Romans 14

Nim Nga Wamp Angina ei Kᵾmp Ti Nᵾti

Wamp ti nga mondpa pili ei ronduⱡ ndam, pi napᵾm ei kandᵾk, wamp ei rawe etᵾk tᵾi! Wote, wamp ei nga elim nga ik elpa mat nim ndi, ik mat ni nᵾni! Wamp ti, elim nga mondpa pili ronduⱡ purum ei ndi, kng rᵾng mbᵾ roldᵾnga norum. Wote wamp ti, elim nga mondpa pili ei, ronduⱡ pi napᵾrᵾm ei ndi, kim mint norum. Kng rᵾng mbᵾ roldᵾnga norum wamp ei ndi, kng rᵾng raⱡ nui nᵾni wamp ei tᵾpa, pei mundi nᵾmᵾndangga! Omba kim mint nui wamp ei ndi, mel mbᵾ roldᵾnga nui wamp ei nga puⱡ ei, akpa ni nᵾnangga! Ei nambuⱡ emel, wamp ei Got ndi, etpa rukᵾr titim. Nim wamp nam mor nᵾkᵾn wamp ti nga kindmant wamp ei nga puⱡ ei kᵾmp tin? Kapⱡa moⱡmba, muna mon ei, el elim nga nuim ei ndi, kᵾmp tᵾmba. Ei nga, kapⱡa moⱡmba, ei nambuⱡ emel, Wu Nuim ei, elim ndi, itangga kapⱡa moⱡmba!

Wamp ti ndi, ant ui mbᵾ nga ant ti, tᵾpa ou ndurum. Wote, wamp ti ndi, ant ui mbᵾ nga ant ti, elpa elpa mon nimba pᵾtᵾm. Ei kᵾn, wamp ei ndi, elim nga numan ila ronduⱡ pilpa morum ei mel ku, pilpa muⱡangga. Wamp ti ndi, ant ui mbᵾ nga ant tenda ti nga keⱡ rondpa moⱡum ndam, ei Nuim ei kᵾn, tᵾpa ou ndupa etᵾm. Wote, wamp nam ti ndi, kng rᵾng mbᵾ nga roldᵾnga norum ndam, Got tᵾpa ou ndupa etᵾm. Nambuⱡ emel, rᵾng ei nga, Got kᵾn angge nᵾtᵾm. Wote, wamp nam ti ndi, kng rᵾng mbᵾ nga mel ti, mowi petᵾm ndam, Nuim ei, tᵾpa ou ndupa kᵾn angge nᵾtᵾm. Wamp ti, elim kont moⱡmba uⱡ ei, el elim nga uⱡ ti mon, muna wamp ti korum uⱡ ei, el elim nga uⱡ ti, mon ku. Tᵾn kont mbun muⱡmin ndam kep, tᵾn kuⱡmin ndam kep, tᵾn Nuim ei nga, mendpᵾⱡ muⱡmin. Ei kᵾn, tᵾn kont muⱡmᵾn ndam kep, kuⱡmᵾn ndam kep, tᵾn Nuim ei nga, mendpᵾⱡ muⱡmin.

Ei nga, Kraist koⱡpa, wote ⱡoporpa kont murum uⱡ ei, tᵾn wamp kui kont mbᵾ nga, tᵾn nga Nuim moⱡmba ei nga itim. 10 Ei kᵾn, nim ndi, nambuⱡ emel, nim nga angina ei nga uⱡ etᵾm mbᵾ, kᵾmp tᵾtᵾn? Wote nim ndi, nambuⱡ emel, nim nga angina ei, tᵾkᵾn pei mundi nᵾmᵾndi? Tᵾn pᵾkᵾ, Got nga kuimp keta ila ᵾnggᵾlamina, elim ndi, tᵾn kᵾmp tᵾmba. 11 Buk Wingti ila petᵾm ik ei ndi, nimba mel,

“Wu Nuim ei ndi, nimba mel, na rᵾk rᵾk kont mbo mor puⱡ wu ei, wamp mbᵾ ndi, ok na nga kuimp keta ila mura koptᵾm rok mondᵾk, wamp mbᵾ ndi, elpa elpa nᵾk para nduk, Na Got kupa mor, ei ning,” nitim.
12 Ei kᵾn, tᵾn wamp tenda tenda nimba ei ndi, Got nga kuimp keta ila moⱡpᵾn, tᵾn nga uⱡ etmun mbᵾ, elim kᵾn para ndupᵾn nimin.

Nim Nga Angina Ei Itana, Uⱡ Kit Ila Mana Pi Nᵾpangga

13 Ei kᵾn, tᵾn wamp ti ndi, ti nga puⱡ ei kᵾmp ti nᵾtamin. Wote, enim ndi itangina, wamp ᵾngᵾn ti ndi, ti ropa, wote uⱡ kit ila mana mba, ei nga pilik itᵾi! 14 Na Nuim Jisas ei kᵾn, numan tenda purum uⱡ ei ndi, rᵾng ti, Got nga kuimp keta ila kit muⱡi nambrᵾm nᵾmp pᵾt. Wote wamp ti ndi, rᵾng ti kit nimba mondpa pᵾtᵾm ndam, wamp ei nga numan ila mendpᵾⱡ, rᵾng ei kit morum. 15 Wote, nim nga angina ei ndi, rᵾng ti, Got nga kuimp keta ila, rᵾng ti ⱡar morum nangga, nim nun ndam, wote nim ndi, nim nga angina mbun kandᵾk, tᵾkᵾn nguin. Wote nim ndi, angina numan ngui ngᵾngᵾn mon! Ei kᵾn, rᵾng ei ndi, wamp ti etkᵾn ⱡar mundana, wamp ei uⱡ kit ila mana pi nᵾpangga mon! Nambuⱡ emel, Kraist wamp ei nga nindpa kurum. 16 Ei nga, enim ndi, uⱡ kun kai mat emin nᵾk pilangina kᵾn, wamp mat ndi, tᵾk pei munding. Ei nga, enim pilik kun etᵾk itᵾi! 17 Ei nambuⱡ emel, Got nga wamp tᵾpa, mumuk rui uⱡ ei, uⱡ kun kai na, moⱡpa kundi uⱡ na, numan kai pili uⱡ mbᵾ, Muⱡnga Wingti ei ndi, tᵾpa ngorum. Wote rᵾng nok, nu nok etmin uⱡ mbᵾ ndi, Got nga wamp tᵾpa mumuk rui uⱡ ei, tᵾpa ngui nganggᵾrᵾm. 18 Wote, wamp nam ti ndi, uⱡ kun kai mat etpa, Kraist nga kindmant endim ndam, wamp ei ndi, Got etpa numan kai pindangga, wote wamp mat ndi, kandᵾk kaip ninding.

19 Ei kᵾn, tᵾn rᵾk rᵾk, ronduⱡ mundpᵾn, wamp ᵾngᵾnᵾl mbᵾ kᵾn, numan wang ndupᵾn, wote mondpa pili uⱡ ei, etᵾp ronduⱡ mundmin! 20 Kng rᵾng mbᵾ nga nᵾkᵾn, Got nga kongun ei, rokᵾn kungᵾndi nᵾngᵾndi! Got nga kuimp keta ila rᵾng mbᵾ pora, kai mint etᵾm. Wote nim angina ei ndi, rᵾng ti, Got nga kuimp keta ila rᵾng ti ⱡar morum nangga nun ndam, wote nim ndi, nim nga angina mbun kandᵾk, tᵾkᵾn nguin, nim etkᵾn ⱡawa mundin. 21 Wote, nim kng rᵾng na, nu wain na mbᵾ nokᵾn, wote uⱡ elpa elpa mat itana, nim nga angina uⱡ kit mbila, mana mba ei nga, nim uⱡ mbᵾ iti nᵾti!

22 Uⱡ ei nga, ninim mondᵾk pin uⱡ ei, nim ninim kᵾn, nim nga Got ei kᵾn, ronduⱡ ambulkᵾn muⱡi! Wamp ti ndi, elim nga uⱡ etᵾm ei, kun punum nimba, numan mbun ti, pili napᵾtᵾm wamp ei, kai pilangga! 23 Wote, wamp ti ndi, el elim kng rᵾng mbᵾ nga ti, numan ou ndupa pilpa norum ndam, Got ndi, wamp ei nga puⱡ ei, nimba kit mondᵾmba. Ei nambuⱡ emel, wamp ei, elim nga mondpa pili uⱡ ila iti natᵾtᵾm. Ei kᵾn, uⱡ ti mondpa pili uⱡ ila, iti natᵾtmin uⱡ ei, uⱡ kit mint etᵾm.

Copyright information for `MED