Philippians 1

Pol kᵾn Timoti raⱡ, tᵾl Kraist Jisas nga kongun wu raⱡ ndi, mon ei ropᵾⱡ, enim Got nga wamp Pilipai kona ila Kraist Jisas nga mondpa pili wamp kᵾⱡ kᵾn, rᵾp wamp na, kongun wamp mbᵾ pora rop ngunmbᵾⱡ.

Tᵾn nga, Wuta Got kᵾn, Nuim Jisas Kraist raⱡ nga wamp poⱡ ti uⱡ ei kᵾn, numan wang ndui uⱡ raⱡ, enim kᵾn kan piyangga!

Pol Got Kᵾn Angge Nitim

Ui mbila rᵾk na enim nga nimp pilip, na nga Got kᵾn angge nimp, rᵾk rᵾk numan kai pilip, enim nga nimp atinga rop mint mor. Nambuⱡ emel, na Rᵾnang Ik Kai ei nga, unt kongun puⱡ mondᵾp it ei kᵾn, omba akup ui ila, na tᵾk rapᵾndᵾrmᵾn. Na kupa punt ei, Got ndi, kongun kai ei, enim kᵾn puⱡ mundrum ei, etpa mepa mba, Kraist Jisas nga ui ou ila, etpa pora ndumba.

Na nga numan ei, enim kᵾn tetᵾm ei nga, wote na enim nga nᵾmp pilip mor. Enim kep, na kep, Got nga poⱡ ti uⱡ ei tᵾtmᵾn. Ei nga, na kan manga ila pep, wote Rᵾnang Ik Kai ei nᵾmp kep, enim tᵾp, na nga numan ila ambᵾⱡᵾp gi ndup mor. Na Got nga kuimp keta ila ik kupa ei nᵾnt. Kraist Jisas nga kont kaimp kul uⱡ ei ndi, na nga numan orunga ropa rut nduⱡnga, wote na enim omp kᵾnimp ei nga kundᵾⱡnga mor. Na enim nga atinga rondᵾp kᵾn, enim nga wamp numan ngui uⱡ ei, tepa mba ou ndangga kᵾn, wote pilpa kungᵾndi tᵾk, numan ila kᵾmp tᵾk kandᵾk, uⱡ kun kai mbᵾ pilik mbi nduk, wote Kraist nga ui ei om ei kᵾn, enim wamp kun kai mbᵾ muⱡeing. 11 Enim nga numan ila, Jisas Kraist nga uⱡ kun kai mbᵾ, tepa peka rangga. Uⱡ ei ndi, Got mbi ou tangga kᵾn, wote tᵾn ndi, Got nga mbi ei, paka rundᵾmin.

Kont Mul Uⱡ Ei Kraist

12 Wote angmᵾn, enim pilᵾi! Uⱡ na kᵾn enim mbᵾ ndi, Rᵾnang Ik Kai ei, ropa mana ndui nandᵾrᵾm mon. Uⱡ ei ndi, Rᵾnang Ik Kai ei, etpa mepa int int purum. 13 Ei kᵾn, Rom gapman nga manga ila, el wu mbᵾ pora, wote wu mat kunda, na Kraist nga mbi ila kan manga ila pet. Ei nambuⱡ emel, na Kraist nga kindmant wu ei nᵾk pᵾtmin. 14 Wamp ou nduk, Wu Nuim ei mondᵾk pᵾtᵾng. Ei kᵾn, na kan manga ila pit ui ei kᵾn, wamp kᵾⱡ nga mondpa pili orunga ronduⱡ tᵾtᵾng. Wote, mundmong etᵾng uⱡ ei, wak rok, ronduⱡ mondᵾk, Got nga Rᵾnang Ik Kai ei nᵾndᵾtᵾng.

15 Kupa, wamp mat ndi, Kraist nga Rᵾnang Ik Kai ninmin ei nga pilik, kit pilik, wᵾlᵾk rok etmin. Wamp mat ndi, pilpa kungᵾndi kai mbᵾ, tᵾk Kraist nga Rᵾnang Ik Kai ei ninditmᵾn. 16 Wu kᵾⱡ pᵾtmin ei, na wamp nga kuimp keta ila moⱡᵾp, Got nga ik ei nᵾmp ronduⱡ mundᵾr ei nga, wamp mbᵾ ndi, na numan nguk, Got nga ik ei nitmin. 17 Wote wu mat, en enim mbi ou ting pilik, Kraist nga ik ei nitmin. Wu mbᵾ, numan kun mat kandᵾk tᵾk, ni nanᵾnmᵾn mon. Na kan manga ila pᵾnt ei kᵾn, na mbun ou ndupa nguing pilik ninmin. 18 Wote kep, nui uⱡ ei kep, kupa ni uⱡ mbᵾ kep, uⱡ mbᵾ pora, Kraist nga mbi paka rundᵾnmᵾn ei, na rᵾk rᵾk, numan mint etmba. 19 Wote, na pᵾnt ei, enim na tᵾk rapᵾndᵾk, atinga rormin ei ndi, Jisas Kraist nga Muⱡnga Wingti na ronduⱡ ngangga! Ya uⱡ pᵾnmᵾn mbᵾ ndi, na tᵾpa rᵾpᵾndangga moⱡᵾp, kai mundimp. 20 Na numan mam ti enim uⱡ, wote orunga pemba mbᵾ, nokundᵾp mor. Na ronduⱡ mbo uⱡ etᵾp mor ei mel itimp ku, pipil kuⱡi nᵾⱡimp. Wote, na kunt ndam kep, kont munt ndam kep, na uⱡ int ei ndi, Kraist nga mbi paka rundimp. 21 Na pᵾnt ei, na kont munt ndam, Kraist nga kongun ei, indimp muna kunt ndam, mel muⱡ ti timp. 22 Wote, na kont munt ndam, na kapⱡa wamp ou ndupa tᵾp rᵾpᵾndimp. Uⱡ raⱡ nga na itimp ei, na pili napᵾnt. 23 Na ila numan raⱡ etᵾp pᵾnt ei. Na Kraist kᵾn mbo munt ndam, ei ama uⱡ kai mel ti pᵾnt! 24 Ei ama uⱡ kai ti pᵾnt. Wote na kont munt ndam, enim kapⱡa tᵾp rᵾpᵾndimp. 25 Na numan ronduⱡ ti pᵾnt ei, enim kᵾn moⱡᵾp mint mbo enim tᵾp rᵾpᵾndamba kᵾn, enim nga mondpa pili ronduⱡ pangga, ambulk palk muⱡeing. 26 Wote, na enim kᵾn unt ei kᵾn, enim na kᵾn ambulk palk, Kraist Jisas nga mbi paka runding.

27 Namba uⱡ mat em ndam, Kraist nga Rᵾnang Ik Kai ei, nᵾtᵾm ei mel pep rui! Na enim omp kᵾnt ndam kep, wote enim mormun ei nga timan ik ei, pint ndam kep, na ti pᵾnt ei, enim numan tenda pangga, numan tenda ei mint ambulk molk, Rᵾnang Ik Kai ila mondpa pili uⱡ ei, etᵾk ronduⱡ mundᵾi. 28 Enim nga el rui wamp mbᵾ nga mundmong iti nᵾtᵾi! Rᵾk rᵾk ronduⱡ mundᵾk molk, wamp mbᵾ uⱡ kupa mbᵾ tᵾk ora ndᵾi. Wamp mbᵾ nila muⱡing, wote enim muⱡ ping. Nambuⱡ emel, Got ndi, enim itᵾi nᵾtᵾm uⱡ ei mel etᵾm. 29 Got ei ndi, enim Kraist nga kongun indeing nimba uⱡ kai mbᵾ ngurum. Enim Kraist kᵾn mondpa pili uⱡ ila mint ngui ngᵾnggᵾrᵾm mon. Wote, elim nga mbi ila molk, mbun koma ruing uⱡ ei kunda ngurum. 30 Unt enim na kandrᵾng ni, na el rur. Akup ei kᵾn, na el rop mint mor timan ik ei pᵾnmin. Enim na kᵾn rup rop moⱡpᵾn el rᵾmin.

Copyright information for `MED