Matthew 9

Jisas Ndi, On Por Mul Wu Ti Etpa Titim

Jisas kelpa nu kanu urum ni kᵾⱡ ila ku, rukᵾr mba, num Galili puⱡa ropa, elim nga kona peng ila int purum. Kona peng ila wamp mat ndi, on por murum wu ti, rupⱡaima ila koma rok mek, elim urum nila orung. Jisas ndi, wamp mbᵾ nga mondpa pili ronduⱡ purum uⱡ ei kandpa, wu on por mul ni kundpa nimba mel, “Na nga wu kangᵾm ye! Numan wang ndui! Nim nga uⱡ kit mbᵾ pendᵾp kent,” nitim.

Jisas nᵾtᵾm ik ni pilik, Moses nga mi ik mbo wu kat, en enim nᵾk int yant etᵾk, “Wu ei ndi, Got nga ik mbuldung orunga nindinim ei ka!” nᵾtᵾng. Ik nᵾtᵾng ei, Jisas ndi, tᵾpa mendpa nimba mel, “Enim numan kit i etpa mbᵾ nambuⱡ emel pᵾnmᵾn? ‘Nim nga uⱡ kit mbᵾ pendᵾp, kent nimp ik ei kapⱡa,’ muna ‘Oⱡa molkᵾn nombuⱡa mam pi,’ nimp ik ei kapⱡa?” Ei mel, na Muⱡᵾl Wu Kupa, ya mᵾi kona ila ronduⱡ tep mor ei ndi, uⱡ it eng mbᵾ pendᵾp kilimp, nᵾnt ik ei mel, itamba kandᵾk poⱡ ndeing. Ei kᵾn, on por mul wu ni kundpa nimba mel, “Oⱡa molkᵾn, nim nga rupⱡaima kᵾⱡ, koma rokᵾn mekᵾn mang kona pi!” nitim. I pilinga, wu ni oⱡa moⱡpa, mang kona purum. Wamp ila morung nimba, uⱡ i itim ei nga kandᵾk, mundmong etᵾk, Got ndi, mᵾi kona wamp, ronduⱡ mam ti ngurum ei ka! Nᵾk kᵾn, Got nga mbi paka rondrᵾng.

Jisas Matyu Wi Ropa Titim

Jisas kona ni wak ropa, nombuⱡa mam ila mba kᵾndrᵾm mel, ku moni takis ti, wu Matyu ni, elim nga kongun manga ila murum ila kundpa nimba mel, “Na pep rokᵾn ui!” nitim. Matyu, Jisas nitim ik ni pilpa, pep ropa akil tepa purum.

10 Jisas kᵾn, elim nga kitip kᵾni wu kᵾⱡ kᵾn puk, Matyu mang kona ila puk rᵾng norung. Ku moni takis ti wu na, punt wu minal rᵾk ok, Jisas kᵾn elim nga kitip kᵾni wu kᵾⱡ kᵾn, morung ila molk, rᵾk ndurᵾng. 11 Perisi wu nimbᵾ ndi, Jisas i etpa, rᵾng numba murum uⱡ ni kandᵾk, elim nga kitip kᵾni wu nimbᵾ waldᵾk nᵾk mel, “Enim nga ik mbo wu ei, ⱡawa etpa, ku moni takis ti wu na, punt ti wu na mbᵾ kᵾn, rᵾng numba morum ei ka!” nᵾtᵾng.

12 Waldᵾtᵾng ik ni, Jisas pilpa nimba int ndupa nimba mel, “Kui rui narᵾrᵾm wamp ei, dokta morum ila pi napᵾrmᵾn. Kui rorum wamp ei mint purmin. 13 Painui wu Oseiya ndi, mon ti ropa i nimba mel,

‘Got ndi, nim wamp elpa mbᵾ kaimp kᵾⱡ nimba pᵾtᵾm. Kng rᵾng mel mbᵾ, kaⱡpa tindiⱡim mundi uⱡ ei mon. Na wamp kun kai mbᵾ kᵾn, Got nga uⱡ mbᵾ pep reing nᵾmp ui nᵾwᵾr mon!’ nᵾtᵾm.
Na uⱡ kit iti wamp na, wote punt ti wamp na mbᵾ, etᵾp timp nᵾmp ur,” nitim.

Jisas Ndi, Rᵾng Mowi Pei Uⱡ Ei Nga Mbo Inditim

14 Wamp nu tindi wu Jon nga kitip kᵾni wu kᵾⱡ ok, Jisas murum nila waldᵾk, “Tᵾn kᵾn Perisi wu kᵾⱡ kᵾn, rᵾng mowi rᵾk rᵾk petmin. Ei wote, nim nga kitip kᵾni wu kᵾⱡ, rᵾng mowi pi napᵾtmin, ei ka!” nᵾtᵾng.

15 Wote Jisas ndi, ik punt ropa nimba mel, “Wamp tᵾma ong mbᵾ, amp tᵾmba wu ei kont moⱡum ei kᵾn, wamp tᵾma ong mbᵾ, numan kai pendᵾk muⱡing. Wote, amp tᵾmba wu ei, imp molk mek pung ei kᵾn, wamp tᵾma mbᵾ, rᵾng nandᵾk kont kolk mowi ping.

16 Wamp ti ndi, muⱡ uni kont ti tᵾpa, wal pᵾki unt nga kat mbila, nᵾtᵾm ila pendpa, kapⱡa ropa rumbᵾⱡi nambrᵾm. Ei nambuⱡ emel, muⱡ uni kont pendpa rambᵾⱡᵾm ei, ronduⱡ mba wal pᵾki unt nga kᵾⱡ mepa, rᵾk omba ou ndupa ou ndurum. 17 Muna, wamp ti ndi, nu wain kont ei tᵾpa, kng meme kᵾng ming unt nga ila, oi ndupa mundi namᵾndrᵾm. I etᵾm ndam, meme kᵾng ming unt nga ei, wain kont ei ndi, pepa mbun itangga, meme ming ei rung nimba. Wote, wain kont ei etpa, kit ku moⱡmba. Mon, wain kont ei meme kᵾng ming kont tila ku, ming rumᵾn uⱡ ei ndi, nu kep, ming kep, pᵾkᵾ etpa kai moⱡmba,” nitim.

Atinga Manga Rᵾp Wu Ti Nga Mbuⱡam Kᵾn, Amp Ti Jisas Nga Wal Pᵾki Minda Ndurum Ei Kᵾn

18 Jisas ik nimba moⱡnga, Jura wamp atinga manga kel rᵾp wu ti, omba Jisas murum nila, mura ropa mondpa nimba mel, “Na nga mbuⱡam ambuⱡa ei, ᵾkpi mendpᵾⱡ koⱡmba enim. Wote nim okᵾn, nim nga ki ei ndi, minda ndun ndam, kont mba moⱡmba,” nitim. 19 Ni kᵾn, Jisas pilpa anggilpa wu ni purum mel akil tilinga, elim nga kitip kᵾni wu nimbᵾ, Jisas purum mel rᵾp rok purung.

20 Ni kᵾn, nombuⱡa mam paka ila amp ti ku, puk ropa, mema omba mba mint moⱡnga, pana 12 omba purum amp ni ndi, omba Jisas nga wal pᵾki roⱡ kᵾⱡ nga punt ila, minda ndurum. 21 Minda ndupa numan rukᵾr nimba mel, “Na elim nga wal pᵾki kᵾⱡ mint minda ndunt uⱡ ei ndi, na nga kui ei pora nimba,” ni pitim.

22 Jisas tᵾpa pelinga ndupa, amp ni kandpa nimba mel, “Na nga ambuⱡa ye! Nim numan wang nda! Nim nga mondpa pili ei ndi, ninim etpa wei mondnᵾm,” nitim. Tᵾngᵾnda mint, amp ei nga mema rurum uⱡ ni kᵾr nitim.

23 I etpa pendpa, wote Jisas ni, mba rᵾp wu ni nga manga ila, murᵾk purum. Mba kᵾndrᵾm mel, koⱡa manga kowa pela ik ndurmᵾn wu mbᵾ kᵾn, koⱡa manga morung, wamp nimbᵾ nga ka rom ik ei, ama oⱡa purum. 24 Jisas kandpa, omba nimba mel, “Enim wamp pᵾkᵾ, ok pena pᵾiya! Ambuⱡa kel ei kuⱡi naⱡᵾm. Ambuⱡa ei, ur mendpᵾⱡ petᵾm!” nitim. I nitim ik ni nga wamp ndi, ik nitim ni, tᵾk ik ong paka pendᵾk, oi endᵾk etᵾng. 25 Jisas ndi, wamp nimbᵾ pᵾkᵾ, makrᵾpa tᵾpa pena ndupa, pora ndupa, ambuⱡa on tetᵾng ruⱡmina nila murᵾk mba, ambuⱡa ni nga ki ni ambuⱡpa, oⱡa tilinga, ambuⱡa ni rᵾt nimba, oⱡa murum. 26 Uⱡ itim ei nga timan ik ei nᵾk, mek ekit puⱡmina, kona nondpa wamp mbᵾ ndi, pilik kapⱡa endᵾtᵾng.

Jisas Ndi, Mong Ti Wu Ralt Etpa Titim

27 Jisas kona ni wak ropa, nombuⱡa mam tila omba purum mel, mong titim wu ralt akil tekᵾⱡ, wi nop nᵾmp rokᵾⱡ nᵾkᵾⱡ mel, “Depit nga kangᵾm ye! Tᵾl kont kun ka!” nᵾtᵾnggil.

28 Wote, Jisas manga ila murᵾk purum ni kᵾn, mong ti wu ni raⱡ akil tekᵾⱡ, elim murum nila oⱡunggila, wu raⱡ kundpa nimba mel, “Na ndi, enmbil kapⱡa, etᵾp timp ni kᵾⱡ mondkᵾⱡ pᵾnmbil ye?” nimba wuldᵾtᵾm. Wote, ni wu ni raⱡ ndi, “Nuim ei! Nim ndi, kapⱡa tᵾl etkᵾn tin,” nᵾtᵾnggil.

29 Wote Jisas ndi, wu ni raⱡ nga mong ei, minda ndupa, “Enmbil nga mondpa pili ei ndi, enmbil etpa tᵾnᵾm,” nitim. 30 Nimba, mong ni raⱡ etpa piral ndurum. Wote Jisas ndi, wu ni raⱡ kᵾn, ronduⱡ mundpa man ngumba mel, “Ya ent uⱡ ei, wamp ti kundᵾk ni nᵾnᵾl mon!” nitim. 31 Wote, Jisas nitim ik ni, pilik kelkᵾⱡ, Jisas nga itim uⱡ ei, kona mbila timan roⱡᵾnggila. Wamp ndi, pilik kapⱡa endᵾtᵾng.

Jisas Ndi, Ik Nᵾni Wu Ti Etpa Titim

32 Wu ni raⱡ kelik poⱡunggila mel, wamp mat ndi, ik nᵾndᵾtᵾm wu ti kur kit moⱡpa itim wu ti, mek Jisas murum ila orung. 33 Wote Jisas ndi, kur kit ni makrᵾpa monduⱡnga, wu ni nga ik ei peⱡa nitim. Wamp morung nimbᵾ ndi, kandᵾk min ngᵾn mundᵾk ei mel nᵾtᵾng, “Tᵾn ya, Isrel kona ila uⱡ ei mel ti, kᵾni nakᵾndᵾrmᵾn,” nᵾtᵾng.

34 Wote, Perisi wu nimbᵾ ndi, nᵾk mel, “Kur kit tᵾpa ekit ndunᵾm ei, kur kit mbᵾ nga Nuim ei ndi, wu ei ronduⱡ ngurum ei nga enim,” nᵾtᵾng.

Jisas, Wamp Mbᵾ Nga Kont Kurum

35 Jisas kona ou kel titim nimbila, atinga manga murum nimbila, andᵾp Got nga kᵾndᵾk ik kai ei nimba ngumba. Omba elim ndi, Got nga tᵾpa mumuk rui kona ei nga nimba. Wote, kui namba kui mbᵾ nga pitim wamp mbᵾ, etpa wei mondpa itim. 36 Wote, Jisas wamp mam ti kᵾndrᵾm. Ni kᵾn, kont minal kurum. Ei nambuⱡ emel, kng sipsip na mat, rᵾp wu mon etᵾm ni mel, wamp mbᵾ, mindil nok pilik rondᵾk puk morung. 37 I itim ei nga kandpa, elim nga kitip kᵾni wu ni kᵾⱡ kundpa nimba mel, “Kongun rᵾng mbᵾ ou ndunᵾm. Ei wote, rᵾng tᵾk mou ruing ei nga kongun wamp onunga enim! 38 Ei nga, kongun rᵾng puⱡ wu ei kᵾn, atinga rangina, kongun wamp puⱡi tᵾpa mundangga, rᵾng mbᵾ tᵾk mou reing,” nitim.

Copyright information for `MED