Philippians 3

Wamp Ti Kraist Mondpa Pilim Ndam, Wamp Ei Kun Kai Moⱡmba

Wamp angmᵾn, na ik ei nᵾmp pora nduimp etᵾp, enim Nuim ei kᵾn numan kai pilᵾi! Enim mon rop ngur ik kᵾⱡ, nga aldpa rop nguimp, ei nga mbun ti mon. Mon ei ndi, enim tᵾpa rapᵾndᵾmba.

Wu kit mat ndi, owa rakra mel ok, tᵾn kᵾng kupti uⱡ ila nga, ronduⱡ mundᵾk nᵾk, enim kᵾng kupti ei nga tᵾk mendᵾk muⱡᵾi! Tᵾn kupti uⱡ ila, tᵾn Got nga kangambuⱡa muⱡi namburmin mon. Tᵾn Got nga Muⱡnga mondpᵾn, Got nga mbi paka rondᵾrmin uⱡ ei, kᵾng kᵾpti uⱡ kupa ei. Tᵾn rapa tenda wamp mbᵾ, Kraist Jisas kᵾn kai pᵾtmᵾn. Ei nambuⱡ emel, tᵾn tᵾn etᵾp peng kont ti natᵾlmina uⱡ mbila, Kraist ndi, tᵾn etpa titim ei nga. Wote, kᵾng orunga uⱡ mat etpᵾn, tᵾndᵾn etᵾp peng kont timᵾn nilimina ndam, na kuimp tep elimba. Jura wamp uⱡ mbᵾ nga nam pilpa pora ndurum. Nilingina ndam, na kapⱡa. Ei nambuⱡ emel, na ndi, na melinga rumbᵾⱡ 8 omba puⱡnga, na Jura wu mema ei nga, Jura wamp nga etmin ei mel, na nga kᵾng kopᵾtᵾtᵾng. Na Isrel wu, Benjamin nga rᵾⱡaip ila, wote Ipru wamp kupa. Ei wote, na Perisi wu kupa, ei nambuⱡ emel, na Moses nga mi ik mbᵾ ronduⱡ mundᵾp pep ruimp nᵾmp it. Wote, na mi ik kᵾⱡ pep rop, Got nga kongun ei ronduⱡ mundᵾp itimp nᵾmp, Got nga rapa tenda wamp mbᵾ rop kundimp nᵾmp it. Ei kᵾn, Moses nga mi ik kᵾⱡ ila wamp ti ndi, kandpa tepa nakᵾn, nim ndam, na nga ⱡawa ti mon.

Wote, na akup Kraist kᵾn moⱡᵾp kᵾn, uⱡ unt nga etᵾp undᵾr mbᵾ, uⱡ roldᵾnga mat nᵾmp pᵾnt. Wote, uⱡ mbᵾ mint mon! Wote na ndi, namba mel mbᵾ pora, tᵾp pei mundunt. Ei mel, ronduⱡ ingk it nga nᵾmp ent. Ei kᵾn, Kraist Jisas na nga Nuim, ei nga numan ei pilip timp. Uⱡ ei nga, nᵾmp kᵾn uⱡ wei mbᵾ wak rop mundᵾr. Na Kraist rukᵾr timp ei nga, mondpa pili uⱡ ei, mel ronduⱡ ti nᵾmp pᵾnt. 10 Na uⱡ ti pilamp, ka nᵾmp pᵾnt ei, Kraist koⱡpa kont purum uⱡ ei nga ronduⱡ ei kᵾn, wote mindil nurum ei mel nomp, kurum ei mel koⱡᵾp, wote ⱡoporpa omba purum ei mel pamp, ka nᵾmp punt.

Tᵾkrᵾp Mbun Mel Muⱡ Ei Ⱡar Nᵾmp Tᵾmin

12 Na ndi nᵾmp kᵾn, na timp nᵾt mel ei, tit ni nanᵾnt mon. Wote, kun kai mor ni nanᵾnt mon ku. Ei nga, na mel kai ti timp ei nga, kokila kongun ronduⱡ mundᵾp etᵾp mint mor. Ei kᵾn, Kraist Jisas elim ndi, na teimp nitim mel kai ei timp. 13 Angmᵾn, na kai muⱡ ei tit nᵾmp pi napᵾnt. Wote, mel tenda ti pᵾnt ei, mel mbuldung orunga tetᵾm mbᵾ wak rop, mel kai ei ronduⱡ mundᵾp timp ei nga pilip kᵾn, tᵾkrᵾp mbo mel muⱡ ei, Got ndi, wi ropa nguⱡnga ila omp kᵾn, mel ingk kai ei tit. Mel kai ei, Kraist Jisas tepa morum. Ei, uⱡ nga kᵾnt nga kont mul uⱡ ei mbo timp.

15 Wote, tᵾn uⱡ kun kai mbᵾ, etᵾp moⱡmina ndam, tᵾn nga numan ei wamp kun kai mbᵾ mel kapⱡa moⱡmina. Wote, enim numan elpa ti pil-ing ndam, Got ndi, enim nga numan ei etpa mot ndumba. 16 Wote, tᵾn uⱡ kun kai titmᵾn mbᵾ, ambuⱡpᵾn gi ndᵾmin.

17 Wamp angmᵾn, enim ndi, na nga uⱡ ent mbᵾ pep rᵾi! Wote enim ndi, unt na uⱡ kun kai et mbᵾ mel, pep rok etmin wamp mbᵾ mel kandᵾk itᵾi! 18 Ui ou ndupa, enim kundᵾp nit. Ei mel ku, wote akup enim kundᵾp nilmba, na nga mong ila ka onum. Ei kᵾn, wamp minal Kraist nga, nde peta ila el rui wamp mel mormin. 19 Wote, enim nga kᵾng orunga numan pᵾtmᵾn ei, en enim nga got mel etᵾm. Wote, wamp mbᵾ ndi, en enim nga kᵾng orunga ambulk parmin ei pipil kul uⱡ mbᵾ, wote wamp mbᵾ ndi, mᵾi kona uⱡ mbᵾ nga mint pᵾtmin. Wamp mbᵾ kit muⱡing. 20 Wote, tᵾn mondpa pili wamp mbᵾ, muⱡ kona ila wamp mendpᵾⱡ kᵾⱡ mormun. Tᵾn wamp kᵾⱡ ndi, Jisas Kraist ei muⱡ kona wak ropa mana omba, tᵾn rukrᵾng tᵾmba ei nga nokundpᵾn mormun. 21 Wote Kraist ndi, tᵾn nga mbo kᵾng kᵾⱡ etpa, elim nga kᵾng wingti kᵾⱡ mel randpa, etpa mon mundᵾmba. Ei mel etpa kᵾn, wote uⱡ ronduⱡ em mbᵾ ndi, mel tetᵾm mbᵾ kᵾmp kᵾm, elim nga mana orunga mint temba.

Copyright information for `MED