Matthew 27

Jisas Ni, Wu Pailot Murum Ila Mek Purung

Ipri unt, wu pris kuimbal na, manga wingti rᵾp wu na mbᵾ ndi, Jisas rok kunding ei mel kanggᵾp ambrung. Wote, ki raⱡ tᵾk, kan ngᵾk mek puk, Rom Gapman ei nga wu kuimbal murum Pailot wu ei, nguing pilik, mek purung.

Wu Juras Ni, Nuim Nga Nurum

Jisas ruk murum wu Juras ndi, moⱡpa kᵾndrᵾm mel, Jisas ni, tᵾk mong ngurung. Uⱡ ni kandpa, elim numan ropᵾl ropa, ku moni silpa K30 ni kᵾⱡ mepa mba, wu pris kuimbal kᵾⱡ kᵾn, manga wingti rᵾp etmin wu mbᵾ kᵾn, int ndupa ngurum. Ngumba nimba mel, “Na ndi, etᵾp ⱡawa mundᵾp, mong ti natᵾm wu ti nga, ruk moⱡmba, akup rok kunding pilik nᵾnmᵾn kant ei ka!” nitim. Wote, wu ni kᵾⱡ ndi, punt rok nᵾk mel, “Uⱡ ei nga puⱡ ti, tᵾn kᵾn pi napᵾtᵾm ei, nim nga uⱡ ei ka!” nᵾtᵾng. Wote Juras ni, ku moni ni kᵾⱡ tᵾpa, manga wingti ila ropa murᵾk ndupa, elim ni mba, nuim nga nurum.

Wu pris kuimbal ni kᵾⱡ ndi, ku moni ni kᵾⱡ, aprᵾk oⱡa tᵾk, nᵾk mel, “Wamp mema oi nim ku moni kᵾⱡ tᵾpᵾn, manga wingti ei nga, moni tetmin kona ila, timin mel kapⱡa mon. Moses nga mi ik ei ndi, mon nᵾtᵾm uⱡ ei mel pep ruimin,” nᵾtᵾng. Wote ol tek, ik nᵾk tenda mundᵾk, ku moni kᵾⱡ ndi, mek puk, mᵾi ming mim etᵾm wu ti nga kona kuta ti, ei rarᵾp rorung. Kona ila wamp tᵾma mat ok, Jura kona ila koⱡung mbᵾ, ᵾngᵾndmin nᵾk etᵾng. Ui ila, yant ndupa omba, akup ui ei kᵾn, kona ei akup mbi tek, “Wamp mema kona,” nᵾtmᵾn.

Ei kᵾn, painui wu Jerimaiya nga ik ei mel nitim ei, omba kupa itim,

“Ku moni K30 silpa kᵾⱡ, Isrel wamp mbᵾ ndi, wu ei rarᵾp rᵾmin nᵾtᵾng ei mel, ku moni kᵾⱡ ndi, mek puk mᵾi ming mim etᵾm wu ei nga, kona keta ei, rarᵾp rorung. Ei na, Oⱡa Nuim ei ndi, na kundpa nitim ei mel nᵾnt,” nitim.

Rom Gapman Nga Wu Pailot Ei Ndi, Jisas Wuldᵾtᵾm

11 Jisas ni mek puk, wu nuim Pailot nga kuimp keta ila monduⱡnga, wu ei ndi waldpa nimba mel, “Nim Jura wamp mbᵾ nga Wu Nuim Mumuk ei?” nitim. Wote Jisas ndi, punt ropa nimba mel, “Int nim nun ei ka!” nitim. 12 Wote, wu pris kᵾⱡ nga wu kuimbal na, manga wingti rup wu na mbᵾ ndi, kai kandᵾk, elim kᵾn ik nᵾtᵾng mbila ik na ti kep, punt ropa ni nᵾndᵾtᵾm. 13 Ei kᵾn, wu Pailot ei ndi, elim kundpa nimba mel, “Nim kᵾn kai kandᵾk, ik nᵾnmᵾn mbᵾ, pᵾn muna mon?” nitim. 14 Wote Jisas ndi, ik na ti, punt ropa ni nᵾndᵾtᵾm ila, Rom Gapman nga wu nuim ni ndi, kandpa min ngᵾn mundrum.

Pailot Ndi, “Jisas Rok Kundᵾi!” Nitim

15 Jura kangambuⱡa kumna mbᵾ, Got ndi, poⱡ titim ui ekit orum ei kᵾn, Rom gapman nga wu nuim ei ndi, wu mat kan manga ila petᵾng mbᵾ nga ti, ku nimba, wamp mbᵾ numan ngurung ei mel, wak ropa mundrum. 16 Ui ei kᵾn, punt mong wu ti, mbi tek Barapas ni, ei kan manga ila pitim. 17 Wamp minal ok, tᵾk tenda etᵾng ni kᵾn, Pailot ndi, waldpa nimba mel, “Enim ndi, wu nant ei, wak ramp nᵾk pᵾnmin? Barapas muna, Jisas ni, wu mbi tek, Kraist nᵾtmin ei?” nitim. 18 Ik ei mel nitim ei, nambuⱡ emel, Jura wamp kᵾⱡ en enmin ndi, wu ei nga nitim uⱡ mbila, wᵾlᵾk rok kᵾn, Jisas mek ok, elim ngurung ei, pilpa kelpa wuldᵾtᵾm.

19 Pailot ni, elim nga nde pol kot pᵾtᵾm kona nila, moⱡnga mel, ambᵾm ndi, rung mundpa, “Wu nit mul nᵾmbil ei kᵾn, uⱡ ti itimp nᵾkᵾn, iti nᵾti! Ei nambuⱡ emel, na wu ei nga ur kump kat etᵾp, kunt ila mindil mam ti, nunt ndi ka!” nitim.

20 Ni kᵾn, wu pris mbᵾ nga wu kuimbal mbᵾ kᵾn, manga wingti rᵾp wu na mbᵾ ndi, wamp mbᵾ kunt rok, Pailot wuldangina, “Barapas wak ropa mundpa, Jisas ropa kundangga, nᵾi!” nᵾtᵾng. 21 Wote Pailot ndi, wamp mbᵾ waldpa nimba mel, “Ya wu raⱡ nga wu nant ei, wak rop mundamp, nᵾk pᵾnmin?” nitim. Ni kᵾn, wamp mbᵾ ndi, waldᵾk nᵾk mel, “Barapas,” nᵾtᵾng. 22 Wote Pailot ndi, wamp mbᵾ, waldpa nimba mel, “Wote Jisas ni, wu Mesaiya nᵾtmin ei, nambuⱡ ti etamp nᵾk pᵾnmin?” nitim. Ni kᵾn, wamp mbᵾ ndi, wi rok nᵾk mel, “Nde peta ila pendkᵾn rui!” nᵾtᵾng.

23 Wote Pailot ndi, wamp mbᵾ, waldpa nimba mel, “Wu ei, namba ⱡawa ti em?” nitim. Ni kᵾn, wamp mbᵾ ndi, kei nᵾk, “Nde peta ila rui!” nᵾtᵾng. 24 Wote Pailot ndi, ik merᵾng ti, nᵾmp mep punt ndam, kona mong pemba kant ei ka nimba. Wamp mbᵾ morung kuimp keta ila, elim nga ki ni raⱡ, nu ila ⱡumᵾiya ropa, nimba mel, “Wu ruing ei nga nit ei, na kᵾn pi napᵾmba mon. Ei enim nga uⱡ ei ka!” nitim. 25 Wamp nimbᵾ ndi, ik punt rok nᵾk mel, “Wu ei nga mema ei ndi, tᵾn kᵾn, tᵾn nga kangambuⱡa mep timin mbᵾ kᵾn, ⱡang etpa tangga,” nᵾtᵾng. 26 Ei kᵾn, Pailot ndi, Barapas ni, wak ropa mundpa, wote Jisas ni, kan puⱡa ndi rok, mek puk, nde peta ila rᵾi nimba, wamp nimbᵾ ngurum.

Rom El Nde Wu Mbᵾ Ndi, Jisas Tᵾk Ik Kuldᵾtᵾng

27 Wote, wu Pailot nga el nde wu nimbᵾ ndi, Jisas ni mek puk, Pailot elim moⱡpa, kongun etᵾm manga mam ila murᵾk puⱡnga, el nde wu mbᵾ ndi, Jisas ni tᵾk paⱡa etᵾng. 28 Kona ila moⱡnga, Jisas nga rᵾrᵾm mel nimbᵾ, ambulk rung nduk mundᵾk, el nde wu kᵾⱡ nga wal pᵾki kunt, roⱡ kat pakᵾrmin kᵾⱡ nga pakᵾndrᵾng. 29 Wote, kan goimbun rong kat mᵾkᵾp rok, Jisas nga peng ila mondᵾk, tᵾmbᵾⱡ ti tᵾk, ki ila amᵾndrᵾng. I etᵾk mondᵾk, Jisas tᵾk ik kuldᵾk, kuimp keta ila, mura koptᵾm rok, rumaⱡi pek nᵾk mel, “Jura wamp nga wu king ei moⱡpa, ruⱡ pangga!” nᵾtᵾng. 30 Wote, kuimp keta na mbila, ol rok kandᵾk, tᵾmbᵾⱡ mbᵾ ndi, oⱡa tᵾk, Jisas nga peng ila rorung. 31 Wote, Jisas ni tᵾk, ik kuldᵾk uⱡ mbᵾ mel etᵾk pendᵾk kᵾn, wal pᵾki kunt, ruⱡ kat pakᵾndrᵾng ni kᵾⱡ, potᵾk mundᵾk, el elim nga rᵾrᵾm mel nimbᵾ, randᵾk pendᵾk mek puk, nde peta ila ruing pilik mek purung.

Jisas Ni, Nde Peta Ila Rorung

32 Kona peng ni, wak rok, ekit ping pilik purung ila, Sairin kona peng ila wu ti, mbi tek, Saimon nᵾtmᵾn ni urum. Ei kᵾn, el nde wu kᵾⱡ ndi, Jisas nga nde peta ei, tᵾk mindi nilingina, mindᵾtᵾm. 33 Wote ok, kona ti mbi tek, Golgata nᵾtmin nila orung. Kona mbi ei nga puⱡ ei, “Wamp peng ombil kona.” 34 Kona ila, el nde wu mbᵾ ndi, nu wain kᵾn, nu kombila iti mat, nu wain ila mundᵾk, Jisas nangga nᵾk, ngurung ni nomba pitim ei, kombila elinga, nui nᵾndrᵾm.

35 Wote, Jisas ni tᵾk, nde peta ila rok pendᵾk, rᵾrᵾm mel nimbᵾ, ambulk rung nduk, nam tᵾmba nda, nᵾk kat rorung. 36 Wote, i etᵾk molk kᵾn, Jisas nde peta ila pitim ei, rᵾp etᵾk morung. 37 Nde peta ei nga peng ila, Jisas tᵾk, ik kuldᵾk nᵾtᵾng ik ni kᵾⱡ, mbi rok pendᵾtᵾng. Ik ei mel nimba murum, “YA WU EI JISAS, JURA WAMP MBɄ NGA WU NUIM MUMUK EI.” 38 Wote ei kᵾn ku, kindᵾp wu ralt, Jisas nde peta ila rorung kona ila, i ku etᵾk, ki mbo orunga wu ti rok, ti ki rar orunga rok pendᵾtᵾng.

39 Wamp nombuⱡa mam ila ok, purung mbᵾ ndi, peng walinga rok Jisas ik mura nguk nᵾk mel, “Nim manga wingti ei rokᵾrkᵾn, wote rumbᵾⱡ raldika omba pangga, wote rᵾk imp nitin wu ni ka! Akup ninim etkᵾn, peng kont ta! Nim Got nga kangᵾm ndam, nde peta ei, wak rokᵾn, mana ui!” nᵾtᵾng. 41 I nᵾtᵾng ei mel ku, wu pris kuimbal na, mi ik mbo wu na, manga wingti rᵾp wu na mbᵾ ndi, i ku etᵾk tᵾk, ik kuldᵾk nᵾk mel, “Wu ei, wamp wei mbᵾ etpa, peng kont tᵾm ni! Wote, el elim etpa, peng kont ti natᵾnᵾm ei, kanmin mon! Elim Isrel wamp mbᵾ nga wu nuim mumuk ni muna? Elim akup nde peta ei, wak ropa mana om ndam, elim mondᵾp pilimin!” nᵾtᵾng. 43 Elim Got nga kangᵾm mor. Wote elim Got mondᵾp pilip mor nitim ndi, akup Got ndi, elim etpa, peng kont tᵾmba ei nga kinamin!” nᵾtᵾng. 44 Wote, kindᵾp wu ralt pendᵾk rorung ni raⱡ ndi, wamp nᵾtᵾng ik tenda ni mel ku nᵾtᵾnggil.

Jisas Ni Kurum

45 Kona ou rᵾnggilmᵾ ni kᵾn, kona ni rumbᵾⱡ moⱡpa pelinga, ant mong raldika omba purum. 46 Wote, ant ni mba, keng orunga mba, ant mong raldika elinga, Jisas ndi, ama oⱡa ndupa, ronduⱡ kei nimba, “Eli, Eli Lama Sabaktani,” nitim. Ik ei nga puⱡ ei, “Na nga Got, na nga Got, nambuⱡ emel na wak ron?” nitim. 47 Wamp mat ila nondpa anggilik morung nimbᵾ ndi nᵾk mel, “Wu ei ndi, Ilaija ni wi ronum,” nᵾtᵾng. 48 Wamp morung nimbᵾ nga ti ndi, tᵾkrᵾpa mba, muⱡ ti tᵾpa, nu kombila iti tila mana ndupa, ekit tᵾpa, ndila ropa, Jisas ni nangga nimba, oⱡa ndupa ngurum. 49 Wote, wamp mat ndi, nᵾk mel, “Unt raka nimbun moⱡamin, Ilaija ndi, elim omba, peng kont tᵾmba, muna mon nda, moⱡpᵾn kᵾnᵾmin!” nᵾtᵾng. 50 Jisas ndi, aldpa ke ronduⱡ nimba kᵾn, elim nga muⱡnga ei wak ropa, nuim kan ᵾkrᵾm.

51 Ei kᵾn mint, wi Jerusa-lem manga wingti ou ila, muⱡ mbal ruⱡ ti, manga kᵾkaⱡ wingti raⱡ oi ndupa morum ni, rᵾk ting ila paⱡpa mba met ekit purum. Wote kona kilimbᵾmp mam ti elinga, ku mam mbᵾ puk rurum 52 Wamp on kona mbila mᵾi rok rak nilinga, Got kᵾn mondᵾk pᵾtᵾng wamp mat korung nimbᵾ, tᵾpa oⱡa monduⱡnga kont morung. 53 Wote, Jisas koⱡpa ⱡoporpa oⱡa murum ni kᵾn, wamp mbᵾ, en enim nga petᵾng on kona mbᵾ wak rok, wi Jerusa-lem kona peng wingti ila puⱡᵾngina, wamp minal ndi kandrung.

54 Wote, el nde wu mbᵾ nga wu kuimbal ei kᵾn, el nde wu mat kᵾn, Jisas rᵾp etᵾk morung nimbᵾ ndi, kona kilimbᵾmp elinga, uⱡ itim nimbᵾ kandᵾk, ama mundmong etᵾk nᵾk mel, “Wu ni, kupa Got nga kangᵾm,” nᵾtᵾng. 55 Ni kᵾn ku, amp mat ruⱡ etᵾk kandᵾk morung ei, met Galili kona ila, Jisas tᵾk rapᵾndᵾk etᵾng amp kᵾⱡ, Jisas pep rok orung. 56 Amp kᵾⱡ morung rᵾk ting ila amp Mariya Makndelin kᵾn, wu Jeims kᵾn, Josep raⱡ nga mam amp Mariya kᵾn, wu Sepeti ambᵾm kᵾn kunda morung.

Jisas Ni Angᵾndᵾtᵾng

57 Kona ni rumbᵾⱡ roⱡnga, Arametiya kona ila wu nuim ti urum. Wu ei, Jisas nga kitip kᵾni wu ti ku, wote wu ei nga mbi ei Josep. 58 Wu ni ndi, wu Pailot ei, murum kona nila mba, Jisas nga on ei, timp nimba wuldᵾtᵾm. Ni kᵾn, Pailot ei ndi, elim nga el nde wu kuimbal ei kundpa, wu on ninim ei, tᵾkᵾn ngui nitim. 59 Wote Josep ndi, wu on ni tᵾpa, muⱡ mbal kurᵾmᵾⱡa kai tila kum ropa, mepa mba, el elim nga on kona ti, ku mam tila rorpa titim nila titim. Wote, ku mam ti ndi, mberᵾk ndupa, on kona ku manga keta puⱡ puⱡ ni, aka ngumba pendpa purum. 61 Amp Mariya Makndelin kᵾn, amp Mariya ti ni kᵾn, ila nondpa, Jisas nga on ei, tetᵾng kona ni, tᵾk nont nduk kandᵾk morunggil.

El Nde Wu Kat Jisas Nga On Kona Ei Rᵾp Etᵾng

62 Jisas rorung ui ei nga utᵾma orunga ei, Jura wamp nga mowi kor muⱡing ei nga tᵾk kun etmin. Ui ei kᵾn, wu pris kuimbal mbᵾ kᵾn, wote Perisi wu na mbᵾ ndi ok, Pailot kᵾn mou rorung. Wote, wamp nimbᵾ ndi, nᵾk mel, “Nuim ye! Ik kol wu rok kondung ni, kont murum ei kᵾn, ik ei mel nitim ik tᵾn pilpᵾn mormin ei, ‘Rumbᵾⱡ raldika omba pangga, na ⱡoporpa oⱡa mondᵾmba,’ nitim. 64 Ei kᵾn, akup nim ndi, nim nga el nde wu mat tᵾk mundana puk, on kona ila rᵾp itangina, rumbᵾⱡ raldika omba pangga kᵾn, wak reing. I etᵾk itangina kᵾn, elim nga kitip kᵾni wu kᵾⱡ ndi ok, wu on ei kundᵾp nok tᵾk, wote wamp mbᵾ ik kol rok kundᵾk nᵾk mel, ‘Jisas ni ⱡoporpa omba pum,’ ning. Akil tepa ik kol rok eng uⱡ ei ndi, kuimp tepa ik kol rorung uⱡ ni, tᵾpa mana ndupa, ama kit moⱡmba,” nᵾtᵾng. 65 Pailot ni ndi, wu ni kᵾⱡ kundpa nimba mel, “El nde wu ti mek puk, on kona ei nga keta puⱡ puⱡ ei, ronduⱡ puk rup itᵾi!” nitim. 66 I nitim ni kᵾn, puk on kona keta puⱡ puⱡ ni, ku mam ti ndi, mberᵾk nduk, peta rok pendᵾtᵾng. Wote pena orunga, el nde wu mat ila, rᵾp iteing nᵾk, tᵾk mondrung.

Copyright information for `MED