Matthew 11

Wamp Nu Tindi Wu Jon Ndi, Kitip Kᵾni Wu Kat Tᵾpa Mundrum

Jisas elim nga kitip kᵾni wu 12 ni kᵾⱡ, ik nimba, ndoimp rondpa pora ndupa, murum kona ni wak ropa, Galili orunga kona peng tetᵾm nimbila, wamp ik mbo endpa, Got nga ik puⱡ nimba, ngumba etmba purum.

Wamp nu tindi wu Jon ni, kan manga ila pepa moⱡpa, Kraist uⱡ enim nᵾtᵾng ik nimbᵾ pilpa, Jon elim nga kitip kᵾni wu ralt, Jisas murum kona nila tᵾpa mundrum. Wote okᵾⱡ, Jisas nitim ik ni mel waldkᵾⱡ, “Nim wu Jon ndi, wote omba nitim wu ni waⱡᵾm, muna mon? Muna tᵾn wu elpa ti nga nukᵾndamin ye?” nitinggil.

Wote Jisas ndi, ik pᵾnt ropa nimba mel, “Int pukᵾⱡ, Jon kun timan rokᵾⱡ, ya uⱡ mbᵾ mel kandpᵾⱡ pilpᵾⱡ onmbᵾⱡ nil! Mong ti wamp mbᵾ, mong piral ninim. On por morum wamp mbᵾ, nombuⱡa mam andinmin. Wote, kint pombuⱡma wamp mbᵾ, mbo kᵾng tᵾnmin. Kum ngorum wamp mbᵾ, ik pᵾnmᵾn. Wamp on mbᵾ, ropa rut nduⱡnga, kont monmᵾn. Omba, Got nga ik kai mbᵾ, wamp kurpa mbᵾ kᵾn, ik mbo endnim nil! Na nga uⱡ ent kᵾⱡ ndi, wamp ti nga mondpa pili ei, ropa mbuⱡ mbaⱡ ndui nandᵾm ndam, wamp ei kai pilangga nᵾnᵾm niⱡ!” nitim.

Jon nga kitip kᵾni wu ni raⱡ kelik, Jon kᵾn int puⱡᵾnggila mel, Jisas ndi, wamp num morung nimbᵾ, Jon nga nᵾndpa nimba mel, “Enim unt kona kui waka ila namba mel, ei kᵾning pilik purung? Nde kaipa mᵾn ei, kᵾpkᵾ ropa, ruimp rika nitim ila, kᵾning pilik purung ye? Muna, wu ti kui kuk mbal raⱡpa, mᵾkᵾ etpa murum ila, kᵾning pilik purung? Kui kuk mbal ralk, moke etmin uⱡ ei, wu nuim mbᵾ nga mᵾkᵾ pena ila mormun ni. Namba mel ei, kᵾnmin nᵾk, kona ila purung? Na kundᵾk nᵾiya! Pᵾnmin an! Wu ni, painui wu mint mon. Wu ni, painui wu mbᵾ, tᵾpa mana ndupa, wu oⱡa orunga, wu elpa ti mel. 10 Got nga ik mong ti petᵾm ei ndi, wu Jon ei nga nᵾndpa mel,

‘Enim pilᵾiya! Na nga nombuⱡa rung wu ei, kuimp tep tᵾp mundamba mba, nombuⱡa mam ti ropa tᵾpa kun indangga,’ nitim.
11 “Enim ik kupa ei, kundᵾp nᵾnt. Ya mᵾi kona wu metᵾng mbᵾ nga wu ti ndi, wamp nu tindi wu Jon ei, kapⱡa ropa mana ndumba mel mon. Wote, muⱡ ila Got nga tᵾpa mumuk rui kona ila wamp mana ti ndi, Jon ni tᵾpa, mana ndupa, elim ni oⱡa mba morum. 12 Wamp nu tindi wu Jon ei, Got nga ik nimba ngumba ᵾndrᵾm ui ei kᵾn, wote yant ndupa omba, akup monmᵾn ui ila, Got nga tᵾpa mumuk rui uⱡ ei, mindil mam mat tᵾpa onum. Ei, punt wu mbᵾ ndi, wu rok wei ai inding pilik enmin. 13 Uⱡ etmba mbᵾ mel, painui wu na Moses nga mi ik na mbᵾ ndi, wamp nu tindi wu Jon kᵾn, wu Mesaiya raⱡ nga nᵾndᵾk, mint moⱡina, wote Jon ni ekit urum. Ei kᵾn, akup painui wu mbᵾ, Elaija yant omba, nᵾk pilik mormin uⱡ ni nga, Jon ni Elaija mel urum. Ei pilik itᵾi! 15 Enim kum nombuⱡa tem ndam, ik ei pilik kun itᵾi! 16 Na ndi, akup ui ila wamp kat namba mel ei kᵾn, to tindimp? Kangambuⱡa kel rarᵾp rop kona pena ila molk, kindmal mel etᵾk, ke nᵾk int yant etᵾk, ‘Tᵾn enim ou nein nimbun nditing rumᵾn ei, enim ou ni nandᵾtᵾng. Tᵾn ka nde mundpᵾn ka imᵾn ei kᵾn, enim ka iti natᵾtmᵾn,’ ni mel. 18 Jon urum ni kᵾn, rᵾng mowi pepa, nu wain nui nandpa itim ei kᵾn, wamp ndi, ‘Kur kit ti mondpa morum,’ nᵾtᵾng. 19 Jon moⱡnga kᵾn, wote wu ei, Muⱡᵾl Wu Kupa ni omba, nu rᵾng mel mbᵾ nurum ei kᵾn, wamp mbᵾ ndi, nᵾk mel, ‘Wu ei kᵾnᵾiya! Wu ei rᵾng wal numba, nu ronduⱡ minal numba, ku moni takis wu na, uⱡ kit etmin wu na mbᵾ nga wu mᵾn ei morum,’ nᵾtᵾng. Wote, Got nga uⱡ rᵾpndi etᵾm mbᵾ ndi, elim nga pilpa kungᵾndi ronduⱡ ei, tᵾpa mot ndurum,” nitim.

Jisas Mondᵾk Pili Napᵾtᵾng Kona Peng Mbᵾ

20 Jisas ndi, uⱡ wengᵾndupa minal etpa, kona peng ila morung wamp mbᵾ, ora ndurum. Wote, wamp mbᵾ ndi, en enim nga uⱡ kit etᵾng mbᵾ, wak rui narᵾrᵾng kona peng ila petmin wamp mbᵾ kᵾn, ik mura itim. 21 Jisas ndi, nimba mel, “Enim kona Korasin kᵾn Betseita raⱡ nga wamp mbᵾ ye! Enmbil kona raⱡ ila nga petmin wamp mbᵾ kᵾn, uⱡ kit mat etmba. Enim wamp mbᵾ kᵾn, uⱡ wengᵾndupa mat etᵾp, ora ndunt nimba, wᵾl Taiya kᵾn Sairon kona raⱡ ila elimba ndam, kona raⱡ ila wamp mbᵾ, kandᵾk etᵾk rok, ui kik raⱡ etᵾk, gel mbal ping mbᵾ ralk, uⱡ kit etmin mbᵾ, wak ronmᵾn, nilingina. 22 Enim ik ti kundᵾp nᵾnt ei, tᵾn wamp kui kont raⱡ kᵾmp tᵾm ui ei kᵾn, enim wamp mbᵾ, mindil mam ti nuing. Wote, kona Taiya kᵾn Sairon raⱡ mindil kot onunga, etpa mel nuinggil. 23 Wote, nim Kaperniyum kona ei, kona peng kel mbᵾ nga ronduⱡ mbᵾ, nim ᵾmbuⱡimp nᵾkᵾn pilᵾn ei nga? Nim ropa ndip kaⱡmba ei ka! Nim kᵾn uⱡ rᵾpndi mat, unt etpa ora ndunt nimbᵾ, Sorum wamp mbᵾ kanduⱡina ndam, Sorum kona ei, akup uⱡ ila telinga. 24 Enim ik kupa ei kundᵾp nᵾnt. Wamp kui kont raⱡ kᵾmp tᵾm ui ei kᵾn, Sorum kona wamp mbᵾ, mindil orunga etᵾk nangina, enim Kaperniyum nga wamp mbᵾ, mindil mam ti nuing,” nitim.

Enim Na Kᵾn Ok Muⱡ Tᵾi

25 Ei kᵾn, Jisas ndi, nimba mel, “Wuta, nim muⱡ mᵾi raⱡ nga Wu Mumuk ei, nim kᵾn angge nᵾnt. Ei nambuⱡ emel, nim ninim ndi, wamp mong rui mbᵾ kᵾn, ik kupa kᵾn, uⱡ kupa mbᵾ kᵾn, etkᵾn mo rokᵾn pendkᵾn, wote kangambuⱡa kel mel mbᵾ kᵾn, apᵾtkᵾn tᵾkᵾn, mot ndukᵾn etᵾn. 26 Wuta ye! Ninim ndi, itangga nᵾkᵾn pitin ei mel ku etᵾm.

27 “Na nga Wuta ei ndi, elim nga mel mbᵾ pora, na ngumba rukᵾr ndurum. Ei nga, na wu elim nga kanim ei nga numan ei, mana mᵾi kona ila wamp ti ndi, kᵾni nakᵾndrᵾm mon. Wuta elim ndi kandrum. Wote, Wuta nga numan ei, mana mᵾi kona ila wamp ti ndi, kᵾni nakᵾndrᵾm mon. Na wu elim nga kangᵾm ei kᵾn, wote elim nga kangᵾm ndi, mbi ropa, titim wamp mbᵾ, elim nga pᵾtᵾm uⱡ mbᵾ mel, tᵾpa pena ila pendpa, Wuta nga timan ik ei, wamp nam ti ndi, pilpa tᵾtᵾm. Wamp ki kunda.

28 “Enim mbun koma ronmin wamp mbᵾ, na kᵾn wᵾi! Na nanim ei ndi, enim etᵾp piya nduimp. 29 Na nga ik kupa nᵾnt kᵾⱡ, pilik rukᵾr tᵾk, na nga ent uⱡ mbᵾ, pilik tᵾi! Ei nambuⱡ emel, na wu koma ti, numan wang ndui wu ei mor. Enim nga min ei, omba kᵾndᵾk ndupa, moⱡmba kona ei na. 30 Ei nambuⱡ emel, na ik mong enim mbo endᵾnt kᵾⱡ, wei wei etᵾk pilik ting, omba na ndi, enim mbun ti kona rundimp ei pᵾiya!” nᵾtᵾm.

Copyright information for `MED