Revelation of John 11

Wu Raⱡ Ndi, Ik Nᵾkᵾⱡ Ekit Ndᵾrᵾnggil

Wote, tᵾmbᵾⱡ ambulk mek andurmin ni mel ti, na nguk kᵾn, nᵾk mel, “Nim ndi, oⱡa anggilkᵾn andkᵾn, Got nga manga wingti ei kᵾn, rat pol na mbᵾ to rokᵾn iti! Wote wamp mat, Got nga mbi paka rondunmᵾn mbᵾ, namba iti mbᵾ kᵾmp rokᵾn iti! Wote nim ndi, rat pol wingti ekit orunga tetᵾm kona ei, to rui nᵾri! Nambuⱡ emel, wamp rᵾⱡaip elpa mbᵾ nga tᵾpa ngurum kona ei tetᵾm. Wamp mbᵾ ndi, Got nga kona peng wingti ei, kᵾmp kambilik mint pangina mba, kalimp 42 omba mba. Na nga nombuⱡa rᵾng wu raⱡ tᵾp mundamba kᵾn, muⱡ ping ralkᵾⱡ pukᵾⱡ wamp mbᵾ kᵾn, Got nga ik mbo endkᵾⱡ panggila, rumbᵾⱡ 1,260 omba mba,” nᵾtᵾng. Muⱡ mᵾi raⱡ nga Got nga kuimp keta ila, nde olip raⱡ kᵾn, wote lam raⱡ mormbil ei, elim nga nombuⱡa rᵾng wu raⱡ nga to ropᵾⱡ mormbil. Wamp mat ndi, wu raⱡ uⱡ mat ndi, etpᵾn kit mundmin nᵾk eng ndam, wu raⱡ nga keta min ila, ndip ti ekit omba kᵾn, wamp mbᵾ nomba kondᵾmba. Wote, wamp nam ti ndi, wu raⱡ nga ti ruimin nᵾk eng ndam, i etᵾk ku kuⱡing. Wu raⱡ nga ronduⱡ tekᵾⱡ moⱡᵾnggil ei ndi, muⱡ ei imp muⱡanggila kᵾn, kona ndamᵾng rui nᵾrangga kᵾn, andkᵾⱡ Got nga ik mong mbᵾ ninggil. Wu raⱡ nga ronduⱡ ei ndi ku, nu mbᵾ tanggila, mema raⱡpa tangga kᵾn, wote mᵾi kona mbila pora, mel tetᵾm mbᵾ kit muⱡangga, ni kᵾⱡ uⱡ mat itinggil. Wu raⱡ ndi, uⱡ mbᵾ pilinggil ei mel, kapⱡa itinggil mint.

Ei kᵾn, wu raⱡ ndi, Got nga ik mong mbᵾ, nᵾkᵾⱡ pora ndanggila kᵾn, wote mel rakra ti, mᵾi ila kut mana petᵾm ei ndi, oⱡa omba, wu raⱡ kᵾn, el romba. Wote, mel rakra ei ndi, wu raⱡ ropa mana ndupa, ropa kondᵾmba. Wu raⱡ nga on raⱡ, kona peng ou ei nga nombuⱡa mam ila tiyangga kᵾn, tᵾn ndi, ik ek ropᵾn, kona peng ou ei kundpᵾn, Sorom kᵾn, Isip mᵾi kᵾmp raⱡ nimin. Unt kona peng tenda ila ku, wu raⱡ nga Nuim ni, unt nde peta ila nil rok, rok kondrung. Ei kᵾn, mᵾi kona mbila wamp rᵾⱡaip elpa elpa na, kᵾng elpa elpa ti na, ik elpa elpa nᵾk etmin na mbᵾ ndi, wu raⱡ nga on ei kandᵾk pangina, rumbᵾⱡ raldika etpa, wote rumbᵾⱡ ti nga ruk ting ila pora nimba. Wote, tᵾk on iteing nᵾk kandᵾk, kont iti nᵾtᵾn. 10 Mᵾi kona wamp mbᵾ ndi, wu raⱡ korᵾnggil uⱡ ei kandᵾk kᵾn, numan kai pilik, ᵾp nok ambulk palk, en enim nga wamp mbo mbᵾ kᵾn, mel mat gem nguk int yant etᵾng, nambuⱡ emel, painui wu raⱡ ndi, mᵾi kona wamp mbᵾ kᵾn, uⱡ kit mbᵾ etᵾnggil ei nga iting.

11 Wote, rumbᵾⱡ raldika omba puⱡnga, wote rumbᵾⱡ ti nga mba rᵾk ting ila pora nilinga kᵾn, Got nga muⱡnga ei, pop ropa, wu raⱡ kᵾn ruk nduⱡnga, wu raⱡ rᵾt ni kᵾⱡ, kont morunggil. Ei kᵾn, wamp mbᵾ ndi, wu raⱡ nga itim uⱡ ei, kandᵾk mundmong etᵾng. 12 Ni kᵾn, wu raⱡ mok pᵾtᵾnggil mel, wi muⱡ kopa ila wamp nga keta min ila, ronduⱡ wi ropa, nimba mel, “Enmbil ya ila oⱡa wᵾl!” nitim. Ei kᵾn, wu raⱡ, kopa pol ila, oⱡa pukᵾⱡ wi muⱡ ila puⱡᵾnggila mel, el rui wamp nimba ndi, wu raⱡ kandᵾk morung.

13 Ui ni kᵾn, kona kilimbᵾmp mam ti elinga, kona peng ou ei nga punt ronggᵾt etpa, kit monduⱡnga kᵾn, wamp 7,000 kolk pora ndurᵾng. Wamp mat kont morung mbᵾ, mundmong minal etᵾk, muⱡ ila Got nga mbi ou ei, tᵾk ou nduk, paka rondrᵾng. 14 Enim pilᵾi! Mbun mindil 2 ni, pora ninim. Wote, ui onunga kot ila mbun mindil 3 ei nondpa, ekit omba.

Anggelo 7 Ni, Pikul Ik Ndunᵾm.

15 Wote, anggelo 7 ni nga pikul ni, ik nduⱡnga mel, wi muⱡ ila wamp nga keta ila ik mat ndi, ronduⱡ wi rok, nᵾk mel, “ Akup mᵾi kona ila nga wamp rᵾp iti uⱡ ei nga ronduⱡ ei, tᵾn nga Oⱡa Nuim ei kᵾn, elim nga Kraist raⱡ kᵾn tetᵾm. Wote, elim uⱡ nga kᵾnt nga rᵾp etpa moⱡmba,” nᵾtᵾng. 16 Ni kᵾn, Got nga kuimp keta ila rᵾp wu 24 kat, en enim nga rᵾpᵾndi pol ila mormin nimbᵾ ndi, Got nga kuimp keta ila mura rok mondᵾk, Got nga mbi paka rondrᵾng. 17 Wu nimbᵾ ndi, nᵾk mel, “Nim Nuim Got Ronduⱡ Purum ei, nim unt murᵾn, akup morᵾn. Nim nga ronduⱡ mam ei, tᵾkᵾn pora ndukᵾn kᵾn, nim Nuim Mumuk molkᵾn, wamp mbᵾ pora puⱡ mondkᵾn rᵾp en. Uⱡ ei nga, tᵾn ndi, nim kᵾn angge ninmᵾn. 18 Uⱡ ila nga, wamp rᵾⱡaip elpa mbᵾ, popᵾⱡ mondrung. Ei nambuⱡ emel, wamp mbᵾ nga popᵾⱡ ei, omba ui ei akup. Ui ei, wamp kui mbᵾ kᵾmp tin. Nim nga ik painui kongun wamp na, wamp mat nim nga mundmong endᵾk, mana orunga molk kongun etᵾng na, mᵾi kona wamp nuim na, wamp kurpa na mbᵾ mel kai mat, punt rokᵾn nguin, ui ei akup. Wamp mat ndi, mᵾi kona ila nga mel tetᵾm mbᵾ, etᵾk kit mondrung ei nga wamp mbᵾ, etᵾk kit munding ui ei akup,” nᵾtᵾng.

19 Wote, rᵾp wu nimbᵾ, ik nᵾk pora nduⱡmina kᵾn, anggelo mbᵾ ndi, Got nga muⱡ ila manga wingti ei, kumba tilingina kᵾn, nimba mᵾi rui ket kᵾⱡ, pena ila ekit omba telinga kᵾndᵾr. Ni kᵾn, kona kump kiraipa etpa, guⱡ gaⱡa nimba, mᵾi ei kilimbᵾmp etpa, kona ndamᵾng tᵾma ropa, kona kup mong mam mbᵾ mana urum.

Copyright information for `MED