Romans 2

Got Ndi, Wamp Kᵾmp Tᵾmba

Uⱡ ei nga, na ndi, enim wamp tenda tenda nᵾmp kundᵾp nᵾnt. Nim nga uⱡ ⱡawa etᵾn mbᵾ, mo ruin mel, kapⱡa mon. Enim ndi, wamp mat nga uⱡ ⱡawa etmin mbᵾ, ki ruⱡ rokᵾn nᵾtᵾn. Uⱡ ei ndi, nim nga orunga, ninim nᵾkᵾn kit mondrᵾn. Nambuⱡ emel, wamp ti nga nᵾndkᵾn purᵾn, ninim uⱡ ⱡawa mbᵾ nga etᵾn ku ei ka! Wote tᵾn pᵾtmᵾn ei, wamp uⱡ kit etmin mbᵾ, Got ndi, wamp kᵾmp tᵾtᵾm uⱡ ei, kun mint. Nim ndi, wamp mat nga uⱡ ⱡawa etmin mbᵾ kandkᵾn nᵾndᵾtᵾn, wote nim ninim uⱡ ⱡawa etᵾn mbᵾ ka! Nim ndi, Got nga wamp kᵾmp tᵾtᵾm uⱡ ila mo rokᵾn, nung nᵾkᵾn, kapⱡa pin ei? Got ndi, nim uⱡ etᵾn mbᵾ nga numan ropᵾl rᵾn nimba, mepa mba, nim uⱡ kai mbᵾ etpa, rᵾp etpa nokundpa orum uⱡ ei, uⱡ wei nᵾwa ti nᵾkᵾn pᵾn ei?

Wote, nim nga numan orunga, ku raⱡ nga numan ropᵾl rui narᵾn. Uⱡ en ei ndi, nim nga mbun kit tin ei nga etkᵾn ndo ndᵾn. Ei kᵾn, ui mam ti pem kᵾn, Got ndi, nombuⱡa mam kun ila wamp kᵾmp tᵾmba. Ei kᵾn, Got nga popᵾⱡ ei ndi, nim punt ropa ngumba. Wote, ei kᵾn ku, wamp nga uⱡ etmin mbᵾ mel, Got ndi, punt ropa, elpa elpa ngumba. Wamp mat rᵾk rᵾk uⱡ kai mbᵾ, ronduⱡ mundᵾk etᵾk, Got kᵾn muⱡ kona rᵾk rᵾk moⱡpᵾn, mbi ou tᵾpᵾn, kont muⱡmin nᵾk, nombuⱡa mam ei, kurᵾk etmin wamp mbᵾ, Got ndi, uⱡ nga kᵾnt nga kont mul uⱡ ei, tᵾpa ngumba. Wote wamp mat, en enim nga orunga mint pilik, Got nga ik kupa mbᵾ, tᵾk mbuⱡ nguk, uⱡ kit mbᵾ, pep rok etmin wamp mbᵾ, Got nga popᵾⱡ ei ndi, punt ropa ngumba. Mbun mindil mam mat uⱡ kit etmin wamp mbᵾ ting. Jura wamp mbᵾ, kuimp tek tangina kᵾn, wote wamp rᵾⱡaip elpa mbᵾ ting ku. 10 Wote Got ndi, wamp namin mat, mᵾi kona molk, kai mondᵾk, mbi ou tᵾk, numan wang nduk teing nimba ngumba. Ei uⱡ kai mbᵾ mint etmin Jura wamp mbᵾ, kuimp tepa ngumba, wote wamp rᵾⱡaip elpa mbᵾ ngumba ku. 11 Ei kᵾn, Got ndi, wamp mbᵾ pora, tou tenda ila mint kᵾmp tᵾtᵾm.

12 Wamp rᵾⱡaip elpa mbᵾ, Got nga mi ik mbᵾ pili napilik, uⱡ kit etmin wamp mbᵾ, kit muⱡing. Wote Jura wamp mbᵾ, Got nga mi ik mbᵾ pilik kᵾn, uⱡ kit etmin wamp mbᵾ, Got nga mi ik ei ndi, kᵾmp tᵾmba. 13 Mi ik mbᵾ, kum ei ndi, mendpᵾⱡ pilik moⱡung wamp mbᵾ, Got nga kuimp keta ila kun muⱡi nᵾmbᵾⱡing mon! Wote, wamp namin mat, mi ik ei pep rong mbᵾ mint, Got ndi wamp kun kai nimba. 14 Ni kᵾn, wamp rᵾⱡaip elpa mbᵾ, mi ik ei pili napᵾtmᵾn. Wote, en enim nga numan ei ndi, mi ik ila petᵾm uⱡ mbᵾ etmin. Wamp mbᵾ mi ik ei, pili napᵾtmᵾn ndam kep, mi ik ei, en enim kᵾn pilik pora ndurmᵾn mel etᵾm. 15 Uⱡ i etmin mbi ora ndupa, Got ndi, wamp mbᵾ nga mundmong rukᵾr orunga mi ik mbᵾ, mon ropa pinditim. Wamp mbᵾ nga uⱡ etmin mbᵾ, en enim nga rukᵾr orunga numan mbo ei ndi, uⱡ mat nimba kit mondpa mat, en enim nga orunga tᵾpa rapundpa nᵾtᵾm. 16 Na ndi, Rᵾnang Ik Kai nᵾt ila nga nitim. Ui ou ei, pem kᵾn, Got ndi, wamp kᵾmp ti uⱡ ei, Jisas Kraist ngangga kᵾn, wamp mbᵾ nga kitim tip ila, ik mo ropa petᵾm mbᵾ, tᵾpa pena ila pendᵾmba.

Mi Ik Ei Ndi, Jura Wamp Mbᵾ Tᵾpa Rapᵾndᵾmba Nᵾk Pᵾtᵾng.

17 Wote, enim Jura wamp mbᵾ, mi ik pep rormin uⱡ ei ndi, en enim tᵾpa rapᵾndᵾmba nᵾk pᵾtmin. En enim nga mbi paka rok nᵾk mel, tᵾn Got nga wamp mendpᵾⱡ kᵾⱡ nᵾtmin. 18 Enim ndi, Got nga numan pᵾtᵾm uⱡ ei mel pᵾnmᵾn nᵾk, enim ndi, mi ik mbᵾ pilpᵾn pora ndurmun. Ei nga, uⱡ kun kai mbᵾ mint, numan ngurmun nᵾtmin. 19 Enim ndi, pilik nᵾk mel, “Mi ik ila nga pilpa kungᵾndi na, ik kupa na mbᵾ nga puⱡ ei, na pilip pora ndur nᵾk kᵾn, mong ti wamp mat kapⱡa, nombuⱡa mam ora nduimp nᵾkᵾn etᵾn. Wote, rumbᵾⱡ ila mormin wamp mbᵾ rᵾⱡang ei, ora ndurun ku. Enim ik mbo wamp mel molk kᵾn, pilpa kungᵾndi iti nᵾti wamp na, kangambuⱡa kel na mbᵾ ik mbo endᵾk etmin. 21 Enim ndi, wamp mat ik mbo endᵾk kᵾn uⱡ ei kapⱡa. Wote enim ndi, en enim mbo endᵾtmin ye! Enim ndi, wamp mbᵾ kundᵾk, kindᵾp nui nᵾnᵾi nᵾk kᵾn, wote en enim kindᵾp normin ei ka! 22 Nim ndi, wamp mbᵾ kundkᵾn, wu amp ndenggᵾⱡa ndui uⱡ ei mon nᵾkᵾn. Wote, ninim wu amp ndenggᵾⱡa ndui uⱡ ei etᵾn ei ka! Wote nim ndi, kur kit mun rui nᵾrᵾi nᵾkᵾn. Wote, ninim kur manga mbila mel mbᵾ, kindᵾp nokᵾn mint morun ei ka! 23 Enim nga mbi ou ting uⱡ ei nga mbi paka rok, nᵾk mel, “Tᵾn Got nga mi ik mbᵾ pᵾtmᵾn,” nitmin. Wote uⱡ i etmin ei ndi, Got nga mi ik mbᵾ, rok puⱡa rok, Got nga mbi ei, etᵾk kit mondᵾk etmin. 24 Buk Wingti ei ndi, ik puⱡ ei nga nimba mel, “Enim Jura wamp mbᵾ uⱡ ⱡawa etmin ila nga, wamp rᵾⱡaip elpa mbᵾ ndi, Got nga mbi ei nᵾk kit kit mondurmin,” nᵾtᵾm.

25 Mi ik kᵾⱡ pep run ndam, kᵾng kupti uⱡ ei kai. Wote nim ndi, mi ik kᵾⱡ rokᵾn puⱡa run ndam, nim nga kᵾng ei koptᵾng kᵾn, nim kᵾng kupti nᵾpti mel etᵾn. 26 Uⱡ ei nga, wu mat kᵾng kupti napᵾtmin mbᵾ ndi, mi ik kai mbᵾ, kun pep rormin ndam, wu ei, kᵾng kupti wu mat nga mbi morum ei mel, wu ei nga mbi ei morum ku. 27 Enim Jura wamp mbᵾ nga mi ik kᵾⱡ nga buk mat tetᵾm ei nga, pilik kᵾng kopᵾtmin. Wote, nim mi ik kᵾⱡ, rokᵾn puⱡa run ndam, wote kᵾng kupti napᵾtᵾtᵾng wu mbᵾ ndi, mi ik mbᵾ pep ropa kᵾn, nim kᵾmp tᵾmba.

28 Wote, wu ti keta kᵾng ila, Jura wamp kupa nimba moⱡpa kᵾn, Jura wamp nga mbi kupa ila muⱡi nambᵾⱡᵾm ndam, kᵾng kupti uⱡ ei kᵾng ekit orunga etᵾm. 29 Wote, wu ti numan rukᵾr orunga, Jura nimba mbi moⱡum ei, Jura kupa ti morum. Kᵾng kupti uⱡ ei, wamp nga mundmong rukᵾr orunga etmin. Ei nga, Muⱡnga Wingti ei ndi, wamp nga numan rukᵾr orunga mbo ronduⱡnga etmin. Mi ik kᵾmp tᵾk kandᵾrmin uⱡ ila mon! Wamp nga kuimp keta ila mbi ou ting iti natᵾtmᵾn mon! Got nga kuimp keta ila mbi ou ting ei nga etmin.

Copyright information for `MED