Matthew 21

Jisas Wi Jerusalem Rukᵾr Purum

Jisas ni, elim nga kitip kᵾni wu kᵾⱡ kᵾn, Jerusalem kona nondpa ok, Olip komnga mana orunga Betpeis manga rᵾⱡaip ila ok, elim nga kitip kᵾni wu raⱡ tᵾpa, kuimp tepa mundpa nimba mel, “Noi manga rᵾⱡaip ila pukᵾⱡ, kng donggi mam ti, waⱡ ei kᵾn, kan kulk tenda ila pendᵾng ei, kan potkᵾⱡ mek, na kᵾn wᵾl! Wamp na ti ndi, kandpa nim ndam, enmbil ndi, ni kᵾⱡ mel, ‘Nuim ei ndi, uⱡ ti itimp nim ila, timbil onmbᵾⱡ nᵾl. Wote ei kᵾn, kng donggi raⱡ mek pᵾl nimba wak romba,’” nitim. “Uⱡ i itim ei ndi, painui wu ti nga nitim ik ei, omba kupa itim,

‘Saiyon mbuⱡam ei kundᵾk, enim nga wu Nuim ei enim kᵾn onum. Wu ei koma pou raⱡ tepa, kng donggi kokila ei nga mbuⱡ ming ila moⱡpa onum.’” nitim.
Wote, kitip kᵾni wu ni raⱡ ndi pukᵾⱡ, Jisas nitim ni mel etᵾnggil. Kng donggi waⱡ mam raⱡ mek okᵾⱡ, en enmbil nga wal pᵾki mbᵾ, potkᵾⱡ donggi kokila mbuⱡ ila oⱡa nduk tilinggila, Jisas ni oⱡa mbᵾ pol ila murum. Wamp minal morung nimbᵾ nga mat ndi, en enim nga wal pᵾki na mbᵾ, potᵾk nombuⱡa mam ila kumbᵾlᵾk tetᵾng, mat ndi, nde omung na yaⱡa ongum na mbᵾ ranggᵾk, tᵾk nombuⱡa omba ila kumbᵾlᵾk tetᵾng. Jisas urum ila wamp minal ok, kuimp akil tek, ᵾⱡi rok kei nᵾk, “Depit nga kangᵾm ei mbi pangga! Oⱡa Nuim ei nga mbi ila tᵾpa angᵾndpa onum ei, Got ndi, memp pindangga! Got nga mbi ei paka rᵾndamin!” nᵾtᵾng.

10 Jisas wi Jerusalem rukᵾr puⱡnga, kona puⱡ wamp nimbᵾ ndi, rot nᵾk mel, “Wu ei nam?” nᵾk waldᵾtᵾng. 11 Wote, wamp num ila mat ndi, nᵾk mel, “Wu ei, Galili kona orunga, Nasaret nga painui wu Jisas ni onum,” nᵾtᵾng.

Jisas Manga Wingti Ou Ila Purum

12 Jisas manga wingti ou ila murᵾk mba wamp mel mbᵾ tek rarᵾp rok, etᵾk morung nimbᵾ, makrᵾpa tᵾpa pena ndurum. Wote ku moni na, kᵾi na, yoⱡ etᵾk morung wu mbᵾ nga rat pol nimbᵾ, ropa kungᵾndrᵾm. Jisas ndi, wu nimbᵾ morung kundpa nimba mel, “Buk Wingti ila, Got ndi, ik ti nitim, ‘Na nga manga wingti ei, mbi tek atinga manga nᵾi,’ nᵾtᵾm. Ni nga wote, enim ndi tᵾk, kindᵾp wamp nga mi manga randᵾnmin ei ka!” nitim.

14 Jisas ni mba, manga wingti ou ila moⱡnga, kᵾmp ki rumbrᵾm wamp na, mong tᵾtᵾm wamp mbᵾ kᵾn, mek oⱡina, etpa titim. 15 Jisas oⱡina ndi, uⱡ ronduⱡ mat itim nimbᵾ kᵾn molk kandrung. Wote, kangambuⱡa mbᵾ ndi, manga wingti ou ila ke nᵾk mel, “Wu Depit nga kangᵾm ei, mbi paka rᵾndamin!” nᵾtᵾng. Ni kᵾn, wu pris peng mumuk kᵾⱡ kᵾn, mi ik mbo wu kᵾⱡ kᵾn, uⱡ mbᵾ kandᵾk popᵾⱡ mondrung. 16 Kangambuⱡa mbᵾ i nilingina, wu ni kᵾⱡ ndi, Jisas waldᵾk nᵾk mel, “Nim ik nᵾnmᵾn ei pᵾnmin?” niting. “Na pᵾnt ei ka,” nimba punt ropa wu kᵾⱡ, wote waldpa nimba mel, “Enim Buk Wingti ila petᵾm ik kᵾⱡ, kᵾmp rok kandᵾrmin muna mon?

‘Oⱡa Got ndi, kangambuⱡa kel na, waⱡ nana na mbᵾ nga keta ila, mbi paka rundi uⱡ mbᵾ nga mbo endᵾtᵾm?’” nitim.

17 Wote Jisas ndi, wu ni kᵾⱡ wak ropa, kona peng ila kelpa ekit mba, Betani kona ila mba rumbᵾⱡ tenda mel murum.

Nde Ui Ti Jisas Ndi, Memp Kit Ei Ngurum

18 Ipri unt Jisas ni, Jerusa-lem kona peng ila yant uimp nimba oⱡnga, kun kurum. 19 Wote kᵾndrᵾm mel, nde ui kat nombuⱡa mam ᵾldᵾ ila murum ila, mong ropa petᵾm muna mon nda? Nimba ruk purum mel, mong ti ropa pi nᵾpᵾtᵾm, wei ongum etpa murum. Jisas ndi, nde ui kᵾⱡ kundpa nimba mel, “Nim wote, ui mbila mong ti rui nᵾrᵾn!” nitim. I nilinga, tᵾngᵾnda mint, nde ui ni kᵾⱡ kurum. 20 Kitip kᵾni wu ni kᵾⱡ uⱡ ei kandᵾk, min ngᵾn mundᵾk nᵾk mel, “Nde ui kᵾⱡ tᵾngᵾnda mint konum ei, etpa enim mel nant?” nᵾk waldᵾtᵾng. 21 Jisas ndi, ik nᵾtᵾng ni, punt ropa nimba mel, “Na enim ik kupa ei, kundᵾp nᵾnt. Enim Got kᵾn mondᵾk pilik, numan ᵾkpᵾk ti natᵾk eng ndam, ya nde ui kᵾⱡ kᵾn, ent uⱡ ni mel kapⱡa iting. Wote, ei mint mon, ya komnga ei kundkᵾn, ninim akᵾkᵾn, oⱡa tᵾkᵾn, num kuta ila mana pi nin ndam, kupa omba mba mint. 22 Enim Got kᵾn mondᵾk piling ndam, namba mel mat atinga rok, ngangga nᵾk, waldᵾng mbᵾ ngumba mint,” nitim.

Jisas Elim Nga Ronduⱡ Ei Nam Ndi, Ngurum Nᵾk Waldᵾtᵾng

23 Jisas manga wingti ou ila yant omba, ik puⱡ mondpa mbo inditim ni kᵾn, wu pris na, manga wingti rᵾp wu na nimbᵾ ndi waldᵾk nᵾk mel, “Tᵾn ndi, nim kongun ngui ngᵾngmin ni, nim ronduⱡ ei nam ndi, nguⱡnga en?” nᵾtᵾng. 24 Wote Jisas ndi, wu kᵾⱡ nga ik nᵾtᵾng ni punt ropa nimba mel, “Na ndi, enim ik ti wuldimp ent ei, punt rong ndam, na nam ndi, ronduⱡ nguⱡnga ent uⱡ mbᵾ mel, enim kundᵾp nimp. Jon wamp nu tᵾndᵾtᵾm ni, nam ndi kongun ngurum, Oⱡa Got ndi, ngurum muna, mana wamp ti ndi, ngurung?” nitim. Nitim ila, en enim rᵾk ik palk nᵾk mel, “Etᵾp nimᵾn mel nant? Tᵾn pᵾnt ropᵾn nimbun mel, ‘Oⱡa Got ndi ngurum,’ nimᵾn ndam, ‘Tᵾn kundpa ei ndam, wote enim Jon nitim ik ei, nambuⱡ emel, mondᵾk pili napᵾtᵾng?’ 26 Wote tᵾn ndi, ‘Mana wamp,’ ti ndi, nimᵾn ndam, wamp mbᵾ ndi, tᵾn kᵾn ik mura ting ei nga mundmong itmin. Ei nambuⱡ emel, Jon ei painui wu ti nᵾk pilik mormin,” nᵾtᵾng. 27 Jisas nga ik ni punt rok nᵾk mel, “Tᵾn pili napᵾn mon,” nᵾtᵾng. Jisas ndi, wu kᵾⱡ kundpa nimba mel, “Enim pili napᵾlᵾng ndam, wote na uⱡ ent kᵾⱡ nga ronduⱡ ei, nam ndi, ngurum ei, enim kundᵾp ni nᵾnimp mon ku,” nitim.

Wu Ʉngᵾn Ʉngᵾn Ralt Nga Ik Ek

28 “Ei kᵾn, enim namba nᵾk pᵾnmin? Wu ti kang wu raⱡ etpa mitim. Wu ni ndi, kangᵾm kang wu kumna ei kundpa, ‘Nim akup pukᵾn wain pana ila kongun tᵾn pi!’ nitim. 29 Nitim ni, kang wu ei ndi, punt ropa nimba mel, ‘Na iti nᵾtimp!’ nimba, wote moⱡpa numan wang ndupa mba itim. 30 “Wote, wu ni ndi, mba kangᵾm akil ni, ik tenda ei ku kundpa nitim ni, kang wu ndi, ‘Kapⱡa nᵾn kongun ei itimp,’ nitim. Wote, kongun ei mba iti nᵾtᵾtᵾm. 31 Ei kun, kang wu nant ei ndi, tipam nga nitim ik ei teng ndurum?” nimba wuldᵾtᵾm. Wu ni kᵾⱡ ndi, “Wu komun ei,” nᵾtᵾng. Wote Jisas ndi, wu kᵾⱡ kundpa nimba mel, “Enim ik kupa ei kundᵾp nᵾnt. Ku moni takis ti wu mbᵾ kᵾn, amp wapra rui mbᵾ kᵾn, Got nga tᵾpa mumuk rui uⱡ ila, kuimp tek pangina enim, akil ting. 32 Ei nambuⱡ emel, Jon ndi omba, enim nombuⱡa kun kai ei, tᵾpa orunga ndurum ei, enim tᵾk pei mundrᵾng. Wote, ku moni takis ti wu mbᵾ kᵾn, amp wapra rui mbᵾ kᵾn, Jon nitim ik ei, mondᵾk pᵾtᵾng. Wamp kᵾⱡ i etᵾng uⱡ ei, enim kandrung ku. Wote, enim molk akil tek, numan ropᵾl rok, Jon nitim ik ei kep, mondᵾk pili napᵾtᵾng ku,” nitim.

Wain Pana Rᵾp Wu Kit Kat Nga Ik Ek

33 Jisas ndi, wu pris na, manga wingti rup wu nimbᵾ, kundpa nimba mel, “Ik ek ti ku, kum tek pilᵾi! Ui ti kᵾn, wu nuim ti, wain pana ti raⱡpa, wote paⱡa etpa rᵾk ndupa, wain mong ropa ngurmba kona ti, wᵾng ila kut akpa tepa, wote rup manga roⱡ ti raⱡpa, mepa oⱡa mba itim. I etpa tepa kona roⱡ tila mba pilpa, wain pana ei wu mat ndi, rᵾp indeing nimba ngumba pendpa purum. 34 Wote, wain rᵾnging ui ei, nondpa urum ni kᵾn, elim nga kindmant wu, tᵾpa wain pana rᵾp etᵾng wu nimbᵾ, morung kona ila, elim nga wain mat ranggᵾk, teing nimba tᵾpa mundrum. 35 Wain pana rᵾp etᵾng wu ni kᵾⱡ ndi, kindmant wu ni kᵾⱡ imp molk, ti tem poⱡ ndi rok, ti rok kondᵾk, ti ku ndi rok etᵾng. 36 Wote, kindmant wu mat minal i ku etpa pilpa, kelpa tᵾpa nga mundrum nimbᵾ, wain pana rᵾp etᵾng wu nimbᵾ ndi, unt wu raldika kᵾⱡ etᵾng ni mel ku etᵾng. 37 Wote akil tepa, elim nga kangᵾm kᵾnt ei tᵾpa mundpa, ‘Na nga mit kang ei, kandᵾk mbi nduk rui nᵾring,’ nimba pitim. 38 Wote, pana rᵾp wu kᵾⱡ ndi kandᵾk, en enim ol tek nᵾk mel, ‘Ya pana puⱡ puⱡ raⱡpa tᵾmba wu ei onum. Ei kᵾn, kang wu ei, rop kondpᵾn, ya pana ei tᵾn tamin,’ nᵾk, kang wu ni imp molk mel, wain pana ᵾldᵾ ila etᵾk puk rok kondᵾk tetᵾng.

40 “Ei kᵾn wote, pana puⱡ wu ei, elim yant om ei kᵾn, wain pana rᵾp etᵾng wu kᵾⱡ, nambuⱡ ti etmba nda?” nitim. Nimba kᵾn, Jisas ndi wuldᵾtᵾm. 41 Wu nimbᵾ ndi, “Uⱡ minᵾpi etᵾng wu kᵾⱡ, ropa mbo nomundpa, wain pana ei tᵾpa, wu kat ku rᵾpᵾtang nimba ngumba. Ngum wu kᵾⱡ ndi, wain rupa rom ei kᵾn, tᵾk elim nguk ku iteing,” nimba itim. 42 Jisas ndi, wu nimbᵾ kundpa, nimba mel, “Buk Wingti nga ik mong ti, ya ei mel petᵾm ndi, kᵾmp rok kandᵾrmin mon?

‘Manga rᵾki wu mbᵾ ndi, nde ti kit nᵾk mundᵾk ketᵾng ni, omba runga nde mel petᵾm. Ei Oⱡa Nuim ei ndi elinga, tᵾn ndi, uⱡ numan iti nᵾmp kandᵾrmin,’ nitim.
43 “Ei kᵾn, akup enim ik ti kundᵾp namp, Got nga wamp tᵾpa mumuk rui uⱡ enim kᵾn petᵾm ei, ekit tᵾpa etᵾk muⱡ pinding wamp mat ngumba. 44 Wamp nam ti, runga nde pol ila mba pem ti, rangga gurpa elpa elpa mba, wote runga nde ei, omba wamp ti nga kᵾng ila pem ndam, wamp ei ropa, nim nim ndupa pendᵾmba,” nitim.

45 Wu pris kuimbal na, mi ik pep rui wu na nimbᵾ ndi, Jisas ik ek rᵾrᵾm nimbᵾ, en enim kᵾn ninim nᵾk pᵾtᵾng. I nᵾk pilik, Jisas ni tᵾp kan nguimin nᵾk nombuⱡa mam mat kururum. Ei kᵾn wote, wamp mbᵾ nga mundmong etᵾng. Ei nambuⱡ emel, wamp mbᵾ ndi, Jisas ei, painui wu ti nᵾk pᵾtᵾng ei nga.

Copyright information for `MED