Romans 8

Muⱡnga Wingti Ei Ndi, Tᵾn Peng Ambrᵾm

Ei nga, tᵾn Kraist Jisas kᵾn rᵾmp nilinga mormun wamp mbᵾ, ik ti ndi omba, tᵾn uⱡ kit etmᵾn nimba mel mon. Tᵾn Muⱡnga ei ndi, etpa kont munduⱡnga, Kraist kᵾn rᵾmp ndup mormun. Ei kᵾn, uⱡ kit iti uⱡ, wote wamp kui nga uⱡ raⱡ ila tᵾn etpa titim. Mi ik ei ndi, wamp ti, etpa kun kai mundi namᵾndrᵾm. Nambuⱡ emel, wamp nga kᵾng ila uⱡ kit iti uⱡ ei pelinga, mi ik ei, pep ru-ing ei nga ronduⱡ ti mon. Got ndi, uⱡ mbᵾ kapⱡa etᵾm ei ndi, uⱡ ei pora, nduimp nimba kᵾn, elim nga kangᵾm tᵾpa munduⱡnga, wamp nga kᵾng tᵾpa mᵾi kona ila urum. Got ndi, uⱡ ei itim ei ndi, tᵾn nga uⱡ kit etmin mbᵾ pora, wak ruimin. Ei kᵾn, mi ik ei nga uⱡ kun kai, Muⱡnga ndi, nᵾtᵾm ik mbᵾ, tᵾn kᵾn peka ropa peng piyangga!

Kᵾng ei nga mint pilik mormin wamp mbᵾ, kᵾng orunga uⱡ mbᵾ nga mint pilik etmin. Uⱡ ei mel, wote Muⱡnga orunga pilik mormin wamp mbᵾ ndi, Muⱡnga numan ngumba uⱡ mbᵾ nga pilik pep rok etmin. Wamp nam ti ndi, kᵾng ei nga numan ngorum uⱡ mbᵾ em ndam, wamp kui nga uⱡ ei kandᵾk tᵾtmᵾn. Uⱡ ei mel ku, wamp nam ti, Muⱡnga Wingti ei nga numan ngorum uⱡ mbᵾ ei ndam, wamp kont mul uⱡ ei kᵾn, numan wang ni uⱡ ei kᵾn, kandpa tᵾmba. Wamp nam ti ndi, kᵾng orunga numan ngurum uⱡ mba etᵾm ndam, Got kᵾn el rui wamp mel morum. Nambuⱡ emel, Got nga mi ik ei, pep rui narᵾrᵾm. Wote, pep romba mel, kapⱡa mon ku!

Wamp mat kᵾng orunga uⱡ etmin mbᵾ, Got ndi, numan ngui nganggᵾrᵾm. Wote, enim kᵾng orunga uⱡ mbᵾ nga wamp kat, muⱡi nambᵾrmᵾn. Enim Muⱡnga ei nga wamp mbᵾ mormin. Got nga Muⱡnga ei, enim kᵾn morum. Ei nga, wamp nam ti, Kraist nga Muⱡnga ei, tepa muⱡi nambᵾⱡᵾm wamp ei, Kraist nga wamp ti mon. 10 Uⱡ kit ei ndi, enim nga kᵾng kᵾⱡ ropa kondrum. Wote, Kraist enim kᵾn moⱡum ndam, enim wamp kun kai kᵾⱡ mormin. Wote, enim nga Muⱡnga ei, kont mba moⱡmba. 11 Got ndi, Jisas ⱡoporpa kont mundrum Muⱡnga ei, enim kᵾn rukᵾr moⱡum ndam, Muⱡnga ei ndi ku, enim nga kᵾng kui ila rukᵾr morum muⱡnga ei, etpa kont mundᵾmba.

12 Ei kᵾn, angmᵾn! Tᵾn punt mondᵾp mormin. Ei nga, kᵾng orunga uⱡ mbᵾ nga numan mundmin mel mon. 13 Kᵾng orunga uⱡ mbᵾ nga numan nguk eng ndam, enim kuⱡing. Wote, enim Muⱡnga Wingti nga ronduⱡ ila kᵾng orunga uⱡ mbᵾ, rok kondᵾk moⱡung ndam, enim kont puk muⱡing. 14 Wamp nam ti ndi, Got nga Muⱡnga ei nga numan ngurum uⱡ mbᵾ, pep ropa em ndam, wamp ei etpa, Got nga kangambuⱡa mondᵾmba. 15 Wote, Got nga Muⱡnga ngurum ei ndi, enim tᵾpa kan ngumba kindmant randpa, enim etpa mundmong endpa iti natᵾtᵾm mon! Muⱡnga ei ndi, enim etpa Got nga kangambuⱡa randrᵾm. Wote, Muⱡnga ei nga ronduⱡ ila, tᵾn Got kᵾn ka etpᵾn nimbun mel, “Na nga Wuta! Na nga Wuta ye!” nᵾtmᵾn. 16 Got nga Muⱡnga ei ndi omba, tᵾn nga muⱡnga ei, tᵾpa rapundᵾⱡnga kᵾn, tᵾn elim nga kangambuⱡa kᵾⱡ mormᵾn nᵾtᵾm. 17 Wote, tᵾn akup elim nga kangambuⱡa wamp raⱡᵾp mormun ei kᵾn, Got nga memp kai elim nga wamp mbᵾ nga tendᵾtᵾm uⱡ mbᵾ, tᵾn kapⱡa timin. Wote, Kraist nga memp kai, Got ndi, tinditim mbᵾ, tᵾn kapⱡa timin ku. Wote, Kraist nga mindil titim uⱡ kᵾⱡ, tᵾn timin ndam, tᵾn Kraist nga mbi ou titim uⱡ ei mel timin ku.

Akil Tepa Rᵾⱡang Eng Nui Uⱡ Ei

18 Akup na pᵾnt mel, wote ui tila uⱡ eng nui kai mbᵾ, Got ndi, tᵾn kᵾn etpa mot ndumba uⱡ ei, oⱡa ndupa tetᵾm. Uⱡ ei, akup nga ui ila mindil tᵾnmin uⱡ mbᵾ, mel kapⱡa mon. 19 Got nga mel wengᵾndupa itim mbᵾ ndi, ui ti nokundᵾk mormin ei, Got ndi, elim nga wamp kupa mot ndangga, kᵾning ei nga nokundᵾk mormin. 20 Wote, mel wengᵾndupa itim mbᵾ, etpa kit murum ei, en enim nga numan ila mon! Wote Got ndi, pilinga itim. Wote uⱡ tenda ti, nokundᵾk mormin ei, Got elim ui pinditim ila kan tinga ndangga, Got nga wamp mbᵾ, kona eng rui ila ambulk palk tᵾk tenda etᵾk muⱡing.

22 Nambuⱡ emel, tᵾn akup pᵾnmᵾn ei, Got ndi, itim mel mbᵾ pora, amp kangambuⱡa mindil normin ni mel, mindil nok mint mormin. 23 Wote, mel wengᵾndupa itim mbᵾ, mint mindil nui nanmin. Wote, tᵾn wamp namin mat, Got nga Muⱡnga ei kuimbal, tᵾn kᵾn wei gem ngurum mbᵾ kunda, rukrᵾng orunga munt mindil tᵾtmᵾn. Ei nambuⱡ emel, Got ndi, tᵾn etpa elim nga kangambuⱡa randpa, tᵾn nga kᵾng kᵾⱡ, etpa kont mundᵾmba ei nga nokundpᵾn mormᵾn. 24 Tᵾn Got ndi, tᵾpa elim nga wamp randᵾmba nᵾmp nokundurmᵾn uⱡ ila, tᵾn etpa titim. Wote, tᵾn nokundurmᵾn mel ei, kandurmun ndam, mel ti nukundmin mel mon. Wamp nam ti ndi, nokundrum mel ei, kandpa pora ndupa, aldpa nokundpa mint morum ei? 25 Wote, tᵾn kᵾni nakᵾndᵾrmᵾn mel mbᵾ, nokundᵾp mormin ndam, tᵾn nokundpᵾn raka nᵾmp mormun.

26 Ei mel ku, tᵾn ronduⱡ pi napᵾrmᵾn ei kᵾn, Muⱡnga ei ndi omba, tᵾn tᵾpa rapᵾndrᵾm. Tᵾn atinga ruimin pilip rundpᵾn moⱡmina, Muⱡnga ei elim, tᵾn nga rukᵾr orunga moⱡpa atinga rondpa tᵾpa, tᵾn nga uⱡ nit petᵾm mbᵾ nga kandpa, Got ndi, tᵾpa rᵾpᵾndangga nimba ik nᵾtᵾm. 27 Wamp numan kandpa kil wu Got ei ndi, Muⱡnga ei nga ik nᵾtᵾm uⱡ ei kandrum. Nambuⱡ emel, Muⱡnga ei ndi, Got nga numan ei, pep ropa wamp mbᵾ, tᵾpa rᵾpᵾndangga nimba, atinga rondrum.

28 Wote, tᵾn pᵾtmᵾn ni, wamp nam ti, Got elim nga numan pᵾtᵾm uⱡ mbᵾ, pep rangga nimba wamp ei, Got numan ngumba kᵾn, namba uⱡ mat ei, elim kᵾn orum mbᵾ, elim etpa kai mondᵾmba onum nimba pᵾtᵾm. 29 Nambuⱡ emel, wamp namin mat, Got ndi, kuimp tepa to ropa titim mbᵾ, tᵾpa elim nga kangᵾm mel mendpᵾⱡ ei muⱡeing nimba, apᵾrpa tᵾpa mundrum. I etpa kᵾn, elim nga kangᵾm tᵾpa, ᵾngᵾnᵾl kat nga kuimbal mondᵾmba pilpa itim. 30 Wote Got ndi, elim nga unt to ropa mundrum wamp mbᵾ, elim ndi, wi ropa rukᵾr titim. Wote, wi ropa rukᵾr titim wamp kᵾⱡ, mbi tepa kun kai nitim. Wote elim ndi, mbi tepa kun kai nitim kᵾⱡ, elim nga uⱡ eng nui mbᵾ teing nitim.

31 Got ndi, tᵾn kᵾn uⱡ mbᵾ mel etᵾm ei nga, tᵾn ndi, namba nimin? Got ei, tᵾn nga morum ndam, wamp nam ti ndi, tᵾn tᵾpa mana ndumba? 32 Got ndi, elim nga kangᵾm imp muⱡi nambᵾⱡpa, tᵾn wei ngurum. Elim nga kangᵾm ei, tᵾn wei ngurum ndam, mel mat, tᵾn kᵾn wei ngui ngangᵾmba ei? 33 Got nga kᵾmp ropa titim wamp mbᵾ nga nimba kun mundi uⱡ ei, Got el elim morum. Ei nga, wamp nam ti ndi, wamp kᵾⱡ nimba kit mondᵾmba? 34 Wamp nam ti ndi, wamp kᵾⱡ kit muⱡeing nimba? Jisas ei, tᵾn nga nimba koⱡpa, wote rut nimba oⱡa mba, Tipam nga ki mbo orunga moⱡpa, tᵾn nga atinga rondpa morum. Ei nga, wamp nam ti ndi, Got nga apᵾrpa titim wamp kᵾⱡ, kit muⱡeing nimba? 35 Kraist nga wamp numan ngui uⱡ ei, tᵾn kᵾn ronduⱡ mba petᵾm ei, wamp nam ti ndi, tᵾpa elpa elpa mundᵾmba? Mindil nui uⱡ ti ndi etmba, muna uⱡ mbun mindil pi, muna mbun ti uⱡ, muna kump kun kan pi uⱡ ei, muna kurpa nui uⱡ, muna wamp kui nga uⱡ ei muna el iti uⱡ ti ndi etangga! Tᵾn Kraist wak ruimin ei? Ei mon!

36 Ei nga, Buk Wingti ei ndi, nimba mel,

“Ui mbila nim nga nindpᵾn moⱡmina, tᵾn rok kunding pilik etmin. Tᵾn kng sipsip na ti, rok kunding pilik etmin ni mel etmin,” nitim.
37 Tᵾn numan ngurum wu ei nga ronduⱡ ila, tᵾn mbun orum mbila ronduⱡ mbun mormun. 38 Na ronduⱡ mundᵾp pᵾnt ei, nambuⱡ emel, wamp kui nga uⱡ ei kep, kont mba mul uⱡ ei kep, wote anggelo mbᵾ ndi kep, wu nuim ronduⱡ mat kep, akup ui monmun ei kep, wote omba ui ei kep, uⱡ ronduⱡ mat kep, wote mel oⱡa petᵾm mbᵾ kep, mana tetᵾm mbᵾ kep, wengᵾndᵾtᵾm uⱡ mbᵾ nga ti ndi kep, Got nga wamp numan ngui uⱡ ei, tᵾn nga Nuim Kraist Jisas kᵾn kandᵾp tᵾtmin. Uⱡ ei, mel ti ndi, tᵾpa elpa elpa mundᵾmba mel kapⱡa mon!

Copyright information for `MED