Romans 1

Na Pol, Kraist Jisas nga kongun kindmant wu ei, Got nga nombuⱡa rung wu ei, muⱡeimp nimba to ropa mondpa, wote Rᵾnang Ik Kai ei, nᵾmp ngeimp nimba wi ropa titim. Rᵾnang Ik Kai ei, Got ndi, unt kor nga ei kᵾn, elim nga painui wu mbᵾ nimba, mᵾi ropa ngᵾⱡnga, Buk Wingti ila mon rorung. Ei kᵾn, Rᵾnang Ik Kai ei ndi, nitim. Got nga kangᵾm Nuim Jisas Kraist, mᵾi kona ila mana omba, mbo wu rᵾrᵾm. Wu ei, Depit nga pundun ei. Got elim ndi, tᵾn nga Nuim Jisas Kraist ni, wamp kui nga uⱡ ila ⱡoporpa tᵾpa, oⱡa mundrum. Ei kᵾn, Got kangᵾm nga ronduⱡ ei, Muⱡnga Wingti ei ndi, tᵾn kᵾn etpa mot ndurum. Jisas Kraist elim mbi ou tᵾmba. Ei nga, Got nga wamp poⱡ ti uⱡ ei ndi, nombuⱡa rᵾng wu kongun ei na ngurum. Ei nambuⱡ emel, wamp rᵾⱡaip elpa mbᵾ ndi, elim kᵾn pep rok, mondᵾk pileing nimba itim. Enim wamp rᵾⱡaip elpa mbᵾ, Got elim ndi, wi ropa tᵾpa, Jisas Kraist nga wamp randrum ku.

Enim Rom kona ila mormin wamp kᵾⱡ, Got ndi, numan ngumba, wi ropa tᵾpa, elim nga wamp wingti rᵾndrᵾm. Tᵾn nga Tipam Got ei kᵾn, Nuim Jisas Kraist raⱡ nga wamp pol ti uⱡ ei kᵾn, moⱡpa kundi uⱡ raⱡ, enim kᵾn kan piyangga!

Pol Rom Wamp Kᵾⱡ Kᵾn Mbi Nitim

Na kuimp tep, na nga Got kᵾn angge nᵾnt. Ei, Jisas Kraist kᵾn, wote enim wamp mbᵾ pora kundᵾp nᵾnt. Ei nambuⱡ emel, mᵾi kona ila wamp mbᵾ ndi, enim nga mondpa pili ei, pilik pora ndurmin. Na nga numan orunga ronduⱡ mundᵾp, Got nga kongun endᵾt. Wote, elim nga kangᵾm nga Rᵾnang Ik Kai ei, nᵾndᵾp et. Got ei ndi, pilpa morum ei, na ndi, enim wak rui narᵾp, enim pilip mint mor. 10 Got nga numan kai ila nombuⱡa mam ti, kandpa tᵾpa ngangga, enim kᵾn int uimp. Ei nga, na rᵾk rᵾk, Got kᵾn atinga rop, mawa etᵾp mor.

11 Na ndi, enim omp kᵾnimp ei nga, na numan elinga mor. Ei nambuⱡ emel, na omp enim kᵾn, Got nga ik nimp. Ei kᵾn, Muⱡnga Wingti nga memp kai ei ndi, etpa ronduⱡ mundᵾmba. 12 Ei kᵾn, na ndi, pᵾnt ei, na nga mondpa pili uⱡ ei ndi, enim tᵾpa rᵾpᵾndangga. Wote, enim nga mondpa pili uⱡ ei ndi, na tᵾpa rᵾpᵾndangga. 13 Wote, na nga angmᵾn enim pilᵾi! Na ndi, wamp rᵾⱡaip elpa mbᵾ etᵾp, numan ropᵾl rondᵾr ei mel, enim kᵾn i ku itimp nᵾmp pilip kᵾn, ui ou ndupa, na enim kᵾn nᵾmp pendᵾp, omp kᵾnimp nit. Ni wote, uⱡ mat ndi, na imp murum.

14 Ei kᵾn, Grik wamp na, wamp rᵾⱡaip elpa na, pilpa kungᵾndi wamp na, wamp kurpa mbᵾ kᵾn pora, Got nga ik ei, nᵾmp nguimp ei nga, na pilip mor. 15 Ei kᵾn, enim Rom wamp mbᵾ kᵾn, i ku etᵾp, Rᵾnang Ik Kai ei, nᵾmp nguimp ei nga numan enim.

Rᵾnang Ik Kai Ei Got Nga Ronduⱡ Ei

16 Kraist nga Rᵾnang Ik Kai ila, Got nga ronduⱡ ei petᵾm. Got nga ronduⱡ ei ndi, mondᵾk piling wamp mbᵾ etpa tᵾmba. Jura wamp mbᵾ kuimp tepa etpa tᵾmba, wote wamp rᵾⱡaip elpa mbᵾ kunda ku etpa tᵾmba. Ei nga, na Rᵾnang Ik Kai ei nimp ei, nga pipil iti natᵾtᵾm. 17 Rᵾnang Ik Kai ila Got ndi, elim nga uⱡ kun kai wamp mbᵾ kᵾneing nimba, tᵾpa mot ndurum. Tᵾn mondpᵾn pilamina, Got ndi, tᵾn wamp kun kai kᵾⱡ nimba. Ei nga, rᵾk rᵾk mondpa pili uⱡ ila mint muⱡᵾmin. Buk Wingti ndi, nimba mel, “Mondpa pilim wamp ei, Got ndi, kundpa wamp kun kai ei nimba, wote wamp ei, uⱡ nga kunt nga kont moⱡpa mint mba,” nitim.

Uⱡ Kit Etmin Wamp Mbᵾ Nga

18 Got nga popᵾⱡ ei, muⱡ ila tepa omba, Got nga uⱡ kun kai mbᵾ, tᵾk mbuⱡ ngurmin wamp mbᵾ kᵾn, etpa mot ndurum. Wamp mbᵾ, en enim nga uⱡ kit etmin ei ndi, Got nga ik kupa ei, tᵾk pei mondrung. 19 Got ndi, wamp mbᵾ mbun ngurum. Ei nambuⱡ emel, Got nga uⱡ mbᵾ, mo ropa ti natᵾtᵾm. Got elim ndi, wamp mbᵾ kᵾn, uⱡ mbᵾ etpa mot ndurum. 20 Unt Got ndi, muⱡ mᵾi raⱡ wengᵾndᵾpa itim ei kᵾn omba, akup ei kᵾn, elim nga ombul ᵾmbul uⱡ ei kᵾn, moⱡpa mint pi uⱡ ronduⱡ ei, mot nilinga kᵾndᵾrmᵾn. Got elim nga mel itim mbᵾ, kandᵾp pora ndunmᵾn. Ei nga, wamp ti ndi, kᵾni nakᵾndᵾr nimba, mel kapⱡa mon. 21 Wamp mbᵾ ndi, Got morum ei pᵾtmin. Wote Got elim, tᵾk ou ndui nandᵾk, angge kep nandᵾk, wamp mbᵾ numan roldᵾnga pilik moⱡᵾngina, en enim nga numan orunga rumbᵾⱡ morum. 22 Wamp mbᵾ, en enim pilpa kungᵾndi ti, tep mormun ku nᵾk, pilik etmin. Ei wote, en enim nga numan orunga wᵾlᵾ purum. 23 Got rᵾk rᵾk kont morum ei nga mbi paka rondunmᵾn ku nᵾk, wote wamp mel ti, mim etᵾk mondᵾk, got kol rui mbᵾ nga mbi paka rondurmun, wote kui kᵾi na, wimbᵾ na mbᵾ nga mbi paka rondurmun ku.

24 Ei kᵾn, Got ndi, wamp mbᵾ, en enim uⱡ kit mbᵾ etmin ei mel iteing nimba, wak rorum ei kᵾn, wamp ᵾngᵾn ti nga kᵾng orunga, kandpa kum pindi uⱡ kit minᵾpi mbᵾ elingina, en enim nga kᵾng orunga etpa kit morum. 25 Got nga ik kupa ei wak rok, ik kol mbᵾ pilik tᵾk, wote Got mel mbᵾ mim itim wu ei nga, rᵾk rᵾk tᵾk ou nduk, kindmant inding ei kelik, aldpa elim mim itim mel mbᵾ, tᵾk ou nduk, kindmant endᵾtmin. Got nga mbi ei, rᵾk rᵾk tᵾk ou nduk paka rᵾi! Ei kupa!

26 Ei nga, nambuⱡ emel, Got elim ndi, wamp mbᵾ kandpa wak roⱡnga, uⱡ minᵾpi mbᵾ etmin. Ei amp mbᵾ ndi, wu mbᵾ kᵾn, rᵾp rok pi uⱡ kun ei, wak rok, amp mat kᵾn rᵾp rormin. 27 Wu mbᵾ ndi, i ku etᵾk, amp kᵾn pi uⱡ kun ei wak rok, en enim nga wu ᵾngᵾnᵾl mat kᵾn, rᵾp ruing ei nga numan minal ngurmin. Uⱡ pipil iti mbᵾ elingina, en enim punt ropa mbun kit mbᵾ nguⱡnga tᵾtmin. 28 Wote, Got elim pilik mbi nduing ei nga tᵾk, pei munduⱡina, Got ei ndi, kandpa wak roⱡnga, wamp mbᵾ, en enim numan kit pitmin uⱡ mbᵾ etmin. 29 Etpa kit mundi uⱡ, wapra rui uⱡ, kit kunt iti uⱡ, wᵾlᵾk rui uⱡ, popᵾⱡ mundi uⱡ, wamp rok, tip keta etᵾk, punt tᵾk andᵾk, ik mbuldung nᵾk andᵾk etmin. Uⱡ kit mbᵾ, wamp mbᵾ nga numan ila peka roⱡᵾngina etmin. 30 Meka rok, Got tᵾk pei mondᵾk, kara pok, ik polk, wamp mbᵾ en enim nga kᵾng orunga, paka rok uⱡ kit mat itimin nᵾk pilik, tipam mamᵾl mbᵾ nga ik teng ndui nandᵾk etmin. 31 Numan mbo pili napᵾtmᵾn mondpa pili nᵾpili nga puⱡ wamp molk, wamp kont kuⱡi nalk andurmin. 32 Got nga mi ik ei ndi nimba mel, wamp ndi, uⱡ i iti mbᵾ eng ndam, kuⱡing nᵾtᵾm. Ik ei pilik kelik, wote uⱡ kit minal mbᵾ etᵾk, wote wamp mat uⱡ kit etmin mbᵾ nga kaip nᵾndᵾtmᵾn ku.

Copyright information for `MED