Mark 10

Jisas Ndi, Wu Amp Raⱡ Ndenggᵾⱡa Nitim Ei Nga Ik Mbo Inditim

Wote Jisas ndi, kona ni wak ropa, Juriya kona ila mba, nu Joran puⱡa ropa, noi orunga purum. Kona ila, wamp minal ndi, aldpa Jisas kᵾn ok mᵾk rorung. Jisas ndi, wamp nimbᵾ, ik mbo endᵾtᵾm ni mel ku inditim.

Perisi wu mat ndi ok, Jisas oⱡa tᵾk waldᵾk nᵾk mel, “Tᵾn nga mi ik ei ndi, tᵾn kundpa wu ei ndi, amp ei kapⱡa ndenggᵾⱡa ndumba nda?” nᵾtᵾng.

Jisas waldᵾtᵾng ni, punt ropa nimba mel, “Moses ndi, enim namba mi ik ei, nimba ngurum?” nitim.

Wote, wu ni kᵾⱡ ndi, punt rok nᵾk mel, “Moses ndi, kapⱡa nangga, wu ti ndi, mon ropa amp ei, mondkᵾn kili nim ndam, wu ei ndi, ambᵾm ei, mondpa kilangga pangga,” nitim.

Jisas ndi, wu ni kᵾⱡ kundpa nimba mel, “Moses ndi, mi ik ei, ropa ngurum. Ei nambuⱡ emel, enim nga numan orunga ronduⱡ puⱡnga, Moses ndi kandpa, mi ik ei mbᵾ ropa rurum. Wote, unt kuimp tepa, Got ndi, mel mbᵾ itim ei kᵾn, ‘Got ndi, wu ei kᵾn, amp ei kᵾn mint itim. Uⱡ ei nga, wu ei ndi, tipam mam raⱡ wak ropa, elim nga amp ei kᵾn, omba rump nᵾtᵾm. Wote, wamp raⱡ omba, wamp tenda mel etᵾm. Wamp raⱡ aldpa wamp raⱡ mel mon, wamp tenda mel mormbil.’ Wote Got ndi, wu amp raⱡ tᵾpa tenda itim uⱡ ei, “Wamp ti ndi nimba ndenggᵾⱡa ndui nᵾndangga,” nitim.

10 Wote Jisas kᵾn, elim nga kitip kᵾni wu ni kᵾⱡ kᵾn, kelik mang kona puk kᵾn, elim nga kitip kᵾni wu ni kᵾⱡ ndi, uⱡ kᵾⱡ nga nᵾk waldᵾtᵾng. 11 Wote Jisas ndi, i etpa kundpa nimba mel, “Wu ti ndi, elim nga amp ei ndenggᵾⱡa ndupa, amp kont paka ti tᵾm ndam, wu ei ndi, amp ei kᵾn, wapra rui uⱡ ei nga etmba. 12 Wote, uⱡ ei mel ku, amp ti ndi, elim nga wu ei ndenggᵾⱡa ndupa, wu kont paka ti pum ndam, amp ei ndi, wapra rui uⱡ ei nga ku etmba,” nitim.

Jisas Ndi, Kangambuⱡa Mbᵾ Memp Pinditim

13 Wamp mat ndi, en enim nga kangambuⱡa mbᵾ, Jisas ndi, memp pindangga nᵾk mek orung. Wote, elim nga kitip kᵾni wu ni kᵾⱡ ndi, wamp nimbᵾ kundᵾk nᵾk mel, “Kelik mek pᵾi!” nᵾtᵾng. 14 Wote Jisas ndi, ik ei mel nᵾtᵾng ila kandpa kᵾn, popᵾⱡ kuⱡpa, elim nga kitip kᵾni wu ni kᵾⱡ kundpa nimba mel, “Kangambuⱡa kᵾⱡ mon ni nᵾnᵾi! Enim ndi, wak rok mundangina, na kᵾn uing. Nambuⱡ emel, Got nga tᵾpa mumuk rui uⱡ ei, wamp i etpa mbᵾ nga. 15 Na enim ik kupa ei, kundᵾp nᵾnt, wote wamp na ti, Got nga tᵾpa mumuk rui uⱡ ei, kangambuⱡa kel kᵾⱡ mel moⱡpa, ti natᵾm ndam, wamp ei, Got nga tᵾpa mumuk rui uⱡ ila rukᵾr pi napᵾmba,” nitim. 16 Wote Jisas ndi, kangambuⱡa nimbᵾ, kanggilpa rukᵾr tᵾpa ambuⱡpa, memp pinditim.

Kang Wu Mel Pi Ti

17 Wote, Jisas kelpa mbi nimba puⱡnga kᵾn, wu ti tᵾkrᵾpa omba kᵾn, Jisas nga kuimp keta nila, mura ropa mondpa kᵾn, Jisas waldpa nimba mel, “Ik mbo wu kai ye! Na wote, namba uⱡ ti, etᵾp uⱡ nga kᵾnt nga kont mul uⱡ ei timp nda?” nitim.

18 Wote Jisas ndi, wu ni waldpa nimba mel, “Nambuⱡ emel, nim ndi, na kundkᵾn wu kai nᵾn? Wamp ti, ama kai mon! Got wu tenda ei mint kai! 19 Nim mi ik kᵾⱡ pᵾtᵾn ei, ‘Nim wamp ti rokᵾn kundi nᵾkᵾndi, nim wu amp kandpa kum pindi uⱡ ei iti nᵾti! Nim kindᵾp nui nᵾni! Nim ik kol rui nᵾri! Nim ik kol rokᵾn, wamp ti nga mel na ti, rok ranggᵾkᵾn iti nᵾti! Nim tipanᵾm manᵾm raⱡ numan ngokᵾn tᵾkᵾn ou ndui!’” nitim.

20 Wu ni ndi, nimba mel, “Ik mbo wu ye! Mi ik kᵾⱡ na ama kang kel kᵾn, moⱡᵾp pep rur,” nitim.

21 Jisas ndi, wu ni kun kandpa, numan ndi, koⱡpa nimba mel, “Nim mel tenda ti nga mint mon kant ei ka! Pukᵾn nim nga mel mbᵾ pora, rarᵾp rokᵾn, ku tᵾkᵾn wote, ku mbᵾ ndi, wamp kit kurpa mbᵾ tᵾkᵾn rᵾpndi. I in uⱡ ei ndi, nim muⱡ kona wu nuim muⱡᵾn. Nᵾnt uⱡ ei mel etkᵾn, nim na kᵾn, pep rokᵾn ui!” nitim. 22 Wu ni, ya kng mel mbᵾ nga wu nuim murum ei nga, ik ni pilpa kᵾn, kuimp keta orunga kit pilpa mang kona purum. Ei nambuⱡ emel, elim wu mel ni ti murum.

23 Wote Jisas ndi, tᵾpa ropᵾl ropa, elim nga kitip kᵾni wu ni kᵾⱡ, kundpa nimba mel, “Wamp nuim mel pi mbᵾ, Got nga wamp tᵾpa mumuk rui kona ila rukᵾr ping ei nga mbun etpa petᵾm,” nitim.

24 Jisas nitim ik ei nga, kitip kᵾni wu ni kᵾⱡ pilik, min ngᵾn mundrᵾng. Wote Jisas ndi, aldpa wu ni kᵾⱡ, kundpa nimba mel, “Na nga kangambuⱡa kᵾⱡ, wamp ti, Got nga wamp tᵾpa mumuk rui kona ila rukᵾr mbi nimba pilim ndam, elim mbun mam mbᵾ, koma romba. 25 Kng kamel ei, gal ruri nombuⱡa mam ila rukᵾr mba uⱡ ei, mbun etpa petᵾm. Ei mel ku, mel pi wamp mbᵾ, Got nga wamp tᵾpa mumuk rui kona ila rukᵾr ping ei nga mbun minal etpa petᵾm,” nitim. 26 Ik ei nga kitip kᵾni wu ni kᵾⱡ, ama min ngᵾn mundᵾk, ik ou nduk ei mel nᵾtᵾng, “Wote, uⱡ ei mel nda, wamp nam ti, Got ndi, etpa tᵾmba nda?” nᵾtᵾng. 27 Jisas ndi, wu ni kᵾⱡ kun kandpa, yant ndupa nimba mel, “Uⱡ ei, tᵾn wamp mbᵾ kᵾn mbun etᵾm. Wote Got ndi, uⱡ ti rundi nandrᵾm. Uⱡ mbᵾ pora, Got ndi, kapⱡa etᵾm mint!” nitim. 28 Wote Pita ndi, nimba mel, “Ya kana! Tᵾn nga mel mbᵾ pora, wak ropᵾn, nim pep ropᵾn urmᵾn ei ka!” nitim.

29 Wote Jisas ndi, wu ni kᵾⱡ, kundpa nimba mel, “Ei kupa ei nga, na enim kundᵾp nᵾnt, wamp nam ti ndi, elim nga mang kona wak ropa, ᵾngᵾnᵾl kimᵾnᵾl wak ropa, mam tipamᵾl wak ropa, kangambuⱡa mbᵾ wak ropa, kongun kona mbᵾ wak ropa, na nga nindpa, na nga ik kai ronduⱡ kᵾⱡ nga nindpa om wamp ei mel kai mat ou ndupa, punt ropa tᵾmba wamp ei, punt ropa mel 100 ei mel ngumba. Wote, ou ndupa pendpa ngumba. Mel mbᵾ manga na, ᵾngᵾnᵾl kimᵾnᵾl na, mam tipamᵾl na, kangambuⱡa na, kongun kona na, ou ndupa tᵾng ei kᵾn, uⱡ mbun mindil nui mat kandᵾk ting ku. Wote, muⱡ mᵾi raⱡ pora nim ei kᵾn, wamp ei uⱡ nga kᵾnt nga kont mul uⱡ ei tᵾmba. 31 Wote, wamp ama puⱡi kuimp tᵾnmᵾn mbᵾ, wote ok akil ting, wote wamp ama puⱡi ok, akil tᵾnmᵾn mbᵾ, wote ok kuimp ting,” nitim.

Jisas Elim Koⱡpa Tikil Romba Ei Nga Nimba, Raldika Inditim

32 Jisas kᵾn elim nga kitip kᵾni wu ni kᵾⱡ kᵾn, Jerusalem nombuⱡa mam nila purung. Jisas ndi, elim nga kitip kᵾni wu ni kᵾⱡ tᵾpa akil ndupa, elim omba, kuimp titim ila, elim nga kitip kᵾni wu ni kᵾⱡ mundmong etᵾng. Wote, wamp pep rok, akil tek orung wamp nimbᵾ, mundmong etᵾng ku. Wote Jisas ndi, elim nga kitip kᵾni wu 12 ni kᵾⱡ rukᵾr tᵾpa, elim kᵾn omba uⱡ mbᵾ mel, “Ya pilᵾiya! Akup tᵾn wi Jerusa-lem kona peng mbin onmᵾn ila, Muⱡᵾl Wu Kupa ei tᵾk, pris kᵾⱡ nga wu kuimbal mbᵾ kᵾn, mi ik mbo wu mbᵾ kᵾn nguing. Wote, wu mbᵾ ndi, wu ei kot endᵾk wu ei, rok kᵾndeing ning. Wote, wu mbᵾ ndi, wu ei, tᵾk wu rᵾⱡaip elpa kat nguing ku. 34 Wote, wamp mbᵾ ndi, wu ei tᵾk ik kuldᵾk, ol rondᵾk, kan pilda rok, wote rok kunding. Wote, rumbᵾⱡ raldika omba pangga kᵾn, wu ei koⱡpa tikil ropa kont moⱡmba,” nitim.

Jeims Kᵾn Jon Raⱡ En Enmbil Nuim Muⱡᵾmbil Nᵾtᵾnggil

35 Wu Sepeti nga kangᵾm Jeims kᵾn Jon raⱡ, Jisas kᵾn okᵾⱡ, waldkᵾⱡ nᵾkᵾⱡ mel, “Ik mbo wu ye! Nim ndi, tᵾl nga uⱡ ti indin, nimbᵾⱡ onmbᵾⱡ ei ka!” nᵾtᵾnggil. 36 “Ei nambuⱡ ti, indeimp ni kᵾⱡ onmbᵾⱡ?” nimba Jisas ndi waldᵾtᵾm. 37 Wu ni raⱡ ndi, yant ndukᵾⱡ ni kᵾⱡ mel, “Wote, nim pukᵾn uⱡ eng nui mbᵾ nga rᵾpndi pol ila, wu nuim mumuk mbi paka ei kᵾn, tᵾl wu raⱡ nga ti tᵾkᵾn nim nga ki mbo orunga mondkᵾn, wote wu ti tᵾkᵾn, ki rar orunga mundana muⱡᵾmbil,” nᵾtᵾnggil. 38 Jisas ndi, wu ni raⱡ kundpa nimba mel, “Ya na waldᵾnmbil uⱡ ei, enmbil pilkᵾⱡ kai iti natᵾk waldᵾnmbil. Wote, enmbil kapⱡa nu ming na, nuimp ent ila enmbil kapⱡa nuinggil ei, wote na nu timp ent nu ila, enmbil kapⱡa nu tinggil ku ei?” nitim. 39 Wote, wu ni raⱡ ndi, Jisas kundkᵾⱡ nᵾkᵾⱡ mel, “Tᵾl kapⱡa itimbil,” nᵾtᵾnggil. Wote Jisas ndi, wu raⱡ kundpa nimba mel, “Kupa, enmbil na nu ming nuimp ent nu ming ila, enmbil nu nuinggil ku. Wote, na nu timp ent nu ila, enmbil nu tinggil ku. 40 Wote, wu nam ti, na nga ki mbo orunga muⱡangga, ti ki rar orunga muⱡangga nimp ei, na nga ronduⱡ ti mon. Ei nga, enmbil kundᵾp i ni nᵾnimp. Wamp nam ti, kona ei tᵾmba ei, Got elim ndi, unt tᵾpa kun etpa, tinditim ei mel ting. Elim ndi, tᵾpa kona ei, wamp kᵾⱡ ngumba,” nitim. 41 Wote, kitip kᵾni wu 10 ni kᵾⱡ ndi, ik ei pilik, Jeims Jon raⱡ kᵾn, popᵾⱡ mondrᵾng. 42 Wote Jisas ndi, wu ni kᵾⱡ pora, rukᵾr tᵾpa, kundpa nimba mel, “Enim pᵾtmᵾn ni, wu nuim na ti, wamp rᵾⱡaip kat nokᵾndrᵾm ndam, wu nuim ei ndi, wamp kel mbᵾ, ambuⱡpa oⱡa mana etᵾm ei, pilik mormin ei? 43 Wote, uⱡ ei mel ti, enim nga rᵾk ting ila, pi nᵾpangga mon! Wu kat enmin wu kᵾⱡ nga ti, elim nuim muⱡimp nimba pilim ndam, wu ei, enim wu kat nga kindmant wu mel muⱡangga! 44 Wu nam ti, enim wu kᵾⱡ nga kuimbal muⱡimp nimba pilim ndam, wu ei, wamp mbᵾ nga pora kindmant wu mel muⱡangga. 45 Nambuⱡ emel, Muⱡᵾl Wu Kupa ei, wamp mbᵾ ndi, elim nga kongun etᵾk, elim tᵾk rᵾpᵾndᵾk inding nimba, ui nᵾwᵾrᵾm mon! Elim urum ei, wamp mbᵾ tᵾpa rapᵾndᵾmba ei nga urum. Wote, elim nga kᵾng wak ropa, wamp puⱡi etpa, yant tᵾmba ei nga urum,” nitim.

Jisas Ndi, Mong Ti Wu Bartimeiyas Etpa Titim

46 Wu nimbᵾ ok, Jeriko orung, Jisas kᵾn, elim nga kitip kᵾni wu ni kᵾⱡ kᵾn, wamp puⱡi kᵾn, Jeriko kona wak rok purung. Wu Timeiyas nga kangᵾm Bartimeiyas mong titim ni, nombuⱡa mam ᵾldᵾ nila moⱡpa, wamp mbᵾ kᵾn, ku mong na mel mat mawa etpa, morum ni mel murum. 47 Wote, wu ni pitim mel, Nasaret wu Jisas ni, onum nᵾtᵾng ila, wu ni kei nimba wi ropa nimba mel, “Jisas! Wu Depit nga kangᵾm! Nim na kont kuⱡa!” nitim.

48 Wamp puⱡi ndi, wu ni kᵾn, popᵾⱡ kulk nᵾk mel, “Nim raka nᵾkᵾn muⱡi!” nᵾtᵾng. Wote wu ni, aldpa ronduⱡ kei nimba, wi ropa nimba mel, “Wu Depit kangᵾm, nim na kont kun ka!” nitim.

49 Jisas ndi, omba anggilpa nimba mel, “Wu ei, wi rᵾi!” nitim. Wamp nimbᵾ ndi, mong ti wu ni, wi rok nᵾk mel, “Jisas ndi, nim wi ronum kᵾn, numan wang ndukᵾn, oⱡa anggilkᵾn ui!” nᵾtᵾng.

50 Wote, elim nga wal pᵾki ni kᵾⱡ, ropa mundpa, rut nimba anggilpa, Jisas murum nila purum.

51 Jisas ndi, wu ni, kundpa nimba mel, “Na ndi, nim nambuⱡ ti indimp nᵾkᵾn pilkᵾn nᵾn?” nitim. Mong ti wu ni ndi, int ndupa nimba mel, “Ik mbo wu ye! Na nga mong ei, etkᵾn kai indana! Na kona mbᵾ aldpa kᵾnimp!” nitim.

52 Jisas ndi, wu ni, kundpa nimba mel, “Nim kapⱡa pa! Nim nga mondpa pili ei ndi, nim etpa tᵾpa mundnum,” nitim. I nilinga kᵾn, tᵾngᵾnda mint, wu ni nga mong ni raⱡ kai murum ila kona nimbᵾ aldpa kᵾndrᵾm. Wote wu ni, Jisas pep ropa purum nombuⱡa mam ni mel purum.

Copyright information for `MED