Romans 16

Pol Ndi, Wamp Ou Ndupa Rawe Etpa Titim

Na ndi, numan ngump pᵾnt ei, tᵾn nga amp kimᵾn Pipi enim ndi, etᵾk kai mundᵾi! Nambuⱡ emel, amp ei nga kongun etᵾm ei, tᵾn nga Senkreiya Got nga rapa tenda wamp kᵾⱡ tᵾpa rapᵾndrᵾm. Na ndi waldᵾnt ei, enim ndi, Nuim ei nga mbi ila, amp Pipi kᵾn rawe etᵾk nᵾk, tᵾk tek muⱡᵾi! Ei uⱡ kai ei, Got nga wamp mbᵾ ndi etmin. Wote, elim uⱡ mat etmba ei nga mbun em ndam, enim ndi, tᵾp rᵾpᵾndᵾi! Nambuⱡ emel, elim ndi, wamp ou ndupa tᵾpa rapundupa, wote na tᵾpa rᵾpᵾndrᵾm ku. Na nga numan kai pili uⱡ ei, enim ndi, amp Prisila kᵾn wam Akuila raⱡ, rawe etᵾk nᵾk ngᵾi! Wamp raⱡ, na kᵾn kongun tenda ila Kraist Jisas nga endᵾtmᵾn. Wamp raⱡ, na rᵾk rᵾk tᵾk rapundkᵾⱡ kuⱡᵾnggil ei nga, nokundkᵾⱡ mormbil. Ei nga, na ndi mint, angge raⱡ kᵾn, ni nᵾnimp mon! Wote Got nga rapa tenda, kona elpa elpa ila mormin wamp rᵾⱡaip elpa mbᵾ ndi, kᵾmp kᵾm wamp raⱡ kᵾn angge ning. Wote enim ndi, na nga numan kai pili uⱡ ei, wamp raⱡ nga manga ila tᵾk tenda etᵾk, atinga rormin wamp kᵾⱡ kᵾn, rawe etᵾk nᵾk ngᵾi! Enim ndi, na nga numan kai pili uⱡ ei, wu Epenatus kᵾn, rawe etᵾk nᵾk ngᵾi! Na nga wu mᵾn kupa ei, Eisiya wamp kᵾⱡ nga kona peng ila, wu ei Kraist kᵾn kuimp tepa mondpa pitim. Enim ndi, na nga numan kai pili uⱡ ei, amp Mariya kᵾn, rawe etᵾk nᵾk ngᵾi! Elim ndi, kongun ou ndupa mindil nomba, enim tᵾpa rᵾpᵾndrᵾm. Enim ndi, na nga numan kai pili uⱡ ei, wu Andronikas kᵾn, amp Juniyas raⱡ kᵾn, rawe etᵾk nᵾk ngᵾi! Wamp raⱡ, na kᵾn rᵾⱡaip tenda, wote kan manga ila kunda pitmin. Nombuⱡa rᵾng wamp kᵾⱡ nga ruk ting ila, wamp raⱡ mbi morum. Wote, wamp raⱡ kuimp tekᵾⱡ, Kraist kᵾn mondᵾk pᵾtᵾnggil, wote na akil tep mondᵾp pit. Enim ndi, na nga numan kai pili uⱡ ei, wu Ampliyatus kᵾn, rawe etᵾk nᵾk ngᵾi! Wu ei, na nga ei, na kᵾn mᵾn mondpᵾⱡ Nuim ei kᵾn morumbᵾⱡ. Enim ndi, na nga numan kai pili uⱡ ei, wu Urpanus kᵾn, rawe etᵾk nᵾk ngᵾi. Ei tᵾn nga Kraist nga kongun ila kunda etmin. Wote, numan kai pili uⱡ ei, wu Stakis rawe etᵾk nᵾk ngᵾi ku. Ei na kᵾn mᵾn mondrum. 10 Enim ndi, na nga numan kai pili uⱡ ei, wu Apeles kᵾn, rawe etᵾk nᵾk ngᵾi! Kraist kᵾn pep rorum ei nga mbi morum. Enim ndi, na nga numan kai pili uⱡ ei, wu Aristopulas nga manga tenda ila wamp kᵾⱡ, rawe etᵾk nᵾk ngᵾi ku! 11 Enim ndi, na nga numan kai pili uⱡ ei, wu Erotiyan rawe etᵾk nᵾk ngᵾi! Ei na nga rᵾⱡaip tenda ei. Enim ndi, na nga numan kai pili uⱡ ei, wu Narsisus nga manga tenda ila wamp kᵾⱡ, rawe etᵾk nᵾk ngᵾi! Wamp kᵾⱡ, Nuim ei kᵾn mormin. 12 Enim ndi, na nga numan kai pili uⱡ ei, amp Traipina kᵾn Traiposa raⱡ, rawe etᵾk nᵾk ngᵾi! Amp raⱡ, Nuim ei nga kongun minal etmbil raⱡ. Wote enim ndi, na nga numan kai pili uⱡ ei, amp Persis kᵾn, rawe etᵾk nᵾk ngᵾi ku! Amp ei, Nuim ei nga kongun ou ndupa etᵾm. 13 Enim ndi, na nga numan kai pili uⱡ ei, wu Rupas kᵾn, rawe etᵾk nᵾk ngᵾi! Wu kai ei ndi, Nuim ei nga kongun ronduⱡ mondpa etᵾm. Wote, elim nga mam ei, na nga mam kunda ku, rawe etᵾk nᵾk ngui! 14 Enim ndi, na nga numan kai pili uⱡ ei, wu Asinkritus, wu Pleikon, wu Ermes, wu Patropas kᵾn, wu Ermas kᵾn, enim nga ᵾngᵾnᵾl kᵾⱡ, enim kᵾn mormin kᵾⱡ kᵾn, rawe etᵾk nᵾk ngᵾi! 15 Enim ndi, na nga numan kai pili uⱡ ei, wu Pilolokus kᵾn, amp Juliya kᵾn, wu Nerus kᵾn, elim nga kimᵾn ei kᵾn, Olimpas kᵾn, Got nga wamp mormin mbᵾ kᵾn kunda, rawe etᵾk nᵾk ngᵾi! 16 Tᵾn Got nga wamp uⱡ etmin ei ndi, enim wamp tenda tenda nᵾk, wamp ᵾngᵾnᵾl mbᵾ ki ngᵾi! Wote, Kraist nga rapa tenda ila wamp mbᵾ ndi, numan kai pili uⱡ ei, enim kᵾn, rawe etᵾk nᵾk ngunmin.

Pol Nga Man Ik Nimbᵾ, Nimba Ngurum

17 Wamp angmᵾn! Na ndi, enim kᵾn mon rop nᵾnt ei. Wu mat ndi, wamp mbᵾ etᵾk oi kan pendᵾk, enim pilik tᵾtᵾng ik ei, tᵾk roi ndurmin. Wote, wamp nga mondpa pili etᵾk, kit mondunmin wu mbᵾ, enim ndi, tᵾk mbuⱡ ngᵾi! 18 I etmin wu mbᵾ ndi, tᵾn nga Nuim Kraist ei nga kongun indi nandᵾtmᵾn mon! En enim nga kᵾng orunga uⱡ kit mbᵾ, pep rok. Wote, ik tᵾngᵾn iti mbᵾ kᵾn, ik kunt rui na mbᵾ etmin ei ndi, wamp numan ronduⱡ pi nᵾpi mbᵾ, etᵾk kit mondurmin. 19 Enim ndi, Got nga ik ei, pep rormin timan ik ei, wamp mbᵾ kᵾmp kᵾm pilik pora ndurmin. Ei nga, na enim kᵾn numan enim. Wote na ndi, numan ngont ei, enim ndi, uⱡ kun kai ei, pilik kun etᵾk kᵾn, wote uⱡ kit mat iting ei nga pili nᵾpiling mon.

20 Wote, Got elim numan wang ndui uⱡ ei nga puⱡ wu ei, ui onunga wei kot ila, Seitan kambilpa nem nem ndupa, enim nga kᵾmp mana orunga mondᵾmba. Tᵾn nga Nuim Jisas nga numan wang ndui uⱡ ei, enim kᵾn piyangga!

21 Na nga kongun tenda wu Timoti ndi, elim nga numan kai pili uⱡ ei, enim kᵾn, rawe etpa nimba mundnum. Wote Lusiyas kᵾn, Jeison kᵾn, wote Sosipater na nga wamp rᵾⱡaip kᵾⱡ kunda, en enim nga numan kai pili uⱡ ei, enim kᵾn, rawe etᵾk nᵾk mundunmᵾn ku.

22 Na Tertiyas, na Pol nga keta tᵾp kᵾn, mon ei ront. Nuim ei nga mbi ila, na nga numan kai pili uⱡ ei, enim kᵾn, rawe etᵾp nᵾmp mundunt.

23 Gaiyus nga numan kai pili uⱡ ei, enim kᵾn, rawe etpa nimba mundnum ku. Elim nga manga ila wamp mbᵾ i ku etpa, na rᵾp etpa kai etᵾm. Wote Got nga rapa tenda ila wamp mbᵾ, i etpa rᵾp ku etᵾm. Erastas ei, gapman ei nga moni kongun peng ou ila morum. Tᵾn nga ᵾngᵾn, Kuartas raⱡ nga numan kai pili uⱡ ei, enim kᵾn, rawe etkᵾⱡ nᵾkᵾⱡ mundunmbil ku. 24 Tᵾn nga Wu Nuim Jisas Kraist nga numan wang ndui uⱡ ei, enim kᵾn kᵾmp kᵾm kan piyangga! Ei kupa.

25 Wote Got ndi, enim nga mondpa pili etpa ronduⱡ mundᵾmba. Ei kᵾn, na ndi, elim nga ik nᵾnt ei ndi etmba ei, Jisas Kraist nga ik ei, elim nga ik mo ropa tetᵾm ik ni unt ui mbila, rᵾk rᵾk mo ropa titim. Ik ni, akup Got ndi, tᵾpa pena ila pendnᵾm. Ei kᵾn akup, Got nga mbi paka rundamin! 26 Akup Got elim rᵾk rᵾk morum ei ndi ninim. Wote tᵾn ndi, wamp rᵾⱡaip mbᵾ kᵾmp kᵾm kundᵾp nᵾnmᵾn. Got elim ndi, ik ei, painui wu mbᵾ kundpa nilinga, mon rorung ei nga wamp mbᵾ ndi, ik mo ropa pi ei, pilik kun etᵾng. Got ndi, i itim ei, wamp rᵾⱡaip mbᵾ ndi pora, elim mondᵾk pilik kᵾn, elim nga ik ei, pep reing. 27 Jisas Kraist nga mbi ila, Got tenda pilpa kungᵾndi nga Puⱡ Wu ei nga mbi ou ei tetᵾm uⱡ ei, uⱡ nga kᵾnt nga pepa mint pangga! Ei kupa.

Copyright information for `MED