Mark 5

Jisas Ndi, Kur Kit Mundrum Wu Ti Etpa Titim

Jisas kᵾn elim nga kitip kᵾni wu ni kᵾⱡ kᵾn, num Galili noi orunga ekit puk, Gerasin kona ou ila ekit purung. Jisas nu kanu ei, wak ropa ekit omba moⱡnga, wu ti. Wamp on kona ila pepa ᵾndrᵾm wu ni, Jisas murum kona ila urum. Wu kur kit murum ei, wamp on kona mbila pepa ᵾndrᵾm. Wamp na ti ndi, kapⱡa tᵾk imp molk, kan ronduⱡ ngᵾk iting mel kapⱡa mon. Wu ei nga kᵾmp ki mbᵾ, tᵾk kan ngᵾk puⱡi endᵾtᵾng ku. Ei wote, ombil minal pitim kan ronduⱡ mbᵾ, ropa puⱡa mint rurum. Ei nga wote, wamp ti ndi, kapⱡa imp molk iti natᵾtᵾng Rumbuldi rᵾnggilmᵾ mbᵾ kᵾn, kei nimba wamp on kona mbila anduⱡnga, ku na mbun ndi, kᵾng mbᵾ, ropa nit minal pinditim.

Wu ni, ruⱡ etpa moⱡpa, Jisas urum ni kandpa, tᵾkrᵾpa mba. Jisas nga kᵾmp puⱡ ila mba pepa, mura kopᵾtᵾm ropa mundrᵾm. Ronduⱡ kei nimba mel, “Jisas, nim Got Ama Oⱡa orunga nga kangᵾm! Nim ndi, na kᵾn nambuⱡ ti itin? Got nga mbi ila nim waldᵾnt, ‘Nim ndi, na mindil ngui ngᵾngi!’” Wu ei ndi, ik nitim, ei nambuⱡ emel, Jisas ndi, kundpa nimba mel, “Kur kit nim wu ei, wak rokᵾn ekit pi!” nitim. Ei nga, Jisas ndi, wu ni waldpa nimba mel, “Nim nga mbi ei nam?” nitim. Wote, wu ni ndi, nimba mel, “Tᵾn minal mormin mel ku, na nga mbi ei wamp puⱡi,” nitim. 10 I nimba, ronduⱡ kei nimba muⱡnga kit ei ndi, Jisas waldpa nimba mel, “Elim ekit tᵾkᵾn mᵾi ila wak rui nᵾri mon!” nitim.

11 Kona ila nondpa, kng minal wᵾr ramba ila rᵾng nok morung. 12 Wote, kur kit ni kᵾⱡ ndi, Jisas waldᵾk nᵾk mel, “Tᵾn tᵾkᵾn kng kᵾⱡ nga kitim ila mundana! Wote tᵾn rukᵾr pamin!” nᵾtᵾng. 13 Jisas ndi, nᵾtᵾng ei mel kapⱡa nilinga, kur kit mbᵾ wu ni, wak rok ekit ok puk kng kᵾⱡ nga kitim ila rukᵾr purung. Kng 2000 mel, ila morung ni kᵾⱡ, tᵾkrᵾk puk, num ᵾldᵾ kop peng titim ila, mana puk nu wanggᵾrᵾng.

14 Wu kng rᵾp etᵾk morung ni kᵾⱡ, kelik tᵾkrᵾk puk, kona peng na, kongun kona titim nimbila, uⱡ itim nimbᵾ mel, timan roⱡᵾngina, wamp mbᵾ pilik kᵾn, uⱡ itim ei mel kᵾnmin nᵾk purung. 15 Wote, wamp nimbᵾ ok, Jisas murum nila kandrung mel, wu ti unt kur kit mundrum ni, numan mbo pilpa, muⱡ raⱡpa etpa murum ila kandᵾk, mundmong etᵾng. 16 Uⱡ itim ila, wamp molk kandrung nimbᵾ ndi, orung wamp nimbᵾ kundᵾk, wu kur kit murum wi ei nga uⱡ itim mbᵾ kᵾn, kng mbᵾ nga etᵾng uⱡ mbᵾ kᵾn, wamp mbᵾ kundᵾk nᵾtᵾng.

17 Pilik kᵾn, Jisas waldᵾk,’ en enim nga kona wak rangga nᵾtᵾng.

18 Nilingina, Jisas ni, nu kanu ni kᵾⱡ ila rukᵾr puⱡnga, wu kur kit murum ni ndi, Jisas waldpa nimba mel, “Na nim kᵾn mbi!” nitim. 19 Ni kᵾn, Jisas ndi, mon nimba, wote wu ni, kundpa nimba mel, “Kelkᵾn nim nga wamp mbᵾ kᵾn mang kona pukᵾn, nim nga wamp mbᵾ kundkᵾn, ya Wu Nuim Got ndi, nim kᵾn em uⱡ mbᵾ kᵾn, wote nim kᵾn uⱡ kai em ei nga kundkᵾn nᵾn pi!” nitim.

20 Wote wu ni, kelpa mba kona peng 10 kat ila andpa, Jisas ndi, elim nga inditim uⱡ nimbᵾ mel, timan roⱡnga, wamp nimbᵾ ndi, pilik min ngᵾn mundrᵾng.

Jairus Nga Mbuⱡam Ei Kᵾn, Amp Ti Ndi, Jisas Nga Wal Pᵾki Kᵾⱡ Minda Ndurum Amp Ei Kᵾn

21 Jisas ni, aldpa nu kanu ni kᵾⱡ ila, num ni puⱡa ropa, nu ᵾldᵾ ronggᵾt purum. Noi num ᵾldᵾ nila, wamp ama puⱡi ok, Jisas murum nila molk, andᵾk pok etᵾng. 22 Jairus ni wu ei, Got nga atinga manga kel, nokundrum wu ei omba, Jisas kandpa kᵾn, Jisas nga kᵾmp puⱡ ila mura koptᵾm ropa mondpa, Jisas kᵾn mindil tᵾpa, waldpa nimba mel, “Na nga ambuⱡa kel kui ropa koⱡmba elinga, wote nim okᵾn, nim nga ki ei ndi, ambulkᵾn kᵾng ila minda ndana, ambuⱡa ei nga kui ei, wang nangga!” nitim.

24 Wote, Jisas kᵾn kunda purᵾnggil, wamp ama puⱡi ndi, Jisas purum ni mel, pep rok purung.

25 Ni kᵾn, amp ti ku pok ropa, mema omba mba mint moⱡnga, pana 12 omba purum. 26 Kui ei nga amp ei, wu dokta puⱡi ndi kandᵾk, marasin ngurung ei, kui ei pora ni nᵾndᵾtᵾm. Amp ei, ku moni ama puⱡi wak ropa, elim nga kui ei etᵾp pora nduimp nimba pilpa itim. Wote, kui ni pora ni nandilinga, ama kui ni mba mam itim. 27 Amp ei, Jisas nga kongun itim timan ei pitim. Wote amp ei, wamp puⱡi orung rᵾk ting ila, Jisas pep ropa mbuldung orunga omba, wal pᵾki ni kᵾⱡ minda ndurum. 28 Amp ei, elim nga numan ei ndi pilpa nimba mel, “Na ndi, Jisas nga wal pᵾki kᵾⱡ minda ndunt ndam, na nga kui ei, pora nimba,” nimba pitim.

29 Amp ni ndi, Jisas nga wal pᵾki ni kᵾⱡ, minda nduⱡnga kᵾn, mema rurum uⱡ ni, tᵾngᵾnda kᵾr nitim. Wote amp ni, elim nga numan orunga pitim mel, elim kui roⱡnga, mbun titim ni pora nitim. 30 I elinga, Jisas pitim mel, elim nga ronduⱡ ei, omba ekit puⱡnga pilpa, tᵾpa ropᵾl ropa, wamp minal morung nimbᵾ waldpa nimba mel, “Wamp nam ndi, na nga wal pᵾki kᵾⱡ minda ndunum?” nitim. 31 Elim nga kitip kᵾni wu kᵾⱡ ndi, nᵾk mel, “Wamp minal ndi, nim tᵾk kum ronmᵾn ei kᵾni nakᵾn ye! Nambuⱡ emel, nim ndi waldᵾkᵾn, ‘Wamp nam ndi, na minda ndonum nᵾn?’” nᵾtᵾng. 32 Wote Jisas ndi, kandpa moⱡpa, wamp nam ti ndi em ei, kᵾnimp nimba mong titim. 33 Wote amp ni, elim nga itim uⱡ ni pilpa kᵾn, amp ni mundmong etpa, purpur ropa omba, Jisas nga kᵾmp puⱡ nila mura koptᵾm ropa mondpa, Jisas kundpa uⱡ itim nimbᵾ mel, kupa mendpᵾⱡ nitim. 34 Jisas ndi, amp ni, kundpa nimba mel, “Na nga ambuⱡa! Nim nga mondpa pili uⱡ ei ndi, nim nga kui ei wang ninim. Nim numan wang ndukᵾn pi, nim nga mbun tᵾtᵾn uⱡ nimbᵾ, akup pora ninim,” nitim. 35 Jisas ni, ik ni kᵾⱡ nimba moⱡnga kᵾn, atinga manga rᵾp wu Jairus nga mang kona ila nombuⱡa rung wu mat ndi, akil tek ok, Jairus kundᵾk nᵾk mel, “Nim nga mbuⱡanᵾm ni, koⱡum ei ka. Nambuⱡ emel, nim ndi, ik mbo wu ei kᵾn, ik ou ndukᵾn nᵾkᵾn morun?” nᵾtᵾng.

36 Jisas ndi wu kᵾⱡ nᵾtᵾng ik ni, kum ti natᵾpa, Jairus ni, kundpa nimba mel, “Mundmong iti natkᵾn, mondkᵾn pili!” nitim. 37 Wote wamp nimbᵾ, wak ropa muⱡᵾi nimba, Pita kᵾn Jeims kᵾn, Jeims ᵾngᵾn Jon kᵾⱡ mint, tᵾpa mepa purum. 38 Wu ni kᵾⱡ puk, Jairus nga mang kona purung ni kᵾn, Jisas ndi, kᵾndrᵾm mel, wamp nimbᵾ, peng ambuⱡ kei nᵾk, ka etᵾk morung. 39 Jisas ni mukᵾr mba wamp nimbᵾ, kundpa nimba mel, “Nambuⱡ emel enim wamp mbᵾ, ka kei nᵾk enmin? Kangambuⱡa ei, kuⱡi naⱡᵾm. Ambuⱡa ei, ur petᵾm ei ka!” nitim.

40 Wamp nimbᵾ ndi, Jisas nga nitim ik ni nga oi endilingina kᵾn, wamp nimbᵾ pora, tᵾpa pena ndurum. Ambuⱡa ei nga tipam mam raⱡ kᵾn, elim nga kitip kᵾni wu raldika ni kᵾⱡ kᵾn, tᵾpa mepa ambuⱡa ei, titim ruⱡmina nila rukᵾr purung. 41 Jisas ndi, ambuⱡa ni nga ki ei ambuⱡpa, ambuⱡa ni kundpa nimba mel, “Talita kum!” ik ei nga puⱡ ei mel, “Ambuⱡa kel ye! Na ndi, nim kundᵾp nᵾnt, oⱡa muⱡi!” nitim.

42 Tᵾngᵾnda mint, ambuⱡa ni oⱡa moⱡpa, nombuⱡa mam ᵾndrᵾm. (Ambuⱡa ni pana 12). Jisas uⱡ kᵾⱡ itim ei kandᵾk, numan mam ti ngorung. 43 Wote Jisas ndi, ronduⱡ mundpa, wamp nimbᵾ kundpa, uⱡ ent ei, wamp ti kundᵾk ni nᵾnᵾi, mon! Wote nimba mel, “Ambuⱡa ei rᵾng mat ngangina nangga!” nitim.

Copyright information for `MED