Revelation of John 14

Wamp 144,000 Ndi, Kinan Kont Kat Nᵾtᵾng

Wote na ndi, kundᵾr mel, Sipsip Waⱡ ei, komnga Saiyon ila anggilinga kᵾn, wamp 144,000 kunda rᵾp rok anggᵾtᵾng. Sipsip Waⱡ ei nga mbi ei kᵾn, Tipam nga mbi ei kᵾn kunda, wamp mbᵾ nga mᵾi ombᵾl ila, mon rok mondrung. Wote, na kum tep pit ei, wi muⱡ ila ik ti pit ei, gita rok nᵾtmin ni mel, ik nilingina, nu kuⱡᵾp ropa, kona guⱡ gaⱡa nimba etᵾm ni mel elinga pit. Wamp 144,000 mbᵾ ndi, rᵾpᵾndi pol nila, tᵾmbᵾkak mel kont mul na, rᵾp wu na mbᵾ nga kuimp keta ila molk, kinan kont kat nᵾtᵾng. Got ndi, wamp 144,000 rukᵾr titim mbᵾ mint kinan kᵾⱡ, pilik mbi nduk nᵾtᵾng. Wamp wei nᵾwᵾ mat ndi, kinan kᵾⱡ, pilik ni nandᵾtᵾng mon! Wu mbᵾ ndi, amp mbᵾ kᵾn, rᵾp rok pek iti natᵾtmin, mon! Wu eng nui mbᵾ molk kᵾn, Sipsip Waⱡ ei, purum kona mbila wu mbᵾ, akil tek pep rok purmin mint. Mᵾi kona mbila wamp mbᵾ nga wu mbᵾ mendpᵾⱡ, Got ndi, etpa rukᵾr titim. Mel mat, Got kᵾn angge nᵾk ngormᵾn ni mel wu mbᵾ, i etᵾk angge nᵾk, Sipsip Waⱡ ei kᵾn, Got kᵾn ngorung. Wamp mbᵾ nga keta ila ik kol ti, ekit ui nawᵾrᵾm. Wote, uⱡ ⱡawa ti kandᵾk, ti natᵾtmᵾn mon ku.

Anggelo Raldika Kat Rᵾnang Ik Nᵾtᵾng

Wote, na kᵾndᵾr mel, anggelo ti, mbur nimba muⱡ ila purum ei ndi, Rᵾnang Ik Kai rᵾk rᵾk kont tetᵾm kᵾⱡ, mepa mba, mᵾi kona mbila pora, ik elpa elpa ni wamp na, wamp rᵾⱡaip elpa elpa na, kᵾng elpa elpa ti wamp na, mᵾi kump elpa elpa mbila, nimba ngumba pilpa purum. Anggelo ei ndi, wi ronduⱡ ropa, nimba mel, “Got nga wamp mbᵾ pora, kᵾmp tᵾmba ui ei, nondpa enim. Enim wamp mbᵾ ndi, Got nga mundmong endᵾk, mbi paka rondᵾk indᵾi! Got nga ronduⱡ ei, muⱡ mᵾi raⱡ na, num kuta na, nu na mel mbᵾ pora, mim itim,” nitim.

Anggelo akil tepa ni ndi, anggelo kuimbal ni, pep ropa omba, nimba mel, “Kona peng ou Bapilon ni, kit moⱡpa pora ndunᵾm, ei ka! Kona peng ou Bapilon ei ndi elinga kᵾn, wamp mbᵾ ndi, wapra puⱡ pendᵾk ronmin. Uⱡ ei, nu wain ronduⱡ mel ti, wamp mbᵾ nguⱡnga, nok kekilip rok etmin,” nitim.

Wote, anggelo 3 ni ndi, anggelo kuimp tetᵾnggil ni raⱡ, pep ropa omba, ronduⱡ ik nimba mel, “Wamp nam ti ndi, mel rakra ei nga to tᵾndᵾk, mim etᵾng mel ei, mbi paka rondpa, wote tip timal ei, ki ila kep, mᵾi ombil ila kep, pem ndam, wamp ei, nu wain ei nomba. Nu wain ronduⱡ ei, Got elim nga popᵾⱡ ei, ming ila oi ndupa mondpa ngumba. Ei kᵾn, uⱡ kit mbᵾ nga punt ropa ngangga nomba. Wote wamp ei, ku salpa nomba, kondpa pem ila anggelo wingti mbᵾ nga kep, Sipsip Waⱡ ei nga mong waⱡ ila kep, mindil minal nomba. 11 Ndip ila wamp mindil nok muⱡangina kᵾn, ndip ikil ei, rᵾk rᵾk oⱡa mba mint moⱡmba. Wamp mbᵾ, mel rakra ei kᵾn, wote mel nga to tᵾndᵾk mim etᵾng mel ei nga mbi paka rondᵾk, mel ei nga mbi ila, tip timal tᵾk etᵾng wamp mbᵾ, rumbuldi rᵾnggilmᵾ raⱡ, mindil nok mint muⱡing,” nitim. 12 Ei kᵾn, akup wamp mat, Got nga mi ik kᵾⱡ pep rok, Kraist kᵾn rᵾk rᵾk mondᵾk pilik etmin wamp kᵾⱡ, ronduⱡ mondᵾk muⱡᵾi!

13 Na kum tep pit mel, wi muⱡ ila wamp nga keta ila, nimba mel, “Nim ndi, ik kᵾⱡ mon rui! Akup kep, wote kep, wamp mat Nuim ei nga kongun endᵾk molk, koⱡung mbᵾ, ambulk palk muⱡing,” nitim. Muⱡnga Wingti ei ndi, i ku ninim, “Wamp mat kont molk kᵾn, mbun koma rorung mbᵾ, muⱡ tᵾk ambulk palk muⱡing. Nambuⱡ emel, wamp mbᵾ nga uⱡ kai mat etmin mbᵾ kunda, mek ping,” nitim.

Mᵾi Kona Rᵾng Ting Ui Ei Nondpa Enim.

14 Wote, na kᵾndᵾr mel, kupa kurᵾmᵾⱡa ila wamp mel ti murum. Wamp ei, wᵾna gol ti peng ila mondpa, kur koiya nengina mul ti, ki ila ambuⱡpa murum. 15 Wote anggelo ti, Got nga manga wingti ila moⱡpa, pena omba ronduⱡ mundpa, ka wi ropa etpa nimba, wamp ti, kopa ila murum ni kundpa, nimba mel, “Pana kona mbila rᵾng mbᵾ, rupa ropa pora ndum, nim nga kur koiya ei ndi, rᵾng mbᵾ koⱡmung iti, akup rᵾng ting ui ei ka!” nitim. 16 Wote, kopa ila murum wamp ni ndi, kur koiya ni, ambuⱡpa mepa mᵾi ila mana omba, pana kona nimbila, rᵾng rupa rurum nimbᵾ, koⱡmung itim.

17 Wote, anggelo ti ku, Got nga manga wingti ila moⱡpa, pena omba kᵾn, elim nga kur koiya nengina mul ti, ku ambuⱡpa, mepa oⱡnga kᵾndᵾr. 18 Wote, anggelo ti ku, Got nga rat pol wingti ei, wak ropa pena urum. Ei nga, ronduⱡ ei ndi, ndip ei rᵾp etᵾm. Anggelo ei ndi, kur koiya nengina mul ti ambuⱡpa, wi ronduⱡ ropa, nimba mel, “Pana kona mbila, nde wain mong mbᵾ poⱡ ropa petᵾm. Nim nga kur koiya nengina mul ei ndi, koⱡmung etkᵾn mᵾk rui!” nitim. 19 Wote, anggelo ni nga kur koiya nengina mul ti, ᵾmbrᵾm ni mepa, pana kona nila mana omba, nde wain mong nimbᵾ, koⱡmung etpa tᵾpa mᵾk rurum. Ropa mondpa, wote tᵾpa ku ming mam ti wain mong mbᵾ, kambilik nim nim ndurmin nila, rᵾk rᵾk itim. Kona ei, Got nga popᵾⱡ kurum kona ei mel. 20 Kona peng ei nga, ekit orunga ku ming mam ni telinga, wain mong nimbᵾ, kambilik nim nim nduⱡmina mel, mema mbᵾ tilk nimba, ekit purum kona ei, 200 kilomita ei mel ruⱡ puⱡnga moⱡpa, oⱡa urum to ei, kng os mᵾi ila oⱡa anggilinga omba, keta min ila oi tᵾtᵾm ei mel, kapⱡa itim.

Copyright information for `MED