Romans 6

Uⱡ Kit Mbᵾ Rok Kona Kᵾn Kraist Kᵾn Kont Muⱡi

Ei nga, tᵾn akup namba uⱡ itmin? Got nga wamp poⱡ ti uⱡ ei, kakina itangga nimbun, tᵾn uⱡ kit mbᵾ, rᵾk rᵾk etᵾp mint mbin ei? Ei kapⱡa mon! Tᵾn uⱡ kit etmin mbᵾ, rop kondpᵾn pora ndurmun. Ei kᵾn, akup tᵾn uⱡ kit mbᵾ, aldpa iti nᵾtmin. Tᵾn Kraist kᵾn tᵾk tenda etᵾk nu tᵾndᵾtᵾng ei kᵾn, Kraist kurum uⱡ ila, nu titmin ei kᵾn tᵾn kurmun ku. Tᵾn nu titmin uⱡ ila, Kraist Jisas on etᵾk angᵾndᵾtᵾng on kut ila kunda koⱡpᵾn mana purmun. I itmᵾn uⱡ ila, Kraist ni koⱡpa pitim ei, Tipam nga uⱡ eng nui mbᵾ nga ronduⱡ ila, ⱡoporpa tᵾpa mundrum. Ei mel, tᵾn i ku etpᵾn uⱡ nga kunt nga kont mba mul uⱡ ei moⱡpᵾn mint mbin.

Nambuⱡ emel, Kraist kurum uⱡ ila, tᵾn kurmun ku. Ei mel ku, wote ⱡoporpa tᵾpa mundrum ei mel, tᵾn i ku etpa, ⱡoporpa tᵾpa mundangga kont mbun muⱡmin. Tᵾn pᵾnmᵾn ei, tᵾn nga mbo kᵾng unt nga kᵾⱡ, Kraist elim nga nde peta ila rok kondrung ei kᵾn pendᵾk rorung. I etᵾng uⱡ ei ndi, tᵾn nga uⱡ kit etmin kᵾng unt nga kᵾⱡ nga ronduⱡ ei, kuⱡangga kᵾn, uⱡ kit mbᵾ nga aldpa kindmant indi nᵾndmin. Ei nambuⱡ emel, wamp ti, korum ant ei kᵾn, wamp ei uⱡ kit nga ronduⱡ ila, aldpa imp muⱡi nambrᵾm.

Wote, tᵾn Kraist kᵾn kurmun ei nga, elim kᵾn kont mbun muⱡmin nimbun mondᵾp pilip mormin. Ei nambuⱡ emel, akup tᵾn pᵾnmᵾn ei, Kraist ni koⱡnga, wote ⱡoporpa tᵾpa mundrum. Ei nga, aldpa kuⱡi naⱡᵾmba, wote wamp kui nga uⱡ ei ndi, wu ei, rᵾp iti natᵾmba mbᵾ. 10 Ei nambuⱡ emel, Jisas tᵾngᵾnda kurum uⱡ ei ndi, uⱡ kit nga ronduⱡ ei, tᵾpa mana ndupa, wote akup, kont mba morum uⱡ ei, Got kᵾn morum.

11 Ei mel ku, enim uⱡ kit mbila nga kolk, wote Kraist kᵾn kup etᵾk mormin uⱡ ila, Got kᵾn kont mbun mormun nᵾk pilik muⱡᵾi! 12 Ei kᵾn, uⱡ kit mbᵾ ndi, enim nga mbo kᵾng kᵾⱡ, rᵾp iti nᵾtangga nᵾk, kᵾng kᵾⱡ nga kandpa kom pindi uⱡ kit mbᵾ kandᵾk, yant ti nᵾteing. 13 Muna enim nga kᵾmp ki na mbᵾ nga ti uⱡ kit itangga nᵾk, nguk rukᵾr ndui nᵾndᵾi! Enim koⱡᵾp kont purmun nᵾk pilik, enim nga min ei kᵾn, kᵾng kᵾⱡ kᵾn pᵾkᵾ, Got nga uⱡ kun kai mbᵾ itᵾi! 14 Ei nambuⱡ emel, enim mi ik ei nga mana orunga muⱡi nambᵾrmᵾn. Enim Got nga wamp poⱡ ti uⱡ ei nga mana orunga mormin. Ei nga, uⱡ kit mbᵾ ndi, enim rᵾp iti nᵾtangga!

Enim Uⱡ Kun Kai Mbᵾ Nga Kindmant Wamp Muⱡᵾi

15 Ei kᵾn, tᵾn etᵾp itmin mel nant? Tᵾn mi ik ei nga mana orunga, muⱡi nambᵾrᵾm mon! Got nga wamp poⱡ ti uⱡ ei nga mana orunga mormun! Ei kᵾn, uⱡ kit mbᵾ etpᵾn mint mbin ei? Ei mon! 16 Enim pilik mormin ei, enim wamp nam ti ndi, elim wu nuim ti kᵾn, ngumba rukᵾr ndupa, elim kindmant wamp muⱡimp nᵾtᵾm ndam, wamp ei, wu nuim ei nga kindmant wamp kupa ei morum. Ei mel ku, wamp ei, uⱡ kit mbᵾ nga kindmant endᵾtᵾm ndam, wamp kui nga uⱡ ei, punt ropa ngorum. Wote, Got nga ik ei, teng ndurum ndam, Got nga kuimp keta ila wamp ei kun kai ei morum. 17 Enim unt uⱡ kit mbᵾ nga kindmant wamp mbᵾ morung. Wote Got nga ik ei, mbo endᵾtᵾng ei kᵾn, ik kupa ei, mundmong ila pilik tᵾtᵾng. Ei kᵾn, akup Got kᵾn angge namᵾn! 18 Enim uⱡ kit mbᵾ nga kan ila pelingina kᵾn, Got ndi, kan tinga ndupa mundrum ila, akup uⱡ kun kai mbᵾ nga kindmant wamp mbᵾ mormin.

19 Na ndi, enim nga numan ei, ronduⱡ pi napᵾrᵾm ei nga kandᵾp kᵾn, ik wei wei etᵾk pilik ting ei mel nᵾnt. Enim unt ui mbᵾ kᵾn, en enim nga kᵾng kᵾⱡ pᵾkᵾ, uⱡ minᵾpi kit mbᵾ nga kindmant wamp muⱡmin nᵾk nguk rukᵾr ndurung. Uⱡ etᵾng ni mel ku, akup enim nga kᵾng kᵾⱡ, uⱡ wingti kun kai mbᵾ nga kindmant wamp muⱡmin nᵾk nguk rukᵾr ndᵾi. 20 Enim unt uⱡ kit mbᵾ nga kindmant wamp morung ni kᵾn, uⱡ kun kai ei nga kindmant wamp muⱡi nambrᵾng. 21 Unt nga uⱡ mat, akup pipil kᵾnmin mbᵾ etᵾng ei kᵾn, namba mel ei tᵾtᵾng? Uⱡ mbᵾ etᵾng ila, wamp kui nga uⱡ ei mepa urum. 22 Wote akup, enim Got ndi, uⱡ kit nga kan ila tinga ndupa tilinga, enim Got nga kindmant wamp mormin. Uⱡ ei nga puⱡ ei, enim Got nga uⱡ mbᵾ mint etᵾk molk kᵾn, uⱡ nga kᵾnt nga kont mul uⱡ ei ting. 23 Ei kᵾn, uⱡ kit ei ndi, punt ropa, wamp kui nga uⱡ ei ngorum. Wote, Kraist Jisas tᵾn nga Nuim kᵾn tᵾp tenda etᵾp mormᵾn uⱡ ila, Got ndi tᵾn uⱡ nga kᵾnt nga kont mul uⱡ ei, wei gem ngurum.

Copyright information for `MED