Revelation of John 20

Seitan Ni, Kan Manga Pelinga Pana 1,000 Enim

Wote, na kᵾndᵾr mel, anggelo ti, muⱡ kona wak ropa mana urum ei ndi, mᵾi ila kut tepa mint purum ei nga ki ei kᵾn, kan sen mam kat kᵾn, ambuⱡpa mepa urum. Anggelo ei ndi, wimbᵾ mam ti tᵾpa, imp moⱡpa, tepa morum ei, unt kor nga murum ei, wimbᵾ ei nga mbi ei, Seitan. Ni kᵾn, anggelo ei ndi, wimbᵾ ni, pana 1,000 kan manga ila piyangga nimba, tᵾpa kan ngurum. Wote, anggelo ni ndi, Seitan ropa tᵾpa, kut mam ila mana ndupa pendpa, kumba ropa gi ndurum. Ei nambuⱡ emel, Seitan ndi, aldpa wamp mbᵾ kᵾn andpa, ik kol rui narᵾpa, kan manga ila piyangga, pana 1,000 omba pangga nimba itim. Wote, pana kᵾⱡ omba pangga kᵾn, kan tinga nduk mundangina kᵾn, ui onunga kot ila ekit omba, wamp mbᵾ kᵾn, kona mbila andᵾmba. Wote, na kᵾndᵾr mel, wu nuim mbᵾ nga rᵾpᵾndi pol mat tetᵾm ila, wu mat morung. Got ndi, wu kᵾⱡ wamp kᵾmp ti, uⱡ ei nga ronduⱡ ngurum. Wote, na kᵾndᵾr mel, wamp minal Jisas mondᵾk pilik, mbi paka rondᵾk, Got nga ik ei, ronduⱡ ambᵾⱡᵾngina, el rui wamp mbᵾ ndi rok, nuim kan puⱡa rorung mbᵾ nga min mbᵾ kᵾndᵾr. Wamp mbᵾ ndi, mel rakra ei kep, mel rakra ei nga to tᵾndᵾk mim etᵾng mel ei, mbi paka rundi nandrᵾng. Wote, mel rakra ei nga tip timal ei, en enim nga mᵾi ombᵾl na, ki na mbila kep, ti natᵾtᵾng ku. Wamp mbᵾ, ⱡoprᵾk kont molk, Kraist kᵾn rᵾp rok, pana 1000 wu nuim mumuk ralk morum. Wamp ⱡoprᵾk kont mul uⱡ ei, wamp kᵾⱡ ndi, kuimp tek etᵾng. (Wote, wamp wei mat unt korung nimbᵾ, pana 1000 omba puⱡnga kᵾn, ⱡoprᵾk kont morung.) Wamp namin kat kuimp tek ⱡoprᵾk kont morung wamp kᵾⱡ memp kai mbᵾ tᵾk, wingti ralk muⱡeing. Wote wamp ndip kona ila puk kormᵾn ei nga ronduⱡ ei ndi, wamp rᵾⱡaip kᵾⱡ ᵾmbᵾⱡi nambuⱡmba mon! Wamp kᵾⱡ Got kᵾn Kraist raⱡ nga pris rᵾⱡaip kᵾⱡ molk, Kraist elim kᵾn wamp rᵾp itangina, pana 1000 omba mba.

Seitan Ni, Ndip Kona Ila Mindil Nonum

Wote, pana 1,000 ei omba pangga kᵾn, kut kumba ei, tᵾk mundangina, Seitan ni, kan manga wak ropa omba mba. Seitan ndi, andpa mᵾi kona mbila wamp mbᵾ kᵾn, ik kol ropa kongun etmba uⱡ ei, Gok kᵾn, Meikok kona raⱡ nga wamp rᵾⱡaip mbᵾ kᵾn etmba. Nu ᵾldᵾ ila ku ok minal tetᵾm ni mel, wamp rᵾⱡaip minal ei, i iteing nimba Seitan ndi, tᵾpa tenda etmba. Ei kᵾn, wamp rᵾⱡaip minal mbᵾ ndi, Got nga kona peng numan ngurum ei kᵾn, elim nga wamp mbᵾ kunda, tᵾk pok etᵾk muⱡᵾngina, wi muⱡ ila ndip ti mana omba kᵾn, wamp mbᵾ nomba pora ndurum. 10 Ni kᵾn, wamp mbᵾ, ik kol ropa ngurum Seitan ei, Got ndi, ropa tᵾpa, ndip kut mam ku salpa nomba, kondpa morum ila mana ndurum. Kona ila, mel rakra ni kᵾn, ik kol painui wu ei kᵾn kunda, ndip ila unt ropa mundrum. Wote, mel raldika kᵾⱡ, rumbuldi rᵾnggilmᵾ raⱡ, rᵾk rᵾk mindil nok mint muⱡing.

Wamp Kᵾmp Tᵾmba Ui Ei Ekit Omba

11 Wote, na kᵾndᵾr mel, rᵾpᵾndi pol kurᵾmᵾⱡa mam ti titim ila wamp ti murum. Ni kᵾn, wu ei nga kuimp keta ila muⱡ mᵾi raⱡ wei ai etᵾnggil muⱡᵾnggil kona ti, ti nᵾtᵾtᵾm. 12 Ni kᵾn, na kᵾndᵾr mel, wamp nuim na, kurpa na, korung nimbᵾ pora, rᵾpᵾndi pol titim ei nga, kuimp keta ila anggᵾtᵾng. Ei kᵾn, buk titim nimbᵾ, kumba tᵾtᵾng. Wote buk ti, wamp kont mul buk ni kumba tᵾtᵾng. Ni kᵾn, wamp korung nimbᵾ, en enim nga uⱡ etᵾng mbᵾ mel, buk ila mbi rok mana ndurᵾng ei mel, kᵾmp titim. 13 Ni kᵾn, num kuta ei ndi, wamp kuⱡi mormin mbᵾ pora, yant ndupa ngurum. Wote wamp kᵾmp titim wu ei ndi, wamp mbᵾ nga pora, uⱡ etᵾng mbᵾ mel, pilpa kᵾmp titim. 14 Ei kᵾn, wamp kuⱡi uⱡ ei ndi, wamp tepa morum mbᵾ mepa omba ngurum. Wote wamp kuⱡi mbᵾ mormin kona ei ndi, i ku etpa, elim nga tepa morum wamp mbᵾ mepa omba ngurum. 15 Ni kᵾn, rᵾk rᵾk kont mba mul buk ila mbi muⱡi nᵾmbrᵾm wamp ei, ndip mam ei nga kut ila, tᵾpa mana ndurum.

Copyright information for `MED