Titus 1

Pol Ndi, Taitas Mon Ropa Ngurum

Na Pol, Got nga kongun kindmant endᵾp, wote Jisas Kraist nga nombuⱡa rung wu mor ei ndi, mon ei rop ngunt. Got ndi, na mbi ropa tᵾpa mundrum ei, Got elim nga mbi ropa titim wamp mbᵾ nga mondpa pili orunga, etᵾp ronduⱡ mundᵾp, elim nga uⱡ kun kupa mbᵾ kandᵾk tᵾk, Got nga wamp mel muⱡing ei nga, na ndi, tᵾp ora nduimp. Got wu ik kol rui narᵾrᵾm ei ndi, unt muⱡ mᵾi raⱡ, iti nᵾtᵾtᵾm ei kᵾn, uⱡ nga kunt nga kont mul uⱡ ei, tᵾn nguimp nimba mi titim. Uⱡ kᵾⱡ, elim nga ui kai kᵾmp ropa itim ila, akup elim nga rᵾnang ik kai ila tᵾpa mot ndonᵾm. Uⱡ ei na ndi, kapⱡa itimp ei nga pilpa mbi ndupa, na neimp nilinga nᵾnt ei, Got tᵾn nga Etpa Ti Wu ei, elim ndi, ni nilinga, nᵾmp ekit ndunt.

Mon ei, Taitas kᵾn rop ngunt, nim na kᵾn mondpa pili orunga, numan tenda purum ei nga, nim na nga kang kupa ei. Got Wuta kᵾn, Jisas Kraist tᵾn nga Etpa Ti Wu ei ndi, nim moⱡpa kundi uⱡ mbᵾ kᵾn, wamp poⱡ ti uⱡ mbᵾ ngangga!

Taitas, Krit Kona Ila Kongun Itim

Na ndi, nim Krit kona ila mondᵾp kelip ur ei nambuⱡ emel, kongun mat kun pi nᵾpᵾrᵾm mbᵾ, tᵾkᵾn kun mundkᵾn itᵾn nᵾmp it. Wote, kona peng elpa elpa tetᵾm mbila, atinga manga rᵾp wu mat na ndi, unt nim man ngur ni mel iti. Rᵾp wu ei, wamp nga mong waⱡ ila uⱡ ⱡawa mat iti natᵾpa, amp tenda tᵾpa, wote elim nga kangambuⱡa mbᵾ, mondpa pili kangambuⱡa mbᵾ molk, ik tᵾk roi nduk, uⱡ kit mbᵾ iti natᵾk, kangambuⱡa kai mat muⱡeing. Got nga kongun rᵾp etmba wu ti, wamp nga mong waⱡ ila, uⱡ ⱡawa mat iti natᵾpa. Wote wu ei, popᵾⱡ tᵾkrᵾpa mundi namᵾndpa, nu ronduⱡ mat ou ndupa nomba, numan mbo pili napilpa iti nᵾtangga! Wote kng mel mbᵾ nga kum pendpa iti nᵾtangga. Rᵾp wu kandᵾk ting ei, wu ti wamp ki ngumba, uⱡ kai mbᵾ etpa, numan ingk pilpa, elim ndi, elim rᵾp etpa, nombuⱡa kun tem ila andpa, wamp nga mong waⱡ ila uⱡ kun kai mbᵾ itangga! Rᵾp wu ei, elim Rᵾnang Ik Kai ei, ronduⱡ mundpa ambuⱡpa, ik puⱡ pem mbila kun nimba itangga. I em uⱡ ei ndi, wamp mat ik kupa mbᵾ nga puⱡ petᵾm mbᵾ, mbo rundangina, pilik tᵾk pep rok, wote en enim nga uⱡ ⱡawa eng mbᵾ, pilik mbi nduk wak reing.

10 Ik nᵾnt ei, nambuⱡ emel, ik Got nga ik tᵾk roi nduk, roldᵾnga nᵾk, ik kol rok etmin wamp ei nga puⱡi mormin. Wamp mbᵾ ndi, wamp mat ik kil rok nguk tᵾk tiki pondurmᵾn. Ei, Jura wamp, kᵾng kupti wamp rᵾⱡaip kᵾⱡ ndi, puⱡ pendᵾk etmin. 11 Ik i etᵾk nitmin mbᵾ, mon nᵾi! Nambuⱡ emel, wamp mbᵾ, enim nga numan orunga ku moni ting ei nga mendpᵾⱡ pilik, wamp ik mbo rondurmin orunga omba kun pi napᵾⱡnga, wamp mbo tenda rᵾⱡaip ei nga, wamp puⱡi enimp kurmin. 12 Unt Krit mᵾi puⱡ wu mendpᵾⱡ ti, ik pai nui wu ei ndi, ik ti nitim ei ndi, nimba mel, “Krit wamp mbᵾ, ik kol nga puⱡ wamp mbᵾ, kng owa rakra mbᵾ mel kapⱡa, kongun iti natᵾk, rᵾng wal nok, wei mormin wamp mbᵾ,” nitim. 13 Ik i etpa nitim ik kᵾⱡ, omba kupa enim. Uⱡ puⱡ ila nga wamp mbᵾ ronduⱡ mundkᵾn ik mbo rundana, wamp mbᵾ nga mondpa pili orunga omba kun mba kai itangga. Wote, Jura wamp nga uⱡ unt nga pep rormin mbᵾ kᵾn, wamp nga mi ik mim etᵾk, ik kupa tᵾk pei mundᵾk etmin uⱡ mbᵾ, wak ruing ni! 15 Ei nga, wamp namin mat, numan orunga eng norum mbᵾ ndi, mel mbᵾ pora kai mint nᵾk pᵾtmᵾn. Wote, wamp namin mat, numan orunga kit moⱡnga, mundᵾk pili napᵾtmᵾn mbᵾ ndi, mel mbᵾ pora, eng nui nandᵾrᵾm nᵾk pᵾtmᵾn. Nambuⱡ emel, en enim nga numan orunga kᵾn pi nᵾpᵾtᵾm. 16 Wamp mbᵾ ndi, Got pᵾtmᵾn ning ei, wote enim nga ik nᵾk, nombuⱡa andᵾk rᵾng nok etmin uⱡ mbᵾ ndi, ora ndupa, mon nimba petᵾm. Wamp mbᵾ, numan ngui ngᵾngi. Wamp mbᵾ, ik tᵾk roi nduk molk, uⱡ mat mura mondᵾk iting mel, kapⱡa mon.

Copyright information for `MED