Matthew 6

Wamp Kurpa Mbᵾ Tᵾp Rᵾpᵾndᵾmᵾn

“Nim kandᵾk neing nᵾkᵾn, nim nga wamp minal moⱡung ila tᵾpa rᵾpndi uⱡ mbᵾ iti nᵾti! Uⱡ ei mel in ndam, nim nga Oⱡa Wu Tipanᵾm ei ndi, nim muⱡ kona ila mel ti ngui ngangᵾmba.

Ei nga nim ndi, wamp ki ngui uⱡ ila, wamp korpa num ti mel ti ngᵾn ndam, wamp ndi, kandᵾk neing nᵾkᵾn na uⱡ ti iti nᵾti! Wamp mat ndi, kun kai mul kump ralk manga wingti na, kona peng na mbila wamp ndi kandᵾk, en enim nga mbi ei, mek oⱡa piyeing nᵾk etmin. Enim ik kupa ei kundᵾp nᵾnt, wamp ndi kandᵾk, neing nᵾk elingina, kandᵾk nitmin uⱡ ni ndi, muⱡ kona ila ting mel ei, tᵾk pora ndurmᵾn. Wote Got ndi, mel ti ngui ngangᵾmba. Ei kᵾn, nim ndi, wamp ki ngui uⱡ ila wamp korpa nom ti tᵾk rᵾpᵾndᵾn ndam, nim nga wamp min ti, in uⱡ ei pili nᵾpᵾlangga. Wote, wamp roldᵾnga ei, pili nᵾpᵾlᵾng. Nim nga muⱡ kona Wu Tipanᵾm ei ndi, uⱡ mo ropa in mbᵾ kandpa kᵾn mel kai ti punt ropa ngumba.

Atinga Ruimin Ei Mel Mbo Inditim

“Nim atinga ruin ei kᵾn, kun kai mul kump rᵾl wamp mbᵾ, etmin ei mel iti nᵾti! Wamp mbᵾ ndi atinga manga na kona pena na mbila, numan mondᵾk, anggilik atinga rormᵾn. I etamin ei, wamp ndi, kandᵾk, enim nga mbi ei, mek oⱡa piyeing nᵾk etmin. Nim ik kupa ei kundᵾp nᵾnt, wamp kandᵾk niyeing nᵾk elingina, kandᵾk nitmin ni ndi, ting mel ei tᵾk pora ndurmᵾn. Nim atinga ruin pilkᵾn, manga ila murᵾk pukᵾn, manga kumba angᵾndkᵾn, nim nga muⱡ kona kᵾni nᵾkᵾni! Wu Tipanᵾm ei kᵾn, atinga rui! Nim nga muⱡ kona Wu Tipanᵾm, uⱡ mo ropa iti na, numan rukᵾr pili na mbᵾ, kandrum wu ei ndi, nim mel kai ti punt ropa ngumba. Nim atinga ruin ei, mbo wamp atinga ropa kᵾni nᵾkᵾni, wamp ralkᵾn, ik mong puⱡ pi nᵾpi mat, ou nduk ni nᵾni! I etpᵾn, atinga roⱡ mat ramina, Got ndi, pilmba ku nᵾk pᵾtmᵾn. Atinga rok roⱡ purmin ei mel, rui nᵾri! Nim nga Tipanᵾm Got ndi, nim pilik rondkᵾn, mawa in mel ei, mawa iti nᵾti, unt pilpa pora ndurum.

Atinga ya ei mel rᵾi!

‘Tᵾn nga muⱡ kona Wuta o! Nim nga mbi ei, tᵾp wingti rᵾndamin!
10 Nim nga wamp tᵾpa mumuk rui uⱡ ei wangga! Muⱡ kona ila nim nga man ik pᵾtmᵾn ei mel, ya mᵾi kona mbila i ku itamin!

11 Akup nga nuimin rᵾng mbᵾ nguiyo!

12 Tᵾn nga uⱡ kit imᵾn mbᵾ wak rundi! Tᵾn ndi, i ku etpᵾn, tᵾn kᵾn uⱡ kit eng wamp mbᵾ nga uⱡ kit mbᵾ wak rundmin.

13 Tᵾn uⱡ kit mbila oⱡa tᵾkᵾn kᵾni nᵾkᵾnᵾi! Wote tᵾn wu kit ei nga kan ila tinga ndukᵾn tiyo!’

14 Nim ndi, nim kᵾn uⱡ kit eng wamp mbᵾ nga nit mbᵾ, pendᵾk kin ndam, nim nga muⱡ kona Wu Tipanᵾm ei ndi, nim nga uⱡ kit mbᵾ pendpa kelmba ku. 15 Wote, nim kᵾn uⱡ kit eng wamp mbᵾ nga nit mbᵾ pendᵾk kili nᵾkᵾn ndam, nim nga muⱡ kona Wu Tipanᵾm ei ndi, nim nga uⱡ kit mbᵾ pendpa kili nakilmba ku.

Rᵾng Mi Rui Uⱡ Ei Nga Mbo Inditim

16 “Enim Got nga nᵾk rᵾng mi rok, mowi ping pilik, kun kai mul kump rᵾl wamp mbᵾ ndi, kuimp keta kit kit pilik, mowi petmin ei mel pi nᵾpᵾi! Wamp mbᵾ ndi, en enim nga kuimp keta kit kit petmin uⱡ ei, mot nga etangga, wamp ndi, rᵾng mowi peng nᵾk kandᵾk, neing nᵾk etmin. Nim ik kupa ei kundᵾp nᵾnt, wamp mbᵾ ndi, kandᵾk neing nᵾk elingina, kandᵾk nitmin uⱡ ni ndi, ting mel ei tᵾk pora ndurmin. 17 Nim rᵾng mowi pin ei kᵾn, kuimp keta el ⱡumᵾi rokᵾn peng ndi, kom etkᵾn, in uⱡ ndi, nim rᵾng mowi pin uⱡ ei mot nga iti natᵾmba. Nim nga muⱡ kona Wu Tipanᵾm, uⱡ mo ropa nimba iti na, numan rukᵾr pili na mbᵾ kandrum wu ei ndi, nim punt ropa mel kai ti ngumba.

Muⱡ Kona Mel Kai Mbᵾ Ting Ei Mel

19 “Ya mᵾi kona ila mel kai mat kui koka nomba, wu raⱡ ropa, wote kᵾndᵾp wu mbᵾ ndi, manga akᵾk, waning ting mel mbᵾ nga ou ndup, tᵾp mou rop timp nᵾkᵾn it nᵾti! 20 Ei mon, nim nga mel ou ndupa, muⱡ kona ila tᵾk mou rui, kona ila kui ndi nandᵾmba ku. Wote, wu raⱡ rui narᵾmba. Wote, kᵾndᵾp wu ndi kep, manga akᵾk wan-ing ti nᵾting ku. 21 Ei nambuⱡ emel, nim nga numan ei, rᵾk rᵾk nim nga mel kai mbᵾ, tem kona ila mba.

Kᵾng Ei Nga Rᵾⱡang Ei

22 “Nim nga mong raⱡ kᵾng ei nga lam kiya norum ei mel kapⱡa, nim nga mong raⱡ kai em ndam, ‘Nim nga kᵾng ei rᵾⱡang mba,’ wote ‘Nim nga mong raⱡ kit moⱡum ndam, kᵾng ei rumbᵾⱡ moⱡmba.’ Nim nga rᵾⱡang aⱡᵾm ei, rumbᵾⱡ moⱡum ndam, nim nga rukrᵾng orunga ama rumbᵾⱡ elpa ti mel moⱡmba!

Got Ei Kᵾn, Mel Ou Ndupa Ti Uⱡ Ei Kᵾn

24 “Wamp ti ndi, wu nuim raⱡ nga kongun kindmant endᵾmba mel kapⱡa mon. Ti numan ngui nganggᵾpa, ti numan ngumba. Ti kᵾn, rᵾmp ndupa, ti tᵾpa pei mondᵾmba. Enim ndi, Got nga kongun ei etᵾk kᵾn, ku moni kongun numan minal mondᵾk, raⱡ tᵾk rak nduk, kongun inding mel kapⱡa mon. 25 Na ndi, enim kundᵾp nᵾnt, enim kont molk, nu rᵾng mbᵾ kandᵾk tᵾk normin. Wote, enim nga kᵾng orunga, muⱡ mbal mbᵾ tᵾk ralk etmin. Wote enim ndi, mel mbᵾ nga numan ou ndupa pili nᵾpᵾlᵾi! Enim kont mba mul muⱡnga ei, tek mormin ei mel ingk ei, rᵾng mbᵾ kᵾn kapⱡa mon. Enim nga kᵾng kᵾⱡ muⱡ mbal ei mel mon, kᵾng kᵾⱡ mel ingk. 26 Kᵾi mbur nᵾk andinmin mbᵾ, kopᵾt kᵾnᵾiya! Pana etᵾk rᵾⱡi nakᵾrmin. Wote, rᵾng manga tila kep, kona ruⱡ tila kep, puk rᵾng nuing ei nga, ti natᵾtmᵾn ku. Ei nga, enim nga muⱡ kona Wu Tipanᵾm ndi, namba mel, kᵾi mbᵾ nuing ei tᵾpa ngorum! Ei nga, enim i ku, kᵾi mbᵾ mel mon. Enim wamp mbᵾ ama mel ingk kᵾⱡ. 27 Enim kont molk ping ei nga, kel rondum wamp ti, ya mᵾi kona ila moⱡpa, ruⱡ mba mel kapⱡa mon!

28 “Muⱡ mbal rᵾⱡing ei nga, nambuⱡ emel, keⱡ ou nduk rondunmᵾn? Plawa kuk na ndi, pana roldᵾnga ila pᵾnᵾm ei kᵾnᵾiya! Mel mbᵾ muⱡ mbal rᵾⱡing ei nga mim iti natᵾtmᵾn. Wote, rᵾng nuing ei nga pana ti etᵾk rᵾⱡi nakᵾrmin. 29 Ei nga, akup ila na ndi, enim i etpa kundᵾp nᵾnt, unt kor nga king Solomon ni wu ei, kng mel mbᵾ nga ou ndupa ropa titim. Ei nga wote, plawa kuk na mbᵾ eng norum ei mel, King Solomon nga wal pᵾki na mbᵾ, i etpa eng nui nᵾndrᵾm. 30 Wote, ema pana mel roldᵾnga mbᵾ, akup kuk ropa, utᵾma oⱡᵾl nᵾtᵾm mel mbᵾ, Got ndi, etpa muⱡ mbal mel eng nondrᵾm ndam, wote ema pana mel roldᵾnga mbᵾ runggulk, tᵾk ndip kalk etmin. Ei nga wote, nim wamp ei keⱡ mam ei, rondᵾmba nᵾmp pᵾnt ei? Nim Got kᵾn mondᵾk pᵾtᵾn uⱡ ei, ronduⱡ pi napᵾrᵾm ei ka! 31 Ei nga, na rᵾng nuimp ei nant tila, tᵾp nuimp muna, nu nuimp muna, muⱡ mbal mbᵾ, nant tila timp nda? Nᵾkᵾn kel rundi nᵾndi! 32 Mbo wamp mbᵾ ndi, rᵾk rᵾk mel mbᵾ nga kel rondᵾrmin. Wote, nim nga muⱡ kona Wu Tipanᵾm ei ndi, nim mel ti nga mon ndurum ei pilpa morum. 33 Ei kᵾn, Got nga wamp tᵾpa mumuk rui uⱡ ei nga kel rangga molkᵾn, wote Got elim nga namba uⱡ mat indᵾn nimba pᵾtᵾm ei mel in ndam, nim namba mel numan ngun mbᵾ, ngangga kapⱡa etmba. 34 Ei kᵾn, utᵾma nga mel mbᵾ tᵾkᵾn, akup ila kel rundi nᵾndi. Utᵾma nga kel rundᵾn uⱡ ei, elpa tetᵾm. Ant tenda ti nga mindil nuimin uⱡ mbᵾ, elim elpa tetᵾm.

Copyright information for `MED