Philippians 2

Tᵾn Mep Mana Mbun Kraist Itim Ei Mel Itᵾmin

Enim nga, numan ila Kraist kᵾn ronduⱡ tᵾtmᵾn muna? Wote, elim nga kaimp kul uⱡ ei ndi, enim nga numan orunga etpa wang ndurum muna? Muⱡnga Wingti nga mul uⱡ ila rukrᵾng orunga mormin muna? Enim nga numan ei, wamp ᵾngᵾnᵾl kᵾⱡ nguk kaimp kurmin ei? I etᵾk kᵾn, na nga ambuⱡpa puⱡi uⱡ ei, etᵾk ou indᵾi! I etᵾk numan tenda mundᵾk, wote kaimp kul uⱡ tenda ambulk, numan tenda pangga muⱡᵾi! Enim nga numan orunga mint pilik, kara pi nᵾpᵾi mon! Wote, wamp mat tᵾk ou nduk, enim mana orunga muⱡᵾi! Enim nga kᵾng orunga mint pili nᵾpᵾlᵾi mon! Wamp mat nga kunda pilᵾi ku!

Kraist Elim Nga Orunga Mepa Mana Oⱡnga, Got Ndi, Elim Orunga Mepa Oⱡa Purum

Enim Kraist Jisas nga numan pᵾtᵾm ei mel ku pilᵾi!

Elim ni Got ku, wote elim ni, Got Tipam murum ei mel muⱡimp nimba, pili nᵾpᵾtᵾm, mon!
Elim nga numan ei wak ropa, kongun kindmant wamp mel raⱡpa moⱡpa, elim nga orunga mepa mana omba, Got nga ik ei pep ropa mba kurum. Nde peta ila ruing nimba pitim ndam kep, koⱡmba ei nga numan ngumba kurum. Ei nga, Got ndi, Jisas oⱡa tᵾpa, elim nga ki mbo orunga mundrum. Wote, mbi ti ngurum ei, mbi wei mbᵾ mel mon, mbi ou ti ngurum. Mbi ei Jisas. Nambuⱡ emel, wi muⱡ kona kep, ya mᵾi kona kep, mᵾi min mana orunga kep, wamp mbᵾ, Jisas nga mbi ei tek, mura rok mondᵾk, wote wamp ik nuim kan elpa elpa mbᵾ ndi, pora keta tenda puⱡnga, Jisas Kraist ei Nuim ei nangina, Got Tipam nga mbi ei mon pangga! Tᵾn ndi, Got nga mbi ou ei paka rundᵾmin.

Tᵾn rᵾⱡang Ei Mel Muⱡᵾmin

12 Ei kᵾn, na nga wamp mᵾn kᵾⱡ, na unt enim kᵾn, mur ei kᵾn, na nga ik ei rᵾk rᵾk pep rorung, ei mel ku akup, na enim wak rur ei kᵾn, ik ei pep ku rᵾi! Enim kongun ronduⱡ mundᵾk etᵾk, Got ndi, tᵾn rukᵾr titim ei nga, mundmong etpᵾn angge nimbun, Got nga mbi paka rundmin. 13 Nambuⱡ emel, Got ndi, enim nga numan orunga pilpa kongun etᵾm. Uⱡ ei nga, elim ndi, enim nga numan ei, ropa rot nduⱡnga, enim ndi, elim nga kongun numan ngorum ei mel kun kulk etmin.

14 Uⱡ mbᵾ kump kᵾm enim iting etᵾk kᵾn, popᵾⱡ mundi namᵾndᵾk, el rui narᵾk eng ei kᵾn, uⱡ ⱡawa mat pi nᵾpangga! Wote, enim Got nga kangambuⱡa kun kai ralk muⱡing. Wote enim ndi, kont mba mul uⱡ ei, ambulk gi nduk, enim ya mana mᵾi ila wamp rᵾⱡaip uⱡ kit etmin mbᵾ nga ruk ting ila ui muⱡ ila mipil mel, rᵾlang pangga muⱡing. Enim ndi, wamp mat kᵾn, Rᵾnang Ik kont pi kᵾⱡ nᵾk ngung ndam, wote Kraist nga ui ou ila, na enim kᵾn numan etmba. Ei nambuⱡ emel, na nga kongun enim kᵾn, it uⱡ mbᵾ wei ai iti natᵾmba. 17 Ei nga, na nga kᵾng kᵾⱡ enim nga, mondpa pili ei nga, nᵾndᵾp uⱡ kunt ndam, na enim kᵾn ambᵾⱡᵾp paⱡᵾp muⱡimp. 18 Wote ei mel ku, enim ndi, i ku etᵾk, na kᵾn ambulk palk muⱡᵾi!

Timoti Kᵾn Epaprondaitus Raⱡ

19 Wote, pilim ndam, ui nondpa ti kᵾn, Timoti enim kᵾn omba moⱡpa, enim nga enmin uⱡ mbᵾ na kundpa nangga, numan kai pilip muⱡimp. 20 Wu tenda ei ndi, na nga numan pᵾt ei mel pilpa, enim tᵾp rᵾpᵾndimp ku nimba pᵾtᵾm. 21 Wote, wamp minal ndi, en enim nga kᵾng orunga nga nᵾk pilik, Kraist Jisas nga kongun mbᵾ pili napᵾtmᵾn. 22 Wote, enim pilik mormun ei, Timoti na kᵾn tipam kangᵾm mel moⱡpᵾⱡ, Rᵾnang Ik Kai ei, nᵾmp mep andrᵾmbᵾⱡ kangᵾm ndi, tipam tᵾpa rapᵾndurᵾm ei mel. 23 Wote, na nanim moⱡᵾp pilamba uⱡ mbᵾ, kapⱡa em ndam, Timoti enim kᵾn ui nondpa tila tᵾp mundimp. 24 Wote, na kupa pᵾnt ei, Nuim ei ndi, nombuⱡa mam ti tᵾpa kun tangga, na enim kᵾn ui nondpa tila uimp.

25 Na pᵾnt ei, na nga ᵾngᵾn Epaprondaitus, wote kongun rᵾp wu, wote el nde wu, nombuⱡa rᵾng wu Epaprondaitus ni, enim kᵾn ngump int ndont. 26 Wu ei, enim kanᵾmba ei nga numan elinga morum. Ei nambuⱡ emel, elim kui rurum ei nga enim numan ou nduk pilik mormun ei nga. 27 Ei kupa, unt elim kui rurum. Ei kᵾn, koⱡpa pora nduⱡnga, ei wote, Got ndi, wu ei kont kurum. Wote, na kont kurum ku. Ei nambuⱡ emel, Got elim ndi, na mbun mam ti, koma rui nᵾreimp nimba pitim. 28 Ei kᵾn, na numan mam ti pᵾnt ei, Epaprondaitus enim kᵾn ngump int ndamba, enim kandᵾk numan wang nduk kai pilangina, na numan ou ndup pili nᵾpᵾleimp. 29 Wote, wu ei om ei kᵾn, Nuim ei nga mbi ila numan mam ti nguk, rawe etᵾk tᵾi! 30 Ei nambuⱡ emel, Kraist nga kongun indimp nimba etpa, elim koⱡmba itim. Elim koⱡmba ei, nga pili napilpa itim ei, enim ndi, iti natilingina mel itim.

Copyright information for `MED