Matthew 26

Manga Wingti Ila Wu Kuimbal Mbᵾ Ndi, Jisas Rop Kundmin Nᵾtᵾng

Wote, Jisas ndi, ik mbᵾ mel mbo endpa pora ndupa kᵾn, elim nga kitip kᵾni wu mbᵾ kundpa nimba mel, “Enim pilik mormin rumbᵾⱡ raⱡ omba pangga! Pasopa rᵾng normin ui ei om kᵾn, na Muⱡᵾl Muⱡᵾl Wu Kupa ei tᵾk mek puk, el rui wu mbᵾ ngangina, nde peta ila rok kunding,” nitim.

“Ui ei kᵾn, wu pris kuimbal na, manga wingti rᵾp wu na mbᵾ ndi puk, wu Pris kᵾⱡ nga peng mumuk wu Kaiyapas nga manga ila, tᵾk tenda etᵾk morung. Ni kᵾn, wamp nimbᵾ tᵾp kum ngui randpᵾn, Jisas ni, rop kundmin nᵾtᵾng. Ni wote, en enmin ndi, nᵾk mel, “Pasopa rᵾng nuing ui ei kᵾn, pendᵾp kilᵾmin. Ei mel, imᵾn ndam, ui mam ila wamp mbᵾ, el pundung ei mon,” nᵾtᵾng.

Betani Kona Ila Amp Ti Ndi, Jisas Ni Kopung Kᵾndrᵾm

Jisas ni, noi Betani kona ila pombuⱡma rorum wu Saimon ni nga manga ila murᵾk mba moⱡnga, amp ti ndi, Jisas murum nila, kopung mura rui ti mepa omba, Jisas nga peng ila, kopung oi ndurum. Wote, elim nga kitip kᵾni wu ni kᵾⱡ ndi, amp ei, itim uⱡ ni kandᵾk, popᵾⱡ kulk nᵾk mel, “Kopung mura rui kai ei, nambuⱡ emel etpa ge ndonᵾm nda? Kopung kai ei, rarᵾp ropᵾn ku moni tᵾpᵾn, wamp kurpa mbᵾ ngoⱡum, muna ant ko!” nᵾtᵾng. 10 Jisas ndi, wu kᵾⱡ nᵾtᵾng ik ni pilpa, int ndupa nimba mel, “Nambuⱡ emel, amp ei, ik ngonmin? Amp ei ndi, na kᵾn uⱡ kai ti enim. 11 Ei nambuⱡ emel, wamp kurpa mbᵾ, pila kana ui mbila, enim kᵾn rᵾk rᵾk muⱡing. Wote, na enim kᵾn rᵾk rᵾk muⱡi nᵾmbᵾⱡimp. 12 Amp ei ndi, enim uⱡ ni, na nga kᵾng kᵾⱡ tᵾk mek puk on iting ei nga, tᵾpa kun endpa, kopung kandnim. 13 Enim ik kupa ei, kundᵾp nᵾnt. Kona nant mbila, Rᵾnang Ik Kai mbᵾ nᵾk ngᵾng ila, amp ei ya na kᵾn, uⱡ enim ei nga timan rok nguing ku,” nitim.

Juras Ndi, Jisas Rᵾk Murum

14 Ei kᵾn, kitip kᵾni wu 12 ni kᵾⱡ nga, Juras Iskariyot wu ni ndi, mba wu pris kᵾⱡ nga wu kuimbal ni, waldpa nimba mel, “Na ndi, Jisas ni wu ei, rᵾk moⱡᵾp mep omp enim ngᵾnt ndam, na namba mel ei nguing?” nitim. Wote, wu ni kᵾⱡ ndi, ku moni kum raldika, Juras ngorung. 16 Ku moni kᵾⱡ, tᵾpa pendpa kᵾn, Jisas ruk moⱡmba ei nga ui kai ti nokᵾndrᵾm.

Jisas Elim Nga Kitip Kᵾni Wu Kᵾⱡ Kᵾn, Moⱡpa Rᵾng Nurum

17 Bret yis mundi namᵾndᵾk normin ui ei nga ui, puⱡ mondpa ila, Jisas elim nga kitip kᵾni wu kᵾⱡ ndi ok, Jisas waldᵾk nᵾk mel, “Pasopa ui ei nga rᵾng mbᵾ, nant ila tᵾp kun etpᵾn muⱡamina, ok nuin?” nᵾtᵾng. 18 Wote Jisas ndi, punt ropa nimba mel, “Kona peng ila puk, wu ti ni nga manga ila puk, i nᵾi, ‘Ik mbo wu ei ndi, ei mel nᵾnᵾm. Na nga ui ei omba, nondpa enim, Pasopa ui ei nga rᵾng ei, nim nga manga ila, na nga kitip kᵾni wu mbᵾ kᵾn omp nuimᵾn,” nitim. 19 Ei kᵾn, kitip kᵾni wu ni kᵾⱡ ndi, Jisas nitim ni mel, puk manga ila, rᵾng mbᵾ kalk tᵾk kun etᵾk morung.

20 Kona rumbᵾⱡ puⱡnga, Jisas kᵾn elim nga kitip kᵾni wu nimbᵾ kᵾn molk, Pasopa rᵾng norung. 21 Rᵾng nok moⱡina, Jisas ndi, nimba mel, “Enim ik kupa ei kundᵾp nᵾnt. Enim mormin wu kᵾⱡ nga ti ndi, na ruk moⱡmba,” nitim. 22 Kitip kᵾni wu ni kᵾⱡ, ik ni pilik, munt mindil tᵾk, elpa elpa Jisas waldᵾk nᵾk mel, “Nuim ye! Ei nam nda?” nᵾtᵾng. 23 Jisas ndi, punt ropa nimba mel, “Na kᵾn tᵾngᵾnda nu ming ila, bret nu mondpᵾⱡ numbᵾⱡ wu ei ndi, na ruk moⱡmba. 24 Muⱡᵾl Wu Kupa ei, rᵾnang ik ila, koⱡmba nᵾk, mon rok pendᵾtᵾng ei mel ku koⱡmba. Wote, wu nam ti, Muⱡᵾl Wu Kupa ei, rᵾk moⱡmba ei nga, na kont mam ti enim! Wu ei mam ndi, mei nambil nga ndam, kapⱡa elinga!” nitim. 25 Juras ruk murum wu ni ndi kundpa nimba mel, “Ik mbo wu ye! Ei na nanim nᵾmp pᵾnt ei?” nitim. I nilinga, Jisas ndi, punt ropa nimba mel, “Int ninim nᵾn ei ka!” nitim.

Jisas Ndi, Kitip Kᵾni Wu Kᵾⱡ, Rᵾng Elim Ngurum

26 Rᵾng nok moⱡina, Jisas ndi, bret ti tᵾpa, Got kᵾn angge nimba kᵾn, pok ropa, kitip kᵾni wu ni kᵾⱡ ngumba nimba mel, “Tᵾk nᵾi! Ya ei, na nga kᵾng elim ei,” nitim. 27 Wote, nu wain ming ni, i ku etpa tᵾpa, Got kᵾn angge nimba, wu kᵾⱡ ngumba nimba mel, “Nu ei, kump kᵾm tᵾk nᵾi! Ya ei, na nga mema oi ndont ei ndi, wamp minal nga uⱡ kit mbᵾ pendpa kilmba. Wote, Got nga wamp tᵾpa, tenda iti uⱡ kont ei, etpa ronduⱡ mundᵾmba. 29 Enim ik ti kundᵾp namp, na ya nonmᵾn nu wain ei, wote aldpa nui nᵾnimp. Wote, ui tila, enim kᵾn pᵾkᵾ nuimᵾn ei, na nga Wuta nga muⱡ ila, tᵾpa mumuk rui kona ila, tᵾp tenda imᵾn ui ei kᵾn, wain kont paka nuimin,” nitim. 30 Wote, kinan kat nᵾk pendᵾk pena ok, Olip Komnga ila purung.

Jisas Elim Pita Ndi, Tᵾpa Mbuⱡ Ngumba Nitim

31 Wote Jisas ndi, wu kᵾⱡ kundpa nimba mel, “Akup rumbuldi, enim pᵾkᵾ, na wak rok mondᵾk, kelik nung nᵾk ping. Ei, Got nga ik ti petᵾm ei ndi, nimba mel,

‘Na ndi, sipsip rᵾp wu ei, rop kundamba, kng sipsip mbᵾ, mbuⱡ mbaⱡ ning,’ nᵾtᵾm

32 Wote, na ropa rut ndangga, kont munt ei kᵾn, enim Galili pi nᵾpi, na unt mbo muⱡimp,” nitim. 33 Ni kᵾn, Pita ndi, Jisas kundpa nimba mel, “Wu wei mbᵾ ndi, nim wak rok kelik pung ndam, na nim wak rui nᵾrimp!” nitim. 34 Jisas ndi, Pita kundpa nimba mel, “Nim ik kupa ei, kundᵾp nᵾnt. Akup rumbuldi mendpᵾⱡ, kᵾi kulda rui nᵾri, na pili napᵾt nᵾkᵾn, raldika indin,” nitim. 35 Pita ndi, punt ropa nimba mel, “Na nim kᵾn pendᵾk, rok kondung ndam kep, nim pili napᵾt, ni nᵾnimp,” nitim. Wote, kitip kᵾni wu mat ndi, i ku etᵾk nᵾtᵾng.

Jisas Getsemani Pana Ila Atinga Rurum

36 Wote, Jisas kᵾn elim nga kitip kᵾni wu kᵾⱡ kᵾn, kona ti mbi tek Getsemani nᵾtmin kona ila purung. Jisas wu kᵾⱡ kundpa nimba mel, “Enim ila muⱡᵾi! Na merᵾng ila mbo atinga ramp,” nitim. 37 Elim mba etpa, wu Pita kᵾn, anda Sepeti kangᵾm Jeims, Jon raⱡ tᵾpa mepa purum. Ni kᵾn, elim ni, munt mindil tᵾpa mbun ndi kurᵾm. 38 Wote, wu ni kᵾⱡ, kundpa nimba mel, “Na nga mundmong ei, ama mbun ndi konum. Ei kᵾn, enim ur pi napᵾk, nokundᵾk muⱡᵾi!” nitim. 39 I nimba pendpa, onunga kot wuldᵾng mba, mura ropa, mᵾi ila rumaⱡi pepa, atinga ropa nimba mel, “Na nga Wuta ye! Nim ndi, kapⱡa nᵾkᵾn pin ndam, ya nu ming mel, mindil nuimp ming nu morum ei, tᵾkᵾn mundi! Ei na nga pint ei mel mon. Ninim pin ei mel itiyo!” nitim.

40 Wote, yant omba kᵾndrᵾm mel, kitip kᵾni wu raldika ni kᵾⱡ, ur pi napilik petᵾng. Wote Jisas ndi, Pita kundpa nimba mel, “Enim wu raldika kᵾⱡ ndi, ant mong na tenda kot kep, na nga nᵾndᵾk rut nᵾk muⱡi nambᵾⱡᵾng ei ka! Etpa em mel nant? 41 Enim oⱡa tᵾpa, kᵾni uⱡ mbila, ropa mana ndumba ei nga, tᵾk mendᵾk atinga rok muⱡᵾi! Muⱡnga ei ndi, numan ngonum. Ei wote, kᵾng kᵾⱡ ndi, enᵾmp monum,” nitim.

42 Nimba pendpa, aldpa mba atinga ropa nimba mel, “Na nga Wuta ye! Nu ming mel ya, mindil nuimp ming ei, tᵾk mundi nᵾmᵾndᵾn! Na nᵾnt ei kᵾn mint, nim nga numan pᵾtᵾn uⱡ ei, peng pemba,” nitim. 43 Wote, yant omba kundrum mel, kitip kᵾni wu ni kᵾⱡ, ur petᵾng. Ei nambuⱡ emel, wu kᵾⱡ nga mong mbᵾ, ur ndi titim.

44 Aldpa wu ni kᵾⱡ, mondpa kelpa int mba, unt nitim ik ni kᵾⱡ ku nimba, atinga roⱡnga raldika itim. 45 Wote yant omba, elim nga kitip kᵾni wu ni kᵾⱡ, kundpa nimba mel, “Enim muⱡ tᵾk, ur ku pek mormᵾn ei? Kᵾnᵾiya! Muⱡᵾl Muⱡᵾl Wu Kupa ei, tᵾk pok punt uⱡ kit etmin wu mbᵾ nga ki ila tᵾnding. Ei nga, ui ei nondpa enim. 46 Oⱡa muⱡangina, kelip pamin! Na ruk moⱡmba wu ei, unt ya onum ei kanmin mon!” nitim.

Jisas Ni, Tᵾk Imp Morung

47 Jisas ik nimba moⱡnga, kitip kᵾni wu kᵾⱡ nga Juras ni, wu ei urum. Wote urum ila, wamp minal wu peng mumuk na, manga wingti rᵾp wu na mbᵾ kᵾn, rᵾp rok, tᵾmbᵾⱡ na, koiya na mat, kapⱡa etᵾk ambulk mek orung. 48 Ruk murum wu ni ndi, wamp orung nimbᵾ nimba, ndoimp rondpa, “Na mbo keta nu rop nunt wu ei kandᵾk, wu aⱡᵾm ei, nᵾk puk imp muⱡᵾi!” nitim. 49 Nitim ni mel, Juras kun mba Jisas keta nu ropa nomba ei mel nitim, “Ik mbo wu ye! Nim ila morᵾn kant ei ka!” nitim. 50 Jisas ndi, punt ropa nimba mel, “Nim itᵾn pilkᵾn un uⱡ ei mel, tᵾkᵾrkᵾn eta!” nitim. Wote, wu nimbᵾ ok, Jisas ni tᵾk imp morung. 51 Ni kᵾn, Jisas kunda morung wu ni kᵾⱡ nga ti ndi, elim nga koiya ni, ekit tᵾpa, wu pris peng mumuk ei nga kindmant wu ti, urum ni nga kum ei, ropa puⱡa rᵾrᵾm. 52 Wote Jisas ndi, wu ni kundpa nimba mel, “Nim nga koiya ei, elim nga petᵾm kona ila, int nduk pindi! Wamp nam ti, koiya ambᵾⱡᵾm wamp ei, koiya ei ndi ku, elim nomba. 53 Na nga Wuta ei ndi, na tᵾpa rᵾpᵾndangga nᵾmp, mawa el mba ndam, tᵾngᵾnda mint anggelo wu ei, kum 12 mel tᵾpa munduⱡnga, ei pᵾn muna mon? 54 Wote Got ndi, na tᵾpa rᵾpᵾndangga nilmba ndam, Got nga ik mong ti ndi, uⱡ enim ei mel itangga, nᵾtᵾm ik ei omba, ik kupa tᵾmba mel nant?” nitim.

55 I nimba kᵾn, wote wamp morung nimbᵾ, kundpa nimba mel, “Enim wu kᵾⱡ ndi, na punt mong wu na ni mel, na imp muⱡmᵾn nᵾk, koiya na, tᵾmbᵾⱡ mel mbᵾ mek onmᵾn ei? Na manga wingti ila, Got nga ik ei, rᵾk rᵾk wamp mbᵾ mbo endᵾp mor ei kᵾn, tᵾk imp muⱡi nambᵾrmᵾn ni ka? 56 Wote, uⱡ pᵾnᵾm kᵾⱡ ndi, Got nga ik ti, painui wu kᵾⱡ ndi, unt mon rorung ik ei, etpa kupa pendᵾm,” nitim. Ni kᵾn, kitip kᵾni wu nimbᵾ, elim wak rok, mundmong etᵾk, nung nᵾk purung.

Jisas Ni, Manga Wingti Rᵾp Wu Mbᵾ Kᵾn Mek Purung

57 Jisas puk imp morung wu nimbᵾ ndi, Jisas mek puk, pris kuimbal murum wu Kaiyapas kᵾn, mi ik mbo wu na, manga wingti rᵾp wu na mbᵾ, tᵾk tenda etᵾk, morung manga ila mek purung. 58 Pita ni, wu kᵾⱡ purung ni mel, ruⱡ etpa pep ropa mba, wu pris kuimbal ei nga mang keta ila purum. Kona ila moⱡpa, Jisas ni etᵾk enmin mel nant nimba, el nde wu kat, kona rᵾp etmin ni kᵾⱡ kᵾn, mba murum. 59 Ni kᵾn, wu pris kuimbal na, wote manga wingti rᵾp wu na nimbᵾ ndi pᵾkᵾ, uⱡ ⱡawa nant ila, nᵾmp oⱡa ndupᵾn, Jisas ruimin nda nᵾk, ol tek nᵾtᵾng. 60 Wote, ⱡawa ti kandᵾk ti natᵾtᵾng. Wote, wamp minal ok, ik kep nok nᵾtᵾng ik nimbᵾ, kupa iti nᵾtᵾtᵾm. Ei kᵾn, wu ralt okᵾⱡ, ei mel nᵾtᵾnggil, “Ya wu ei ndi, nimba mel, ‘Got nga manga wingti ou ei, rok tᵾp mana tᵾp, wote rumbᵾⱡ raldika ila, rᵾkimp nᵾm,’” nᵾtᵾnggil.

62 Wu pris kuimbal ni anggilpa, Jisas kundpa nimba mel, “Nim kᵾn ik ninmin ei nga ik na ti kep, punt ruin muna mon ei?” nitim. 63 Wote, Jisas ni, ik ti ni nandpa, pilpa kui itim. Aldpa, wu pris kuimbal ni ndi, ronduⱡ mundpa, Jisas waldpa nimba mel, “Got kont morum ei nga mbi ila, mi ambᵾⱡᵾp nᵾnt. Ei kᵾn, nim wu Kraist, Got nga kangᵾm ei kupa muna mon?” nitim. 64 Wote, Jisas ndi, punt ropa nimba mel, “Ik ei int nim nᵾn ei ka! Wote, ik ti enim wamp pora kundᵾp namp. Akup mormᵾn ui ei nga mba, wote ui tila, na Muⱡᵾl Wu Kupa ei, Got wu ronduⱡ pi ei nga, ki mbo orunga moⱡᵾp, muⱡ kona kopa pol ila wamba, kᵾning!” nitim. 65 Ei mel nilinga, wu pris kuimbal ni ndi, elim nga wal pᵾki ni kᵾⱡ ambuⱡpa, rung ndupa, nimba mel, “Got kᵾn ik nimba kit mondnᵾm! Aldpa ik mat, kombᵾⱡᵾp ni nᵾnamin! Got kᵾn ik nimba, kit mondnᵾm ik ei, enim pora pᵾnmin ni ka! 66 Ei kᵾn, akup enim namba nᵾk pᵾnmin?” nitim. Wote, wu kat ndi, ik punt rok nᵾk mel, “Elim nga ⱡawa ila, elim kuⱡangga!” nᵾtᵾng.

67 I nᵾk kᵾn, Jisas nga kuimp keta ila ol rok, wote ki kum ndi rorung ku. Wu mat ndi, ki ⱡurwa ndi rok, kundᵾk nᵾk mel, “Kraist ni, nim painui wu ti ndam, wamp nam ndi, nim ronum ei mbi tekᵾn ni,” nᵾtᵾng.

Pita Etpa Kambᵾtᵾpa Rurum

69 Pita ni, wu pris kuimbal ei nga mang keta ila murum. Ei kᵾn, wu pris kuimbal ei nga kongun amp ti ndi omba, Pita kundpa nimba mel, “Nim Galili wu, Jisas ei kᵾn kunda andᵾrmᵾn, kandᵾr ni ka!” nitim. 70 Wote Pita ndi, wamp kona ila morung nimbᵾ mondpa, kulkᵾⱡ ropa nimba mel, “Nim nᵾn ik ei, na pili napᵾnt,” nitim. 71 Wote, i nimba pendpa, mang keta nila omba ekit purum. Wote ila, kongun amp ti ndi, kandpa mbi ndupa nimba mel, “Wu ei, Nasaret wu Jisas kᵾn, kunda andrᵾnggil ndi ka!” nitim. 72 Wote, aldpa Pita ndi, kulkᵾⱡ ropa nimba mel, “Wu ninmin ei, na pili napᵾnt ei ka,” nitim. 73 Ei kᵾn, nondpa mel ku, wu kat ila morung kᵾⱡ ndi ok, Pita kandᵾk nᵾk mel, “Nim wu kᵾⱡ nga ti ku kanmin ei, nim nga ik nᵾn, nuim kan ei, pilip ninmin ei ka!” nᵾtᵾng. 74 Wote Pita ndi, nimba mel, “Na mi tep, ik kupa ei nᵾnt! Na wu ei, pi napᵾnt nᵾnt. Muna na wu ei, etᵾp pᵾt ndam, Got ndi, na mbun ti ngangga!” nitim. Ei kᵾn mint, kᵾi kulda ti, wi roⱡnga, Jisas ndi, unt Pita kundpa nitim ik ni kᵾⱡ, omba rundrum, “Kᵾi kulda wi ropa, raldika indi nᵾndi kᵾn, nim ndi, na pili napᵾt nᵾkᵾn kulkᵾⱡ rokᵾn, raldika indin,” nitim. Ni kᵾn, manga keta ni, wak ropa ekit mba, ka rom kᵾk kᵾk nimba rurum.

Copyright information for `MED