Romans 12

Got Nga Kongun Ila Tᵾn Nga Kᵾng Numan Mbᵾ Pᵾkᵾ Ngᵾmin

Angmᵾn, Got nga wamp kont kaimp kul uⱡ ei, tᵾn kᵾn minal ngurum. Ei nga, na enim kᵾn ik ei mel nᵾnt! En enim nga kont mormin kᵾng kᵾⱡ, Got nga kongun ila mendpᵾⱡ ruk puk kongun endᵾk, kalk tindiⱡim mundanggina mura mbᵾ oⱡa pangga, Got ndi, pilpa kai pilangga! Uⱡ ei mel eng ndam, Got nga mbi ei kupa paka runding. Mᵾi kona ila wamp mbᵾ ndi, uⱡ enmin mbᵾ, pep rui nᵾrᵾi! Wote, Got ninim rukᵾr tana, enim nga numan ei tᵾpa, elim nga numan petᵾm ei mel pendᵾmba. Wote Got ndi, uⱡ kun kai, kᵾndᵾk etᵾm, elim ndi, numan ngurum uⱡ mbᵾ, enim nga rukᵾr orunga nimba mot ndangga pilᵾi.

Wote, Got nga pol ti uⱡ na ngurum ei nga, na enim kᵾn ei mel nᵾnt. Enim nga numan ei ndi, en enim mek oⱡa pi nᵾpᵾi! Ei kelik, enim nga numan orunga mek mana puk, Got ndi, mondᵾk pili uⱡ enim ngurum ei nga, kᵾmp tᵾk pilᵾi! Tᵾn nga kᵾng tenda ila kump, ki, kum mel kᵾⱡ petᵾm. Mel kᵾⱡ nga kongun elpa elpa etmin. Uⱡ ei mel ku, tᵾn wamp puⱡi mormun ei nga, wote Kraist nga kᵾng tenda ila rᵾmp ndupᵾn mormun. Wamp tenda ti, elim mendpᵾⱡ muⱡi nambrᵾm, ti ndi, ti ambuⱡnga mint mormun. Got ndi, elim nga wamp pol ti uⱡ ei, tᵾn kᵾn kongun elpa elpa kᵾmp tᵾpa wei gem ngurum. Ei mel ku, kongun itimin. Got nga ik nindmin ndam, mondpa pili tep mormin to ila ku itmin. Wamp rᵾng itmin ndam, ei mel ku itmin, Ik mbo rundmin ndam, ei mel ku itmin. Wote, wamp mat nimbun numan orunga ronduⱡ mundmin ndam, ei mel ku itmin. Wote, wamp nam ti, elim nga mel mbᵾ mok romba ndam, ou ndupa ngangga! Wote, wamp nam ti, kongun kuimbal moⱡum ndam, kongun ronduⱡ mundᵾk itᵾi. Wote, wamp nam ti, wamp elpa mbᵾ kont kun ndam, ambulk palk itᵾi.

Wamp numan ngui uⱡ ei, enmin nᵾk itᵾi! Wote enim kep nui nᵾnᵾi! Uⱡ kit mbᵾ tᵾk mbuⱡ nguk, uⱡ kai mbᵾ ronduⱡ mundᵾk ambulk muⱡᵾi! 10 Kraist nga angmᵾn mormun nᵾk, ti ndi ti numan minal nguk, wote ti tᵾpa ou ndui uⱡ ei nga numan nguk itᵾi 11 Enimp mundi namᵾndᵾk, kongun ronduⱡ mundᵾk itᵾi! Nuim ei nga kongun kindmant indi uⱡ ei, numan tenda pilik itᵾi! 12 Wakᵾt Nuim ei omba, enim etpa tᵾmba nᵾk, mondᵾk pilik nokundᵾk mormin uⱡ ei ndi, etpa numan kai pindangga, mbun om mbila ronduⱡ puk molk, wote atinga rᵾk rᵾk rok muⱡᵾi! 13 Got nga wamp ti, mel ti mon ndum ndam, nim nga tekun mun mel ei ngui! Wote, nim nga manga ila wamp tᵾma mat ong ndam, rawe etkᵾn tᵾkᵾn, rᵾp iti!

14 Wamp mat ndi, enim etᵾk kit mondung ndam, Got ndi, etpa kit mundangga nᵾk atinga rui nᵾrᵾi mon! Wote Got ndi, wamp mbᵾ memp pindangga nᵾk atinga rᵾi!

15 Wamp mat kᵾnangina ambulk palk moⱡung ndam, mbᵾ kᵾn kup etᵾk i ku etᵾk muⱡᵾi! Wote wamp mat ka etᵾk moⱡum ndam, ei mel ku rᵾp rok ka itᵾi! 16 Enim nga numan orunga pᵾtᵾn ei mel ku, wamp ᵾngᵾnᵾl mbᵾ kᵾn, i ku etᵾk pilᵾi! Wote, enim ndi, pilpa kungᵾndi ronduⱡ kat pᵾnt nᵾk, enim nga kᵾng orunga mek oⱡa pi nᵾpᵾi. Enim nga numan orunga mek mana ok, kongun kel mbᵾ numan nguk itᵾi!

17 Wamp nam ti, enim kᵾn uⱡ ⱡawa ti em ndam, ⱡawa ei punt rui narᵾk kandᵾk kui itᵾi! Wamp mbᵾ ndi, kandᵾk kai pᵾtmin uⱡ mbᵾ nga itᵾi! 18 Nim nga numan orunga namba uⱡ pin mbᵾ mel ronduⱡ mondkᵾn kongun etkᵾn, wamp mbᵾ kᵾn pora, numan wang ndukᵾn muⱡi. 19 Na nga wamp angmᵾn kᵾⱡ, enim wamp na ti ndi, uⱡ ti enim kᵾn etpa kit mondum ndam, punt rop timin nᵾk uⱡ ti iti nᵾtᵾi! Enim wak rangina, Got nga popuⱡ ei ndi, elim kongun itangga! Ei nambuⱡ emel, Buk Wingti ila ei mel nᵾtᵾm,

“Nuim ei ndi, nimba mel, uⱡ kit nga punt rui uⱡ ei, na nga kongun ei. Uⱡ kit em wamp ei, na nanim ndi punt ruimp,” nitim.
20 Wote, Buk Wingti ei ndi, nimba mel,

“Nim nga el rui wamp ei, kump kun kuⱡum ndam, rᵾng ngui! Nu waka kuⱡum ndam, nu ngui! Uⱡ ei mel itana, elim uⱡ ⱡawa nim kᵾn etᵾm ei nga pipil kuⱡmba!” nitim.
21 Uⱡ kit mbᵾ ndi, nim tᵾpa mana ndui nᵾndangga mon! Wote, uⱡ kai mbᵾ mint itana kᵾn, uⱡ kai mbᵾ ndi, uⱡ kit mbᵾ, tᵾpa mana ndangga!

Copyright information for `MED