Revelation of John 19

Muⱡ Kona Ila, Wamp Mbᵾ Molk, Got Nga Mbi Paka Rondrᵾng

Wote, ui ei kᵾn, na kum tep pit mel, wi muⱡ ila wamp puⱡi molk, wi ronduⱡ rok, nᵾk mel, “Tᵾn ndi, Got nga mbi paka rundamᵾn! Wamp Etpa Ti Uⱡ, uⱡ rᵾpᵾndi mbᵾ nga puⱡ wu, wote uⱡ ronduⱡ pi mbᵾ pora, tᵾn nga Got ei kᵾn puⱡ petᵾm. Got ndi, ik kupa ei kᵾn, nombuⱡa mam kun ila wamp kᵾmp tᵾtᵾm. Amp wapra mbi purum ei ndi, mᵾi kona wamp mbᵾ pora, etpa kit mondrum. Uⱡ ila, Got ndi, amp ei, ropa ndip kᵾrᵾm. Amp wapra ei ndi, Got nga kongun wamp mbᵾ, ropa kundrum uⱡ ⱡawa ila, Got ndi, punt ropa pora ndurum.” nᵾtᵾng. Ni kᵾn, aldpa wi muⱡ ila wamp nimbᵾ ndi wi rok, nᵾk mel, “Tᵾn Got nga mbi paka rundamᵾn! Kona peng ou ndip nonum ei nga ikil enim ei, rᵾk rᵾk oⱡa mint pangga!” nᵾtᵾng.

Wote, rᵾp wu 24 ni kᵾⱡ kᵾn, mel tᵾmbᵾkak kat, kont mormin ni kᵾⱡ kᵾn kunda, Got nga rᵾpᵾndi pol ila morum ei nga kuimp keta ila rumᵾⱡi pek, mbi paka rondᵾk, nᵾk mel, “Tᵾn Got nga mbi paka rundamᵾn! Ei kupa,” nᵾtᵾng.

Wote, Got nga rᵾpᵾndi pol ila nga wamp ti ndi, wi ropa, nimba mel, “Enim Got nga kongun wamp mbᵾ, Got kᵾn mundmong itᵾi! Enim wamp kurpa na, nuim na mbᵾ pora, tᵾn nga Got nga mbi paka rundᵾi!” nitim.

Sipsip Waⱡ Ei Amp Tᵾmba Elinga, Rᵾng Mam Mat Oⱡa Urum

Na kum tep pit mel, wamp puⱡi mᵾk rok molk, ik nᵾtmᵾn uⱡ ei mel nᵾnmᵾn. Nu ndi ropa, ik nᵾtᵾm uⱡ ei mel nitim. Kona muⱡ gaⱡa nimba enim. Uⱡ mbᵾ etpa nᵾk mel, “Tᵾn Got nga mbi paka rundamᵾn kᵾn, Nuim tᵾn nga Got Ronduⱡ Purum ei, akup Nuim Mumuk muⱡangga! Tᵾn akup ambuⱡpa paⱡpᵾn numan kai pilpᵾn, Got elim nga mbi paka rondpᵾn i tᵾmin. Ni kᵾn, Sipsip Waⱡ ei nga amp tᵾmba ui ei, nondpa oⱡnga kᵾn, amp tᵾmba ei nga, tᵾpa kun etpa morum. Got ndi, amp ei, wal pᵾki kurmᵾⱡa eng nui kai kat, amp ei pᵾkangga nimba ngurum. Wal pᵾki kᵾⱡ, eng nomba rᵾⱡang mba etᵾm kᵾⱡ. Wal pᵾki kurmᵾⱡa eng nui kai kᵾⱡ to tᵾndpa mel, Got nga uⱡ kun kai mbᵾ, pep rok etmin wamp kᵾⱡ,” nᵾtᵾng.

Wote, anggelo ti ndi, na kundpa nimba mel, “Nim ndi, ik nᵾnt ei mel, mon rui! ‘Sipsip Waⱡ ei nga amp tᵾmba kona ila rᵾng nuing wamp mbᵾ Got ndi, wi rangga uing wamp mbᵾ, numan kai pilik muⱡing,’” nitim. Wote, na kundpa nimba mel, “Ik ei, Got nga ik kupa mendpᵾⱡ ei!” nitim.

10 Wote na ndi, anggelo ei nga kᵾmp puⱡ ila mura rop mondᵾp, mbi paka rundimp nᵾmp elimba mel, wote anggelo ei ndi, na kundpa, nimba mel, “Nim ndi, uⱡ ei mel iti nᵾti mon! Na nim nga kongun wu ei, wote nim nga ᵾngᵾnᵾl mbᵾ nga kunda kongun endᵾt. Enim ndi, Jisas nga mbi paka rondᵾk mondᵾk pilik itᵾi! Tᵾn ndi, Got tenda ei nga mint, elim nga mbi paka rundmᵾn. Tᵾn pᵾtmᵾn uⱡ ei, Muⱡnga Wingti ei ndi, wamp mat muⱡnga nguⱡnga kᵾn, pai nok wamp ik mbo endᵾtmin,” nitim.

Wu Ti Kng Os Kurᵾmᵾⱡa Mbuⱡ Ila Murum

11 Wi muⱡ ei, kumba tilinga, kng os kurmᵾⱡa ti kᵾndᵾr. Wu ti, kng os mbuⱡ ming ila morum ei nga mbi tek, ei mel nitmin. Wu ei ndi, kongun mbᵾ rᵾp Etpa Kai Mondpa, Uⱡ Kupa mbᵾ mint etpa. Wote wamp mbᵾ, kᵾmp tᵾtᵾm uⱡ ei, rᵾk rᵾk uⱡ kun kai mbila mint pilpa el rorum. 12 Wu ei nga mong raⱡ, ndip mel nomba rᵾⱡang purum ila, wu nuim mumuk mbᵾ nga wᵾna mondurmin ei nga puⱡi, elim nga peng ila mundrum. Wu ei nga kᵾng ila mbi ti rok mondrung ei, elim mint pᵾtᵾm. Wamp elpa mbᵾ ndi, mbi ei pili napᵾtmin mon! 13 Elim nga wal pᵾki roⱡ pᵾkrᵾm kᵾⱡ mema ndi, ⱡumᵾi rurum kᵾⱡ mbi tek, Got Nga Ik, ei nᵾtmin. 14 Muⱡ kona ila el wu mbᵾ, kng os kurᵾmᵾⱡa mbuⱡ ila molk, wu ei, pep rok akil tek purung. Wu mbᵾ nga kᵾng mbila, wal pᵾki kurmᵾⱡa eng nui kai mat, pakᵾk purung. 15 Wote, koiya rukᵾm mul ti, wu kuimbal purum ei nga keta ila ekit omba kᵾn, mᵾi kona wamp mbᵾ pora, koiya ruⱡ ei ndi, ropa int pendᵾmba. Got nga ronduⱡ ei, tᵾmbᵾⱡ mel ambuⱡpa moⱡpa, wamp mbᵾ rᵾp etmba. Wote, wain mong mbᵾ, kambilik nim nim nduⱡmina, wain nu ei, tᵾk nimba ekit orung ni mel, Got Ronduⱡ Purum ei nga popᵾⱡ ei, i ku etmba. 16 Wu ei nga wal pᵾki roⱡ na, kᵾmp mbᵾⱡaimp na mbila, elim nga mbi ei, mon rok mondrung ei ndi, nimba mel, “Wu nuim mumuk mbᵾ nga Wu Nuim Mumuk ei, wote wu nuim mbᵾ nga Wu Nuim ei morum!” nitim.

17 Wote, na moⱡᵾp kᵾndᵾr mel, anggelo ti, kona ant ila oⱡa morum ei ndi, wi ronduⱡ ropa, nimba mel, “Oⱡa waka ila kᵾi mbᵾr nᵾk andᵾrmᵾn mbᵾ kundpa, Got nga rᵾng mam ila ning wᵾi! 18 Wu nuim mumuk mbᵾ nga kᵾng na, el wu nuim na, el wu na, kng os na, kng os mbuⱡ ila mormin wu na, kindmant kongun wu na, wote wu mat roldᵾnga mormin wu na, wu kurpa na, wote wu nuim na mbᵾ nga pora, kᵾng mint mbᵾ ok, ning wᵾi!” nitim.

19 Wote, na kᵾndᵾr ei, mel rakra ni kᵾn, mᵾi kona wu nuim mumuk mbᵾ kᵾn, en enim nga el wu na mbᵾ kunda ok, mᵾk rok pora ndurᵾng. Wu mbᵾ ndi, kng os ila murum wu ei kᵾn, elim nga el wu mbᵾ kᵾn, el iting pilik ok morung. 20 Wote, wu ei ndi, ik kol painui wu ni kᵾn, mel rakra ni kᵾn kunda, tᵾpa kan ngurum. Ik kol painui wu ni ndi, mel rakra nga kuimp keta ila itim. Uⱡ rᵾpndi mat kol ropa wamp mat, mel rakra ei nga tip timal tᵾtᵾng mbᵾ kᵾn, wote mel rakra ei nga to tᵾndᵾk mim etᵾng mel ei nga, mbi paka rondᵾk etᵾng wamp mbᵾ, uⱡ rᵾpndi kol mbᵾ ndi, tᵾpa tiki pundrum. Wote, mel rakra ni kᵾn, ik kol painui wu ni kᵾn, kont mondᵾk tᵾk, ku salpa ila nip mam ti, nomba kondpa guk nimba murum ila, tᵾk mana ndurᵾng mbᵾ kᵾn, kng owa rakra na, mel raⱡ akup kont morum mbila mint. Mel raⱡ rok tᵾk, ndip mam ti nomba, ku salpa kᵾn kondpa petᵾm kut ila mana ndurᵾng. 21 Wu ti, kng os ila oⱡa murum wu ni nga koiya rukᵾm mul ti, keta ila ekit orum ni ndi, mel rakra ei nga wamp mbᵾ, ropa konduⱡnga kᵾn, kᵾi mbᵾ ndi ruk ok, wamp mbᵾ nga kᵾng mint mbᵾ, nok pilᵾng kondrung.

Copyright information for `MED