Matthew 19

Jisas Ndi, Wu Amp Ndenggᵾⱡa Ni Uⱡ Ei Nga Mbo Inditim

Jisas ndi, ik mbᵾ pora nimba mel, Galili kona ila wak ropa, nu Joran noi orunga, Juriya kona tetᵾm mbila purum. Wamp minal ndi, Jisas kandᵾk purum ila, akil tek orung nimba, mat kui peng itim wamp mbᵾ, etpa weing titim.

Ei kᵾn, Perisi wu mat ndi, Jisas oⱡa tᵾk kᵾning pilik ik ei mel, waldᵾtᵾng nᵾk mel, “Wu ti nga amp ei, uⱡ ei muna ei, enim nimba ndenggᵾⱡa ndupa, mundpa kilmba ei, kapⱡa etmba muna mon?” nᵾtᵾng.

Wote Jisas ndi, ik int ndupa nimba mel, “Enim Buk Wingti ila wamp weng ndupa itim ei ndi, wu amp nimba mim itim mon ei, kᵾmp rok kandᵾrmin muna mon? Wote Got ndi, nimba mel, ‘Wu amp raⱡ nᵾmp mim ent uⱡ ei ndi, wu ei, elim nga mam tipam raⱡ wak ropa mba, amp ei kᵾn kup itangga, wamp tenda ralk muⱡᵾnggil.’ Ei kᵾn, wamp raⱡ, wote raⱡ mel mon. Wote, wamp tenda ralk muⱡᵾnggil. Got ndi, tᵾpa tenda itim uⱡ ei, mana mᵾi kona ila wamp ti ndi, nimba ndenggᵾⱡa ndumba mel kapⱡa mon,” nitim.

Wote, Perisi wu ni kᵾⱡ ndi, waldᵾk nᵾk mel, “Wote nambuⱡ emel, Moses ndi, mi ik ti ngumba kᵾn, wu ei ndi, elim nga amp ei, amp ndenggᵾⱡa ndui mon ti ngumba wak rangga?” nitim.

Jisas ndi, nimba mel, “Moses ndi, enim nga ambᵾnᵾmᵾl mbᵾ, ndenggᵾⱡa ndᵾi nitim ei, nambuⱡ emel, wu amp raⱡ mim itim ei nga puⱡ ei, enim ndi, pilik kᵾn, tᵾk roi ndurum. Uⱡ ei mel, wu amp raⱡ mim itim ei kᵾn, uⱡ ei pi nᵾpᵾtᵾm. Enim pilᵾiya! Wu ti ndi, elim nga ambᵾm ei wapra rui uⱡ ti iti nᵾtangga, mᵾn kan amp ei, mundpa kelpa, amp kont nga tᵾm ndam, wu ei wapra rui uⱡ ⱡawa ei etmba,” nitim.

10 Wote, kitip kᵾni wu ni kᵾⱡ ndi, Jisas kundᵾk nᵾk mel, “Nim ndi nᵾkᵾn kᵾn, wu amp wapra rui uⱡ ei ndi mendpᵾⱡ, wu amp ndenggᵾⱡa nitmin nin ndam, wu amp ti natᵾk, wangᵾn pelingina ndam, kapⱡa elinga,” nᵾtᵾng. 11 Ni kᵾn, Jisas ndi, ik punt ropa nimba mel, “Wu amp wangᵾn petmin uⱡ ei, wamp pora nga uⱡ ti mon. Got elim ndi, pᵾtᵾm wamp kᵾⱡ mendpᵾⱡ, wangᵾn petmin. 12 Wu amp ti natᵾtmᵾn uⱡ ei nga puⱡ minal ei, mat mamᵾl nga oⱡ rukᵾr ila pek ormᵾn ei kᵾn, wu puk amp tᵾk iting mel mon. Wote, wamp mat ndi elingina, pot petmin mat muⱡ ila tᵾpa, mumuk rui uⱡ ei nga nᵾndᵾk, wangᵾn pek etmin. Ei kᵾn, ik ei pilpa tᵾmba wamp ti, elim pilpa tangga,” nitim.

Jisas Ndi, Kangambuⱡa Kel Mbᵾ Memp Pindᵾtᵾm

13 Wote, wamp mat ndi, kangambuⱡa mbᵾ, Jisas ndi, peng mbila ki oⱡa ndupa ambuⱡpa, memp pindangga nᵾk mek orung. Ni kᵾn, kitip kᵾni wu nimbᵾ ndi, uⱡ ei kandᵾk, wamp mbᵾ ik ngorung. 14 Ni kᵾn, Jisas ndi, nimba mel, “Kangambuⱡa mbᵾ, na kᵾn weing, enim ndi, mon ni nᵾnᵾi! Muⱡ ila tᵾpa mumuk rui uⱡ ei, wamp mat kangambuⱡa kel mbᵾ mel, ralk moⱡᵾng mbᵾ nga” nitim. 15 I nimba kᵾn, kangambuⱡa nimbᵾ nga peng ila ambuⱡpa, memp pendpa kᵾn, wote kona tila purum.

Kang Wu Ti, Kng Mel Ou Ndupa Pitim ei

16 Ui ti kᵾn, wu ti rᵾk omba Jisas waldpa nimba mel, “Ik mbo wu ye! Na uⱡ kai namba uⱡ mbᵾ etᵾp, uⱡ nga kᵾnt nga kont mul uⱡ ei timp?” nitim. 17 Jisas ndi, punt ropa nimba mel, “Uⱡ kai ei, nant nᵾkᵾn na kᵾn waldᵾn ei, ⱡawa etkᵾn nin ei ka! Got mint wu kai tenda ei morum. Uⱡ nga kᵾnt nga kont mul uⱡ ei, timp nᵾkᵾn pin ndam, Got nga mi ik kᵾⱡ pep rui,” nitim.

18 Ni kᵾn, wu ni ndi, nimba mel, “Ei mi ik nant mbᵾ nga nᵾn?” nimba wuldᵾtᵾm. Wote Jisas ndi, punt ropa nimba mel, “Wamp ti rok kundi nᵾkᵾndi, wu amp wapra rui uⱡ mbᵾ iti nᵾti, kindᵾp nui nᵾni! Nim wamp ti kᵾn, ik kol rok ni nᵾni, manᵾm tipanᵾm raⱡ tᵾkᵾn ou ndui, nim ninim numan ngorun ei mel ku, nim nga manga keta kup wamp mbᵾ i ku etkᵾn, numan ngui!” nitim. 20 Wote, kang wu ni ndi, punt ropa nimba mel, “Ya nᵾn mi ik mbᵾ, na pep rop pilip ket ent. Na nambuⱡ ei nga kapⱡa iti natᵾnᵾm?” nitim. 21 Jisas ndi, wu ni kundpa nimba mel, “Nim wu kun pi kai ti muⱡimp nᵾkᵾn, pin ndam, int pukᵾn nim nga kng mel tekᵾn morᵾn mbᵾ, rarᵾp rokᵾn, ku moni tᵾkᵾn ku mbᵾ ndi, mek pukᵾn, wamp kurpa mbᵾ ngui! Wote yant okᵾn, na nga kitip kᵾni wamp ralkᵾn mᵾn ndam, nim muⱡ kona ila mel pemba,” nitim. 22 Kang wu ni ndi, Jisas ik nitim ni pilinga, numan ei mbun elinga, kelpa purum. Ei nambuⱡ emel, elim kng mel ou ndupa tepa murum. 23 Wote Jisas ndi, elim nga kitip kᵾni wu ni kᵾⱡ, kundpa nimba mel, “Enim ik kupa ei, kundᵾp nᵾnt, kng mel mbᵾ pei wamp ti ndi, muⱡ ila tᵾpa mumuk rui uⱡ ila rukrᵾng mba, ei nga mbun ndi koⱡmba. 24 Ik ei nga, wote aldpa nᵾnt, kng kamel ou ei ndi, gal ruri nombuⱡa ila rukrᵾng mba ei nga mbun etpa tetᵾm. Wote, wamp kng mel pi ti, Got nga tᵾpa mumuk rui uⱡ ila rukrᵾng mba ei nga, ama minal mbun etpa tetᵾm,” nitim. 25 Kitip kᵾni wu ni kᵾⱡ ik ei pilik, min ngᵾn mundᵾk, nᵾk mel, “I ndam, nam uⱡ nga kᵾnt nga moⱡpa mint mba?” waldᵾtᵾng. 26 Wu ni kᵾⱡ kᵾn, kundpa nimba mel, “Wamp ti ndi, elim peng kont ti natᵾmba. Ei wote, Got ndi, nambuⱡ mbᵾ, kapⱡa etmba mint,” nitim. 27 Wote Pita ndi, ik akpa nimba mel, “Kana! Tᵾn nga mel mbᵾ, tᵾp mbuldung ndupᵾn, nim pep rumᵾn ei nga, tᵾn Got ndi, namba mel ei ngumba?” nitim. 28 Wote Jisas ndi, wu ni kᵾⱡ, kundpa nimba mel, “Enim pilik nduimp rok muⱡᵾi! Na Muⱡᵾl Wu Kupa ei, mon pangga, rᵾpndi pol ila munt kᵾn, enim na nga kitip kᵾni wu 12 kᵾⱡ, i ku etᵾk, rᵾpndi pol ila molk, Isrel nga wu rᵾⱡaip 12 kᵾⱡ kᵾmp ting. 29 Wote, wamp nam ti, na pep ruimp nimba kᵾn, elim nga mam tipamᵾl, kimᵾnᵾl, ᵾngᵾnᵾl, kangambuⱡa, na pana kongun kona mbᵾ, wak rom ndam, mel minal pendpa pᵾⱡ ila tᵾpa pangga 100 etmba. Wote, uⱡ nga kᵾnt nga kont mul ei, Got ndi ngumba. 30 Wote wamp mat akup kuimbal mormin mbᵾ ok, akil ting. Wote, akup ila wamp mat, akil tenmin mbᵾ ok, kuimbal ping.

Copyright information for `MED