Philippians 4

Wamp Mbᵾ Numan Tenda Pangga, Numan Kai Pilik, Pilpa Kungᵾndi Kai Mbᵾ Ting

Wote, na nga angmᵾn! Enim Nuim ei kᵾn ronduⱡ mundᵾk muⱡᵾi! Wote na ndi, pilip nᵾnt ei, na nga numan ei, enim ngump, na enim kᵾn kont minal enim. Na enim kᵾn numan etᵾm ei kᵾn, enim wamp kai wei kᵾⱡ nᵾpᵾnt.

Amp Iyotiya kᵾn Sintike raⱡ, enmbil pilᵾl! Enmbil Nuim ei kᵾn, numan tenda pangga, muⱡᵾnggil! Nim na kᵾn, kongun tenda ila kupa etmbᵾⱡ ei nga nim kundᵾp nᵾnt. Nim ndi, amp raⱡ tᵾkᵾn rᵾpᵾndi! Amp raⱡ ndi, na tᵾk rapunduⱡᵾnggila, Nuim ei nga Rᵾnang Ik Kai ei nᵾtmᵾn. Wote Klement kᵾn, kongun wu mat kᵾn, kongun tenda ila etmᵾn mbᵾ, amp raⱡ kᵾn kongun etmin. Enim nga mbi ei, kont mba mul Buk ila morum.

Enim ndi, ui mbila rᵾk rᵾk Nuim ei kᵾn kai pilik muⱡᵾi! Na aldpa nᵾnt ku, enim ambulk palk muⱡᵾi! Enim ndi, wamp mbᵾ kᵾn pora, numan wang ndui uⱡ mbᵾ etᵾk muⱡᵾi! Nuim ei nondpa onum. Enim numan ou nduk pili nᵾpilᵾi mon! Wote, enim numan ngung mel mbᵾ, Got kᵾn rᵾk rᵾk numan mbo ila tek, elim kᵾn kai pilik, atinga rok, angge nᵾk etᵾi! Ei nga, moⱡpa kundi uⱡ ei, Got ndi, tᵾn ngorum ei ndi, wamp mbᵾ nga pilpa kungᵾndi uⱡ mbᵾ pora ropa mana ndurum. Wote, Jisas Kraist nga kongun etᵾm ila moⱡpa kundi uⱡ ei, enim nga numan orunga kᵾn, enim nga pilpa kungᵾndi uⱡ orunga rᵾp etpa kai etangga!

Nimp pora ndup nᵾnt wamp angmᵾn. Enim nga numan ila rop peka runding mel kᵾⱡ, uⱡ wingti kai, ik kupa, mbi ou, uⱡ kun, mel wingti, uⱡ kai mon pi, wote kaip ninding uⱡ mat itᵾi! Uⱡ mbᵾ kᵾmp kᵾm enim mbo rundᵾr ui ei kᵾn, enim tᵾk pora ndurᵾng uⱡ mbᵾ, enim pilik, wote na kandrung ei, wote enim ndi, rᵾk rᵾk uⱡ mbᵾ pora etᵾi! Wote etangina kᵾn, Got ndi, tᵾn kᵾn moⱡpa kundi uⱡ ei, enim kᵾn moⱡmba.

Pol Mel Titim Mbᵾ Nga Angge Nitim

10 Akup enim nga numan ei ropa rot nduⱡnga, enim na nga nᵾk pᵾnmᵾn. Wote ei nga, Nuim ei kᵾn numan kai ti enim. Enim unt na nga nᵾk pᵾtᵾng. Ei nga, wote na tᵾk rᵾpᵾnding ei nga, nombuⱡa mam ti, ti natᵾtᵾm mon. 11 Na mel, ti nga mon mondunᵾm ni nᵾnᵾnt mon. Na mel ou ndupa tep munt kep, orunga etᵾp tep munt kep, na nga numan orunga kapⱡa elinga mor. 12 Na wamp kurpa mel moⱡᵾp, wote mel minal kapⱡa ᵾmbuⱡimp. Na rᵾng ou ndupa nui uⱡ ei nga puⱡ ei pᵾt. Wote, kump kun tetᵾm ei nga puⱡ ei, pᵾt ku. Wote, mel minal ᵾmbil uⱡ ei nga, na pᵾt ku, wote mel mon ndui ei nga, puⱡ ei pᵾt ku. Wote ui mbila kep, kona mbila kep, kᵾmp kᵾm na ndi kapⱡa mint nᵾt. 13 Kraist ndi, na ronduⱡ mundrum ei nga, elim nga ronduⱡ ila, na ndi kapⱡa uⱡ mbᵾ itimp.

14 Wote enim ndi, uⱡ kai ti etᵾng ei, enim ndi, na nga mbun ila, na tᵾk rapᵾndrᵾng. 15 Enim Pilipai wamp kᵾⱡ, pilik kun etᵾk mormin. Na Masaroniya kona wak rur ui ei kᵾn, na Rᵾnang Ik Kai ei nᵾmp ngur ei, enim Got nga rapa tenda ila wamp kᵾⱡ ndi mendpᵾⱡ, na tᵾk rapᵾndrᵾng. Enim wamp kᵾⱡ ndi, na kᵾn molk, mel mat na ngok mint etᵾng. Wote, mat yant nguk etᵾng. 16 Na Tesalonaika kona ila moⱡmba. Enim ndi, na unt tᵾk rapᵾndᵾk, wote tᵾk rapᵾndᵾk etᵾng. 17 Na ndi, enim nga mel ti timp ei nga ni nᵾndᵾt mon. Na ndi, enim nga uⱡ kai numan ngur mbᵾ, etᵾk kakina indᵾi! 18 Na mel timp ei mel tᵾp, wote ama mat pendᵾk ngurung. Na nga gem ngurung mel Epaprondaitus mepa urum nimbᵾ, na tilmba kakina murum. Koipa tindiⱡim mundi uⱡ ni mel, mel mura rui kai mat mek, na ngurung nimbᵾ, Got ndi, pilpa kai pitim. 19 Na nga Got ei, mel kai mbᵾ tepa morum ei ndi, Kraist Jisas nga nindpa, enim wamp nam ti mel mon ndum ei, etpa kapⱡa endᵾmba.

20 Got tᵾn nga, Tipam ei kᵾn, ui mbila rᵾk rᵾk elim nga mbi ei, tᵾn wamp mbᵾ ndi, paka rundamin! Ei kupa.

21 Na ndi, Kraist Jisas nga mbi ila, enim Got nga wamp mbᵾ kᵾn, mᵾkᵾlmᵾ kai, nᵾnt. Wote, tᵾn nga wamp ᵾngᵾnᵾl na kᵾn, kunda mormin mbᵾ ndi, enim kᵾn, mᵾkᵾlmᵾ kai ku ninmᵾn. 22 Wote, Got nga wamp ya wu nuim mumuk Sisa nga manga ila kongun etmin wamp mbᵾ ndi, ama ronduⱡ mundᵾk enim kᵾn, ‘Mᵾkᵾlmᵾ kai,’ nᵾnmin.

23 Nuim Jisas Kraist nga wamp, mᵾn kan mundi uⱡ ei, enim kᵾn kan piyangga!

Copyright information for `MED