Mark 15

Jisas Ni, Pailot Nga Kuimp Keta Ila Ʉnggᵾtᵾm

Ipri unt, wu pris kᵾⱡ nga wu kuimbal kᵾⱡ kᵾn, manga wingti rᵾp wu mbᵾ kᵾn, mi ik mbo wu na, wote kaunsil wu ou mat, kona ila mormᵾn nimbᵾ pora, ik tenda ti nᵾk pendᵾk ok, Jisas ni kan ngᵾk mek puk, Pailot nga ki ila ngorung. Wote, Pailot ni ndi, Jisas waldpa nimba mel, “Nim Jura wamp mbᵾ nga wu nuim mumuk ei?” nitim. Wote Jisas ndi, punt ropa nimba mel, “Int nim nᵾn ei ka!” nitim.

Ei kᵾn, wu pris kuimbal mormᵾn nimbᵾ ndi, Jisas uⱡ ⱡawa mat ou ndupa etᵾm nᵾtᵾng. Ni kᵾn, Pailot ndi, Jisas aldpa waldpa nimba mel, “Nim ik ti punt ruin muna mon? Nim uⱡ ⱡawa mat ou ndupa in nᵾk, ik mura ngonmin ei, pᵾn muna mon!” nitim.

Aldpa, Jisas ik ti punt rui nᵾrᵾrᵾm ila, wu Pailot ni, ama min ngᵾn mundrum.

Pailot Ndi, Jisas Nde Peta Ila Reing Nimba Ngurum

Pana ui mbila rᵾk rᵾk Jura wamp mbᵾ nga etpa ti rᵾng normᵾn ui ei, ekit orum ei kᵾn, Pailot ndi, kan manga ila wu tenda ti, wamp mbᵾ ndi, en enim numan ngormᵾn wu ei tᵾpa, ekit ndupa ku etᵾm. Ui ei kᵾn, kan manga ila wu ti mbi tek, Barapas nᵾtmᵾn wu ei kᵾn, wote wu mat, el etᵾk wamp rok kondᵾk etᵾng wu nimbᵾ kᵾn, kunda petᵾng. Wote, wamp minal ok, mou rok molk, Pailot waldᵾk en enim ui ei kᵾn, etᵾm uⱡ ni mel itangga nᵾk morung. Wote Pailot ndi, wamp nimbᵾ, waldpa nimba mel, “Na ndi, ya Jura wamp mbᵾ nga wu nuim mumuk ei, wak rop mundamp ninmin ei?” nitim. 10 Pailot ik ei mel nitim ei, nambuⱡ emel, wu pris kuimbal kᵾⱡ ndi, Jisas kᵾn wᵾlᵾk rok, Jisas mek ok, elim nga ki ila tᵾndᵾtᵾng uⱡ ei, pilpa pora ndupa nitim.

11 Wote, wu pris kuimbal kᵾⱡ ndi, wamp minal morung nimbᵾ kᵾn, ronduⱡ mondᵾk nᵾk, Pailot ndi, nimba mel, “Barapas mint wak rangga nᵾi!” nᵾtᵾng. 12 Wote, aldpa Pailot ndi, wamp minal morung nimbᵾ, kundpa nimba mel, “Jura wamp nga wu nuim mumuk, ninmin ei, na ndi, namba uⱡ ti, tamp nᵾk pᵾnmin?” nitim.

13 Wamp pora, ke nᵾk int nduk nᵾk mel, “Nde peta ila nil rui!” nᵾtᵾng.

14 Pailot ndi, waldpa nimba mel, “Wu ei, namba ⱡawa ti em?” nitim. Pailot ndi wuldᵾtᵾm. Ni kᵾn, wamp pora, ronduⱡ ke nᵾk mel, “Nde peta ila nil rui!” nᵾtᵾng. 15 Wote Pailot ndi, wamp pora ronduⱡ mundᵾk, Jisas ruimin nᵾtᵾng ni, kandpa wamp kᵾⱡ nga numan orunga, etᵾp wang nduimp nimba, Barapas kan ngᵾk pendᵾtᵾng ni, wak ropa mundrum. Jisas ni, kan pilda rok, wote nde peta ila nil rok etᵾng nimba, Rom el wu nimbᵾ nga ki ila ngumba, rukrung ndurum.

El Wu Kᵾⱡ Ndi, Jisas Ni Tᵾk Ik Kuldᵾtᵾng

16 Wote Jisas ni, el wu kᵾⱡ ndi, mek gapman wu ou ei nga manga kukaⱡ ila mek mukᵾr puk, el wu morung nimbᵾ pora ok mou rᵾi nᵾtᵾng. 17 Wote, el wu nimbᵾ ndi, Jisas mul kunt na ti mel pakundᵾk, kan goimbun rong mul ti tᵾk, mᵾkᵾp etᵾk tᵾk wᵾna mel pakᵾndrᵾng. 18 Uⱡ kᵾⱡ etᵾk pora nduk, kei nᵾk, Jisas kᵾn mura rok mondᵾk nᵾk mel, “Jura wamp nga wu mumuk ei muⱡangga!” nᵾtᵾng. 19 Wote, nde puⱡa mat tᵾk, Jisas nga peng ila tᵾmbᵾⱡ rok, rᵾk rᵾk etᵾk, ol rok kandᵾk, mura rok mondᵾk, wote mbi paka rondᵾk etᵾng. 20 Wote, Jisas tᵾk wᵾlᵾ mundrᵾng uⱡ nimbᵾ, etᵾk pora nduk, muⱡ mbal kunt ti, pakᵾndrᵾng ni tᵾk mundᵾk, Jisas elim nga muⱡ, unt nga ni kᵾⱡ tᵾk randrᵾng. Randᵾk kᵾn, Jisas nde peta ila nil ruing pilik mek purung.

Jisas Ni, Nde Peta Ila Nil Rorung

21 Jerusalem kona peng ni, wak rok ekit puⱡᵾngina, Saimon, ya Sairin kona ila wu Aleksanda kᵾn, Rupas raⱡ nga tipam ei, kona ekit orunga tila moⱡpa, kona peng ila uimp nimba urum. Wu ni, el wu nimbᵾ ndi, ronduⱡ mundᵾk nᵾk mel, “Jisas nga nde peta ni, tᵾpa miyangga!” nᵾtᵾng. 22 I etᵾk mek ok, Jisas ya kona ti mbi tek, “Golgata,” nᵾtmᵾn kona nila mek rᵾk orunga, Golgata mbi ei nga puⱡ ei, “Wamp peng ombᵾl kona,” nᵾtmᵾn. 23 Kona ila Jisas nu wain kᵾn mel kombuⱡa iti ti, mbi tek, mur rok nᵾtmᵾn ni, rok oⱡa mana etᵾk, mek ok ngurung. Ni kᵾn, Jisas nui nᵾndrᵾm. 24 Wote Jisas ni, nde peta ila, nil rok pendᵾk, el wu kat ndi, Jisas nga wal pᵾki ni kᵾⱡ, nam ndi, tᵾmba nda nᵾk, kat etᵾng. 25 Ant mong 9 kilok elinga, Jisas ni, nde peta ila nil rok pendᵾtᵾng. 26 Jisas tᵾk, ik kuldᵾk mon ti, ei mel rok mondrung. Mon ei ndi, nimba mel, “JURA WAMP NGA WU NUIM MUMUK EI,” nᵾtᵾng. 27 Ei kᵾn, kindᵾp wu ralt pendᵾk, nde peta ila rorung. Ti Jisas nga ki mbo orunga rok, ti ki rar orunga rok pendᵾtᵾng. 28 [I elingina, Painui wu Aiseiya ndi, ik ti unt mon ropa pinditim ik ni, omba kupa itim. Ik ei ndi, nimba mel,

“Wu ei kindᵾp wu mbᵾ kᵾn, rak nduk, rok kunding,” nimba petᵾm.]
29 Wamp nombuⱡa mam ila ok puk mel, peng mbᵾ walinga rok, Jisas tᵾk, ik kuldᵾk, ei mel nᵾtᵾng, “Kaiye! Nim manga wingti ou ei, gu ndup, mana tᵾp, rumbᵾⱡ raldika ila rᵾkimp nitin ni ka! Akup nim nde peta ila mana okᵾn, ni ninim etkᵾn tin ka!” nᵾtᵾng.

31 Wamp ik nᵾtᵾng ni mel ku, wu pris kuimbal mormᵾn nimbᵾ kᵾn, mi ik mbo wu nimbᵾ kᵾn, Jisas tᵾk, ik kuldᵾk nᵾk, int yant etᵾng, “Jisas wamp mat etpa titim ni, wote elim etpa ti natᵾnᵾm ei ka! 32 Akup nim Kraist, Jura wamp nga wu nuim mumuk ei ndam, nde peta ei, wak rokᵾn, mana wana kandpᵾn kᵾn, tᵾn ndi, nim Got nga kangᵾm ei, nimbun mondᵾp pilᵾmin!” nᵾtᵾng. Wote, kindᵾp wu ralt, Jisas kᵾn, nde peta ila pendᵾk rorung wu ni raⱡ ndi, kunda ku, Jisas ik ngurᵾnggil.

Jisas Ni Kurum

33 Wote, ui ni kᵾn, kona ou rᵾnggilmᵾ elinga, mᵾi kᵾmp nimbᵾ pora, rumbᵾⱡ roⱡnga, ant mong raldika itim. Ant mong raldika elinga, Jisas mindil tᵾpa, ronduⱡ wi ropa nimba mel, “Eli, Eli, Lama Sabaktani!” nitim. Ik ei nga puⱡ ei, Ipru ik ila ei mel nᵾtᵾm, “Na nga Got, na nga Got, nambuⱡ emel nim na wak ron?” nitim.

35 Wamp mat kona ila nondpa morung nimbᵾ ndi, Jisas ik nitim ni pilik, “Kum tᵾiya! Wu ei Elaija wi ronum!” nᵾtᵾng. 36 Wote, wu ti ndi, muⱡ undi ti tᵾpa, nu wain kit murum tila mana ndupa, tᵾpa ndilwa punt ila mondpa, Jisas nu ei nangga nimba itim. Oⱡa ndupa Jisas ngumba etpa nimba mel, “Tᵾn nokundpᵾn moⱡpᵾn kinamin! Painui wu Elaija ndi omba, Jisas nde peta ila mana tᵾmba muna mon nda?” nitim.

37 Wote, Jisas ka ronduⱡ etpa kᵾn, wote kurum.

38 Jisas ni koⱡnga kᵾn, muⱡ mbal ti manga wingti ou ila, rukᵾr mondᵾrmᵾn ni rᵾk ting ila paⱡpa omba, met ekit purum. 39 Ni kᵾn, el wu ou ti, nde peta ila nondpa murum ni, Jisas ke nimba koⱡpa itim uⱡ nimbᵾ, kandpa kᵾn nimba mel, “Wu ei ama kupa, Got nga kangᵾm ei!” nitim.

40 Kona ila nondpa, amp mat ruⱡ etᵾk molk, kandᵾk morung. Amp morung ni kᵾⱡ nga amp, ti Mariya Maktelin, ti Mariya ei, kang wu Jeims kᵾn Josis raⱡ nga mam ei, wote amp ti Salomi. 41 Amp kᵾⱡ, Jisas Galili kona ila kont murum ei kᵾn, Jisas tᵾk rapᵾndᵾk, Jisas nga ik kum tek etᵾng amp kᵾⱡ. Wote amp mat, Jisas kᵾn rᵾp rok, Jerusa-lem kona ila orunga amp nimbᵾ pora, Jisas rorung kona nila morung ku.

Jisas Ni Tᵾk On Etᵾng

42 Ui ni, Jura wamp nga mowi kor utᵾmᵾ orunga muⱡing ei nga, akup mel Jisas kurum. Ei nga, kona rumbᵾⱡ romba elinga, Arimatiya kona ila wu Josep ei, Jura wamp nga moⱡpa kundi orunga, wu nuim kai ti, elim Got nga wamp tᵾpa mumuk romba ui ei, nokundpa murum wu ei urum. Wu ei ndi, elim ronduⱡ mundpa, Pailot kᵾn mba, Jisas nga on ei ngangga nimba, mawa itim. 44 Wote, wu Pailot ni, Jisas koⱡum nᵾtᵾng ik ni pilpa, rut nimba, elim nga el wu ou ti, wi ropa rukᵾr tᵾpa, Jisas koⱡpa pora ndum muna mon, nimba wuldᵾtᵾm. 45 Wu Pailot ni, elim nga el wu ou ei nga ik nimba, yant ndurum. Ni pilpa kᵾn, Josep kapⱡa, Jisas nga on ei, tangga nitim. 46 Wote, Josep ni mba, muⱡ mbal kurᵾmᵾⱡa ti, wamp on kum rormᵾn mbᵾ nga, rarᵾp ropa tᵾpa, mepa omba. Jisas nga on ni mana tᵾpa, muⱡ nila kum ropa tepa, Jura wamp nga wamp on etmin ku manga ila rukrᵾng ndupa titim. Wote, ku mam ti ndi, ku manga ni kumba rurum. 47 Josep ndi, Jisas nga on ei, titim kona ni, amp Mariya Makndelin kᵾn, Mariya kang wu Josis nga mam kᵾn, kandᵾk moⱡᵾnggila, Jisas nga on ni titim.

Copyright information for `MED