Matthew 8

Kint Pombuⱡma Rurum Wu Ti Etpa Titim

Jisas komnga ila, mana urum ni kᵾn, wamp minal purum ni mel pep rok akil tetᵾng. Orung ila kint pombuⱡma rurum wu ti omba, Jisas nga kuimp keta ila rumaⱡi pepa, nimba mel, “Nuim ei! Nim ndi pilana, kapⱡa em ndam, na etkᵾn mbo kᵾng tindin ka!” nitim.

Jisas ndi, ki ni rundpa wu ni, mindi ndupa nimba mel, “Nin ei mel endamp, mbo kᵾng ta!” nitim ni kᵾn, mint mbo kᵾng titim. Wote, wu ni kundpa, “Kum tᵾiya! Uⱡ ei ndi, wamp ti kᵾn, timan rui nᵾri pukᵾn, Pris ei moⱡum ila, nim nga kᵾng kᵾⱡ tᵾkᵾn, ora ndana kᵾnangga! Wote, Moses nga mi ik ei ndi, nitim ei mel, ‘Got kᵾn angk ngui mel, ti mek ngana wamp ndi, nim kupa mbo kᵾng tin nᵾk, pilik ndeimp rondᵾk, nim akup kapⱡa morᵾn ming,’” nitim.

Kindmant Wu Ti Etpa Titim

Jisas omba Kaperniyum kona peng ila, ruk urum. Ni kᵾn, Roman el wu ei nga wu peng ti ndi omba. Jisas kᵾn kont iti ik ranggᵾpa waldpa, “Nuim ye! Na nga kindmant kang wu ei, kui mam ti ndi, tᵾl nga kᵾmp ki raⱡ kep, roka ndupa iti natᵾpa, ur mint pepa morum,” nitim.

Wote, Jisas nimba mel, “Na kunda mbuⱡ, wu ei itamba, wei muⱡangga,” nitim.

Ni kᵾn, el wamp nga wu peng ni ndi, punt ropa int ndupa nimba mel, “Mon, Nuim ei! Na wu kai nant ei nga mang kona ila uin? Ik mong ti ya morᵾn ila nin ndam, na nga kindmant kang wu ei, kui pora nangga, omba mba ei nga pilip nᵾnt. Na wu iti ti ku, wu nuim mat nga mana orunga moⱡᵾp, iti nᵾtmin uⱡ mbᵾ, teng ndup et. Wote na ndi, el wu rᵾⱡaip mat rᵾp et ku. Rᵾp et wu mbᵾ kundᵾp, ‘Pi!’ nᵾt ndam, purmᵾn. Omba ti kundᵾp, ‘Ui!’ nᵾt ndam, orum. Wote, na nga kongun kindmant wu ei kundᵾp, ‘Ya ei mel iti!’ nᵾt ndam, ei mel ku etᵾm,” nitim.

10 Ik i nitim ik ni kᵾⱡ, Jisas pilpa min ngᵾn mondpa, wamp elim pep rok orung nimbᵾ kundpa, “Ik kupa ei, enim kundᵾp nᵾnt. Ya Isrel kona ila wamp ti, ya wu ei, mondpa pᵾtᵾm uⱡ ei mel, wamp ti kᵾni nakᵾndᵾr. 11 Pᵾnmᵾn an! Wamp minal al ant oⱡa ui orunga kᵾn, wᵾl ant mana pi orunga kᵾn, tᵾk tenda etᵾk, mou rok ok, Aparam, Aisak kᵾn, Jekop kᵾn, tᵾpa mumuk rui kona ila tᵾk tenda etᵾk, rᵾng rat pol tenda ila molk nuing. 12 Wote, tᵾpa mumuk rui kona ei, puⱡ puⱡ ralk tilingina, wamp kᵾⱡ, ekit orunga kona rumbᵾⱡ mul ila rok ekit mundangina, gu konggilik gi nduk, ka rom rok etᵾk muⱡing,” nitim.

13 Jisas ndi, el wu kuimbal ni kundpa, “Kapⱡa mang kona pa! Nim nga mondᵾk pᵾn ei ndi, nim nga nᵾkᵾn un uⱡ ei endᵾmba,” nitim. Ni kᵾn mint, kindmant kang wu ni nga kui ni pora nitim.

Jisas Ndi, Kui Peng Itim Mat Etpa Titim

14 Jisas mba, Pita nga mang kona moⱡpa kᵾndrᵾm mel, Pita nga kulpam amp ni, kui emᵾngi roⱡnga pitim. 15 Ni kandpa, amp ni nga ki ni, ambuⱡa nga kui ni wang nilinga, oⱡa moⱡpa, Jisas rᵾng kaⱡpa ngumba itim.

16 Wote, epindama kur kit moⱡpa itim, wamp minal mek orung. Kur kit murum nimbᵾ, Jisas nga ik ila wamp mbᵾ, wak reing nimba makrᵾpa mondpa, kui rurum wamp nimbᵾ, etpa wang ndupa itim. 17 Uⱡ ei mel elinga, Painui wu Aisaiya nga ik pai nurum kᵾⱡ, omba kupa itim. I nimba kᵾn,

“Wu elim ndi, tᵾn nga kui elpa elpa mbᵾ nga mindil nuimin uⱡ mbun mbᵾ, tᵾpa mepa ruⱡ etpa purum,” nᵾtᵾm.

Jisas Nga Kitip Kᵾni Wu Ruⱡing

18 Wamp minal ndi, Jisas elim murum kona nila, tᵾk paⱡa elingina kandpa, elim nga kitip kᵾni wu ni kᵾⱡ kundpa nimba mel, “Num Galili noi ᵾldᵾ orunga pamin!” nitim. 19 Mi ik mbo wu ti ndi, omba Jisas kundpa, nimba mel, “Ik mbo wu ye! Nim nant tila pun ei mel, na kandᵾp pep rop uimp!” nitim.

20 Wote Jisas ndi, ik punt ropa nimba mel, “Owa rakra mbᵾ nga nde kuimp tetᵾm. Kᵾi mbᵾ nga mi manga ei anggᵾtᵾm. Na Muⱡᵾl Wu Kupa, mana ui ei nga peng kilanda ti mon!” nitim.

21 Kitip kᵾni wu ni kᵾⱡ nga ti ndi, nimba mel, “Nuim ei, na nim kᵾn uimp ei nga tᵾp kun etᵾp mor. Ei wote, unt yant mbo, wuta kuⱡangga kᵾn, tᵾp on etᵾp pendᵾp uimp,” nitim.

22 Wote Jisas ndi, ik punt ropa, “Akup na punt ei mel kandkᵾn nim pep rokᵾn ui! Wote, wamp on mbᵾ ndi, en enim nga on mbᵾ tᵾk ᵾngᵾndeing,” nitim.

Jisas Ndi, Kona Tᵾmᵾ Ti Nilinga, Kᵾr Nitim

23 Jisas omba nu kanu kat ila, rukᵾr purum ni mel, elim nga kitip kᵾni wu ni kᵾⱡ akil tetᵾng. 24 Ni kᵾn, tᵾngᵾnda mint kona tᵾmᵾ mam ti tᵾmᵾn tᵾpa oⱡnga, num ni pᵾnin nimba omba, nu kanu ni kᵾⱡ oi ndumba itim. Ni kᵾn, Jisas ur pitim. 25 Elim nga kitip kᵾni wu ni kᵾⱡ ndi ok, ronduⱡ rok rᵾt nduk, nᵾk mel, “Nuim ei, tᵾn nu ndi, tᵾpa wangᵾmba enim ei, pilkᵾn petᵾm ei?” nᵾtᵾng.

26 Wote Jisas ndi, punt ropa nimba mel, “Nambuⱡ emel, enim mundmong mam enmin! Enim nga mondpa pili ei ronduⱡ pi naprᵾm kant ei ka!” nitim. Nimba oⱡa moⱡpa kona kᵾpkᵾ kᵾn, nu pᵾnin nimba urum ni kᵾn, tiyu ni nilinga, tᵾngᵾnda mint kᵾr nitim.

27 Jisas elim nga kitip kᵾni wu nimbᵾ, min ngᵾn mundᵾk nᵾk mel, “Wu ei namba wu ti nda? Kona kᵾpkᵾ ei ndi kep, nu pᵾnin ei ndi kep, wu ei nga ik teng ndonmbil ei ka!” nᵾtᵾng.

Jisas Ndi, Kor Kit Murum Wu Ralt Etpa Titim

28 Jisas omba, Galili noi orunga, Gandera wamp nga kona orunga ekit urum ni kᵾn, wu ralt wamp on kona, ku manga ila molkᵾⱡ, ekit okᵾⱡ, Jisas kandᵾk tᵾtᵾnggil. Wu raⱡ kor mbo kit ei nga murum mbᵾ ndi, rok rakra mundᵾⱡina, kona ila wamp mbᵾ ruinggil elinggila, wamp mbᵾ mundmong etᵾk, nombuⱡa mam ila wamp andᵾk iti natᵾtᵾng. 29 Jisas urum ni, kandkᵾⱡ ke nᵾkᵾⱡ mel, “Nim Got nga kangᵾm ye! Tᵾn kᵾn nambuⱡ itimp nᵾkᵾn on? Muⱡ mᵾi raⱡ pora ni nᵾni. Tᵾn unt tᵾkᵾn mindil nguin on ei ka!” nᵾtᵾnggil.

30 Wote, morung kona ila, kng ama puⱡi ila, rᵾng nok morung. 31 Kur nimbᵾ ndi, kont iti ik ranggᵾk nᵾk mel, “Nim tᵾn mak rᵾkᵾn mundin ndam, mak rᵾkᵾn kng kᵾⱡ nga oⱡ ila mundana muⱡamin,” nᵾtᵾng.

32 Wote Jisas ndi, kur kit nimbᵾ kundpa nimba mel, “Wu raⱡ wak rok pᵾiya!” nitim. Nilinga, kongundᵾk ekit puk, kng mbᵾ nga oⱡ ila, rukᵾr puⱡina kng nimbᵾ, komnga ramba ila, pᵾkᵾ rok, puk num ila pek, nu wanggᵾk korung. 33 Kng rᵾp etᵾng wu nimbᵾ, pᵾn nᵾk, kona peng ila puk, Jisas ndi, uⱡ i etpa em mel ya, ya nᵾk, wu ni raⱡ kur kit etpa, titim ni mel timan rok etᵾng. 34 Ik ei pilik, kona peng ila wamp petᵾng nimbᵾ puk, Jisas kandᵾp timin nᵾk orung. Ok kandᵾk tᵾk, Jisas kont iti ik ranggᵾk, en enim nga kona ei wak ropa, mba kona elpa tila pangga nᵾtᵾng.

Copyright information for `MED