Matthew 1

Jisas Kraist Nga Anda Kouwᵾmᵾn Mbᵾ

Ya ei Jisas Kraist nga wamp pundun kᵾngan kalk, tᵾk mek yant ok, Depit kangᵾm nᵾk, Depit Aparam kangᵾm nᵾk etᵾng ei nga.

Aparam ni, Aisak nga tipam, Aisak ni, Jekop nga tipam, Jekop ni, Jura kᵾn ᵾngᵾnᵾl nga tipam, Jura ni, Peres kᵾn Jeral raⱡ nga tipam, wote wu raⱡ nga mema, Tamar Peres ni, Esron nga tipam, Esron ni, Ram nga tipam, Ram ni, Aminarap nga tipam, Aminarap ni, Nason nga tipam, Nason ni, Salmon nga tipam, Salmon ni, Bowas nga tipam, wote mam Reiyap, Bowas ni, Opet nga tipam, Opet ni, Jesi nga tipam, Jesi ni, wu peng mumuk Depit nga tipam murum. Depit ni, Solomon nga tipam, mam amp Yuraiya ni, wu ei nga ambᵾm. Solomon ni, Riyopowam nga tipam, Riyopowam ni, Apaija nga tipam, Apaija ni, Eisa nga tipam, Eisa ni, Jeyosopat nga tipam, Jeyosopat ni, Jeyoram nga tipam, Jeyoram ni, Atariya nga tipam, Atariya ni, Jotam nga tipam, Jotam ni, Eiyas nga tipam, Eiyas ni, Etikaiya nga tipam, 10 Etikaiya ni, Manasa nga tipam, Manasa ni, Amon nga tipam, Amon ni, Josaiya nga tipam, 11 Josaiya ni, Jeoiyakin kᵾn ᵾngᵾnᵾl ni kᵾⱡ nga tipam murum.

12 Ui ni kᵾn, Isrel wamp mbᵾ rok makrᵾk Bapolon kona nila mek purung. Bapolon kona mek ok mondrung ni kᵾn, Jeoiyakin ni, Seldiyel nga tipam, Seldiyel ni, Serupapel nga tipam, 13 Serupapel ni, Apiyut nga tipam, Apiyut ni, Eliyakim nga tipam, Eliyakim ni, Asor nga tipam, 14 Asor ni, Seitok nga tipam, Seitok ni, Akim nga tipam, Akim ni, Eliyut nga tipam, 15 Eliyut ni, Eliyeisor nga tipam, Eliyeisor ni, Matan nga tipam. Matan ni, Jekop nga tipam, 16 Jekop ni, Josep nga tipam, Josep ambᵾm ei Mariya, kang Jisas mam, akup mbi tek Kraist nᵾtmin ei, Jisas ei, Got nga ngurum wu.

17 Ei kᵾn, Aparam ni kᵾn, yant ndupa, wamp rᵾⱡaip 14 mel molk oⱡina mba, Depit metᵾng. Wote, Depit ni kᵾn, yant ndupa, wamp rᵾⱡaip 14 mel molk oⱡina mba, Bapolon mᵾi kona ou ei ndi, Isrel wamp rok, kan ngᵾk mek purung. Bapolon ok morung ei kᵾn, yant ndupa, wamp rᵾⱡaip 14 mel molk oⱡina mba, Kraist ei, Got nga ngurum wu ei metᵾng.

Kang Jisas Mitim Mel

18 Ya ei, Jisas Kraist mitim mel: Jisas mam, amp Mariya ni, wu Josep nga ol ik nundᵾk mondrung. Wote ei Josep nga kuima ngok tᵾk manga tenda ila pindi nᵾpindi kᵾn kandrung ei, amp Mariya ni, Muⱡnga Wingti nga ronduⱡ ila kangambuⱡa mundrum. 19 Nambuⱡ emel, Josep amp Mariya tᵾmba nᵾtᵾng wu ni, uⱡ minᵾpi mbᵾ nga iti natᵾpa itim. Uⱡ ei ndi, amp Mariya kangambuⱡa mondpa itim ni, tᵾpa pena ila pendᵾp etᵾp tᵾngambuⱡ kundi nᵾkᵾndimp nimba, kiyang nᵾmp wak ruimp nimba pitim.

20 Numan i etpa pilpa murum ni, ur pepa, ur kump itim nila, Got nga anggelo ti ndi omba kundpa nimba mel, “Josep, nim Depit nga pundun ei, amp Mariya tᵾkᵾn nim nga ambnᵾm rundᵾn ei nga, mundmong iti nᵾti! Kangambuⱡa mondpa morum ei, Muⱡnga Wingti ei nga ronduⱡ ila mondpa morum. 21 Amp ei ndi, kang ti memba ei mbi tekᵾn Jisas ni, nambuⱡ emel, wu ei ndi, elim nga wamp mbᵾ uⱡ kit mbila mormin ei nga, etpa peng kont tᵾmba,” nitim. 22 Uⱡ kᵾⱡ itim ei, Oⱡa Nuim Got ei nga keta tᵾpa painui wu ti ndi, nitim ik ei kupa itim.

23 “Amp wendᵾp ei, kangambuⱡa mondᵾmba. Wote, kang ti memba ei mbi tek, “Imanuwel,” ning ei nga puⱡ ei, “Got tᵾn kᵾn morum,” nitim.
24 Ni kᵾn, Josep ur pepa rut nimba kᵾn, Got nga anggelo ei ndi, ur kump ngumba nitim ni mel, amp Mariya ni tᵾpa, elim nga ambᵾm rundrum. 25 Tᵾpa ambᵾm rundrum ei kᵾn, rᵾp rokᵾⱡ iti natᵾtᵾnggil, amp ei elim wendᵾp murum ei mel ku moⱡpa mba, kang ei mitim. Wote Josep ndi, kang ei mbi tepa, Jisas nitim.

Copyright information for `MED