Matthew 4

Jisas Seitan Ndi, Oⱡa Tᵾpa Kᵾndrᵾm

Seitan ndi, Jisas oⱡa tᵾpa kanᵾmba ei nga, Got nga muⱡnga ei ndi, Jisas mepa kona kui waka tila purum. Rumbᵾⱡ 40, wote ant 40 mel rᵾng ti nui nandpa pitim ei nga, Jisas ama kump kun ndi kurum. Ni kᵾn, Seitan Jisas murum nila omba kundpa nimba mel, “Nim Got nga kangᵾm ei ndam, ya ku kᵾⱡ nana omba oka rᵾⱡangga,” nitim.

Wote Jisas ndi, ik punt ropa nimba mel, “Got nga ik mong ti petᵾm ei ndi, nimba mel, ‘Oka ndi, mendpᵾⱡ wamp ti ombᵾl ᵾmbᵾⱡi nambrᵾm. Got nga keta ila ik mong ekit orum ei ndi, wamp ombᵾl ambrᵾm,’” nitim.

Nitim ni kᵾn, akil tepa Seitan ndi, Jisas tᵾpa mepa kona wingti Jerusalem nga manga wingti ou im ila mondpa, Jisas kundpa, “Nim Got nga kangᵾm ndam, pukᵾ rokᵾn mana pi, Got nga ik mong ti petᵾm ei ndi, nimba mel,

‘Elim nga anggelo mbᵾ, nim nga nᵾndpa tᵾpa mundangga, nim tᵾk ki kaimp pol ila ambulk, oⱡa nduk mek wangina, nim nga kᵾmp kot kep, ropa nit pindi napundᵾmba’” nitim.
Ni kᵾn, Jisas ndi, ik punt ropa nimba mel, “Got nga ik mong ila ku, ik ti petᵾm ei ndi nimba mel, ‘Nim nga Wu Nuim Got ei, oⱡa tᵾkᵾn, kᵾni nᵾkᵾni mon, nimba petᵾm!’” nitim.

Aldpa Seitan ndi, Jisas tᵾpa mepa komnga oⱡa tila mba, muⱡ uⱡ ila kng mel tetᵾm mbᵾ kᵾn, wamp rᵾⱡaip mormin mbᵾ kᵾn, tᵾpa ora ndupa, nimba mel, “Na kᵾn rumᵾⱡi pekᵾn na nga mbi paka rundᵾn ndam, ya kona na mel, na kan mbᵾ pᵾkᵾ nim nguimp,” nitim.

10 Ei kᵾn, Jisas ndi, nimba int ndupa, “Seitan nim kelkᵾn pi! Got nga kᵾndᵾk ik mong unt nga petᵾm ei ndi, nimba mel, ‘Nim nga Oⱡa Nuim Got ei mendpᵾⱡ, mbi paka rondkᵾn kongun indi!’” nᵾtᵾm.

11 Seitan ni, Jisas wak ropa kelpa puⱡnga, anggelo mbᵾ ndi ok, Jisas tᵾk rapᵾndrᵾng.

Jisas, Galili Kona Orunga Kongun Puⱡ Mondpa Itim

12 Jon tᵾk kan manga ila pendᵾtᵾng nᵾtᵾng ik ni Jisas pilpa, Juriya mᵾi kona ei wak ropa kelpa, Galili int purum. 13 Jisas mba Nasaret muⱡi nambᵾⱡpa, kelpa mba Kaperniyum kona peng ila pepa murum. Kona peng ei, num Galili ei nga ᵾldᵾ wote, Sepulun kᵾn, Neptali wu rᵾⱡaip raⱡ nga oi ila. 14 Uⱡ itim ei, Oⱡa Nuim Got ei nga keta tᵾpa ik pai nui wu Aisaiya ndi, nitim ik ei omba kupa itim.

15 “Sepulun kᵾn, Neptali wu rᵾⱡaip kᵾⱡ nga mᵾi kᵾmp, wote num kuta morum orunga ndi, Joran al orunga, Galili mbo wamp rᵾⱡaip elpa mbᵾ nga mᵾi ila, 16 enim rumbᵾⱡ ila morung wamp mbᵾ, akup rᵾⱡang ti kᵾning! Enim wamp kui nga mᵾi ila petᵾng wamp mbᵾ, akup rᵾⱡang ei ndi, rᵾⱡang ngumba,” nitim.
17 Ui ni kᵾn, Jisas nga nombuⱡa rung ik mbᵾ puⱡ mondpa wamp mbᵾ kᵾn nimba mel, “Muⱡ ila tᵾpa mumuk rui uⱡ ei enim kᵾn onum. En enim nga uⱡ kit mbᵾ wak rᵾiya!” nitim.

Jisas Ndi Oma Wal Mundi Wu Tᵾmbᵾkak Kat Wi Ropa Titim

18 Jisas, num Galili ei nga ᵾldᵾ orunga omba kᵾndrᵾm mel, oma wal mundi wu ᵾngᵾn ᵾngᵾn raⱡ Saimon wote, (mbi tek Pita) nᵾtmᵾn. Ni kᵾn, ᵾngᵾn akil Andru raⱡ oma ruimbil nᵾkᵾⱡ, oma wal nu ila mundkᵾⱡ morunggil. 19 Ni kᵾn, Jisas ndi nimba mel, “Enmbil na kᵾn wᵾl! Na ndi, enmbil wamp wal mondᵾk tinggil ei mel, mbo indimp,” nitim. 20 Nitim ni mel teng ndukᵾⱡ, oma wal nimbᵾ tᵾngᵾnda mint wak rokᵾⱡ, elim purum nila kunda purung.

21 Wote, num ni nga ᵾldᵾ orunga mba, ama merᵾng orunga nu mil ila, wu ᵾngᵾn ᵾngᵾn elpa ralt ku morunggil. Ni raⱡ, wu Sepeti kangᵾm Jeims kᵾn, Jon kᵾn, wu raⱡ nga tipam Sepeti kᵾn, nu kanu ila oma wal mundmin nᵾk, wal tek kun etᵾk moⱡina, Jisas ndi, omba wi rurum. 22 Ni kᵾn, tᵾngᵾnda rot nᵾk, oⱡa anggilikᵾⱡ, en enmbil nga tipam ni kep, nu kanu ni kep, mondᵾk kelkᵾⱡ wak rokᵾⱡ, Jisas purum nila kunda purung.

Jisas Ndi, Got Nga Ik Ei Nimba Ngumba. Ik Mbo Endpa, Kui Wamp Etpa Wei Mondpa Itim

23 Jisas mba Galili orunga andpa, kapⱡa endpa, atinga manga mbila, Got nga ik mbo endpa, tᵾpa mumuk rui kona kᵾndᵾk ik kai ei, nimba ngumba, kui mbo elpa elpa na, kᵾmp ki rambuⱡpa itim wamp mbᵾ etpa, we mondpa itim. 24 I itim uⱡ mbᵾ nga timan ei, Siriya kona orunga pora purum ila, kui elpa elpa roⱡnga, mindil norung wamp na, kur kit rurum wamp na, numan mbila ropa kupᵾr mundrum wamp na, on por murum wamp na mbᵾ mek oⱡina, Jisas ndi, wamp mbᵾ pora etpa titim. 25 I itim ila kandᵾk, Galili kona peng kᵾⱡ kᵾn, Jerusalem, Juriya nui orunga na, Joran noi orunga wamp nimbᵾ, kᵾmp kᵾn ok, elim purum mel, kandᵾk pep rok purung.

Copyright information for `MED