mon ropa pinditim ei mel,

“Got ndi, nimba mel, ‘Na ndi, wu ti tᵾp mundimp, ei na nga nombuⱡa rᵾng wu ei, kuimp tepa nim nga nombuⱡa mam ei, tᵾpa kun endᵾmba.’
Wamp ti ndi, kona kui waka ila, wi ropa nimba mel, ‘Wu Nuim ei nga, nombuⱡa mam ti, rop tᵾpᵾn kun indamina, nombuⱡa mam ropᵾn kun etpᵾn timᵾn ila elim wangga!’” nitim.
Jon elim mendpᵾⱡ omba, kona kui waka nila moⱡpa, wamp nu tindpa, Got nga ik puⱡ nimbᵾ, nimba ngumba. Wote, wamp mbᵾ kundpa nimba mel, “Enim nga uⱡ kit mbᵾ, wak rok nu tangina kᵾn, Got ndi, enim nga uⱡ kit mbᵾ, wak rondᵾmba,” nitim. Wamp minal ya Juriya kona ou ei kᵾn, wote ya Jerusalem kona peng ou raⱡ nga wamp mbᵾ ndi ok, Jon nga ik ei pᵾtᵾng. Wamp mbᵾ ndi, en enim nga uⱡ kit mbᵾ nᵾk para nduⱡungina, Jon ndi, nu Joran ila wamp mbᵾ nu tinditim.

Jon nga muⱡ mbal paⱡpa kan raⱡpa itim mel kᵾⱡ, kng kamel kᵾng mbila mim etᵾng. Rᵾng nurum mbᵾ, pilma muⱡ na, uipᵾ goimba na mbᵾ nurum. Wote Jon ndi, wamp nimbᵾ ik puⱡ mbᵾ nimba ngumba mel, “Wu ti na nga mbuldung orunga omba ei, na mel kapⱡa mon. Wu ei ama oⱡa orunga. Ei nga, na ndi, wu ei kᵾn, mura rop mondᵾp, elim nga kᵾmp rᵾk kan ei pilinga, nduimp mel kapⱡa mon. Na ndi, enim nu ila mendpᵾⱡ nu tᵾndᵾnt. Wote, wu ei ndi, enim Muⱡnga Wingti ei kᵾn pendpa, nu tᵾndᵾmba,” nitim.

Jisas Nu Tilinga, Wote Seitan Ndi, Oⱡa Tᵾpa Kundrum

Wote, ui ei kᵾn ku, nu ou ndupa, Jisas Nasaret kona moⱡpa kᵾn, Galili kona ou ila oⱡnga, Jon ndi, Jisas nu Joran ila nu tinditim. 10 Wote, Jisas nu ni, wak ropa ekit omba kᵾndrᵾm mel, wi muⱡ ni kumba tilinga, Got nga Muⱡnga Wingti ni, kᵾi imil mel, elim kᵾn mana urum. 11 Wote, wi muⱡ ila ik ti ekit omba nimba mel, “Nim na nga numan ngur kan tenda ei, na nim kᵾn numan mam ti enim,” nitim.

12 Wote, Muⱡnga Wingti ei ndi, Jisas etpa mepa mba kona kui waka ila purum. 13 Kona kui waka ila moⱡnga, rumbᵾⱡ 40 omba puⱡnga Seitan ndi, Jisas uⱡ kit mat tangga nimba, oⱡa tᵾpa kᵾndrᵾm. Kng na mel rakra mbᵾ ila morung ku. Ei wote, anggelo mbᵾ ndi ok, Jisas tᵾk rapᵾndrᵾng.

Oma Rui Wu Tᵾmbᵾkak Kat Jisas Ndi Wi Ropa Titim

14 Wote, Jon ni tᵾk kan ngᵾk pendilingina kᵾn, Jisas ni Galili kona nila mba, Got nga rᵾnang ik kai nimbᵾ tᵾpa, wamp mbᵾ ik puⱡ nimbᵾ, kundpa nimba mel, “Ui ni akup om. Got nga wamp tᵾpa mumuk rui uⱡ ei nondpa onum. Enim nga uⱡ kit mbᵾ wak rok, ya Got nga rᵾnang ik kai kᵾⱡ mondᵾk pilᵾi!” nitim.

16 Wote, Jisas ni, num Galili ᵾldᵾ nila omba kᵾndrᵾm mel, oma rorumbil wu raⱡ, Saimon Pita kᵾn, ᵾngᵾn Andru raⱡ, oma wal mundkᵾⱡ morunggil. 17 Jisas ndi, wu ni raⱡ kundpa nimba mel, “Enmbil na kᵾn wᵾl! Na ndi, enmbil wamp mbᵾ oma mel wal mundkᵾⱡ tᵾnggil ei mel mbo indimp,” nitim. 18 Ik ei mel pilkᵾⱡ kᵾn, tᵾngᵾnda mint, en enmbil nga oma wal na mbᵾ wak rokᵾⱡ, Jisas pep rok purᵾnggil. 19 Jisas onunga wei kot wuldᵾng mba kᵾn, wu ᵾngᵾn ᵾngᵾn ralt kᵾndrᵾm. Wu raⱡ Jeims kᵾn Jon raⱡ, wu Sepeti nga kangᵾm raⱡ. Wu ni raⱡ, nu kanu ila, rukᵾr molkᵾⱡ, oma wal ni kᵾⱡ, tᵾkᵾⱡ kun etᵾnggil. 20 Jisas ndi, wu ni raⱡ kandpa kᵾn, wi roⱡnga kᵾn, wu ni raⱡ ndi, en enmbil nga tipam wu Sepeti ni kᵾn, kongun tᵾk rapᵾndrᵾng wu nimbᵾ kᵾn, wak rokᵾⱡ Jisas kᵾn purᵾnggil.

Kur Kit Murum Wu Ti

21 Jisas kᵾn, elim nga kitip kᵾni wu ni kᵾⱡ kᵾn, Kaperniyum kona ou ila orung. Orung orunga Jura wamp nga mowi kor mormin ui ei kᵾn, Jisas manga wingti kel ila mba kᵾn, puⱡ mondpa wamp ik mbo inditim. 22 Jisas nga ik ei pᵾtᵾng wamp mbᵾ ndi, Jisas nga ik mbo rundrum uⱡ ila, pilik min ngᵾn mundrᵾng. Jisas ya Jura wamp mbᵾ nga mi ik ila ik mbo rondurmᵾn ei mel mon. Elim ndi, ik mbo rundrum ei ik ronduⱡ.

23 Ni kᵾn, kur kit murum wu ti manga wingti ila omba kᵾn, wi ropa nimba mel, “Nim tᵾn kᵾn namba uⱡ itin pilkᵾn un, Nasaret kona ila wu Jisas? Nim ya un ei, tᵾn rokᵾn ndip kᵾⱡin ei nga un ei? Nim nam, ei na nim pilip mor. Nim Got nga nombuⱡa rung Wu Wingti ei!” nitim.

25 Jisas ndi, muⱡnga kit ni kᵾn ronduⱡ mundpa nimba mel, “Raka nᵾkᵾn moⱡa! Wu ei, wak rokᵾn kelkᵾn ekit pa!” nitim.

26 Kur kit nga muⱡnga ni ndi, wu ni ama ronduⱡ ambuⱡpa pur pur ndupa, kei ronduⱡ nimba, wu ni wak ropa kelpa ekit urum.

27 Wamp nimbᵾ ndi, min ngᵾn mundᵾk, en enim wamp mat ndi, mat waldᵾk nᵾk mel, “Ei namba uⱡ? Uⱡ kont ti ik mbo rondnum nda? Wu ei nga ronduⱡ ila muⱡnga kit mbᵾ kundpa nilinga, ik ei teng ndᵾnmᵾn ei ka!” nᵾtᵾng.

28 Wote ni kᵾn, Jisas nga uⱡ itim nimbᵾ, Galili kona nimbila puⱡnga, pilik pora ndurᵾng.

Jisas Ndi, Wamp Puⱡi Etpa Kai Mundrum

29 Jisas kᵾn elim nga kitip kᵾni wu ni kᵾⱡ kᵾn, Jeims kᵾn Jon raⱡ kunda, manga wingti kel ei wak rok puk, Saimon kᵾn Andru raⱡ nga mang kona purung. 30 Saimon nga kulpam ni, kui roⱡnga, ruⱡmina ila pitim. Wote, Jisas mang kona purum ni kᵾn, Jisas kundᵾk nᵾk ei mel, amp ei kui roⱡnga petᵾm nᵾtᵾng. 31 Amp ni, kui noⱡnga pitim ruⱡmina nila, Jisas rukᵾr mba amp ni, ki mbo orunga ambuⱡpa, tᵾpa rapundpa oⱡa tᵾpa mundrum. I itim ni kᵾn, kui ni pora nilinga, amp ni ndi, wamp orung nimbᵾ nga rᵾng nimbᵾ, kandpa tᵾpa kun itim.

32 Wote, ant ni mana mba rumbᵾⱡ romba elinga kᵾn, wamp mat ndi, Jisas murum nila kui rᵾrᵾm wamp na, kur kit murum wamp nimbᵾ mek orung. 33 Kona peng kel ila, wamp nimbᵾ ok, manga keta ila mᵾk rok morung. 34 Jisas ndi, wamp kui elpa elpa pitim wamp puⱡi etpa tᵾpa mundpa, kur kit rukᵾr murum mbᵾ, tᵾpa mundpa itim. Jisas ndi, kur kit mbᵾ, ik neing nimba kandpa kont iti nᵾtᵾtᵾm. Nambuⱡ emel, kur kit mbᵾ ndi wu ei, Jisas nᵾk pᵾtᵾng.

Jisas Ndi, Galili Kona Ila Ik Puⱡ Nimba Ngurum

35 Utᵾma orunga ipri unt, rangᵾmba min titim kᵾn, Jisas ni rut nimba manga ni wak ropa kona peng kel ila ekit mba, kona waka tila elim atinga rurum. 36 Wote, Saimon kᵾn elim nga rup rok andᵾrmᵾn wu mbᵾ kᵾn, Jisas ni andᵾk kurᵾrᵾng. 37 Wote, wu ni kᵾⱡ ndi, Jisas ni kandᵾk tᵾkᵾn, kundᵾk nᵾk mel, “Wamp minal nim andᵾk kurᵾnmin,” nᵾtᵾng.

38 Jisas ndi, punt ropa nimba mel, “Tᵾn kona kel kel mbila elpa elpa pamin! Na kona mbila, Got nga ik puⱡ mbᵾ nᵾmp nguimp ku. Ei nambuⱡ emel, na uⱡ ei nga ur,” nitim.

39 Jisas ndi, Galili kona rᵾk nila pora andpa manga wingti kel nimbᵾ ila, Got nga ik puⱡ nimba ngumba, kur kit mbᵾ tᵾpa mundpa titim.

Jisas Ndi, Kint Pombuⱡma Rurum Wu Ti, Etpa Kai Mundrum

40 Kint pombuⱡma rurum wu ti Jisas ndi, tᵾpa rᵾpᵾndangga nimba mura koptᵾm ropa mondpa, Jisas waldpa, “Nim ndi na nga kᵾng ei etᵾp kai mundimp nᵾkᵾn pin ndam, kapⱡa indi,” nitim.

41 Jisas wu ni nga kont kuⱡpa, ki ni run ndupa, wu ni minda ndurum. Minda ndupa nimba mel, “Na numan ngᵾnt. Nim kai muⱡᵾn!” nitim.

42 I nilinga, wu ni nga kᵾng ila kint pombuⱡma rurum ni kᵾⱡ pora nilinga, kᵾng kai ni, ekit urum. 43 Jisas ndi, wu ni kelpa pangga nimba, ronduⱡ mundpa nimba mel, “Uⱡ ei nga wamp ti, kundkᵾn ni nᵾni! Kuimp tekᵾn Pris ei kᵾn pana, kanim uⱡ ei ndi, kai itangga! Wote, wamp mbᵾ ndi, nim nga kᵾng kai em uⱡ ei kandᵾk, pilik iteing. Angge mel ti, Got nga mbi ila nguin ei, Moses ndi nitim uⱡ ei mel itᵾn,” nitim.

45 Wote, wu ni ndi, mba Jisas ndi, itim uⱡ ni nga wamp nimbᵾ, timan ropa ngurum. Ik ni kona nimbila pora pᵾtᵾng. I etpa wu ei, ik nitim ei mba ou nduⱡnga, Jisas wamp morung kona peng kel mbila rᵾk pi nᵾpᵾrᵾm. Ei nga, Jisas ekit orung kona waka nimbila moⱡnga, wamp pora kona elpa elpa nimba ila molk, Jisas murum nila orung.

Copyright information for `MED