Mark 7

Anda Kouwᵾmin Mbᵾ Nga Mbo Endᵾtᵾng Ik Mbᵾ

Perisi wu mat kᵾn, mi ik mbo wu mat kᵾn, Jerusalem kona molk ok, Jisas murum nila ok, tᵾk polk etᵾk morung. Wu nimbᵾ kandrung mel, Jisas nga kitip kᵾni wu nimbᵾ ndi, en enim nga rᵾng nimbᵾ, ki ⱡar pᵾkᵾ norung, ki mbᵾ ⱡumᵾi rui narᵾrᵾng. Uⱡ ei, Perisi wu mbᵾ ndi, itᵾi nᵾtmᵾn uⱡ ei mel iti natᵾtᵾng.

Ya wu Perisi na, Jura wamp wei mbᵾ pᵾkᵾ, en enim wu anda kouwᵾmin mbᵾ ndi, ik mbo endᵾk nᵾk mel, rᵾng nuing etᵾk kᵾn, kuimp tek ki ⱡumᵾi rok kai etᵾk kᵾn, wote rᵾng nᵾi nᵾtᵾng. Wote, uⱡ mat etᵾng mbᵾ, rᵾng rarᵾp rok tᵾtᵾng mbᵾ, nuing pilik kuimp tek, ki ⱡumᵾi mint rorung! Wote, mi ik unt nga mat, pep rorung mbᵾ, ya kap na, nu ming na, rᵾng nuing pilik morung rat pol na mel mbᵾ, ⱡumᵾi rok kai mint etᵾng.

Wote, Perisi wu mbᵾ kᵾn, mi ik mbo wu na mbᵾ ndi, Jisas waldᵾk nᵾk mel, “Nambuⱡ emel, nim nga kitip kᵾni wu kᵾⱡ ndi, tᵾn nga anda kouwᵾmin kᵾⱡ nga man ngurung ik mbᵾ, pep rui narᵾk, rᵾng mbᵾ ki ⱡar pᵾkᵾ nonmᵾn ei ka!” nᵾtᵾng.

Jisas ndi, punt ropa nimba mel, “Painui wu Aiseiya ndi, enim wamp mbᵾ, ik kol rormᵾn,” nitim. “Ei enim keta kᵾng ila, ik nᵾtmᵾn wu nimbᵾ nimba kᵾn, mon ropa mundrum,

‘Wamp rᵾⱡaip kᵾⱡ ndi, enim nga numan ei mek puk, ronggᵾt elpa tek na nga mbi ei, keta kᵾng ila mint paka rondᵾrmᵾn.
Wote, wamp mbᵾ ndi, mᵾi kona ila wamp nga mi ik mim etᵾng mbᵾ pilik, Got nga mi ik kupa ei, nᵾk pilik wamp mbᵾ, mbo rondurmᵾn. Wote, Got nga mbi paka runding uⱡ ei iti natᵾk. En enim wamp nga mi ik ei, mint pep rormᵾn.’
Enim Got nga mi ik kᵾⱡ wak rok, mᵾi kona wamp nga ik mong kᵾⱡ pep ronmᵾn ei ka!” nitim.
Wote Jisas ndi, nimba mel, “Enim pilik kai etᵾk, Got nga mi ik mong ei, wak rok, en enim nga anda kouwᵾmin mbᵾ nga uⱡ etmin mbᵾ pep ronmᵾn. 10 Moses nga mi ik mong ndi, nimba mel, ‘Nim nga tipanᵾm manᵾm raⱡ tᵾkᵾn ou ndui. Wamp nam ti ndi, elim nga tipam mam raⱡ nimba kit mondum ndam, wamp ei rok kunding,’ nitim. 11 Wote, ya enim ndi, ik mbo rondᵾrmin ei, wu ti mel mat tepa moⱡum ndam, wu ei ndi, kapⱡa mel mbᵾ ndi, elim nga tipam mam raⱡ kep, tᵾpa rapᵾndᵾmba. Wote, wu ei ndi, wamp raⱡ kundpa nimba mel, ‘Mel kᵾⱡ oi ndup elpa tent kᵾⱡ, Got nga mendpᵾⱡ,’ nᵾtᵾm. Uⱡ ei ndi, tipam mam raⱡ tᵾpa rapᵾndᵾk napᵾndᵾmba ei nga tᵾpa ora ndurum. 13 Ik mong ila, enim ndi, wamp ik mbo ronduⱡina kᵾn, Got nga ik mong ei, wak rormᵾn. Wote, uⱡ i etpa mat ou ndupa enim etmin ku,” nitim.

Mel Mbᵾ Ndi, Wamp Etpa Kit Mondrum

14 Wote Jisas ndi, wamp minal morung nimbᵾ, aldpa wi ropa rukᵾr tᵾpa kundpa nimba mel, “Na nga ik i, enim wamp pora kum tek, pilik kai itᵾi! 15 Tᵾn nga rᵾng mat normᵾn kᵾⱡ ndi, tᵾn etpa kit mundi namᵾndrᵾm. Wote rᵾng mat, wamp nga numan rukᵾr orunga, pepa ekit orum kᵾⱡ ndi, wamp ei etpa kit mondrum. 16 [Enim kum nombuⱡa tem ndam, ik ei kum tek pilᵾi!” nitim.]

17 Wote Jisas ni, wamp minal morung nimbᵾ, wak ropa omba, manga ila murᵾk puⱡnga kᵾn, elim nga kitip kᵾni wu ni kᵾⱡ ndi, Jisas ik ek rurum ei nga puⱡ ei, nimba ngangga, nᵾk waldᵾtᵾng. 18 Jisas ndi, wu ni kᵾⱡ kundpa nimba mel, “Enim pilik kai iti natᵾnmin ei? Ya wamp mat iting ei mel, enim enmin ei ka! Mel mat ekit orunga tepa rukᵾr purum mbᵾ ndi, wamp etpa kit mundi namᵾndrᵾm. 19 Nambuⱡ emel, mel kᵾⱡ ndi, wamp nga mundmong ila rukᵾr pi napᵾrᵾm. Mel kᵾⱡ ndi, wamp nga te pilᵾng ila mba, ti raⱡpa omba ekit purum.” (Jisas i nitim uⱡ ei ndi, rᵾng mbᵾ pora, kapⱡa nuing mint nitim.)

20 Wote Jisas ndi, nimba mel, “Wamp nga numan rukᵾr orunga, pepa ekit orum mel kᵾⱡ ndi, wamp ei etpa kit mondrum. 21 Wamp ti nga mundmong rukᵾr orunga pepa, ekit orum uⱡ kᵾⱡ ndi, numan kit mbᵾ mbo ronduⱡnga, uⱡ kit mbᵾ mint etmin. Wote kindᵾp nombun, wamp rop kondpᵾn, wu amp kandpa kum pindi uⱡ ei kᵾn, wamp ti nga mel ei, kandᵾp kum pindi uⱡ ei etpᵾn, uⱡ kit mbᵾ etᵾk, ik kol ropᵾn, kara mbun etmin, wamp mat nga ik mbuldung orunga nᵾndᵾk, meka rok, numan mbo pi nᵾpi wamp mel raⱡpᵾn etmin. 23 Uⱡ kit mbᵾ ndi, wamp nga numan rukᵾr orunga, tepa ekit omba wamp nga numan etpa kit mondrum.”

Amp Ti Nga Mondpa Pili

24 Wote Jisas ndi, kona ni wak ropa mba, Taiya kona peng ou nila nondpa purum. Jisas manga tila mukᵾr mba wamp na ti ndi, elim murum kona ei, pili napᵾlᵾng nimba pitim. Ei wote, mo ropa moⱡmba mel kapⱡa mon itim.

25 Ni kᵾn, amp ti, elim nga mbuⱡam ambuⱡa ei, kur kit rukᵾr orunga murum. Ei ndi, Jisas nga timan ik ei pilpa kᵾn, omba Jisas nga kᵾmp puⱡ nila rumᵾⱡi pitim. 26 Amp ei, Grik amp ei, wote Siriya Ponisiya kona ila metᵾng. Amp ei ndi, Jisas waldpa nimba mel, elim nga mbuⱡam ambuⱡa ei nga kur kit morum ei, tᵾpa mundangga nitim. 27 Wote

Jisas ndi, amp ni, kundpa nimba mel, “Tᵾn kangambuⱡa kᵾⱡ rᵾng unt kuimp tepᵾn ngamᵾn. Kangambuⱡa kᵾⱡ nga rᵾng mbᵾ, roldᵾp tᵾpᵾn, owa mbᵾ nguimin mel kapⱡa mon,” nitim.
28 Amp ni ndi, nimba mel, “Nuim ye! Ei, kupa nᵾn ei nga, wote owa mbᵾ ndi, kangambuⱡa mbᵾ rᵾng noⱡina, gurpa nde pol ila mana purum mbᵾ, kapⱡa nuing mint,” nitim.

29 Wote Jisas ndi, amp ni, kundpa nimba mel, “Nim nga ik mong punt ron ei kᵾn, nim mang kona pi! Pukᵾn kᵾn, kur kit ni, nim nga ambuⱡa ei, wak ropa omba ekit pum!” nitim.

30 Amp ni, mang kona mba kᵾndrᵾm mel, kur kit ni, ambuⱡa ni, wak ropa, omba ekit puⱡnga, ambuⱡa ni rupⱡaima nila ur pitim.

Jisas Ndi, Kum Ngurum Wu Ti Etpa Titim

31 Jisas ni, Taiya kona ruk ting ni wak ropa, Sairon kona mba, num Galili nila purum. Kona peng 10 tetᵾm kona ila purum.

32 Ni kᵾn, wamp mat ndi, wu ti kum ngumba, ik mindil ngumba nitim ni mek ok, Jisas waldᵾk kᵾn, elim nga ki ei ndi, wu ei ᵾmbᵾⱡangga nᵾk mek orung. 33 Wote Jisas ndi, wamp minal morung nimbᵾ, muⱡeing nimba mondpa, wu ni mint tᵾpa mepa, elim nga ki ruⱡ ni ndi, wu ni nga kum nombuⱡa nila ᵾmbrᵾm. Wote, ol ropa kᵾn, wu ni nga keta anmbil ni minda ndurum. 34 Wote Jisas ni, tᵾpa oⱡa ndupa, wi muⱡ ni kandpa kᵾn, muⱡnga tᵾpa i etpa, nimba mel, “Epaata!” Ik ei nga puⱡ ei mel, “Kum ei pilaⱡa nangga!” nitim.

35 Tᵾngᵾnda mint, wu ni ik pilpa wote, elim nga kum ni pilaⱡa nilinga, wote keta anmbil ni pinda nilinga wu ni, ik puⱡ mondpa nitim. 36 Wote Jisas ndi, wamp mbᵾ kundpa, “Uⱡ ei nga wamp mat kundᵾk ni nᵾnᵾi mon!” nitim. Ni kᵾn, pilik kelik wamp ou ndupa ndi, wamp mat kundᵾk nᵾtᵾng. 37 Wote, wamp mbᵾ pilik min ngᵾn mundᵾk, “Wu ei uⱡ kai kᵾⱡ nambuⱡ etpa enim! Wote, uⱡ kᵾⱡ elinga, wamp kum ngui mbᵾ ik pilik, ik ni nandᵾtmᵾn wamp mbᵾ, ik nᵾnmᵾn ei ka!” nᵾtᵾng.

Copyright information for `MED