Matthew 13

Rᵾng Mong Mundrum Ei Nga Ik Ek

Ant tenda ei kᵾn, Jisas murum manga ni, wak ropa mba, num Galili ei nga ᵾldᵾ ila, ik mbo endᵾmba ei nga, murum kona ila wamp minal ok, num pelingina wamp nimbᵾ, nu ᵾldᵾ ila mondpa kelpa, elim mba nu kanu kat titim kᵾⱡ ila, rukᵾr mba pol ila murum. Ila moⱡpa wamp mbᵾ, ik minal mbo inditim. Ik ek mbᵾ mint ropa nitim. Ik ek ti, ropa nimba mel, “Tᵾnggᵾt kᵾn, wu ti pana ila wit mong mbo mundimp nimba purum. Wit mong mbᵾ, mepa andpa ndanda ndupa munduⱡnga mat ni, nombuⱡa ᵾldᵾ ila titim nimbᵾ, kᵾi ndi ok norung. Wit mong mat, ku pol ila mana mba, mᵾi wei wei etpa titim ila, tᵾkrᵾpa mᵾlᵾ ropa oⱡa urum. Wote ant ndi, oⱡa omba kᵾndrᵾm ei kᵾn, kui nimba kurum. Ei nambuⱡ emel, ku pol ila pilkan mundᵾmba, ei mel mon ei nga kurum. Wit mong mat, mana puⱡnga kumbᵾⱡ nde ⱡᵾmbᵾⱡ rong mul mbᵾ kᵾn, rukᵾrᵾⱡa etpa oⱡa urum. Wote, rᵾng mong mbᵾ, ropa kurᵾp ila inditim. Mong mat mᵾi kai ila, mana purum mbᵾ, mᵾlᵾ ropa kai mondpa oⱡa omba mong rorum. Mat mong 100, mat mong 60, mat mong 30 ropa pitim,” nitim. Ik ek kᵾⱡ ropa pora ndupa ei nimba mel, “Kum nombuⱡa tem ndam, na ik nᵾnt ei, pilik tᵾi!” nitim.

Jisas Ik Mbᵾ Namba Elinga Ek Ropa Nitim?

10 Wote, kitip kᵾni wu, ni kᵾⱡ ok, Jisas waldᵾk nᵾk mel, “Nim ndi, wamp mbᵾ ik ek rokᵾn, ik mbo endin ei, nambuⱡ emel en?” nᵾtᵾng. 11 Wote, Jisas ndi, nimba mel, “Enim Got ndi, muⱡ kona tᵾpa mumuk rui uⱡ ei, ting ei nga ik mou ropa petᵾm mbᵾ nga pilpa kungᵾndi nguⱡnga, pilik kun enmin. Wote, wamp wei mbᵾ, ei mel mon. 12 Pilpa kungᵾndi tᵾpa moⱡum wamp ei, Got ndi, pilpa kungᵾndi ou ndupa ngumba, wote wamp ti pilpa kungᵾndi ei nga, numan ngui ngangᵾm wamp ei, pilpa kungᵾndi onunga, etpa tᵾpa moⱡum kᵾⱡ, Got ndi, elim rukᵾr tᵾmba. 13 Na ik ek puⱡi rop wamp mbᵾ, ik mbo endᵾnt. Ei nambuⱡ emel,

‘Kanmin ei wote, kandᵾk mbi ndui nandᵾnmin. Wote, kum tenmin ei, wote ik puⱡ ei, pilik kun iti natᵾnmin,’ nitim.
14 Ei kᵾn, Painui wu Aisaiya ndi, ik ti unt kor nga pai nomba nitim ei, ya wamp kᵾⱡ kᵾn omba kupa enim.

‘Enim kum tek pili piling, wote pilik kun iti nᵾtᵾng. Kandᵾk kᵾni kᵾning, wote kandᵾk kun iti nᵾting.
15 Ei nambuⱡ emel, wamp mbᵾ nga numan ei, piral ni nᵾndᵾtᵾm, wote ik kum tek pili napᵾnmin, wote mong raⱡ ndi, kᵾni nakᵾnmin. Muna uⱡ mbᵾ mel iti natᵾlina ndam, mong raⱡ ndi kandᵾk poⱡ nduⱡina, kum raⱡ ndi, pilik kun etangina numan ei ndi, pilik ndoimp rondᵾk, numan ropᵾl rok, na wu Got ei kᵾn, yant wangina, na ndi, wamp mbᵾ etᵾp tilmba!’ nitim.
16 Wote, enim na nga kitip kᵾni wu kᵾⱡ kai pilᵾiya! En enim nga mong raⱡ ndi, kandᵾk mbi ndᵾnmin omba, enim nga kum raⱡ ila pilik mbi rondᵾnmin. 17 Enim nᵾmp ndoimp rondᵾp nᵾnt, unt kor nga Painui wu minal kᵾn, Got nga wamp minal mbᵾ, akup enim kanmin uⱡ mbᵾ mel kᵾnamᵾn nᵾk pᵾtᵾng ei, wote kᵾni nakᵾndrᵾng. Omba akup, pᵾnmᵾn ik mbᵾ mel pilamin nᵾk pᵾtᵾng ei, wote pili napᵾtᵾng.

Rᵾng Mong Mundi Ik Ek Kᵾⱡ Nga Puⱡ Ei Nimba Ngurum.

18 “Kum tek pilᵾi! Rᵾng mong mundi ik ek ei nga, puⱡ ei pilik, kun itᵾiya! 19 Mat ndi, tᵾpa mumuk rui uⱡ ei nga, nombuⱡa rung ik ei, pilik ndoimp rundi nandᵾrmin mbᵾ, wit mong mat, nombuⱡa mam ila mana purum ei mel, Got nga ik ei, mundmong ila mbo mundᵾk pendᵾtmin ei, wu kit ei ndi, omba tᵾpa ropa wei ai endᵾtᵾm ei mel kapⱡa.

20 Omba rᵾng mong mat, ku pol titim mᵾi mbila mana purum ei, Got nga ik ei pᵾtmᵾn ei kᵾn, mint numan kai ndi, kurmin ei mel. 21 Wote, pᵾtmᵾn ik ei, puⱡ pilkan etpa, roⱡ pi napᵾrᵾm. Ui mat kᵾn wamp ei, Got nga ik pᵾtᵾm uⱡ ila wamp mat ndi, ei rok kongundᵾk. Wote, mbun kandᵾk tᵾk ngᵾk etmin ei kᵾn, Got nga ik ei tᵾk mbuⱡ ngurmin. 22 Wote, rᵾng mong mat ni, nde rong murum mbila, mana puⱡnga ndi, rong mul kᵾⱡ ndi, ropa kurᵾp ila inditim ei, tᵾpa mumuk rui uⱡ ei nga, nombuⱡa rung ik ei pili pᵾtmᵾn. Wote, kᵾng orunga mel mbᵾ, kel rondᵾk, kng mel mbᵾ nga kom pendᵾk etmin uⱡ ei ndi, Got nga ik mong ei, ropa kurᵾp ila enduⱡnga, mong rui narᵾrᵾm. 23 Omba, wit mong mᵾi kai ila mᵾlᵾ ropa kai itim ei, wamp ti, nombuⱡa rung ik ei, pilpa ndoimp rondrum ei ndi, mong ropa 100, mat ropa 60, omba mat ropa 30 endᵾtᵾm,” nitim.

Pana Eta Purum Ei Nga Ik Ek Ti

24 Wote Jisas ndi, ik ek ti ku kitip kᵾni wu ni kᵾⱡ, ku ropa ngumba nimba mel, “Muⱡ ila tᵾpa mumuk rui uⱡ wu ti, ei ya ei mel kapⱡa, wu ti, elim nga pana ila, wit mong kai mat mundrum.

25 “Rumbᵾⱡ roⱡnga wamp pᵾkᵾ ur petᵾng ni kᵾn, pana puⱡ wu ei nga, el rui wu ti ndi, wit rᵾng mundpa pinditim pol nimbila, eta kit mong mbᵾ, mbo mundpa pendpa purum. 26 Wote wit nimbᵾ, mᵾlᵾ ropa mong kokila romba elinga, eta kit ni kᵾⱡ, kunda oⱡa urum.

27 “Wu ni nga kongun wamp mbᵾ ndi nᵾk mel, ‘Wu Nuim ye! Pana ila wit mong kai mbᵾ nga, mint mbo mundrᵾn. Ni wote, eta kit mat kunda oⱡa onmᵾn ei, nant ila pitim mbᵾ onum nda?’ nᵾk waldᵾtᵾng. 28 Ni kᵾn, pana puⱡ wu ei ndi, punt ropa nimba mel, ‘Ei el rui wu ti ndi omba itim,’ nitim. Wote kongun wamp nimbᵾ ndi, int nduk nᵾk mel, ‘Tᵾn mbun eta mbᵾ rᵾnggᵾⱡpᵾn mundamin nᵾkᵾn pᵾn muna mon?” nᵾk waldᵾtᵾng. 29 Wote, pana puⱡ wu ei ndi, punt ropa nimba mel, ‘Mon nᵾnt. Ei nambuⱡ emel, eta kᵾⱡ rᵾnggᵾⱡmin nᵾk itangina mel, wit mat pendpa rᵾnggᵾⱡpa oⱡa omba, ei nga mon,’ nᵾnt. 30 ‘Kandᵾk kont itangina, eta mbᵾ kᵾn, wit mbᵾ kᵾn kunda oⱡa wangina, wit ropa rangga rᵾngmin ui ei kᵾn, tᵾpᵾn elpa elpa itmin. Ei kᵾn, wit rangᵾng wamp mbᵾ kundᵾp, eta mbᵾ kuimp tek runggulk, ot rok tek ndip kᵾⱡeing. Wote, wit rᵾng mbᵾ tᵾk tenda etᵾk mek pok, na nga wit rᵾng tet manga ila tindᵾi nimp!’” nitim.

Jisas Ndi, Nde Mastat

Mong Ei Mel Nimba Ik Ek

Ti Rurum

31 Jisas ndi, ik ek ti ropa nimba mel, “Muⱡ ila tᵾpa mumuk rui uⱡ ei ya ei mel kapⱡa. Wu ti nde mastat mong mat mepa mba elim nga pana ila mbo mundrum. 32 Nde wei mbᵾ nga mong mbᵾ wei, ya mastat mong ei mel wei kᵾⱡ, wote mᵾlᵾ ropa oⱡa orum ei kᵾn, pana ila kim na rᵾng wei mbᵾ, ropa mana ndupa mastat ei oⱡa purum. Wote oⱡa omba mam etᵾm ei kᵾn, kᵾi mbᵾ ndi, nde puⱡa mbila mi manga rok pek etmin,” nitim.

Yis Nga Ik Ek Ei Rurum

33 Ik ti, ek ropa nimba mel, “Got nga wamp tᵾpa mumuk rui uⱡ ei ya ei mel kapⱡa. Amp ti ndi, plawa ila yis mundpa ropᵾl mapᵾl ropa, nu mundpa telinga, plawa ei mepa oⱡa orum ei mel,” nitim.

34 Jisas ndi, wamp nimbᵾ kᵾn, ik ek mbᵾ mint, ropa kundpa nitim. Ik ti kᵾn, para ndupa mbo indi nᵾndᵾtᵾm mon! Ik mbᵾ pora, ek mint ropa kundpa nitim. 35 I itim uⱡ kᵾⱡ, painui wu Aisaiya nga ik nitim kᵾⱡ, etᵾp kupa indimp nimba nitim,

“Na ik kundᵾp nimp etᵾp ik ek mint rop nimp, muⱡ mᵾi raⱡ iti nᵾti kᵾn, ik mo ropa titim mbᵾ, ndupa para ndup nimp,” nitim.

Jisas Pana Eta Mel Ik Ek Kat Rurum Ni Nga Nimba Mot Ndurum

36 Wote, Jisas wamp num morung nimbᵾ, kelik pᵾi nimba mundpa, manga ila murᵾk purum ni kᵾn, elim nga kitip kᵾni wu ni kᵾⱡ ndi, akil tek ok nᵾk mel, “Pana eta ei mel ik ek ron ni nga puⱡ ei, tᵾn kundkᵾn ni,” nᵾtᵾng.

37 Jisas ndi, punt ropa pendpa nimba mel, “Rᵾng mong kai mbᵾ mundrum wu ei, ‘Na Muⱡᵾl Wu Kupa’ ei mel. 38 Pana kuta ei, ya mᵾi kona ei mel, rᵾng mbo kai kᵾⱡ ei, Got nga tᵾpa mumuk rui uⱡ ila wamp mormun ei mel, pana eta ei, Seitan ei nga wamp mbᵾ mel, el rui wu ti, eta kit kᵾⱡ, mepa omba mundrum wu ei, Seitan. Rᵾng poⱡ roⱡnga ranggᵾrᵾng ei, muⱡ mᵾi raⱡ pora nimba ei mel, rᵾng ranggᵾrᵾng wamp mbᵾ, anggelo mbᵾ mel.

40 “Wote eta mbᵾ, tᵾk mᵾk rok, ndip pol etᵾk, ndip karmin ei mel ku, muⱡ mᵾi raⱡ pora nim ei kᵾn, uⱡ ei mel ku pemba. 41 Muⱡᵾl Wu Kupa ei ndi, elim nga anggelo mbᵾ, tᵾpa mundangga, Got nga tᵾpa mumuk rui wamp mormin mbᵾ nga mat ndi, wamp mat kᵾn ⱡawa etmin. Wote, wamp mat uⱡ kit etmin mbᵾ kᵾn, anggelo mbᵾ ndi, aprᵾk ekit tᵾk rok, ndip kona ku mel, kundpa moⱡum ila mundangina, gu konggilik gᵾkᵾr tᵾk, ka rom rok muⱡing. 43 Ei kᵾn, Got nga kindmant endᵾtmin wamp mbᵾ, en enim nga tipam kᵾnt ei nga tᵾpa mumuk rui kona ila, kona ant na, rᵾⱡang purum ni mel, rᵾⱡang ti ku pangga muⱡing. Ei kᵾn, enim kum nombuⱡa tem ndam, na nᵾnt ik ei, kum tek pilᵾi!” nitim.

Jisas Ndi, Mel Kai Mat Mou Rok Pendᵾtᵾng Mel Nimba Ik Ek Ti Rurum

44 “Got nga muⱡ kona ila wamp tᵾpa mumuk rui uⱡ ei, mel kai mat kongun kona tila mou rok pendᵾtᵾng. Ei kᵾn, wu ti ndi, kandpa tᵾpa numan ndi koⱡpa, wote mel mbᵾ mᵾi akpa, mou ropa pendpa. Wote mba, elim nga tepa morum mel mbᵾ, rarᵾp ropa ku tᵾpa, wote ku mbᵾ mepa yant mba kongun kona ei, rop ropa titim ei mel.

Mel Ronduⱡ Eng Nui Ei Nga Ik Ek

45 “Wote uⱡ ti, muⱡ kona wamp tᵾpa mumuk rui uⱡ ei, wu ti ndi, ku eng nui mat andpa kᵾrᵾrᵾm ni mel kapⱡa. 46 Wote, kurpa andpa mel ronduⱡ eng nui ei, kandpa tᵾtᵾm ei kᵾn, int mba elim nga mel kai tepa morum mbᵾ, mepa mba ku moni tᵾpa ku moni mbᵾ ndi, mepa yant omba, mel ronduⱡ eng nui ei, rarᵾp ropa tᵾmba ei mel kapⱡa.

Oma Wal Ei Nga Ik Ek

47 “Omba uⱡ ti, muⱡ ila wamp tᵾpa mumuk rui uⱡ ei, ya ei mel, oma wal mundi wu mat ndi, oma wal mbᵾ, num ila pendᵾk, oma mbo elpa elpa mbᵾ nga imp molk, tᵾtmᵾn ei mel kapⱡa. 48 Oma wal ei oma ndi, peka rurum ei kᵾn, ᵾldᵾ ila ekit tᵾk tek, oma mbᵾ aprᵾk tᵾk, elpa elpa etmin. Oma kai mbᵾ tᵾk wal ila rakilik, oma kit mbᵾ, rok mundᵾk ketmin. 49 Muⱡ mᵾi raⱡ pora nim ei kᵾn, uⱡ ei mel ku etmba. Anggelo mbᵾ ndi, ekit pok, uⱡ kit eng wamp mbᵾ, aprᵾk tᵾk elpa mondᵾk uⱡ kai etmin wamp mbᵾ, aprᵾk tᵾk tila mondᵾk iting. 50 Uⱡ kit iti wamp mbᵾ rok tᵾk, ndip ila rok mundangina, ka etᵾk, gu konggilik, gᵾkᵾr tᵾk muⱡing.

51 Jisas ndi, nimba mel, “Enim ik mbo endᵾnt mbᵾ, pilik kun enmin muna mon?” nimba waldilinga. Wote, wu kᵾⱡ ndi, nᵾk mel, “Pilpᵾn kun enmin,” nᵾtᵾng. 52 Wote, Jisas ndi, punt ropa nimba mel, “I pilik kun enmin pᵾnt ei kᵾn, mi ik mbo wu na ti ndi, muⱡ ila wamp tᵾpa mumuk rui uⱡ ei nga kitip kᵾni wu kandpa, kongun etᵾm. Wu ti ndi, elim nga wal kum ila, elim nga mel unt nga, kont nga mbᵾ pora, apᵾtpa tᵾpa, ekit ndurum ni mel kapⱡa,” nitim.

Nasaret Wamp Mbᵾ Ndi, Jisas Tᵾk Mbuⱡ Ngorung

53 Wote Jisas ni, ik ek nimbᵾ pora ndupa, murum kona ni wak ropa, elim nga mᵾi mang kona ila mba, atinga manga ila moⱡpa, ik mbo inditim. Ik pᵾtᵾng wamp nimbᵾ ndi, pilik min ngᵾn mundᵾk nᵾk mel, “Wu ei pilpa, kongundpa ni, ik na, uⱡ rᵾpndi ronduⱡ na mbᵾ, etpa pilpa titim mel nant nda?” nᵾtᵾng. 55 “Elim nga puⱡ ei, tᵾn pilpᵾn mormun ye? Elim wu kamnda ei nga kangᵾm ant ko! Mam amp Mariya nᵾmp pᵾnmᵾn ye? Jeims, Josep, Saimon, Juras min kᵾⱡ, elim nga ᵾngᵾnᵾl, wote elim nga amp kimᵾnᵾl mbᵾ kep, ya tᵾn nga kona ila mormun ant ko! Uⱡ mbᵾ nam ndi, mbo inditim nda?” nᵾtᵾng. 57 Ik kᵾⱡ mel nᵾk pilik, Jisas nga itim uⱡ mbᵾ, tᵾk mbuⱡ ngorung. Ni kᵾn, Jisas ndi, kandpa nimba mel, “Painui wu ti, kona elpa mbila, elim tᵾk ou ndurmin. Wote, elim nga mang kona ila kep, elim nga wamp mema tenda mbᵾ ndi kep, elim tᵾk pei mondᵾrmin,” nitim.

58 Wu ei, uⱡ rᵾpndi mat, Nasaret wamp mbᵾ kᵾn, etpa ora ndui nᵾndrᵾm. Ei nambuⱡ emel, elim ni, mondᵾk pili napᵾtᵾng.

Copyright information for `MED