Revelation of John 12

Amp Ei Kᵾn, Wimbᵾ Mam Ei Kᵾn

Wote, uⱡ min ngᵾn pi ti, muⱡ ila ekit urum ei, amp ti murum ei, elim nga muⱡ rurum kᵾⱡ, kona ant ei mel kapⱡa, rᵾⱡang purum. Wote, elim nga kᵾmp puⱡ mana orunga, kona kalimp ei pitim. Wote, elim nga peng ila mipil 12 kat, wu nuim mbᵾ nga wᵾnᵾ mondurmᵾn ei nga ti mundrum. Amp ni, kangambuⱡa mundrum ei nga kangambuⱡa memba ui ei nondpa urum ila, mindil nomba ronduⱡ ke nitim. Wote, uⱡ min ngᵾn pi ti ku, muⱡ ila ekit urum ei, wimbᵾ mam kunt ti, peng 7 anggilpa, kom 10 anggilpa etᵾm ei, ekit urum. Ni kᵾn, peng 7 ni kᵾⱡ ila, wu nuim mumuk mbᵾ nga wᵾnᵾ mondurmᵾn nimbᵾ nga mondrung. Ni kᵾn, wimbᵾ ᵾi ni ndi, muⱡ ila mipil minal petmin nimbᵾ nga rᵾⱡaip ti ropa tᵾpa, mᵾi kona ila mana ndurum. Ni kᵾn, wimbᵾ ni ndi, amp ei kangambuⱡa miyangga nuimp nimba, nokundpa murum. Wote, amp ni ndi, kang ti mitim. Kang ei, ronduⱡ minal tepa moⱡpa, wamp rᵾⱡaip minal rᵾp etpa nokundᵾmba. Wote, amp ni ndi, kang ni melinga kᵾn, tᵾkrᵾk ruk ok, kang ni tᵾk mek, Got kᵾn elim nga rᵾpᵾndi poⱡ ila, mek oⱡa purung. Wote amp ni, nung nimba mba, kona kui waka tila purum ei, Got ndi, amp ei nga tᵾpa kun endpa, tinditim kona ila purum. Kona ila amp ei, rᵾp itangina, rumbᵾⱡ 1260 omba mba.

Ni kᵾn, muⱡ kona ila el mam ti etᵾng. Anggelo Maikel kᵾn, elim nga anggelo mbᵾ, tᵾpa tepa wimbᵾ ei kᵾn, el roⱡnga, wimbᵾ kunt ei ndi, elim nga anggelo mbᵾ, tᵾpa tepa Maikel nga anggelo mbᵾ kᵾn el rurum. Ni wote, wimbᵾ ei nga anggelo mbᵾ, el iting ei nga ronduⱡ ti mon. Uⱡ ei nga, muⱡ kona ila muⱡing mel, kapⱡa iti nᵾtᵾtᵾm. Got nga anggelo mbᵾ ndi, wimbᵾ mam ei, rok tᵾk ekit ndurᵾng. Wimbᵾ mam ei, unt kor nga murum ei, mbi tek, Seitan nᵾtᵾng ei ndi, mᵾi kona ila wamp mbᵾ, ik kol nga puⱡ ropa ngumba itim ila, elim nga anggelo mbᵾ kᵾn kunda, rok tᵾk mᵾi kona ila mana ndurᵾng.

10 Wote, na pit mel, wi muⱡ ila wamp nga ik ti ndi, wi ronduⱡ ropa, nimba mel, “Akup tᵾn nga Got nga wamp etpa ti uⱡ ei onum! Akup Got elim nga wamp tᵾpa mumuk rui uⱡ ei nga ronduⱡ ei, pena ila ekit onum. Akup elim nga Kraist nga ronduⱡ ei, ekit onum. Uⱡ ei, nambuⱡ emel, wamp ti, tᵾn nga wamp ᵾngᵾnᵾl mbᵾ, rumbuldi rᵾnggilmᵾ raⱡ, Got nga kuimp keta ila, ik ndo ngumba etᵾm wu ni, akup anggelo mbᵾ ndi, rok tᵾk mana ndurᵾng. 11 Tᵾn nga wamp angmᵾn mbᵾ, Sipsip Waⱡ ei nga mema ila ronduⱡ tᵾk kᵾn, elim nga ik kupa ei, wamp mat kundᵾk nᵾk etᵾng uⱡ ei ndi, el rui wamp ei, rok mana ndurᵾng. Wamp angmᵾn mbᵾ ndi, en enim rok kunding uⱡ ei, kapⱡa mint nᵾk pᵾtᵾng. 12 Nim muⱡ kona ei kᵾn, muⱡ ila mormin wamp mbᵾ pora, numan kai pilik muⱡᵾi! Wote, nim mᵾi kona ei kᵾn, num kuta raⱡ kit pilkᵾⱡ ka etkᵾⱡ muⱡᵾl! Nambuⱡ emel, mbun mindil mam mat, enmbil kᵾn onum. Seitan ni, popᵾⱡ mam mat mepa kur mana urum. Ei nambuⱡ emel, elim ui onunga kot ila, mana omba moⱡmba uⱡ ei nga pilpa urum,” nitim.

13 Wimbᵾ ei, elim tᵾk mᵾi kona ila mana ndurᵾng uⱡ ei pilpa kᵾn, amp i kang mitim ni, pep ropa tᵾkrᵾpa purum. 14 Wote amp ni, kᵾi ndowa mam ti nga pou raⱡ ngorung. Ei nambuⱡ emel, amp ei ndi, kᵾi pou raⱡ ropa mondpa mbur nimba mba, kona kui waka ila muⱡangga, kona ila amp ei, rᵾp itangina, wimbᵾ ei kᵾn, ruⱡ etpa nᵾk kᵾn etᵾng, rumbᵾⱡ 1260 omba mba. 15 Wote, wimbᵾ ni nga keta nombuⱡa ila nu mam ti, mik ropa tᵾpa, ekit ndurum ila nu ei ndi, amp ei, tangga nimba pilpa itim. 16 Wimbᵾ ei ndi, nu ni mik ropa munduⱡnga kᵾn, wote mᵾi ei ndi, amp ni, tᵾpa rapundpa, nu mam ni keta anga ropa, nomba kitim. 17 Ni kᵾn, wimbᵾ kunt ei ndi, amp ei kᵾn, popᵾⱡ kuⱡpa kᵾn, amp ei nga wamp pundun mbᵾ kᵾn, el ruimp nimba purum. Wamp pundᵾn mbᵾ, Got nga, mi ik mbᵾ pora, pep rok, Jisas nga ik kupa ei nᵾndᵾk, rᵾk rᵾk pep rok etmin. 18 Wote, wimbᵾ mam kunt ni, num kuta ᵾldᵾ ila anggilpa murum.

Copyright information for `MED